1, 2. Nu mappili tu addetan ta pattolay, ngatta masirib nu magginna ittam ta Namaratu nittam? (Innan i letratu ira ta gafu na artikulo.)

NU KABATAAN ka, siguradu nga aru i manabarang nikaw ta mappange mu. Awayyana nga pagaramman naka na mestru, guidance counselor, onu na tanakuan tapenu manga tu atannang nga edukasion anna trabahu nga atannang i suelduna. Ngem tanakuan i tabarang nikaw ni Jehova. Siguradu nga kayàna nga mallallappo ka durante nga magiskuela ka tapenu egga noka i pattolayammu kabalimmu maggradua. (Col. 3:23) Ngem nu mappili ka tu prayoridad ta pattolay, pagaramman naka nga mappegiya ta masirib ira nga prinsipio anna ikonsidera tam i gakkagna anna i urena durante ta tiempo na panuppalan.​—Mat. 24:14.

² Daddamman gapa nga ammu ni Jehova i ngamin nga mesissimmu megafu ta ammuna i pappangetan na mundo anna ammuna nga aranni ngana nga madaral yatun. (Isa. 46:10; Mat. 24:3, 36) Ammuna ittam​—nu anni i mangiyawa nittam tu kurug nga pakkakontentu anna pagayayya kunne na gapa nu anni i makadismaya anna makaparraddam nittam. Yayya nga, maski gittana rasonable i tabarang na tolay, nu arianna nga nikonsidera i Uvovug  na Dios, ari vuluvuga nga masirib yatun.​—Prov. 19:21.

3, 4. Anni i efekto na marake nga tabarang kada Adan anni Eva tuange ta gaka-gakada?

³ Ta ollu pagalaman nga historia na tolay, namegafu i marake nga tabarang nguri ta siminallung si Satanas ta eksena. Kinagi natun na arogante anna maguroray nga gumattabarang kani Eva nga yayya anna i atawana ay mas magayayya nu ira lagapa i mappili ta klase na pattoleda. (Gen. 3:1-6) Ngem i kakuruganna, makasarili i motibo ira ni Satanas. Kayàna para kada Adan anni Eva tuange ta mappange nga gaka-gakada nga makimoray anna maddayaw ta nisa imbes nga kani Jehova. Ngem anni ngana kari i kingnguana para nira? Si Jehova i nangiyawa ta ngamin nga egga nira​—i kataggi-tadday nira, i makakkasta nga hardin nga paddianadda, anna i perfekto nga baggida nga egga i tiansada nga mattolay ta mannanayun.

⁴ Kaddaraddam, ari sinuttul da Adan anni Eva i Dios, nga nisinada i baggida ta nisa. Gitta na ammum, marake i nattuppalan natun. Megitta ira ta lappaw nga nesina ta funna, sisinu ngana nga makkatang anna matay. Nazziga-riga gapa i ánada gafu ta liwa. (Roma 5:12) Maski paga kunna, aru lagapa nga totolay i pinilida nga ari makimoray ta Dios. Mas gustuda nga mattolay segun ta kayàda lagapa. (Efe. 2:1-3) Manawag nga ipasingan na nesimmu ira nga “awan tu sirib . . . nu kumontra kani Jehova.”​—Prov. 21:30.

5. Ta anni makasiguradu i Dios ta pinaratuna nga totolay, anna ngatta?

⁵ Ngem siguradu si Jehova nga i karuan, nelagum ngana i matalikarag ira nga kabataan ay alegadda anna passerbiadda yayya. (Sal. 103:17, 18; 110:3) Kuruga tagibaloranna danatun nga kabataan! Tadday ka kari nira? Nu kunna, siguradu nga aru nga “gannug ira nga mapia” nga naggafu ta Dios i talaga mamagayayya nikaw. (Bibbigan i Salmo 103:5; Prov. 10:22) Kagitta na magigiammu tam, nelagum ta “gannug ira nga mapia” i abundansia nga masingngo nga espiritual nga makan, kapianan nga klase na kokkofun, makasta ira nga addetan, anna kurug nga kapalubbang.

6. Ngatta pannuammu nakuan i espiritual nga pakawagammu, anna kunnasi nga iyayawa ni Jehova yatun nikaw?

⁶ Ari tu gitta na aya-ayam, egga i espiritual nga pakawagammu, nga i Namaratu laman nikaw i puede nga mamannu. (Mat. 4:4) Nu sigga-appresia ka nga magginna sa, mapeggakka tu pakalippawa, sirib, anna pagayayya. “Magayayya danuri sigga-nono ta espiritual nga kawagadda,” kunni Jesus. (Mat. 5:3, NW) Pannuan na Dios i espiritual nga pakawagammu gukaban na Uvovugna anna abundansia nga espiritual nga makan nga iyayawa na “mekatalo anna nannono nga doroban.” (Mat. 24:45) Kuruga nadduruma anna napakaru yatun nga makan!​—Isa. 65:13, 14.

