1-3. Anni i ari nakua na profeta nga naggafu ta Juda, anna anni i resultana? (Innan i letratu ta gafu na artikulo.)

TA TIEMPO na pammaguray ni Patul Jeroboam, zinog ni Jehova i tadday nga profeta na Juda tapenu kagian tatun nga apostata nga patul na Israel i mensahe na pangukum. Matalo nga nitulug na profeta yatun nga mensahe, anna pinrotektan yaya ni Jehova ta gazzi ni Jeroboam.​—1 Pat. 13:1-10.

² Ta pallabbe na profeta, nadafunna i tadday nga lakay nga naggafu ta Bethel. Nalladdug yatun nga lakay sa anna kinagina nga profeta yaya ni Jehova. Nilogona i profeta yatutta arianna sinuppal i manawag nga dob ni Jehova sa nga ‘ari kuman tu pan onu minum tu danum ta Israel’ anna ‘ari manoli ta dalan nga naggafuanna.’ Nallussaw si Jehova. Ta pallabbena, nadafunna ta dalan i tadday nga leon tapus pinatay natun yaya.​—1 Pat. 13:11-24.

³ Ngatta nawawan na profeta i dati nga kinapakalinnona tapus nangurug yaya ta minangngilogo nga lakay? Ari nga kagian na Biblia nu ngatta. Ngem awayyana tu nattammanna nga mawag nakuan nga ‘lumakag yaya tu mepangngo kavulu na Dios.’ (Bibbigan i Mikias 6:8.) Ta Biblia, i pallakag kavulu i Dios tam kebalinanna nga mattalo tam sa, suportan i soberaniana, anna tuttulan i pangiyorolluna. Ammu na mapakalinno nga tolay nga  mawag tu kanayun nakuan yaya nga makimallo kani Jehova. Kiniddaw nakuan na profeta kani Jehova nga klaruan i instruksionna ira, ngem awan tu kagian na Biblia tu kunnatun i kingnguana. Egga ira tiempo nga mawag gapa tu mangngua tam tu mariga ira nga desision, ngem ari tu manawag nittam i mepangngo nga kuattam. Nu mapakalinno nga mappegiya ittam kani Jehova, malillitattam i madammo nga liwi-liwa.

4. Anni i gigiammuattam taw nga artikulo?

⁴ Ta nappasa nga artikulo, nammuattam nu ngatta importante lagapa i pappakalinno ta Cristiano ira anna nu anni i nelagum tatun. Anni gafu ira nga situasion i meparubang nittam nga mamurueba ta pappakalinno tam? Kunnasi tam nga mepasingan yaw nga makasta nga kualidad tapenu makapattalupaddiattam nga mapakalinno maski nu mariga yatun? Tapenu matabbag yaw ira nga pakkiavu, ikonsidera tam i tallu nga gagangay nga situasion ira nga mamurueba ta pappakalinno tam, anna innattam nu kunnasi tam masirib nga marubang i kada situasion.​—Prov. 11:2.

5, 6. Kunnasi nga nipasingan ni Barzilai i pappakalinno?

⁵ Mapurueban i pappakalinno tam nu manguli i personal ira nga sirkumstansia onu asayment tam. Turi ta inimbita ni David i 80-anios nga si Barzilai nga maddian ta palasio na patul, siguradu nga nakatageno tu dayaw si Barzilai. Nu alawatanna yatun, kanayunna nga makavulu i patul. Ngem pinammanakitanna yatun. Ngatta? Megafu ta lakay ngana yaya, kinagina kani David nga manakina nga mabbalin yaya nga vuru-vurung ta patul. Yatutta nirekomenda ni Barzilai si Chimham, nga awayyana tu tadday ta ánana nga lalaki, bilang katalina.​—2 Sam. 19:31-37.

⁶ Nakoffun kani Barzilai i pappakalinno tapenu rasonable i desisionna. Arianna pinammanakitan i imbitasion ni David megafu ta natagenona nga arianna ngana meyabaga i responsibilidad onu megafu ta kayàna laman ngana i memammo nga marretiro ta pattolena. Imbes tu kunnatun, nikonsidera anna inalawàna i nanguli nga sirkumstansiana anna i limitasionna ira. Manakina nga manga tu responsibilidad nga lampas ngana ta mawayyana. (Bibbigan i Galacia 6:4, 5.) Nu nakafokus tam ta posision, ta kinaprominente, onu ta pamadayaw, pamegafuanan yatun na egotismo, kompetision, anna pakkadismaya ta pangultimuanna. (Gal. 5:26) Makoffun lallagu i pappakalinno tapenu ifokus na ngamin i nattaradday nga abilidad anna pappursigida ta pangidayaw ta Dios anna pangngua ta adde na mawayya nga uffunan i tanakuan.​—1 Cor. 10:31.

