KAGIAN na rekord ta Genesis 22:6 nga tapenu makaprepara si Abraham tu sakrifisio nga tavvu ta arayyu nga lugar, ‘inàna i kayu para ta matuggi nga tavvu anna nipakattuna kani Isaac nga anana. Tapus, inàna i afi anna i kutsilyu, anna naggiddang ira dua nga liminakag.’

Awan tu nekagi ta Katurakan nu kunnasi i mappakaddul ta tiempo ira gari. Meyannung tatun nga rekord, kinagi na tadday nga komentarista nga “imposible nga agga-lanzog ta interu nga apaddu nga pabbiahe” i afi nga pinadday da Abraham anna Isaac. Yatutta, awayyana tu tukuyanna yatun i rimienta para ta pamadday tu afi.

Ngem kagian gapa na tanakuan nga mariga turi ollu tiempo i mappakaddul. Mas alistu para ta totolay gari nu makkiddaw ira ta karrubada tu baggang anne tu mappakaddul paga laman ira. Yatutta mangurug i iskolar ira nga egga i nagipayyan ni Abraham​—awayyana tu banga nga egga kawagna—​tu baggang nga naggafu ta nappasa nga gabi. (Isa. 30:14) Nu kunnatun, mas alistu mosa yatun nga baggang ta pappakaddul ta kayu ira ta maski anni nga tiempo durante nga egga ta biahe.