Ngatta Importante nga Ammu Tam i Limitasiottam?
“I kinasirib ay egga ta ammuda i limitasiodda ira.”—PROV. 11:2.
KANSION: 38, 69
1, 2. Ngatta nawawan i fabor na Dios ta tadday nga dati nga mapakalinno? (Innan i letratu ta gafu na artikulo.)
TA GAFU na pammaguray ni Patul Saul ta Israel gari, tadday yaya nga mapakalinno anna respetadu nga tolay. (1 Sam. 9:1, 2, 21; 10:20-24) Ngem piga laman nga tiempo kabalin na pinappatulna, natturunug i arogante nga kikkingnguana. Nguri ta ari zimittal si profeta Samuel ta Gilgal ta eksakto nga tiempo, nofu i pasensia ni Saul. Mappange nga gerran ira na Filisteo ira, ngem pinanawan na Israelita ira si Saul megafu ta assidda. Awayyana nga nanonona, ‘Mawag tu egga kuakku—insigida nga kuakku.’ Yatutta namegafu yaya nga nangitavvung ta Dios, maski nu ari yaya nga autorisado nga kuan yatun. Napalussona si Jehova.—1 Sam. 13:5-9.
2 Turi ta zimittal si Samuel ta Gilgal, pinoryanna si Saul. Imbes nga alawatan ni Saul i pangitunung, narrason yaya, nipaliwàna ta tanakuan yatun, anna pinalappawna i kingnguana nga liwa. (1 Sam. 13:10-14) Namegafu tatun, nakakua si Saul tu tanakuan paga nga natturunug nga liwa, nga nakalsanna ta trono, anna mas paga grabe, nalsa i fabor ni Jehova sa. (1 Sam. 15:22, 23) Maski nu makasta i gafuna, nattuppal ta kadaral i pattolay ni Saul.—1 Sam. 31:1-6.
3. (a) Anni i pagimamma na aru meyannung ta pappakalinno? (b) Anni ira nga pakkiavu i matabbag?
3 Ta mundo nga minakkikompetensia i totolay, aru i mangurug nga mawag tu neruma ka ta magaru tapenu sikaw i malalaki. Megafu tatun, ari ngana tu uso i pappakalinno. Angngariganna, kinagi na tadday nga sikat nga aktor nga nabbalin tu pulitiko: “Ari nga meyaplika i pappakalinno niakan—paray nakuan tu ariakku vuluvuga malà yatun.” Ngem, ngatta importante i pappakalinno? Anni i pappakalinno, anna anni i ari nga pappakalinno? Kunnasi tam makapattalupaddian nga mapakalinno maski nu meparubang ta ziga onu pamipilit na tanakuan? Taw nga artikulo, matabbag yatun nga ollu nga dua nga pakkiavu. Tabbagan gapa na tumunug nga artikulo i mekatallu nga pakkiavu.
NGATTA IMPORTANTE I PAPPAKALINNO?
4. Anni i kebalinan na arogante nga guyu-guyu?
4 Pinadduma na Biblia i pappakalinno anna i papparayag. (Bibbigan i Proverbio 11:2.) Masirib i pinakkiddaw ni David kani Jehova nga ‘meyarayyu yaya ta sigga-uray nga pakkaraga ta katagarulian [“arogante nga guyu-guyu,” NW]. (Sal. 19:13) Anni ira yatun nga “arogante nga guyu-guyu”? I tolay nga arogante i guyu-guyuna ay babbasta onu gavva ngana laman nga mangngua tu gannug nga ari yaya autorisado. Megafu ta narensia tam nga liwa, mabbalittam tu arogante nu mittan. Ngem gittana nipasingan na ehemplo ni Patul Saul, nu meyugaliattam i pabbalin tu arogante, duttal noka i tiempo nga madaral i relasiottam ta Dios. Kagian na Salmo 119:21 meyannung kani Jehova: “Porayam-mu danuri i maparayag ira.” Ngatta kunnatun?
