Tagibaloran i Regalum nga Lallaguray
“Nu sitaw i dian na Espiritu na Yafu, egga i kapalubbang.”—2 COR. 3:17.
KANSION: 62, 65
1, 2. (a) Anni i madduruma nga pagimamma na totolay meyannung ta lallaguray? (b) Anni i ituddu na Biblia nittam meyannung ta lallaguray nga mappili, anna anni ira nga pakkiavu i ikonsidera tam?
NU MEYANNUNG ta personal nga paddesision, kinagi na tadday nga babay ta kofunna: “Ariammà ngana pannonopan; kagiammu ngana laman nu anni kuakku. Mas mabi yari.” Mas kayà na babay nga mekagi sa nu anni i kuanna anne ta usanna i nabalor nga regalu na Namaratu sa—i regalu nga lallaguray. Kunnasi ka gapa? Kayàmu kari tu sikaw lagapa i maddesision, onu mas kayàmu nga tanakuan i maddesision para nikaw? Kunnasim imammatan i lallaguray?
2 Nabayag ngana nga paguruvovugan na totolay yatun nga topiko. Kagian na karuan nga awan tu makagi nga lallaguray—nga nadestina ngana ngamin na Dios i mesimmu. Abbo gapa na karuan nga kurug laman yatun nu awan tu limitasion na lallaguray. Ngem, tapenu malippawa yatun tu fustu, mawag nga ammuattam i kagian na Uvovug na Dios, i Biblia. Ngatta? Kagianna yatun nga pinaro ittam na Dios nga egga lallagurena; yatun i kapasidad anna pakawayya nga mangngua tu sarili nga intelihente nga pappili. (Bibbigan i Josue 24:15.) Tabbagan gapa na Biblia i pakkiavu ira nga: Kunnasi tam nakuan usan i lallaguretam nga maddesision? Egga kari limitasionna yatun? Kunnasi mepasingan na pangusa tam ta lallaguray i monag nga pangaya tam kani Jehova? Kunnasi tam merespeto i desision na tanakuan?
ANNI I MAGIGIAMMU TAM KANI JEHOVA ANNA KANI JESUS?
3. Anni i ehemplo nga nipasingan ni Jehova ta pangusa tu lallaguray?
3 Awan vuluvuga tu limitasion na lallaguray ni Jehova, ngem ehemplo yaya ta pangusa tatun. Angngariganna, pinilina i nasion na Israel nga mabbalin tu totolena, i “espesial nga pakkukuana.” (Deut. 7:6-8) Ari laman tu basta-basta yatun nga pappili. Tinalakkurug ni Jehova i promesana piga siglo ngana i nappasa ta kofunna nga si Abraham. (Gen. 22:15-18) Kanayun gapa nga ipasingan ni Jehova i lallagurena nga mekunnay ta kualidadna ira nga aya anna hustisia. Masingan yatun ta pinaddisiplinana ta Israelita ira, nga namippiga nga pinanawadda i kurug nga paddayaw. Nu napafutuan i pabbabawida, sigga-paran nga ayatan anna ikabbi ira ni Jehova, ta kunna: “Urukku i ariadda pammakatalo. Ayatakku ira gukaban na lallagurè.” (Os. 14:4) Kakkasta nga ehemplo ta pangusa tu lallaguray para ta pammakapian na tanakuan!
4, 5. (a) Sinni i ollu nga nakalawà ta regalu nga lallaguray, anna kunnasina inusa yatun? (b) Anni nga pakkiavu i mawag tu iyavu na kataggi-tadday nittam?
4 Pinili ni Jehova nga paratuan i anghel anna i totolay nga egga lallagureda. I ollu nga nakalawà tatun nga regalu ay i kaka nga anana, “i paningannan ta ari nga masingan nga Dios.” (Col. 1:15) Maski nige nga minay ta davvun ni Jesus, pinilina nga mammakatalo ta Yamana anna ari nevulu ta rebelyon ni Satanas. Turi ta egga ngana yaya ta davvun, inusana i lallagurena tapenu ibita i tentasion ira na Diablo. (Mat. 4:10) Ta napafutuan nga pakimallona nige na patena, kinagi uli ni Jesus i determinasionna nga kuan i uray na Dios. “Ama,” kunna, “nu awayya na ay ililli mà toye ta pazziga-riga ku. Ngem ari tu i urè i matuttul nu ari i urem.” (Luc. 22:42) Parigattam nakuan i nipangusa ni Jesus ta lallagurena nga dayawan si Jehova anna kuan i urena! Posible kari talaga yatun?