7, 8. Kunnasi nga makoffun i pappakalinno tapenu mebita tam i mattalo laman ta baggi tam?

⁷ Maruddu nga dakal i responsibilidad, dakal gapa i autoridad. Yatun i mamurueba ta kapakalinno. Turi ta nammuan ni Nehemias i ziga na totolay ta Jerusalem, nakimemallo yaya kani Jehova. (Neh. 1:4, 11) Zimittal i bendision ni Jehova nguri ta sinunno ni Patul Artaxerxes si Nehemias bilang gobernador na rehion. Ngem maski nu prominente i posisionna, maririku, anna dakal i autoridadna, ari vuluvuga naddepende si Nehemias ta ekspiriensa onu ta abilidadna ira. Tulu-tuloy nga liminakag yaya kavulu i Dios. Ari yaya nagimmang nga nappegiya kani Jehova gukaban na pakkonsulta ta Dob na Dios. (Neh. 8:1, 8, 9) Ari gapa ngana dinominan ni Nehemias i tanakuan; nu ari, nasserbi yaya maski nu mawag tu massakrifisio.​—Neh. 5:14-19.

⁸ Masingan ta ehemplo ni Nehemias nu kunnasi nga malillitattam i mattalo ta baggi tam laman nu manguli i asayment tam onu meddan ittam tu aru paga nga responsibilidad. Awayyana nga maddepende laman i  tadday nga elder ta ekspiriensana yatutta baka ituppalna i ganna-gannug na kongregasion maski nu arianna labbi nga konsultan si Jehova ta pakimallo. Maddesision labbi gapa i karuan tapus ipakimalloda nga bendisionan ni Jehova i desisiodda. Ngem kunnatun kari i pappakalinno? Kanayun nga daddamman na mapakalinno nga tolay i sinaddagna ta unnug na Dios. Ari tu i abilidad tam ira i importante. Netallugaring nu meparubattam ta parehu nga situasion onu problema, mawag tu magimmugug ittam nga ari mattalo ta baggi tam laman. (Bibbigan i Proverbio 3:5, 6.) Bilang miembro na kongregasion na Dios, magigiammu tam nu kunasi nga tuppalan i papel tam ta familia onu bilang parte na kongregasion anne ta basta pakkaraga nga mapeggan tu ranggo onu posision.​—1 Tim. 3:15.

9, 10. Kunnasi nga makoffun i pappakalinno tapenu marubattam i ari kurug nga pakkritika?

⁹ Mariga nga kontrolan i emosiottam nu mawag tu attammattam i awan tu basehanna nga pakkritika. Maruddu nga tumangi si Hana megafu kani Penina, i kontrana, nga awattu immanna nga manutturia sa. Iddu ni Elkana si Hana, ngem baug yaya. Turi ta maddaggun yaya nga makimallo ta tabernakulo, inakusan yaya ni Eli nga nellaw yaya. Fugurammu yatun! Ngem maski nu kunnatun, kinontrol na mapakalinno nga si Hana i baggina anna marespeto nga sinabbagna si Eli. Nerekord i makatukkal nga pakimallona ta Biblia. Napannuan yatun tu pangurug, pamadayaw, anna appresasion.​—1 Sam. 1:5-7, 12-16; 2:1-10.

¹⁰ Makoffun i pappakalinno tapenu ‘maffu tam i marakay ta pangngua ta mapia.’ (Roma 12:21) Maruddu nga ari tu patas i pattolay ta sistema ni Satanas, anna mawag tu kontrolattam i papporay megafu ta kondukta na marake ira. (Sal. 37:1) Parigan na mapakalinno nga tolay si Jesus. “Ngem turi ta inuyu-uyaw da yaya,” kagian na Biblia, “ari nga nangibalo . . . ; nu ari nammakatalo ta Dios nga matunung nga manentensia.” (1 Ped. 2:23) Ammu ni Jesus nga si Jehova laman i egga kepangngattanna nga mangibalo. (Roma 12:19) Netabarang gapa ta Cristiano  ira nga mawag tu mappakalinno anna ‘ariadda nga ibalo i marakay nga makua nira.’​—1 Ped. 3:8, 9.