5. Ngatta serioso i arogante nga guyu-guyu?
5 Mas serioso i pabbalin tu arogante anne ta ari sinadya nga liwa. Ollu, nu arogante i pagguyu tam, ari tam nga madayaw si Jehova bilang mepangngo nga Soberano tam. Mekadua, nu mallampas ittam ta sakup na autoridad tam, mas posible nga makkaproblema ittam ta tanakuan. (Prov. 13:10) Mekatallu, awayyana nga mepasiranan ittam nu magafutan i arogante nga guyu-guyu tam. (Luc. 14:8, 9) Ari tu makasta i resulta na arogante nga guyu-guyu. Ipagaram na Katurakan nga kanayun nga makasta i pappakalinno.
ANNI I NELAGUM TA PAPPAKALINNO?
6, 7. Anni i nelagum ta pappakalinno?
6 Ta Biblia, makagi nga mapakalinno i tadday nga tolay nu ari nga parayag onu arogante. Kagian na Filipos 2:3 nga i mapakalinno ay ‘ipay na nga kanayun ta nono na tu mas mapia i karuan ira nga totolay anne sa.’ Fustu nga magukug na mapakalinno nga tolay i adde na abilidad anna makasta ira nga netuppalna, aminanna i kamalina ira, anna alawatanna i suhestion anna i bagu ira nga ideya. Kakayà ni Jehova danuri mapakalinno.
7 Ta Biblia, nelagum paga ta pappakalinno i mepangngo nga pattantia ta baggi tam anna i pakannammu ta limitasiottam ira. Ta orihinal nga Griego nga lengguahe, masita yatun nga pakannammu nu kunnasi nga afektanna yatun i pattratu tam ta tanakuan.
8. Anni ira i seniales na mapakatannang nga pannono onu pagguyu?
8 Kunnasi nga mamegafu nga mappakatannang i pannono onu i pagguyu tam? Ikonsideram i piga laman nga serioso nga seniales. Baka atatannang i paningattam ta baggi tam onu ta pribilehio tam ira. (Roma 12:16) Awayyana tu ari mepappangngo nga nakafokus i atensiottam ta baggi tam. (1 Tim. 2:9, 10) Onu baka ipilit tam i opiniottam ira megafu laman ta posision, koneksion ira, onu i personal ira nga kurugattam. (1 Cor. 4:6) Maruddu nga nu kunnatun i kuattam, baka ariattam paga natageno nga nabbalittam ngana nga minappakatannang.
9. Ngatta nappakatannang i karuan? Mangiyawa tu angngarigan ta Biblia.
9 Awayyana nga mappakatannang i maski sinni nu ipamavulunna nga manganannuan nga maffu yaya na nepattaggan ira nga pakkaraga. Megafu ta makasarili nga ambision, passil, anna ari makontrol nga papporay, nattuppal yatun ira ta arogante nga guyu-guyu. Nappatenta i karakter ira na Biblia gitta da Absalom, Uzias, anna Nabucodonosor ta nepattaggan ira nga annangngua, yatutta nikazza ira ni Jehova megafu ta pappakatannadda.—2 Sam. 15:1-6; 18:9-17; 2 Cro. 26:16-21; Dan. 5:18-21.
10. Ngatta ibita tam nga ukuman i motibo na tanakuan? Mangiyawa tu angngarigan ta Biblia.
10 Egga paga tanakuan nga rason nu ngatta mappakatannang i karuan. Nonopammu yaw ira nga rekord na Biblia: Genesis 20:2-7 anna Mateo 26:31-35. Megafu kari ta marake ira nga pakkaraga nu ngatta nappakatannang da Abimelec anna Pedro? Onu ariadda laman ammu i ngamin nga detalye na nesimmu onu baka nakaddagan laman ira? Ari tam mabibbig i futu, yatutta masirib anna meddu nu ibita tam i makkonklusion meyannung ta motibo ira na tanakuan.—Bibbigan i Santiago 4:12.
I PAPEL TAM TA UNNUG NA DIOS
11. Ngatta nelagum ta pappakalinno i pakannammu ta papel tam ta unnug na Dios?
11 Mamegafu i pappakalinno ta pakannammu ta papel tam ta unnug na Dios. Bilang Dios na unnug, niddan ni Jehova i kada tadday nittam tu papel ta kongregasion. Sittam ngamin ay importante. Megafu ta kinasippona, niddanna ittam tu madduruma nga regalu, abilidad, onu talento. Mosa tam yatun ira tapenu dayawan yaya anna mammakapia i tanakuan. (Roma 12:4-8) Nitalo ni Jehova nittam i panangngal nga egga nelagum tu kekakua, pattalo, anna responsibilidad.—Bibbigan i 1 Pedro 4:10.