5 Wan, maparigattam i ehemplo ni Jesus, megafu ta naparatu gapa ittam ta imahe na Dios. (Gen. 1:26) Ngem egga ira i limitasiottam. Ari tu kagitta na lallaguray ni Jehova i lallaguretam. Ipakanawag na Biblia nga egga ira pagaddetan na lallaguretam anna mawag tu tuttulattam ira i limitasion nga mepangngo nga niyawa ni Jehova nittam. Mas paga, mawag tu mappasakup nakuan i atawa nga babbay ta gi-attawada kunne na gapa ta àna ta maganada. (Efe. 5:22; 6:1) Kunnasi nga afektan danaw nga limitasion i pangusa tam tu lallaguretam? Nakadepende ta tabbag tatun nga pakkiavu i mannanayun nga mappange tam.
I PANGUSA ANNA PANGABUSO TA LALLAGURAY
6. Iyilustra nu ngatta mepangngo nga egga limitasion na lallaguretam.
6 Kurug kari i lallaguray nu egga i limitasionna? Wan! Ngatta makagi tam yatun? Masserbi nga proteksion ta totolay i lallaguray nga egga limitasionna. Angngariganna, mosa tam i lallaguray nga mappili nu mammaneho ta arayyu nga lugar. Ngem mas meyarayyu tam kari ta peligro nu mabbiahe ittam ta highway ira nga awan tu dorob na trapikona, nu sitaw nga egga lallaguray na ngamin nga mappili nu kunnasi kapaspas onu nu sitaw lagapa kayàda nga paddalanan? Siempre ari. Kawagan ira i limitasion tapenu pammakapianan na ngamin i kurug nga lallaguray. Tapenu meyilustra paga i kinasirib na pangiyusa ta lallaguretam ta limitasion ni Jehova, ikonsidera tam i karuan nga angngarigan ta Biblia.
7. (a) Kunnasi neruma si Adan ta tanakuan ira nga pinaratu ta Eden megafu ta lallaguray? (b) Iyesplika nu kunnasi nipasingan ni Adan i lallagurena.
7 Turi ta pinaratu na Dios i ollu nga tolay Gen. 2:19.
nga si Adan, niddanna yaya tu parehu nga regalu nga niyawana ta anghel ira—i lallaguray. Yatutta neruma si Adan ta aya-ayam megafu ta kuadda laman i gannug segun ta nikeparatuda. Innattam i tadday nga angngarigan nu kunnasi nga mepangngo i pinangusa ni Adan ta lallagurena. Naparatu i aya-ayam nige na totolay. Ngem, niyawa ni Jehova ta ollu nga tolay nga anana i pagayaya nga ngaganan yatun ira nga pinaratu. “Pinegafuanan [na Dios] nga iyangay ira ta tolay tapenu mammuan nu anni i iyagalna nira.” Kabalinna nga obserban anna ngaganan tu mepangngo i kada ayam, ari naki-alam onu tinalianan ni Jehova i pinili ni Adan. Lallagu, “maski anni i pangagal na tolay ta kada naparatu, yatun i mabbalin tu ngaganna.”—8. Kunnasi inabuso ni Adan i lallagurena, anna anni i resultana?
8 Ari nakontento si Adan ta neyawa na Dios nga trabahuna nga makkoman anna manangngal ta paraiso nga davvun. Nakurangan yaya ta lallagurena nga tuppalan i dob na Dios: “Maggaka kamu anna umaru kamu, pannuannu i davvun anna imagurayannu, anna pappasakupannu i manango na bebay . . . , i makkaga-kagag ira nga pinaratu . . . , anna i kada sigga-matolay nga pinaratu nga magguyu-guyu ta davvun.” (Gen. 1:28) Pinilina lallagu nga mallampas ta limitasion nga niyawa na Dios nguri ta kinnanna i megamma nga vunga. Narresulta yaw nga grabe nga pangabuso ta lallaguray ta rinivu dagun nga ziga anna daddam ta gaka ni Adan. (Roma 5:12) Mapaguyu tam nakuan na pakannammu ta resulta na desision ni Adan nga usan i lallaguretam tu responsable anna segun ta limitasion ira nga niyawa ni Jehova.
9. Anni nga pappilian i niyawa ni Jehova ta Israelita, anna anni i pinilida?
9 Narensia na gaka-gaka da Adan anna Eva i kina-imperfekto anna patay ta ari maggigginna nga maganada. Ngem egga lagapa nira i regaluda nga lallaguray. Masingan yaw ta pinakilallang ni Jehova ta Israelita ira. Gukaban na aripanna nga si Moises, niddanna ira tu lallaguray nga pilian onu ibita i pribilehio nga mabbalin tu espesial nga pakkukuana. (Ex. 19:3-6) Anni i pinilida? Pinilida nga mabbalin tu totolay na Dios anna naggara-anugutadda: “Ngamin nga kinagi ni Jehova ay sigga-parakkami nga kuan.” (Ex. 19:8) Ngem zimittal i tiempo nga inabusoda i lallagureda nga mappili anna ariadda sinuppal i promesada. Daddammattam nakuan yaw nga pamappalan anna kanayun nga tagibaloran i regalu tam nga lallaguray gukaban na tulu-tuloy nga paddukko kani Jehova anna pattuppal ta matunung ira nga kiddona.—1 Cor. 10:11.
