1. Anni ira i makapabbaw nga abilidad na totolay?

PINARATU ni Jehova i totolay nga egga i makapabbaw ira nga abilidadda. Niddanna ittam tu abilidad nga mannono tapenu solban i problema ira anna mapplano para ta mappange. (Prov. 2:11) Egga gapa i pakawayya tam nga kuan i plano tam ira, tapenu magawà tam ira i addetattam. (Fil. 2:13) Naparo ittam tu egga konsensia tam​—neyanakattam nga panageno meyannung ta fustu anna nu anni i ari fustu—​nga makoffun nittam tapenu malillitan i pangngua tu tagaruli anna itunung i liwi-liwa tam nu makkamali ittam.​—Roma 2:15.

2. Anni i ekspektan ni Jehova nga kuattam ta abilidad tam ira?

² Ekspektan ni Jehova nga usattam tu mapia i abilidad tam ira. Ngatta? Megafu ta ayatanna ittam, anna ammuna nga makapagayaya ittam nu usattam yatun ira nga regalu. Gukaban na Uvovugna, kanayun nga tabarangngan ittam ni Jehova nga usan tu mapia i abilidad tam ira. Angngariganna, ta Hebreo nga Katurakan, mabibbig tam: “I plano ira na matalikarag ay siguradu nga  makasta i pattuppalanna”; anna “maski anni nga malegan na limam nga kuan, kuammu ta ngamin nga sikammu.” (Prov. 21:5; Ecl. 9:10) Ta Cristiano nga Griego nga Katurakan, nakagi nittam: “Kada maka-lugar ittam, kuat-tam i mapia ta ngamin nga ikattolay tam”; anna ‘i kataggi-tadday nikamu ay niddan na Dios ta awayyana nga makua anna iserbi nu ta pammakapian na kataggi-tadday.’ (Gal. 6:10; 1 Ped. 4:10) Manawag nga kayà ni Jehova nga kuattam i adde ta mawayya tam tapenu mabenefisiowattam anna i tanakuan.

3. Anni ira i limitasion na totolay?

³ Ammu gapa ni Jehova nga egga ira i limitasiottam. Nu ta pakawayya tam laman, ariattam malsa i kina-imperfekto, liwa, anna patay; ariattam makontrol i tanakuan megafu ta egga lallagureda nga mappili. (1 Pat. 8:46) Maski aru ngana i ammu onu ekspiriensa tam, kanayuttam nga meyarig nga abbing kumpara kani Jehova.​—Isa. 55:9.

4. Anni i ikonsidera tam taw nga artikulo?

⁴ Ta ngamin nga situasion, kawagattam nga maddepende ta pangigiya ni Jehova, mattalo nga suportanna ittam anna kuanna para nittam i ariattam makua ta sarili tam laman. Kuattam gapa nakuan i adde na mawayya tam anna i mepangngo tapenu solban ira i problema anna uffunan i tanakuan. (Bibbigan i Salmo 37:3.) Kayàna kagian, kawagan nga “mammakatalo ka kani Jehova anna kuammu i mapia”; anna “magguyu ka gukaban na kinamatalo.” Tatun nga gannug, ikonsidera tam nu anni i magigiammu tam ta ehemplo ira da Noe, David, anna tanakuan ira nga aripan ni Jehova nga nattalo sa anna nagguyu tu mepangngo. Kagitta na magigiammu tam, nelavu tatun i pamadduma ta ariadda makua anna ta makuada anna pagakto mekunnay tatun.

5. Iyistoria nu anni i situasion nga inarubang ni Noe.

⁵ Nattolay si Noe ta mundo nga “napannu tu kinavayolente” anna imoralidad. (Gen. 6:4, 9-13) Ammuna nga pangultimuan gabbalaman noka ni Jehova yatun nga marake nga mundo. Ngem maski kunnatun, nafektan lagapa si Noe tatun nga ari makadios nga paddia-paddian. Tatun nga situasion, nalippawa ni Noe nga egga ira i gannug nga arianna makua ngem egga gapa ira i makuana.