7. Anni ira i benefisio nga mala mu ta espiritual nga makan nga iyayawa na Dios?

⁷ Iddan naka na espiritual nga makan nga iyayawa na Dios tu sirib anna abilidad nga mannono, nga mapprotekta nikaw ta napakaru nga gannug. (Bibbigan i Proverbio 2:10-14.) Angngariganna, danaw nga kualidad i makoffun nikaw tapenu makannammuan i falsu nga tuttuddu, gitta na pangurug nga awan tu Namaratu. Maprotektaddaka kontra ta kinaladdug nga i kuartu anna kinariku i sekreto na pagayayya. Moffunan naka paga nga marekunnisi anna melilli ta marake nga pakkaraga anna makadaral ta baggi nga ugu-ugali. Yari ta itulu-tuloy i pagaleg ta makadios nga sirib anna abilidad nga mannono, nga imammatan danatun nga minas! Durante nga mapeggakka tu kunnatun nga nabalor ira nga kualidad, maekspiriensam nga iddeddukan  naka ni Jehova anna kayàna i kapianan para nikaw.​—Sal. 34:8; Isa. 48:17, 18.

8. Kunnasi ka mabenefisiowan ta mappange nu maddukko ka ta Dios sangawe?

⁸ Ari ngana mabbayag, madaral noka i ngamin nga parte na mundo ni Satanas, anna si Jehova laman i makapapprotekta nittam. Kakuruganna, duttal noka i tiempo nga maddepende ittam laman sa maski ta tumunug nga kanattam! (Hab. 3:2, 12-19) Wan, sangawe ngana i tiempo nga mapeggan tu madukko nga relasion ta nelangitan nga Yama anna patuyaggan i pattalo mu sa. (2 Ped. 2:9) Nu kunnatun i kuammu, maski anni i mesimmu ta pallevu mu, matageno mu i gitta na natageno ni salmista David nga nattura: “Ammù tu kanayun nga kavulu ku i YAFU; aranni yaya, ay awan tu pakavurungak-ku.”​—Sal. 16:8.

9. (a) Segun ta Juan 6:44, anni i kuan ni Jehova? (b) Anni i nerumu-ruma nu egga i bagu ira nga makilalam nga Saksi?

⁹ Iyaranni ni Jehova danuri ipamavulunna nga mabbalin tu miembro na espiritual nga familiana anna masippo nga iyarannina i tadday ta kurug nga paddayaw. (Bibbigan i Juan 6:44.) Nu egga i bagu nga makilalam nga ariammu kapangngurug, anni i ammum meyannung tatun nga tolay? Fuera ta ngagan anna itchurana, awayyana nga apenas laman. Ngem ari tu kunnatun nu egga i bagu nga makilalam nga ammammuna anna ayatanna si Jehova. Maski paga yatun nga tolay ay tanakuan i naggafuan, nasion, tribu, onu kulturana, aru ngana i ammum meyannung sa anna aru ngana gapa i ammuna meyannung nikaw!

10, 11. Anni i papparehuan na ili ni Jehova, anna kunnasi ittam mabenefisiowan tatun?

¹⁰ Angngariganna, alistum laman marekunnisi i “lengguahe” nu dua​—i “marenu nga lengguahe” na kinakurug. (Zef. 3:9) Bilang resulta, ammunu ngana i kuru-kurugan na kataggi-tadday meyannung ta Dios, moral ira nga estandarte, iddanama ta mappange, anna karuan paga. Kakuruganna, danatun i pinaka-importante nga gannug nga mammuan meyannung ta tadday nga tolay, gannug ira nga mangiyawa tu komfiansa anna pattalo. Danaw i mangiyawa tu fundasion na makasta anna mannanayun nga pakkorofun.

¹¹ Yari tu nu maddayaw ka kani Jehova, talaga makagim nga egga nikaw i kapianan nga klase na kokkofun. Egga ira i kokkofummu ta interu mundo, maski kammu paga ira  nakilala ngamin! Egga kari i ammum, fuera ta ili ni Jehova, nga magayayya taw nga nabalor nga regalu?