Anni i magigiammu tam ta ehemplo ni Jesus ta pangalawà ta manguloli nga papel? (Innan i parapo 12-14)
12, 13. Ngatta ari tam nakuan makaddag nu ta pappasa na tiempo ay manguli i papel tam ta unnug na Dios?
12 Ngem ari tu permanente i papel tam ta unnug na Dios. Manguli yatun ta pappasa na tiempo. Innammu i ehemplo ni Jesus. Ta gafuna, magitetadday yaya nga kavulu ni Jehova. (Prov. 8:22) Tapus zinuffunanna i Yamana nga mangngua ta karuan nga espiritu nga pinaratu, ta uniberso, anna ta ultimo, i totolay. (Col. 1:16) Turi kua, egga mangana i bagu nga papel ni Jesus ta davvun, ollu bilang inosente nga abbing tapus bilang adulto. (Fil. 2:7) Kabalin na sakrifisio nga patena, nanoli ta langi si Jesus bilang espiritu. (Heb. 2:9) Namegafu tatun, “neyawa [sa] ngamin i pakawayya ta langi anna ta utun na davvun.” (Mat. 28:18) Ari tu yatun i ultimo nga panguli na papelna. Kabalin na Milenio nga Pammagurena, itoli noka ni Jesus i Pappatulan kani Jehova tapenu “i Dios ngana i mammaguray ta ngamin nga adde na.”—1 Cor. 15:28.
13 Ekspektattam gapa nga ta pappasa na tiempo, manguloli ira i annungattam, maruddu nga base ta desisiottam ira. Angngariganna, dati ka kari nga single tapus nangatawa ka ngana? Egga ngana kari i anamu? Ta pagadultom, egga kari ira kingnguam nga panguloli ta pattolem tapenu makapasserbi ta ngamin-tiempo? Kada desision nga kingnguam, egga ira espesipiko nga pribilehio anna responsibilidad nga kagiddanna. Nu manguli i sirkumstansia tam, Heb. 6:10.
awayyana nga umaru onu bumaddi i makua tam. Abbing ka kari paga onu manakam ka ngana? Makasta kari i gawa-gawayyammu onu makafi? Ikonsidera ni Jehova i makua na kada tadday nittam ta passerbi tam sa. Ekspektanna laman nu anni i rasonable, anna talaga appresianna i maski anni nga makua tam.—14. Kunnasi nga makapagayaya ittam ta maski anni nga situasion megafu ta pappakalinno?
14 Nagayaya si Jesus ta kada neyawa sa nga papel, anna kunnatun gapa i pagayaya nga malegattam. (Prov. 8:30, 31) Ari nga malimitan i mapakalinno nga tolay megafu ta maddaggun nga papel onu responsibilidadna ta kongregasion. Arianna mavurung ta mappange ira nga pribilehio onu nu anni ira i metuttuppal na tanakuan. Nakafokus lallagu yaya ta pagaleg tu gakkag anna pakkakontento ta maddaggun nga papelna megafu ta imammatanna yatun nga naggafu kani Jehova. Napafutuan gapa nga irespetona i papel onu lugar nga niyawa ni Jehova ta tanakuan. Makoffun nittam i pappakalinno tapenu magayaya ittam nga ikakua anna suportan i tanakuan.—Roma 12:10.
NU ANNI I ARI KEBALINAN NA PAPPAKALINNO
15. Anni i magigiammu tam ta pappakalinno ni Gideon?
15 Makasta nga ehemplo na pappakalinno ta agguyu-guyu si Gideon. Turi ta nappasingan sa i anghel ni Jehova, inakseptana nga mapakalinno laman i naggafuanna anna i kualipikasionna ira. (Uk. 6:15) Kabalin nga alawatan ni Gideon i papel nga niyawa ni Jehova sa, siniguraduna nga talaga
natindianna nu ani mekiddaw sa, anna nappegiya yaya kani Jehova. (Uk. 6:36-40) Magutu anna masikan i nono ni Gideon. Ngem minaggimmugug anna masirib yaya. (Uk. 6:11, 27) Arianna nga inusa i papelna tapenu mabbalin tu prominente. Kabalinna nga kuan i kinagi ni Jehova, nagayaya yaya nga nanoli ta dati nga paddia-paddianna.—Uk. 8:22, 23, 29.16, 17. Anni i ikonsidera na mapakalinno nga tolay nu nononopanna i mapprogreso ta espiritual?
