Ipammakatalomu Yaw nga Ganna-gannug ta Mapammakatalakkan nga Totolay
“I naginnam ira nga nituttuddù . . . ay ituddum ta totolay ira nga pammakatalakkan tapenu awayya da gapa nga ituddu ta karuan.”—2 TIM. 2:2.
KANSION: 123, 53
1, 2. Anni i pagimamma na aru nga totolay ta trabahuda?
MARUDDU nga mammammu i totolay depende ta trabahuda. Mangurug i aru nga nakabase i balor na tadday nga tolay ta trabahu onu ta posisionna. Ta karuan nga kultura, nu kannammuammu i tanakuan nga tolay, tadday ta ollu nga mepakkiavu ay “Anni i klase na trabahum?”
2 Nu mittan tukuyan na Biblia i totolay segun ta trabahuda. Nekagi si “Mateo nga gumattuki tu vugi”; si “Simon nga minakkurti”; anna si ‘Lucas, i ideddukan nga doktor.’ (Mat. 10:3; King 10:6; Col. 4:14) Makilala gapa i totolay megafu ta espiritual nga asayment onu pribilehioda ira. Mabibbig tam i meyannung kani Patul David, si profeta Elias, anna si apostol Pablo. Tinagibalor danaw nga totolay i niyawa na Dios nira nga asayment. Nu egga pribilehio tam ta passerbi, tagibalorattam nakuan gapa yatun ira.
3. Ngatta mawag tu sanayan na mannakam i mabbing ira? (Innan i letratu ta gafu na artikulo.)
3 Ideddukan na aru nittam i trabahu tam anna kayà tam nga ari nakuan mangultimo yatun nga kukukuattam. Kaddaraddam ta mamegafu ta tiempo ni Adan, mallakay i kada henerasion tapus matalianan tu tanakuan. (Ecl. 1:4) Ta kapappasa ira nga tiempo, neparubang ta bagu ira nga kapurueba i Cristiano megafu tatun nga panguloli. Ziminakal i sakup anna mas narriga i trabahu na aripan ira ni Jehova. Durante nga kuattam i bagu ira nga proyekto, egga ira bagu nga metodo ta pangngua tu ganna-gannug—maruddu nga mangusa tu teknolohia nga mabi laman nga manguloli. Awayyana tu marigatan i karuan nga mannakam nga makiggiddang taw ira nga papprogreso. (Luc. 5:39) Normal gapa nga mapakarianan i sikan anna enerhia na totolay durante nga mammanakam ira. (Prov. 20:29) Yatutta, makasta anna praktikal para ta mannakam nga sanayan i mabbing ira para ta mas dakal nga responsibilidad.—Bibbigan i Salmo 71:18.
4. Ngatta marigatan i karuan nga ipammakatalo i autoridadda? (Innan i kahon nga “ Nu Ngatta Manakî na Karuan i Mangitalò.”)
4 Baka marigatan danuri egga autoridadna nga ipammakatalo ta mabbing ira i ganna-gannug. Maganassing i karuan nga mawawadda i tagibaloradda nga posision. Mavurung gapa i karuan nga mawawan ira tu kontrol, anna mangurug ira nga ari tu kasi-kalalakida i mabbing ira. Irason gapa na karuan nga awan tu tiempoda nga sanayan i tanakuan. Para gapa ta mabbing ira, mawag tu ibitada i mawanan tu pasensia nu awan tu meyawa nira nga ammung nga responsibilidad.
5. Anni ira nga pakkiavu i magigiammu taw nga artikulo?
5 Innattam i dua nga anggulo na pangipammakatalò. Ollu, kunnasi nga moffunan na mannakam i mabbing ira nga mangiyabaga tu mas dakal nga responsibilidad, anna ngatta importante yatun? (2 Tim. 2:2) Mekadua, ngatta kanayun nakuan nga makasta i pagimamma na mabbing ira durante nga uffunadda i brother ira nga mas ekspiriensadu anna makagigiammu nira? Pagolluattam nga innan nu kunnasi nga niprepara ni Patul David i anana nga mangattu tu importante nga trabahu.