11, 12. (a) Kunnasi makoffun nittam i pappakalinno tapenu marubattam i sobra nga pamadayaw onu pangipoppoddu? (b) Kunnasi nakuan nga afektan na pappakalinno i assinnun anna i pagguyu-guyu tam?

¹¹ Mapurueban gapa i pappakalinno tam nu sobra nga dayawan onu ipoppoddu ittam na tanakuan. Nonopammu i reaksion ni Ester turi ta nesimmu yatun sa. Guaguapa yaya anna neddan yaya tu mangina ira nga pappaguapa ta tanga-ragun. Inaggaw nga makavuluna i aru nga maginganay ta interu nga Imperio na Persia nga marralaban para ta atension na patul. Ngem nattalupaddian yaya nga minangngikakua anna disente. Ari yaya nga nabbalin tu maarte onu ari nga mapakalinno maski nguri ta yaya i pinili na patul nga reyna.​—Est. 2:9, 12, 15, 17.

¹² Makoffun nittam i pappakalinno tapenu kanayun nga mabbisti, magayus, anna pakappiattam i baggi tam tu disente anna respetadu. Ammu tam nga madde tam i giffutuan na totolay, ari nga ta pangiparayag onu pangisentro ta atension ta baggi tam, nu ari, megafu ta “masippo anna memammo nga appana-panono.” (Bibbigan i 1 Pedro 3:3, 4; Jer. 9:23, 24) Masingan lagapa noka ta kakkagian anna kukukuattam nu anni i paningattam ta baggi tam. Angngariganna, baka ipatageno tam ta tanakuan tu espesial ittam megafu ta pribilehio tam, ta konfidensial ira nga ammu tam, onu megafu ta kofuttam i egga ira pribilehioda. Onu awayyana tu ipamamma tam nga kingngua tam i tadday nga gannug maski nu egga mabba ira nanguffun nittam tatun. Uli mangana, nangiyawa si Jesus tu makasta nga ehemplo tatun. Aru ta kinagina ira ay naggafu onu nalàna ta Hebreo nga Katurakan. Sigga-pakalinno nga naguvovug yaya tapenu mammuan na maggigginna ira sa nga i kinagina ay naggafu kani Jehova, ari nga naggafu ta sarili nga uto onu siribna.​—Juan 8:28

13, 14. Kunnasi makoffun i pappakalinno tapenu mas makasta ira i desisiottam?

¹³ Tadday paga nga mamurueba ta pappakalinno tam ay nu mangngua tam tu desision ira. Durante nga maddian ta Cesarea si apostol Pablo, kinagi sa na profeta nga si Agabo nga nu umay yaya ta Jerusalem, maaresto yaya tari. Baka mapatay paga lagu yaya. Megafu ta assidda, nakimemallo i wawwaragi kani Pablo nga arianna ngana umay. Ngem ariadda nafugaddan si Pablo. Ari yaya nga sobra nga mammakatalo ta baggina onu fermi nga manassingan. Buu i pattalòna kani Jehova anna sigga-paran yaya nga balinan i asaymentna, maski nu sitaw i pangiyangayan ni Jehova sa. Ta pakaginnada sa, sigga-pakalinno nga nagimmang ngana i wawwaragi nga fugaddan i desision ni Pablo nga umay ta Jerusalem.​—King. 21:10-14.

¹⁴ Makoffun gapa i pappakalinno tapenu makapaddesisiottam tu makasta maski nu ari tam ammu onu kontroladu i mesimmu ta ganna-gannug. Angngariganna, nu egga i pakipartisipattam nga maski anni nga aspeto na ngamin-tiempo nga serbisio, anni i mesimmu nittam nu mattaki ittam? Kunnasi nu kawagan ittam na lakay anna bako ngana nga magana tam? Sinni noka i manangngal nittam nu lakay onu bako tam ngana? Ari nga makalanno i aru nga pakimallo onu par-research tapenu matabbag danatun nga pakkiavu. (Ecl. 8:16, 17) Megafu ta pakkomfiansa tam kani Jehova, malippawa anna maaksepta tam i limitasiottam ira. Kabalittam nga mar-research, kumonsulta ta tanakuan, anna mappegiya ta pakimallo, mawag tu tuttulattam i pangiyorollu na espiritu na Dios nittam.  (Bibbigan i Eclesiastes 11:4-6.) Megafu tatun, egga rason ni Jehova nga bendisionan ittam, onu awayyana tu ari mataga-tageno nga itunung ni Jehova i gakkag tam ira.—Prov. 16:3, 9.