6, 7. (a) Anni i ari makua ni Noe? (b) Kunnasi meyarig i situasiottam kani Noe?

⁶ Nu anni i ari makua ni Noe: Maski matalo  nga nilayyagayya ni Noe i mensahe nga pamappalan ni Jehova, arianna mafuersa i marake nga totolay ta pallevuna nga akseptan yatun, anna arianna awayya nga palistuan i dattal na Delubio. Kawagan ni Noe nga makkomfiansa nga tuppalan ni Jehova i promesana nga pangultimuan i kinadake, anna kurugan nga kuan na Dios yatun ta mepangngo nga tiempo.​—Gen. 6:17.

⁷ Mattolay tam gapa ta mundo nga napannu tu kinadake, nga ammu tam tu daralan ni Jehova noka. (1 Juan 2:17) Ta maddaggun, ariattam mafuersa i totolay nga alawatan i “Mapia nga Dumug na Pammaguray na Dios.” Awan gapa tu makua tam tapenu mapalistu i dattal na “mas kanninipang” onu dakal nga ziga. (Mat. 24:14, 21) Kagitta ni Noe, mawag tam i maladda nga pangurug, nga aranni ngana nga magguyu i Dios. (Sal. 37:10, 11) Kumbinsidu ittam nga ari ipamavulun ni Jehova tu mabbayag yaw nga marake nga mundo ta maturu tu tangaggaw anne ta ikiddaw na gakkagna.​—Hab. 2:3.

8. Kunnasi naffokus si Noe ta makuana? (Innan i letratu ta gafu na artikulo.)

⁸ Nu anni i makua ni Noe: Imbes nga makkafi i nono ni Noe megafu ta arianna makua, naffokus yaya ta makuana. Matalo nga nilayyagayyana i mensahe na pamappalan ni Jehova. (2 Ped. 2:5) Siguradu nga nattalupaddian i maladda nga pangurug ni Noe megafu tatun. Inusana paga i pisikal anna mental nga abilidadna ira tapenu kuan i nipakua na Dios nga trabahu sa nga pagangngua tu arka.​—Bibbigan i Hebreo 11:7.

9. Kunnasi tam maparigan i ehemplo ni Noe?

⁹ Kagitta ni Noe, apurattam nga ‘mallallappo nga kanayun ta trabahu nga masserbi ta Yafu.’ (1 Cor. 15:58) Nelagum tatun nga trabahu i pangipataddag anna pammentena ta pasilidad ira para ta paddayaw, pabboluntario ta asamblea anna kombension ira, onu pattuppal ta asayment ira ta panga nga ofisina onu ta remote translation office. I pinaka-importante, mabbalin ittam tu okupadu ta pallayyagayya, megafu ta ammu tam nga paladdanna yatun i iddanama tam ta mappange. Kunnaw i kinagi na tadday nga sister: “Nu ipakiyuvovugmu ta tanakuan i meyannung ta bendision ira ta Pappatulan na Dios, malippawamu nga awan vuluvuga tu iddanamada anna para nira permanente ira i problema.” Yatutta, talaga makoffun i pallayyagayya tapenu mas mappositibo ta mappange anna  maddeterminadu nga ari tu magimmang ta pareha para ta inango.​—1 Cor. 9:24.

10. Iyesplika i situasion nga neparubang kani David.

¹⁰ Nibilang ni Jehova si Patul David nga ‘tolay nga meddu ta futuna.’ (King. 13:22) Masingan ta interu nga pattolay ni David i kinamatalo. Ngem maski kunnatun, nakaliwa yaya tu madammo megafu ta panallawna kani Batseba. Mas naggrabe paga yatun ta pinuruebanna nga ilimag yatun nga liwa gukaban na papplano nga ipapatay ta gerra i atawana nga si Urias. Enna paga nga nipatulug kani Urias mismu i tura nga mappapatay sa! (2 Sam. 11:1-21) Ari nafugaddan i pinallawan na liwi-liwa ni David. (Mar. 4:22) Anni i reaksion ni David turi nesimmu yatun?

