Nabibbig mu kari tu mapia i nappasa ira nga isyu na Passifusifutan? Innammu nu matabbag mu yaw ira nga pakkiavu:

Anni i nebase-Biblia nga ebidensia nga egga i empatia na Dios nittam?

Turi ta naaripan ta Ehipto i ili na Israel gari, ammu na Dios i ziga-rigada anna matagenona yatun. (Ex. 3:7; Isa. 63:9) Pinaratu ittam na Dios ta imahena, yatutta mepasingattam gapa i empatia. Egga empatiana nittam maski nu matageno tam nga ariattam mepangngo ta ayana.​—wp18.3, p. 8-9.

Kunnasi nga nakoffun i tuttuddu ni Jesus ta totolay tapenu affutan i pangireruma?

Aru nga Judio ta tiempo ni Jesus i mangireruma. Nipatalatto ni Cristo i pakawagan para ta kinapakalinno anna kinondenana i pappakatannang megafu ta lahi. Nipalippawana ta disipulosna nga imammatadda nakuan tu wawwaragi i kataggi-tadday.​—w18.06, p. 9-10.

Anni i magigiammu tam nu ngatta ari pinavulunan na Dios si Moises nga tullung ta Nepromesa nga Davvun?

Madukko i relasion ni Moises kani Jehova. (Deut. 34:10) Ta pangultimo na 40 dagun ta katanapan, narreklamo mana uli i magili gafu ta kawan na danum. Kinagi na Dios kani Moises nga kiyuvovuganna i dakal nga batu. Ngem, pinalu ni Moises i dakal nga batu. Awayyana nga napporay si Jehova megafu ta ari sinuttul ni Moises i instruksionna onu megafu ta arianna nidayaw i Dios tatun nga milagro. (Num. 20:6-12) Ituddu nakuan nittam naw i importansia na pattuppal kani Jehova anna pangidayaw nisa.​— w18.07, p. 13-14.

Kunnasi ittam alistu nga makaliwa nu mangukum ittam base laman ta masingan?

Egga i tallu nga aspeto nu sitaw maruddu nga mainfluwensian i totolay na masingadda: lahi, estado na pattolay, anna edad. Importante nga innattam i tanakuan segun ta ari mangireruma nga paningan na Dios! (King. 10:34, 35)​—w18.08, p. 8-12.

Anni ira i makua danuri lakay ira nga Cristiano tapenu makoffun ta tanakuan?

Maski i lakay nga Cristiano nga nanguli i asaymentna ay tagibaloran lagapa na Dios anna aru i meyuffunna ta tanakuan. Awayyana nga uffunan i ari-Saksi nga atawa na wagi anna i inaktibo ira, mangikondukta tu paggigiammu tu Biblia, anna palawan i ministeriona.​—w18.09, p. 8-11.

Anni ira i naddian na Teaching Toolbox na Cristiano ira?

Egga ira i contact card anna imbitasion. Nelagum gapa i walu nga tract kunne gapa i magazina nga Passifusifutan anna Malukag! Kasali gapa ta toolbox i karuan nga brosiur, dua nga libru nga meyusa ta paggigiammu, anna appa nga video, nelagum i Ngatta Gigiammuammu i Biblia?​—w18.10, p. 16.

Kunnasi nga ‘gatangan i kinakurug’ na tadday nga Cristiano gitta na nepagaram ta Proverbio 23:23?

Kattam mawag i kuartu tapenu gatangan i kinakurug. Ngem, mawag i tiempo anna pappursigi tapenu mala yatun.​—w18.11, p. 4.

Anni i magigiammu tam ta pinakilallang ni Oseas ta atawana nga si Gomer?

Namippiga nga nakidallaw si Gomer, ngem pinakoma yayya ni Oseas anna arianna lagapa pinangultimo i pagatawada. Nu nakaliwa tu seksual nga imoralidad i Cristiano nga atawa, awayya gapa nga mamakoma i inosente nga atawa. Ngem nu i tadday nga inosente nga atawa ay egga i seksual uli nga pattaddeda ta nakaliwa nga atawana, makansela i nebase-Biblia nga basehan nakuan na diborsio.​—w18.12, p. 13.