10. Anni ira i pamakurug nga posible para ta imperfekto ira nga totolay nga makedayaw ta Dios i pangusa ta lallagureda? (Innan i letratu ta gafu na artikulo.)
10 Ta Hebreo kapitulo 11, mabibbig tam i ngagan na 16 nga aripan ira na Dios nga pinilida usan i lallagureda segun ta limitasion nga niyawa ni Jehova. Narresulta yatun tu aru nga bendision anna siguradu nga iddanama para ta mappange. Angngariganna, nipasingan ni Noe i daka-dakal nga pangurug anna pinilina nga tuttulan i instruksion ira na Dios nga mamadday tu arka tapenu mapaliag i familiana anna i tumunug ira nga gaka na totolay. (Heb. 11:7) Sigga-paran nga sinuttul da Abraham anna Sara i pangigiya na Dios nira nga umay ta nepromesa nga davvun. Maski nakapanaw ngana ira, egga lagapa ‘i lugar da nga manoli’ ta mariku nga siudad na Ur. Ngem, nakafokus i mata na pangurugda ta mappange nga “nitabba ira na Dios”; nga nakkaraga ira ta “mas mapia nga ili nga paddianan.” (Heb. 11:8, 13, 15, 16) Nilikuran ni Moises i kinariku na Ehipto, nga “mas paga lallagu nga pinili na i makipazziga-riga ta totolay na Dios anne tu mappalappagustu ta manganannuan nga pagayaya nga irattal na katagarulian.” (Heb. 11:24-26) Parigattam nakuan i pangurug danatun ira gukaban na pattagibalor ta regalu nga lallaguray anna pangusa tatun ta pattuppal ta uray na Dios.
11. (a) Anni i tadday ta aru nga bendision megafu ta lallaguray? (b) Anni i motibom ta mepangngo nga pangusam ta lallagurem?
11 Maski gittana mas mabi nu egga i maddesision para nittam, malsa nittam i tadday ta daka-dakal ira nga bendision—i lallaguray. Nakagi yatun nga regalu ta Deuteronomio 30:19, 20. (Bibbigan.) Nekagi ta bersikulo 19 i pappilian nga niyawa na Dios ta Israelita ira. Magigiammu tam gapa ta bersikulo 20 nga niddan ira ni Jehova tu nabalor nga oportunidad tapenu mepasingan nu anni i egga ta giffutuadda. Egga gapa i lallaguretam nga dayawan si Jehova. Awan ngana tu mas importante nga motibo tam ta pangusa ta regalu na Dios nga lallaguray nu ari i pangipasingattam tu aya anna ta pangiyawa tu dayaw anna gloria sa!
ARIAMMU ABUSUAN I REGALUM NGA LALLAGURAY
12. Anni nakuan i ariattam vuluvuga nga kuan ta regalu tam nga lallaguray?
12 Nonopammu nga niddammu tu regalu i kofummu. Siguradu nga madismaya ka nu nammuammu nga nitabbona laman ta basura, onu mas grabe paga, inusana yatun tapenu takitan i tanakuan! Yatutta nonopan nu anni i matageno ni Jehova nu masinganna nga abusuan na aru nga totolay i lallagureda nga mappili ta pattoleda, mas ngana tapenu takitan i tanakuan. Kagitta na neprofesiya ta Biblia nga ta “pangurianan ira nga aggaw,” i totolay ay “ariad-da nga ammu i mabbala-balo.” (2 Tim. 3:1, 2) Ariattam nakuan vuluvuga nga abusuan i nabalor nga regalu ni Jehova. Kunnasi tam gafu mebita nga abusuan i regalu tam nga lallaguray?
13. Kunnasi tam nga malillitan nga abusuan i Cristiano nga lallaguretam?
13 Egga i lallaguretam ngamin nga mappili tu kakavvulu, istilo na sinnun anna itsura, anna dibersion. Ngem mabbalin tu ‘panakkag ta pangngua ta marakay’ i lallaguretam nu mappa-aripattam ta nepattaggan nga pakkaraga onu nu parigattam i kappasirang nga istilo anna uso ta mundo. (Bibbigan i 1 Pedro 2:16.) Imbes nga usan i lallaguray ta “pamagustu ta karagatan na baggi,” determinadu tam nakuan nga mappili nga mekunnay ta tabarang nga: “Kuan nu ngamin yatun ta keraya-rayaw na Dios.”—Gal. 5:13; 1 Cor. 10:31.