12. Anni ira i makasta nga espiritual nga addetan i puedem nga gawatan?

¹² Bibbigan i Eclesiastes 11:9–12:1. Egga kari i gawa-gawatammu nga tadday onu mas aru nga espiritual nga addetan? Awayyana nga mappuppursigi ka nga mabbibbig tu Biblia kada aggaw. Onu kayà mu paga pakastan i abilidad mu nga maguvovug anna manuddu. Anni laman danatun, nu egga i masingammu nga positibo ira nga resulta​—onu masingan yatun na tanakuan anna komendaddaka—anni matageno mu? Siguradu nga matageno mu nga egga netuppal mu anna magayayya ka. Ngatta? Megafu ta kukukuammu i kayà ni Jehova nikaw, kagitta ni Jesus.​—Sal. 40:8; Prov. 27:11.

13. Kumpara ta sekular ira nga addetan, ngatta espesial anna nerumu-ruma i passerbi ta Dios?

¹³ Nu maffokus ta espiritual ira nga addetan, kukukuammu i trabahu nga talaga makapagayayya gafu ta kuruga makabenefisio yatun. Nitura ni apostol Pablo: “Pakaladdan nu anna arian nu nga ibbattan i angngurug nu. Mallallappo kamu nga kanayun ta trabahu nu nga masserbi ta Yafu, ta ammu nu gammabba tu agga-mavvunga ngamin i passerbi nu sa.” (1 Cor. 15:58) Nu ikumpara, i pattolay nga nakasentro ta sekular nga ambision anna pakkaraga​—maski danaw ay gittana makapagayayya​—ay ta kakuruganna ari nga pammakapianan ta pattolay. (Luc. 9:25) Egga i tadday nga namakurug tatun ta baggina​—anna ta nittam​—si Patul Solomon.​—Roma 15:4.

14. Anni i magigiammum ta pinageksperimento ni Solomon ta pappaga-pagayayya?

¹⁴ Pinegafuanan na kuruga mariku anna makapangngua nga si Solomon i mageksperimento tapenu ‘purueban i mappaga-pagayayya anna innan nu egga mapia nga mesimmu.’ (Ecl. 2:1-10) Namataddag yayya tu babalay, naddisenio tu hardin anna parke ira, anna kingnguana i ngamin nga kayàna. Anni i natagenona kabalin natun? Malanna-lanno? Magayayya? Kontentu? Kattam mawag nga lavvunan. Kinagi mismu ni Solomon ta nittam. Niturana: “Turi ta innakku i ngamin nga trabahu nga nakua na mismu nga limi-limà . . . , nasingakku nga awan tu kwenta ngamin natun . . . Awan vuluvuga tu kurug nga nabalor.” (Ecl. 2:11) Anni na mabba i kastana nga leksion! Masirib mu kari nga ipafutu yatun?

15. Ngatta importante i pangurug, anna anni i benefisiona ira, gitta na mabibbig ta Salmo 32:8?

¹⁵ Manaki ni Jehova nga matakitakka labbi nige mu makagigiammu tu leksion ta pattolay. Siempre, mawag mu i pangurug tapenu tuttulan i Dios anna pagolluan i urena ta pattolem. I kunna nga pangurug ay kuruga nabalor, anna ari vuluvuga makadismaya. Wan, ari vuluvuga nga kattaman ni Jehova “i pangaya nu sa, nga nipasingan nu.” (Heb. 6:10) Yari tu mappursigi tapenu mapeggan tu matuyag nga pangurug, anna masingammu mismu nga sigga-nono i nelangitan nga Yamam ta pammakapianammu.​—Bibbigan i Salmo 32:8.

16. Ngatta tagibalorattam nakuan i kapalubbang anna masirib nga usan yatun?

¹⁶ “Nu sitaw i dian na Espiritu na Yafu, egga i kapalubbang,” kunni Pablo. (2 Cor. 3:17) Fustu, ayatan ni Jehova i kapalubbang, anna nipena yatun nga aya ta futum. Ngem, kayàna gapa nga responsable i pangusam ta kapalubbammu, para ta proteksiommu. Awayyana nga egga ira i kilalam nga kabataan nga maggiraw tu pornograpia onu magaggangngua tu seksual nga imoralidad, makisali ta delikadu nga isports, onu mangabuso ta droga anna alkohol. Kakuruganna, puede  nga temporario nga magenjoy onu magayayya ira. Ngem kanayun nga marresulta yatun ta dakal nga perwisio, gitta na taki, adiksion, onu patay paga lagu. (Gal. 6:7, 8) Abbo na kabataan nga magaggangngua tu kuddanatun nga gannug nga egga i kapalubbadda, ngem ta kakuruganna awan.​—Tito 3:3.