NIPREPARA ANNA SINUPORTAN NI DAVID SI SOLOMON
6. Anni i kayà nga kuan ni David, anna kunnasi nga simibbag si Jehova?
6 Kabalin na piga ragun nga pinattagu ni David, nabbalin yaya nga patul tapus naddian ta komportable nga balay. Nadismaya yaya megafu ta awan tu “balay,” onu templo nga nededika para kani Jehova, yatutta kayàna nga mangipattaddag. Kinagina gafu 1 Cro. 17:1-4, 8, 11, 12; 29:1.
kani profeta Natan: “Hawe ngà nga maddian ta balay nga napadday ta sedro ira durante nga i arka na pakkasinabban ni Jehova ay egga ta tela ira nga tolda.” Kunni profeta Natan: “Kuammu nu anni i egga ta futum, megafu ta egga nikaw i kurug nga Dios.” Ngem tanakuan i kagian ni Jehova. Nipekagina kani David gukaban ni Natan: “Ari tu sikaw i mamataddag tu balay nga paddianakku.” Maski nu meddu nga nipasiguradu ni Jehova kani David i tulu-tuloy nga bendisionna, nidobna nga i ana ni David nga si Solomon i mangngua tu templo. Anni i reaksion ni David?—7. Anni i reaksion ni David ta kinagi ni Jehova?
7 Ari nga niyetu ni David i suportana anna ari yaya navurung nga ari meyawa sa i dayaw ta pappataddag tu templo. Kakuruganna, nabbalin tu templo ni Solomon yatun, ari tu kani David. Maski nu awayyana nga nadismaya si David megafu ta arianna makua i pakkaraga na futuna, buu i suportana ta proyekto. Insigida nga nagorganisa yaya tu grupo na totolay nga mattrabahu anna nagunnug yaya tu balayang, tubbaga, pira, anna vulawan, kunne na gapa i kayu ira nga sedro. Pinagaramna paga si Solomon, nga kunna: “Yatutta ana ku, egga nakuan si Jehova nikaw, anna paray nakuan tu mavviktoria ka anna ipataddag i balay ni Jehova nga Diosmu, gittana kinagina meyannung nikaw.”—1 Cro. 22:11, 14-16.
8. Anni i posible nga manono ni David meyannung kani Solomon, ngem anni i kingnguana?
8 Bibbigan i 1 Cronicas 22:5. Posible nga manono ni David nga ari tu kualipikadu nga mangiyorollu si Solomon tatun nga dakal nga trabahu. Ta kakuruganna, mabbalin tu “kuruga kekkasta” i templo ngem si Solomon tatun nga tiempo ay “mabbing paga anna awan tu ekspiriensana.” Ngem ammu ni David nga uffunan ni Jehova si Solomon tapenu makuana i trabahu nga neyawa sa. Naffokus gafu si David ta makuana tapenu makaduffun, anna nangiprepara yaya tu napakaru nga materiales.
MAGAYAYA TA PASSANAY TA TANAKUAN
Makapagayaya nga innan i mas abbing nga lallaki nga meddan tu mas aru nga responsibilidad (Innan i parapo 9)
9. Ngatta magayaya i mannakam nga ipeyabaga ta mabbing ira i responsibilidad? Iyilustra.
9 Ari nakuan nga makkafi i nono na mannakam nu kawagan nga mepammakatalo ta mabbing ira i pribilehioda ira. Imbes tu kunnatun, mas makkasta i trabahuda nu masanay i mabbing ira nga iyabaga i responsibilidad ira. Mas dakal nakuan i pagayaya na elder ira nu mabbalin tu kualipikadu i sinanayda ira nga mabbing nga kuan i asayment ira. Tapenu meyilustra, nonopammu i tadday nga yama nga manuddu ta anana nga mammaneho. Nguri ta abbing paga i anana, gigirawanna laman i yamana. Turi ta magadulto ngana i abbing, mas iyesplika ngana na yama nu anni i kukukuanna. Tapus nu ari ngana tu menor-de-edad i abbing, awayyana tu puruebanna nga manehuan i takay durante nga igiya yaya na yamana. Nu mittan, baka puede nga makkinna-tubba ira nga mammaneho, ngem sonu kua, baka puru i ana ngana i mammaneho onu talaga yaya ngana laman i mangimaneho megafu ta lakay ngana i yamana. Magayaya i yama nga makasingan ta anana nga natudduan ngana anna arianna matageno nga yaya nakuan lagapa i mammaneho. Kunnatun gapa i ayaya na mannakam
ira nu sanayadda i mabbing ira nga iyabaga i mas aru ira nga responsibilidad.10. Anni i pagimamma ni Moises ta dayaw anna autoridad?
