“Magayayya Kani Jehova Danuri Matunung”
SI DIANA ay maturu ngana tu 80 anios anna piga dagun nga narigi-rigatan. Nattaki tu Alzheimer’s disease i atawana anna naddian ta nursing home adde ta natay. Natay gapa i dua nga anana tapus inattammanna i taki nga breast cancer. Ngem, nu masingan na kakongregasionna si Diana ta Kingdom Hall onu ta ministerio, kanayun yayya nga magayayya.
Si John ay traveling overseer ta maturu 43 dagun. Kakayàna i kunnatun nga klase na serbisio—yatun i pattolena! Ngem, nagimmang yayya nga masserbi tatun nga pribilehio tapenu tangngawan i mataki nga parientesna, tapus massesserbi ngana sangawe ta lokal nga kongregasion. Nu masingan na dati ira nga kakilalana si John ta asembli onu ta kombension, gittana awan vuluvuga tu nanguli sa. Ari lagapa napakarianan i pagayayyana.
Ngatta posible lagapa kada Diana anni John nga magayayya? Kunnasi nga magayayya i tadday maski magatta-attam ta emosional anna pisikal? Kunnasi lagapa nga magayayya i tadday maski ari ngana nga masserbi ta pribilehio nga talaga tagibaloranna? Mabibbig ta Biblia: “Magayayya kani Jehova danuri matunung.” (Sal. 64:10, NW) Mas malippawa tam yaw nga importante nga kinakurug nu makannammuattam nu anni i makeyawa nittam tu monag nga pagayayya anna nu anni i ari.
PAGAYAYYA NGA TEMPORARIO
Siguradu nga ammum nga egga ira i gannug nga mamagayayya. Angngariganna, nonopan nu makkasal i lalaki anna babay nga makka-iddu. Kunne na gapa nu mabbalin tu magana onu mangalawa tu teokratiko nga pribilehio. Danatun nga gannug ay mamagayayya anna mepangngo laman, megafu ta danatun nga aspeto na pattolay ay naggafu kani Jehova. Yayya i maka-unnug ta pagatawa, kapeggan tu ána, anna nangiyawa tu annungan ira ta Cristiano nga kongregasion.—Gen. 2:18, 22; Sal. 127:3; 1 Tim. 3:1.
Ngem, temporario laman i karuan nga mamagayayya. Kaddaraddam, puede nga ari mattalupaddian nga matalo i tadday ta pagatawa onu matay. (Eze. 24:18; Os. 3:1) Ari sinuttul na karuan nga abbarabbing i maganada anna i Dios, onu puede nga nadisfellow paga lagu. Ari tu mepangngo i pinasserbi na ána ni Samuel kani Jehova, anna megafu ta kingngua ni David nangirattal yayya tu trahedia ta mismu nga familiana. (1 Sam. 8:1-3; 2 Sam. 12:11) Kaddaraddam anna kakkonsimision danatun. Siguradu nga ari mamagayayya nittam.
Kunne na gapa, nu mittan magimmang ittam nga masserbi ta pribilehio tam kani Jehova megafu ta taki onu panangngaw ta kafamilia tam, onu egga i panguli ta organisasion. Aminan na aru nga neparubang ta kunnatun nga panguloli nga ala-alegadda i pagayayya ta dati nga pribilehioda.
Masingattam nga i kunnatun nga rason para ta pagayayya ay ari kanayun nga mannanayun. Yayya nga egga paga kari i klase na pagayayya nga mattalupaddian maski paga narriga i pattolay? Siempre egga, megafu ta ari nawawan i pagayayya da Samuel, David, anna karuan paga maski nazziga-riga ira.
PAGAYAYYA NGA MANNANAYUN
Ammu ni Jesus i kurug nga pagayayya. Nigena minay ta davvun, kagian na Biblia nittam nga ‘magaya-ayayya si Jesus ta arubang ni Jehova ta ngamin nga tiempo.’ (Prov. 8:30) Ngem ta davvun, egga ira i tiempo nga neparubang yayya ta mariga ira nga situasion. Ngem, nagayayya lagapa si Jesus ta pangngua ta uray na Yamana. (Juan 4:34) Kunnasi gapa ta ultimo ira nga oras na pazziga-rigana? Mabibbig tam: “Megafu ta pagayaya nga maginnennag sa, inattamman na . . . i kappasiran nga kapapatay.” (Heb. 12:2) Yayya nga egga gafu i rasottam tapenu ikonsidera i dua nga komento ni Jesus meyannung ta kurug nga pagayayya.
Mittan, nanoli i 70 nga disipulosna kabalidda nga nallayyagayya. Magaya-ayayya ira megafu ta ngamin nga kingnguada, nappakamfag onu nappatavvar paga ira tu demonio. Ngem kinagi ni Jesus nira: “Ari kamu nga magayaya megafu ta tumulu nikamu i marakay ira nga espiritu, nu ari magayaya kamu megafu ta netura i ngaga-ngagan nu ta langi.” (Luc. 10:1-9, 17, 20) Wan, i mas importante anne ta kapeggan tu espesial nga pribilehio ay i kapeggan tu fabor ni Jehova. Siguradu nga daddammanna i matalo ira nga disipulos—rason tapenu mas magayayya.