11, 12. (a) Turi ta nakaliwa si David, anni i arianna makua? (b) Nu mabbabawi ittam, anni i kuan ni Jehova para nittam?

¹¹ Nu anni i ari makua ni David: Arianna ngana metoli ni David i nakuana ira. Anna arianna nga malillitan i resulta ira na liwi-liwana. Ta kakuruganna, adde ta patena i efektona yatun ira. (2 Sam. 12:10-12, 14) Yatutta, kawaganna i pangurug. Mawag tu makkomfiansa yaya nga nu kurug i pabbabawina, pakoman yaya ni Jehova anna uffunanna yaya tapenu maattammanna i resultana ira na kikkingnguana.

¹² Megafu ta kina-imperfekto, makaliwa ittam ngamin. Mas madammo i karuan nga liwa anne ta tanakuan. Egga ira i situasion nga ariattam ngana metoli i nakaliwatattam. Awan tu makua tam nu ari nga alawatan i resultana yatun ira. (Gal. 6:7) Ngem mattalo tam ta kakkagian na Dios ta uvovugna nga nu mabbabawi ittam, suportan ittam ni Jehova maski ta mariga ira nga tiempo—maski nu sittam i makalliwa.​—Bibbigan i Isaias 1:18, 19; Kingngua 3:19.

13. Kunnasi napatuyag uli i espiritualidad ni David?

¹³ Nu anni i makua ni David: Nipamavulun ni David nga uffunan yaya ni Jehova tapenu mattuyag ta espiritual. Tadday ta kingnguana ay akseptan i panunung na profeta ni Jehova nga si Natan. (2 Sam. 12:13) Nakimallo gapa yaya kani Jehova, inaminna i liwi-liwana anna kinagina i sinsero nga pakkaragana nga metoli i fabor ni Jehova. (Sal. 51:1-17) Imbes nga awan tu kuanna megafu ta makonsensia yaya, nakagigiammu si David ta liwi-liwana. Kakuruganna, arianna ngana vuluvuga kingngua uli yatun ira nga madammo nga liwa. Nappasa i piga ragun, natay yaya tu matalo, anna meraddamman ni Jehova i integridadna.​—Heb. 11:32-34.

14. Anni i magigiammu tam ta ehemplo ni David?

¹⁴ Anni i magigiammu tam ta ehemplo ni David? Nu makaliwa ittam tu madammo, kawagattam i sinsero nga pabbabawi anna pakkiddaw tu pamakoma ni Jehova. Aminattam sa i liwi-liwa tam. (1 Juan 1:9) Aranniattam gapa i elder ira nga makoffun nittam ta espiritual. (Bibbigan i Santiago 5:14-16.) Gukaban na pangapprobetsa ta unnug ira ni Jehova, mepasingattam nga mattalo ittam ta promesana nga pammapian anna pakoman ittam. Tapus, makagigiammu ittam nakuan ta liwi-liwa tam, mapprogreso ta passerbi kani Jehova, anna mappositibo ittam ta mappange.​—Heb. 12:12, 13.

15. Anni i magigiammu tam ta ehemplo ni Hana?

¹⁵ Siguradu nga makanono ka paga tu tanakuan nga matalo ira nga aripan gari nga nattalo kani Jehova durante nga mangngua tu positibo nga aksion. Angngariganna, awan tu makua ni Hana megafu ta baug yaya. Ngem nattalo yaya nga banna-bannayan yaya ni Jehova, yatutta nattulu-tuloy yaya nga maddayaw ta tabernakulo anna  ivuvvu i futuna ta pakimallo. (1 Sam. 1:9-11) Ari kari nga makasta yatun nga ehemplo para nittam? Nu meparubang ittam ta taka-taki onu tanakuan paga nga kapurueba nga ariattam kontroladu, ipammakatalo i vuru-vuruttam kani Jehova megafu ta tangngallanna ittam. (1 Ped. 5:6, 7) Kuattam ngamin i adde ta mawayya tam tapenu mabenefisiowan ta study ira anna ta tanakuan paga nga espiritual ira nga probision.​—Heb. 10:24, 25.