10 Bilang mannakam, ibita tam nakuan i passil. Innammu nu anni i reaksion ni Moises turi ta egga i karuan ta kampu na Israel nga namegafu nga magguyu gittana profeta ira. (Bibbigan i Numeros 11:24-29.) Kayà ni Josue, nga kaduffun ni Moises, nga fugaddan ira. Siguradu nga nanonona nga mapakarianadda i kinaprominente anna autoridad ni Moises. Ngem kunni Moises: “Mamassil kamu kari para niakan? Ari, karagatakku tu ngamin nga totolay ni Jehova ay profeta gapa anna iyawa ni Jehova i espirituna nira!” Ammu ni Moises nga si Jehova i mangidirekta ta trabahu. Imbes nga apanna i dayaw para ta baggina, nikagina i pakkaraga nga kunnatun gapa nakuan nga espiritual nga regalu i malawà na ngamin nga aripan ni Jehova. Gitta ni Moises, magayaya tam kari gapa nu makalawa tu pribilehio ira i tanakuan?
11. Anni i makagi na tadday nga brother ta pangipammakatalò ta trabahuna?
11 Ta kaggawattam, aru i ehemplo na wawwaragi nga lalaki nga malallappo nga nattrabahu ta piga nga dekada anna nassanay ta tanakuan nga mapeggan tu mas aru nga responsibilidad. Angngariganna, egga tadday nga brother nga mangngagan tu Peter nga ta maturu tu 74 dagun ta ngamin-tiempo nga serbisio, 35 nga dagun i pinasserbina ta panga nga ofisina ta Europa. Nabayag nga tiempo nga yaya i overseer ta Service Department. Ngem si Paul ngana nga mas mabbing nga nakipattrabahu kani Peter tu piga nga ragun i maddaggun nga overseer. Turi ta neyavu kani Peter nu anni makagina ta panguli nga asaymentna, kunna: “Fermi ayaya ku nga egga ira brother nga nasanay tapenu alawatan i mas aru nga responsibilidad anna malalaki ta trabahuda.”
TAGIBALORAN I LALLAKAY ANNA BABBAKO TA NALLATANATTAM
12. Anni i magigiammu tam ta rekord na Biblia meyannung kani Rehoboam?
12 Ta patay ni Solomon, nappatul i anana nga si Rehoboam. Turi ta kawagan ni Rehoboam i tabarang nu kunnasi nga tangngallan i responsibilidadna ira, ollu nga kiniddona i tabarang na mannakam. Ngem arianna gininna i tabaradda! Kingnguanna lallagu i tabarang na mabbing ira nga kakontemporariona anna kaduffunna ira. Talaga kaddaraddam i resultana ira. (2 Cro. 10:6-11, 19) Anni i leksion? Masirib nga kiddawan anna memmugug nga ikonsidera i tabarang na mannakam anna ekspiriensadu ira. Maski nu ari gapa nga igalu na mabbing ira i baggida ta nappasa ira nga metodo na pangngua tu ganna-gannug, ariadda nakuan nga insigida nga balewalaan i tabarang na mannakam.
13. Kunnasi nga makikoopera i mas mabbing ira nga brother ta mannakam?
13 Egga ira mas mabbing nga brother nga mangasikasu ngana ta aktibidad nga pakipartisipan na mannakam nga brother. Maski nu nanguli ngana i papel danatun nga mas mabbing, mabenefisiowan lagapa ira ta ekspiriensa na mannakam nigeda nga mangngua tu desision ira. Si Paul nga nakagi ta nappasa nga parapo, nga nanali kani Peter bilang overseer na tadday nga departamento ta Bethel, kunna, “Niddakku tu tiempo nga ginnan i tabarang ni Peter, anna pinagaram ku i tanakuan ta departamento nga kunnatun gapa nakuan i kuadda.”
14. Anni i magigiammu tam ta kooperasion ta nallatanan ni Timoteo anna ni apostol Pablo?
14 Si Timoteo nga mas abbing ay nakipattrabahu kani Pablo ta aru nga dagun. (Bibbigan i Filipos 2:20-22.) Nitura ni Pablo ta taga-Corinto ira: “Dobak-ku nikamu si Timoteo nga iddeddukak-ku anna pammakatalakkak-ku nga ana gafu ta Yafu. Yaya i mangiparaddam nikamu ta bagu nga attolè ta ketadday kani Cristo. Yaw i ituddù ta ngamin nga iglesia ta maski sitaw nga lugar.” (1 Cor. 4:17) Pakuruganna yaw nga madukko i relasion da Pablo anna Timoteo. Niddan ni Pablo tu tiempo nga sanayan si Timoteo ta ‘bagu nga attolena [“metodona ira,” NW] ta ketadday kani Cristo.’ Malalaki nga nagigiammu ni Timoteo yatun anna nalàna i pagiddu ni Pablo. Mattalo si Pablo nga tangngallan ni Timoteo i espiritual ira nga kawagan danuri na taga-Corinto. Makasta nga ehemplo yatun nga parigan na elder ira ta kaggawattam durante nga sanayadda i tanakuan nga lallaki ta pangiyorollu ta kongregasion!