14. Ngatta mawag nga mattalo ittam kani Jehova nu usattam i lallaguretam?
Isa. 48:17) Sigga-pakalinno nakuan nga tuttulan i kinakurug ta nainspiran ira nga uvovug: “Ari nga kukua na neravvunan nga tolay i mangigiya lagapa ta dalanna. Ari nga metunung na tolay i mismu nga dala-dalanna.” (Jer. 10:23) Ariattam nakuan masilu nga mappili segun ta pakalippawa tam, gittana kingngua da Adan anna Israelita ira. Lallagu, ‘mattalo tam kani Jehova ta interu nga futu tam.’—Prov. 3:5.
14 Tadday paga nga makua tapenu memmuguran i regalu nga lallaguretam ay i pattalo kani Jehova anna pangipamavulun nga igiyana ittam segun ta makepaliag nga limitasion nga niyawana nittam. Yaya laman ‘i Tadday nga manuttuddu nittam tapenu mabenefisiowattam, i Tadday nga mangigiggiya nittam ta dalan nga mawag tu lakarattam.’ (PANGIRESPETO TA REGALU NGA LALLAGURAY NA TANAKUAN
15. Anni i magigiammu tam ta prinsipio nga mabibbig ta Galacia 6:5?
15 Tadday ta limitasion na lallaguretam i pangirespeto ta kepangngattan na tanakuan nga maddesision. Ngatta? Megafu ta egga i regalu na ngamin tu lallaguray, awan tu dua nga Cristiano nga kanayun nga parehu i desisiodda. Fustu yatun maski nu meyannung ta kondukta anna paddayaw tam. Daddamman i prinsipio nga mabibbig ta Galacia 6:5. (Bibbigan.) Nu malippawa na kada Cristiano nga “mawag tu akkatan na kataggi-tadday i karga na laggapa,” irespeto tam i kepangngattan na tanakuan nga usan i lallagureda.
Maddesisiottam ngem ariattam ifuersa yatun ta tanakuan (Innan i parapo 15)
16, 17. (a) Kunnasi nabbalin tu isyu ta Corinto i lallaguray nga mappili? (b) Kunnasi yatun sinolba ni Pablo, anna anni i itudduna yaw nittam?
16 Ikonsidera i ehemplo ta Biblia nga nangipasingan nu ngatta kawagan nga irespeto tam i lallaguray na kapangngurug tam ta paddesisiodda gukaban na konsensia. Nassirinna i Cristiano ira ta Corinto megafu ta pakkakan tu karne nga awayyana nga netunnag ta sinan-dios onu santu ira tapus melaku ta palengke. Irason na karuan: ‘Awan mabba tu kuenta na santu ira, marenu lagapa i konsensiam nu kanammu yatun nga karne.’ Ngem, para ta dati ira nga maddayaw ta santu ira, gittana paddayaw yatun nga pakkakan. (1 Cor. 8:4, 7) Sensitibo yaw nga isyu, tadday nga rason ta maggi nga passirinna na kongregasion. Kunnasi inuffunan ni Pablo i Cristiano ira ta Corinto tapenu malippawada i pagimamma na Dios meyannung tatun?
17 Ollu, niperaddam ni Pablo ta dua nga grupo nga ari mamaddukko nira kani Jehova yatun nga makan. (1 Cor. 8:8) Tumunug, sinabarangnganna ira nga ariadda ipamavulun nga i ‘uru-ureda laggapa i kegafuan na kesiddukal danuri makafi i angngurugda.’ (1 Cor. 8:9) Kabalinna, kinagiananna danuri makafi i konsensiada nga ariadda ivuya danuri nappili nga kuman tu karne. (1 Cor. 10:25, 29, 30) Yatutta, taw nga importante nga gannug meyannung ta paddayaw, mawag nga memmugug nga maddesision i kada Cristiano segun ta konsensiana. Ariattam kari gafu nga irespeto nakuan i kepangngattan na wawwaragi tam nga maddesision lagapa ta simple ira nga gannug?—1 Cor. 10:32, 33.
18. Kunnasim mepasingan nga tagibalorammu i regalu nga lallaguray?
18 Niregaluan ittam ni Jehova tu lallaguray nga nelagum tatun i kurug nga kapalubbang. (2 Cor. 3:17) Tagibalorattam yatun nga regalu megafu ta mepasingattam i monag nga pangaya kani Jehova ta paddesisiottam. Kanayuttam tam nakuan idemonstra i appresasiottam taw nga regalu gukaban na pangusa tatun nga makedayaw ta Dios anna pangirespeto ta pangusa na tanakuan ta regaluda.