16. Anni i magigiammu na magana ira ta lakay nga si Samuel?

¹⁶ Kunnasi gapa danuri matalo nga magana nga narrebelde i ánada? Ari mafuersa na lakay nga si Samuel i adulto ira nga ánana nga mattalupaddian nga matalo ta matunung ira nga estandarte nga nitudduna nira. (1 Sam. 8:1-3) Nipammakatalona ngana yatun kani Jehova. Maski kunnatun, mapattalupaddian ni Samuel i integridadna anna mapagayayana i nelangitan nga Yamana, si Jehova. (Prov. 27:11) Kunnatun gapa i situasion na Cristiano ira nga magana ta maddaggun. Mattalo ira nga kagitta na yama ta istoria nga narrebelde i anana, sigga-paran nga alawatan ni Jehova danuri nakaliwa ira nga nabbabawi. (Luc. 15:20) Iyapitu gapa natun nga magana ira nga mattalupaddian nga matalo kani Jehova, anna magiddanama nga mapaguyu i ánada nga manoli megafu ta ehemploda ira.

17. Ngatta makapagaram i ehemplo na pobre nga balu?

¹⁷ Nonopan gapa i pobre nga balu ta kaggawan ni Jesus. (Bibbigan i Lucas 21:1-4.) Awan tu makuana ta darogas ira nga annangngua ta templo. (Mat. 21:12, 13) Baddi laman gapa i makuana tapenu manguli i situasionna ta finansial. Ngem, nabboluntario yaya nga maddona tu “pilippiga nga kuartu na nga pakkatolayan na.” Nipasinganna yatun nga matalo nga babay i interu-futu nga pattalo kani Jehova, ta pakannammuna nga nu pagolluanna i espiritual ira nga gannug, iyawana sa i pisikal ira nga pakawaganna. Napaguyu yaya na pattalona tapenu suportan i unnug meyannung ta kurug nga paddayaw. Kunnatun gapa, nu mattalo ittam nga pagolluan i Pappatulan, siguraduan ni Jehova nga iyawa i kawagattam.—Mat. 6:33.

18. Mangiyawa tu ehemplo na moderno nga aripan nga napeggan tu fustu nga pagimamma.

¹⁸ Aru ta kapangngurug tam ta maddaggun i nangipasingan tu parehu nga pattalo kani Jehova anna nangngua tu mepangngo nga aksion. Ikonsidera tam i brother nga si Malcolm, nga nattalupaddian nga matalo adde ta patena turi 2015. Ta piga dekada nga pinasserbida na atawana kani Jehova, naka-ekspiriensa ira tu pagayaya anna problema. “Ariammu ammu nu mittan i mesimmu ta pattolay, ari tu siguradu, anna mariga nga arubangan yatun,” kunna. “Ngem bendisionan ni Jehova danuri maddepende sa.” I tabarang ni Malcolm? “Ipakimallo nga mabbalin tu produktibo anna aktibo ta serbisio. Maffokus ta makuam, ari tu ta ariammu makua.” *

19. (a) Ngatta fustu laman i teksto tam para ta dagun 2017? (b) Kunnasim iyaplika i teksto ta dagun 2017 ta pattolem?

¹⁹ Durante nga “mabbalin tu mas marakay” yaw nga sistema na ganna-gannug, ekspektattam nga meparubang ta mas mariga ira nga kapurueba. (2 Tim. 3:1, 13) Yatutta mas ngana importante nga ariattam ipamavulun nga awan tu makua tam megafu tatun ira nga kapurueba. Mas kawagan lallagu nga mapeggan tu maladda nga pattalo kani Jehova durante nga mangngua tu mepangngo ira nga aksion. Fustu laman gafu i teksto tam ta dagun: “Mammakatalo ka kani Jehova anna kuammu i mapia”!​—Sal. 37:3, NW.