15. Kunnasi nga makoffun ta pappakalinno i pannono meyannung kani Jehova?

¹⁵ Megafu ta aru i bentaha na pappakalinno, kunnasi tam nga mas mapeggan tu kunnatun? Ikonsidera tam i appa nga makua tam. Ollu, mas nga mapeggattam tu pappakalinno anna pangikakua kani Jehova nu sigga-appresia nga nonopattam i atannang ira nga kualidad anna i posisionna. (Isa. 8:13) Daddammattam nga lumalakag ittam kavulu i Makapangngua nga Dios, ari tu i anghel onu i tolay. Yatun nga pakalippawa i mamaguyu nittam nga ‘mappakalinno ittam ta makapangngua nga Dios.’​—1 Ped. 5:6.

16. Kunnasi nga makoffun ta pappakalinno tam i pannono tu mapia ta aya na Dios?

¹⁶ Mekadua, makepasingattam tu pappakalinno nu monag nga nonopattam i aya ni Jehova. Nitura ni apostol Pablo nga ‘mas immuguran’ ni Jehova danuri parte na baggi nga abbattattam nga awan kuruga tu serbida. (1 Cor. 12:23, 24) Ta kunnatun gapa, ikavurungan ni Jehova i kada tadday nittam maski nu egga ira i pakkafiattam. Arianna ittam ikumpara ta tanakuan onu iyetu i ayana nu makkamali ittam. Megafu ta aya ni Jehova, makatageno ittam tu seguridad maski nu sitaw i passerbiattam ta organisasionna.

17. Anni i makasta nga efekto nittam na paningan ta makasta nga kualidad na tanakuan?

¹⁷ Mekatallu, dumakal i pangappresia tam ta papel tam ta passerbi kani Jehova durante nga parigattam yaya ta paninganna ta makasta ira nga kualidad na tanakuan. Imbes nga mappasikat onu kanayun nga maddomina, mas kiddawattam i tabarang na tanakuan anna tumulu ta suhestion da ira. (Prov. 13:10) Makitappagayaya tam nira nu makalawà ira tu pribilehio. Dayawattam si Jehova durante nga masingattam nu kunnasi nga bendisionanna i “ngamin nga wawwagi [tam] ta angngurug ta interu mundo.”​—1 Ped. 5:9.

18. Kunnasi nga mabbalittam nga mapakalinno nu masanay i konsensia tam?

¹⁸ Meka-appa, mas paga mapakalinno ittam nu sanayattam i konsensia tam gukaban na prinsipio ira na Biblia. Mapeggattam tu balanse nga pagimamma anna mammuattam nu anni i mataga-tageno anna nononopan ni Jehova. Gukaban na regular nga paggigiammu, pakimallo, anna pangiyaplika ta magigiammu tam, sesenu nga mapaladda tam i konsensia tam. (1 Tim. 1:5) Magigiammu tam nga pagolluan i tanakuan. Nu kuattam i papel tam, ipromesa ni Jehova nga ‘lannappanna i ngamin nga pakkurangattam,’ tapenu masanay ittam nga mapeggan tu pappakalinno anna tanakuan paga nga makadios nga kualidad.​—1 Ped. 5:10.

19. Anni i makoffun nittam nga mattalupaddian nga mapakalinno ta mannanayun?

¹⁹ Meraddammammu kari i profeta na Juda nga ginigiammu tam ta gafu? Nawawanna i inangona anna i fabor ni Jehova megafu ta ari yaya nattalupaddian nga mapakalinno. Ngem makua tam yatun maski nu mapurueban ittam. Pakurugan na matalo ira gari anna mapakalinno ira ta maddaggun nga posible nga makua yatun. Durante nga mas mabbayag tam nga masserbi kani Jehova, mas nga mammakatalo tam nakuan sa. (Prov. 8:13) Maski nu sitaw i passerbiattam ta maddaggun, awayya tam lagapa makalakag kavulu si Jehova. Yatun i kadakallan nga pribilehio tam. Tagibalorammu yatun nga dayaw, anna mattalupaddian nga mapakalinno anna lumakag kavulu si Jehova ta mannanayun.