17, 18. (a) Kunnasi nga mamalubbang i pattuppal ta Dios? (b) Ikumpara i nadduman na kapalubbang nga naekspiriensa ta gafu da Adan anni Eva ta kapalubbang na totolay ta maddaggun?

¹⁷ Bilang pangikumpara, piga i kilalam nga nattaki gafu ta sinuttulda i estandarte ira na Biblia? Manawag nga parehu nga makasta anna mamalubbang i pattuppal kani Jehova. (Sal. 19:7-11) Fuera paga tatun, nu usammu tu masirib i kapalubbammu​—nga ari massobra ta limitasion na perfekto nga dorob anna prinsipio na Dios​—ipasingammu ta Dios tuange ta magana mu, nga mepangngo ka ta mas aru nga kapalubbang. Kakuruganna, gakkag na Dios nga iddan tu perfekto nga kapalubbang i matalo ira nga aripanna, nga natukoy ta Biblia bilang “makapabbaw nga kapalubbang na ána na Dios.”​—Roma 8:21.

¹⁸ Nasissiman da Adan anni Eva i kunnatun nga kapalubbang. Ta hardin na Eden, piga kari nga restriksion i niyawa na Dios nira? Tadday laman. Ariadda puede kanan i vunga na tadday nga kayu. (Gen. 2:9, 17) Ikonsideram kari yatun nga tattadday nga restriksion bilang pangiyetu onu panattazzi? Siempre ari! Ikumparam yatun ta napakaru nga pinadday na tolay tu dorob nga fuersadu nga gigiammuan anna tuttulan na totolay.

19. Kunnasi ittam natudduan nga mabbalin tu napalubbangan nga totolay?

¹⁹ Masirib nga makilallang si Jehova ta aripanna ira. Imbes nga iddanna ittam tu napakaru nga dorob, pasensianna ittam nga tudduan tapenu tuttulan i dob na aya. Kayàna nga mattolay ittam segun ta nadiosan ira nga prinsipio anna pallikuran i marake. (Roma 12:9) I Sermon ta Vukig ni Jesus i makakkasta nga angngarigan natun nga tuddu, megafu ta palawananna i gamu na pattagaruli. (Mat. 5:27, 28) Bilang Patul na Pappatulan na Dios, itulu-tuloy noka ni Cristo nga tudduan ittam ta napabagu nga mundo tapenu perfekto nga maparigattam i pagimammana ta kinatunung anna ta kinamarake. (Heb. 1:9) Pabbalinanna gapa ittam nga perfekto ta pisikal anna ta mental. Imajinammu, kattam ngana noka matenta nga mangngua tu marake onu maekspiriensa i marake ira nga resulta na liwa. Ta pangultimuanna, magayayya ka noka “ta makapabbaw nga kapalubbang” nga nipromesa ni Jehova nikaw.

20. (a) Kunnasi usu-usan ni Jehova i kapalubbanna? (b) Kunnasi ka mabenefisiowan ta ehemplo na Dios?

²⁰ Siempre, i kapalubbattam ay kanayun nga egga i limitasionna. Igiya yatun na aya ta Dios anna ta kasittoletam. Kakuruganna, ikaya laman ni Jehova nga parigattam yayya. Awan tu limitasion na kapalubbanna; ngem, pinilina nga mappegiya ta aya ta pakilallanna ta intelihente nga pinaratuna. (1 Juan 4:7, 8) Rasonable gafu nga nonopan nga mabbalin laman tu kurug i kapalubbattam nu parigattam i Dios.

21. (a) Anni i natageno ni David meyannung kani Jehova? (b) Anni i ikonsidera tam ta tumunug nga artikulo?

²¹ Appresiammu kari i “gannug ira nga mapia” nga niyawa ni Jehova nikaw, gitta na abundansia nga espiritual nga makan, kapianan nga kokkofun, kakastan ira nga addetan, anna i iddanama na perfekto nga kapalubbang? (Sal. 103:5) Nu wan, paray nakuan nga makagim i napafutuan nga pakimallo nga mabibbig ta Salmo 16:11: “Sikaw i mangipasingan niakan ta dalan nga mattuppal ta inango; i keggam i mamannu niakan ta pagayaya anna mangiyawa ta awan tu panuppalan na nga palupagia.” Magigiammu ta tumunug nga artikulo i karuan nga espiritual nga minas gitta na malegan ta meka-16 na Salmo. Mas paga nga ipakanawag danatun i sekreto ta kurug nga makapagayayya nga pattolay.