EGGA I IMPORTANTE NGA PAPEL NA KATAGGI-TADDAY NITTAM
15. Kunnasi nakuan nga makoffun nittam i tabarang ni Pablo ta Cristiano ira ta Roma nu afektadu ittam na panguloli?
15 Egga tam ngana ta kappabbaw ira nga tiempo. Tulu-tuloy nga dumakal i neravvunan nga parte na organisasion ni Jehova ta nadduruma nga aspeto yatutta kawagan i panguloli ira. Durante nga mafektan ittam natun nga panguloli ira, mapakalinno tam nakuan, nga maffokus ta interes ira ni Jehova, ari nga ta baggi tam laman. Makoffun yatun tapenu mapeggan tu pattaradday. Para ta Cristiano ira ta Roma, nitura ni Pablo: “Kiddawak-ku ta kataggi-tadday nikamu: arian nu nga ikwenta i baggi nu tu mas atannang anne ta appana-panono, anna usitakkan nu i baggi nu segun ta kadakal na angngurug nga niyawa na Dios nikamu. I baggi ay aru i parte na, anna madduma-ruma i keyusan na kada tadday nga parte; ay kunnatun ittam gapa. Maski nu aru ittam, tattadday ittam nga baggi megafu ta niketadday tam kani Cristo.”—Roma 12:3-5.
16. Anni i makua na mannakam, mabbing ira, anna atawa nga babbay tapenu kanayun nga memammo anna nattaradday i organisasion ni Jehova?
16 Maski nu anni gafu i sirkumstansia tam, makka-uffuttam ngamin nakuan para ta interes na kappabbaw nga Pappatulan ni Jehova. Sikamu nga mannakam, itulu-tuloynu nga sanayan i mabbing ira nga kuan i kukukuannu. Sikamu nga mabbing ira nga brother, akseptannu i responsibilidad, mapakalinno, anna kanayun nga irespetu i mannakam. Sikamu nga atawa nga babbay, parigannu i ehemplo na atawa ni Akila nga si Priscila, nga matalo nga vinulun anna sinuportanna si Akila maski nu manguloli i sirkumstansiada ira.—King. 18:2.
17. Anni i matageno ni Jesus ta disipulosna ira, anna ngatta sinanayna ira?
17 Meyannung ta passanay ta tanakuan tapenu mangiyabaga tu mas dakal nga responsibilidad, si Jesus i kakastan nga ehemplo. Ammuna nga mangultimo i ministeriona ta davvun anna tanakuan noka i mangituloy ta trabahuna. Maski nu imperfekto i disipulosna ira, nakkomfiansa yaya nira anna kinagina nga mangngua ira tu mas kappabbaw nga ganna-gannug anne sa. (Juan 14:12) Sinanayna ira tu mapia, anna nilayyagayyada i mapia nga dumug ta interu nga mundo ta kaggawadda.—Col. 1:23.
18. Anni i iddanama tam ta mappange, anna anni i makua tam ta maddaggun?
18 Kabalin na sakrifisio nga patay ni Jesus, napaginnolay yaya ta langi anna neddan tu mas aru nga trabahu anna autoridad nga “atannangan na ngamin i mammaguray, makawayya, makapangngua, anna yafu ira.” (Efe. 1:19-21) Nu matay tam nga matalo nige na Armagedon, mapaginnolay tam noka ta matunung nga napabagu nga mundo, nga abundansia ngana i trabahu nga kuattam. Ngem egga i importante nga trabahu nga kuan na ngamin ta maddaggun—i pallayyagayya ta mapia nga dumug anna pangngua tu disipulo ira. Paray nakuan tu ngamin ittam, mabbing onu manakam ay ‘mallallappo nga kanayun ta trabahu nga masserbi ta Yafu.’—1 Cor. 15:58.