16 Nu mapakalinno i tadday, arianna kayà kagian nga ariattam ngana vuluvuga nga maggawà onu mangalawa tu mas aru nga pribilehio na passerbi. Ipagaram na Katurakan ta ngamin nga mapprogreso. (1 Tim. 4:13-15) Kanayun kari nga mekiddaw tatun i panguli tu asayment? Ari gapa. Megafu ta bendision ni Jehova, awayya tam nga mapprogreso ta espiritual ta maddaggun nga annungattam. Makapattulu-tuloy tam nga mapakasta i niyawa na Dios ira nga abilidad tam anna ta pangngua paga tu makasta nga annangngua.
17 Nige nga alawatan na mapakalinno nga tolay i tadday nga responsibilidad, ammuanna labbi nu anni i mekiddaw sa. Tapus matantiana tu mapia i paddia-paddianna. Angngariganna, mawayyana kari i mangalawà tu mas aru nga trabahu onu responsibilidad nga ari mapagurayan i tanakuan nga importante nga gannug? Awayyana kari nga meyali i karuan ta trabahuna ta tanakuan tapenu makuana yatun nga bagu nga responsibilidad? Nu parehu nga ari i tabbag taw nga dua nga pakkiavu, baka egga i mas kualipikadu nga mangngua tatun nga trabahu ta maddaggun. Makoffun nu ipakimallo anna mabbalittam nga realistiko tapenu ari tam nga malampasan i limitasion na abilidad tam ira. Makoffun i pappakalinno tapenu makapakkagi tam tu ari.
18. (a) Anni i makua na pappakalinno ta pangalawà tam tu bagu nga papel onu responsibilidad? (b) Kunnasi nga meyaplika ta mapakalinno nga tolay i Roma 12:3?
18 Nu alawatattam i bagu nga asayment, iperaddam nittam na ehemplo ni Gideon nga ariattam makua yatun nu awan tu pangigiya anna bendision ni Jehova. Nakagi mabba nga “lumakag [ittam] tu mepangngo kavulu na Dios!” (Mik. 6:8) Kada mangalawa tam gafu tu bagu nga responsibilidad, ipakimallo tam nakuan i maski anni nga kakkagian ni Jehova gukaban na Uvovug anna na organisasionna. Mawag tu magigiammu tam nga pangulolian i pattoletam tapenu mekunnay yatun ta pangiyorollu ni Jehova. Daddammattam nga “madumu-rumug” ittam ari nga megafu ta abilidad tam, nu ari, ta pappakalinno ni Jehova. (Sal. 18:35) Nu piliattam nga lumakag nga mapakalinno kavulu i Dios, ariattam nonopan nga kuruga atatannang onu alalinno i paddia-paddiattam.—Bibbigan i Roma 12:3.
19. Ngatta mapeggattam nakuan tu pappakalinno?
19 Iyawa na mapakalinno kani Jehova i mepangngo nga dayaw sa, megafu ta yaya i Namaratu anna i Soberano ta Uniberso. (Nep. 4:11) Makoffun nittam i pappakalinno tapenu kontento anna produktibo ittam ta papel tam ta unnug na Dios. Ilisi ittam na pappakalinno ta pagangngua tu kepasiranan, anna mangirattal yatun tu pattaradday ta totolay ni Jehova. Megafu tatun, pagolluattam i tanakuan anne ta baggi tam, anna ipagaramna yatun nga magimmugug ittam tapenu malillitan i madammo nga liwi-liwa. Yatutta importante i pappakalinno ta ngamin nga totolay ni Jehova, anna tagibaloranna danuri makkaraga nga mapeggan tu kunnatun. Ngem kunnasi gapa nu mapurueban ittam? Ipasingan na tumunug nga artikulo nu kunnasi nga makapattalupaddiattam nga mapakalinno maski nu meparubang ta mariga ira nga situasion.