Egga i tiempo nga turi ta maguvovug si Jesus ta arubang na aru nga totolay, nappabbaw i tadday nga babay nga Judio ta tudduna nga kinagina nga siguradu nga magayayya i yena ni Jesus nisa. Ngem kinorekta yayya ni Jesus anna kunna: “Danuri Luc. 11:27, 28) Magayayya nga ekspiriensa i pabbalin tu magana; ngem, i kapeggan tu relasion kani Jehova megafu ta pattuppal sa i mas mamagayayya.
i magginna anna mamarulo ta uvovug na Dios, ay ira i mapalag!” (Wan, i pakatageno ta fabor ni Jehova i sekreto ta kapeggan tu monag nga pagayayya. Maski paga ari nga makapagayayya i kapurueba ira, arian naw alsan i pagayayya tam. Kakuruganna, nu mattalupaddian ittam nga matalo maski mapuruebattam, mas mabbalin tu monag i pagayayya tam. (Roma 5:3-5) Kunne paga, iddan ni Jehova tu masanto nga espiritu danuri mattalo sa, anna pagayayya i tadday ta aspeto natun. (Gal. 5:22) Yayya nga malippawa tam nu ngatta kagian na Salmo 64:10, NW: “Magayayya kani Jehova danuri matunung.”
Anni i nakoffun kani John tapenu mannanayun i monag nga pagayayyana?
Yatun i rason nu ngatta da Diana anni John, nga nakagi ta gafu, ay napattalupaddiadda i mannanayun nga pagayayya turi ta neparubang ira ta mariga ira nga situasion. Kunni Diana: “Nakiyegu ngà kani Jehova, gittana abbing nga makiyegu ta maganana.” Kunnasida natageno i fabor na Dios? “Natageno ku nga binendisionannà tu abilidad nga tulu-tuloy nga mallayyagayya nga sigga-ayayya.” Anni i nakoffun kani John tapenu mattalupaddian nga magayayya anna okupadu ta ministerio nguri ta mawagna nga ibbattan i pribilehiona? Kunna: “Namegafu ta 1998 turi ta neyasayn ngà nga manuddu ta Ministerial Training School, mas nappursigi ngà nga nappersonal study anne tagga.” Niyesplikana nga mas alistu da dua na atawana nga nalawà i panguli megafu ta kanayun ira nga sigga-paran nga kuan i annungan nga iyayawa ni Jehova nira. Kunna paga: “Kingnguami yatun nga awan tu nabbabawyammi.”
Aru gapa i nakaekspiriensa nga kurug i kinagi na Salmo 64:10. Angngariganna, egga i magatawa nga nasserbi tu maturu 30 dagun ta Bethel ta United States. Tapus neyasayn ira bilang espesial nga payunir. Kakuruganna, kudda: “Natural laman i maddaddam nu mawanakka ta gannug nga kakayà mu,” ngem kudda paga: “Kammu mawag maddaddam tu mannanayun.” Ta paddattalda ta bagu nga asaymentda, insigida ira nga nakiparte ta pallayyagayya na kongregasion. Kunna magatawa: “Nakimallo kami meyannung ta espesipiko ira nga gannug. Tapus turi ta natabbag i pakimallomi ira, napagaram kami anna magaya-ayayya. Ari nabbayag namegafu ta paddattalmi, nappayunir i karuan ta kongregasion, anna nabendisionakkami tu dua nga progresibo nga Bible study.”
“MAGAYAYYA TA MANNANAYUN”
Siempre, ari kanayun nga alistu i magayayya. Egga ira tiempo nga marraddam ittam. Ngem, banna-bannayan ittam ni Jehova gukaban na uvovugna nga mabibbig ta Salmo 64:10 (NW). Maski nu madismaya ittam mittan, makapattalo ittam nga danuri mapakurugda nga “matunung ira” gukaban na pattalupaddian nga matalo maski ta manguloli nga sirkumstansiada ay “magayayya” kani Jehova. Iddanamattam paga sonu matuppal i nipromesa ni Jehova nga “bagu nga langa-langi anna bagu nga davvun.” Permanente noka nga mapawan i kina-imperfekto. Ngamin noka i totolay na Dios ay “masselebra anna magayayya ta mannanayun” ta ngamin nga kukukuan ni Jehova anna iyayawana.—Isa. 65:17, 18.
Imajinammu nu anni i kebalinanna: magayayya ta perfekto nga gawa-gawayyan anna masiki-sikan kadaggaw. Maski anni paga nga gannug ira i nesimmu ta nappasa nga nakaparraddam nittam, ariattam ngana noka nga matakitan tatun. Masiguradu tam nga “i dati ira nga ganna-gannug ay ari ngana nga meraddamman, onu maski paga mepafutu.” Masingattam uli i iddeddukattam megafu ta milagro nga paginnolay. Minillion i makatageno ta natageno na magana na 12 anios nga babay nga pinaginnolay ni Jesus: “Ay kuruga nappabbaw ira megafu ta nesimmu.” (Mar. 5:42) Sonu kua, mabbalin noka tu “matunung” ngamin nga totolay ta davvun anna “magayayya kani Jehova” ta mannanayun.