MATALIKARAG nga massesserbi i aru nga maginganay nga Saksi ta lugu-lugar nga mas dakal i pakawagan para ta mangilayyagayya ta Pappatulan. Dekada ngana nga masserbi i karuan nira ta tanakuan nga nasion. Anni nakoffun nira tapenu magali ta tanakuan nga nasion piga ragun ngana i nappasa? Anni i nagigiammuda ta passerbi tatun ira nga nasion? Kunnasi i pattoleda tari? Ininterviumi i karuan taw nga ekspiriensadu ira nga sister. Nu awan tu atawam anna egga i napafutuan nga pakkaragamu ta kuruga makapagayaya nga ministerio, siguradu kami nga mabenefisiowakka ta komentoda ira. Ta kakuruganna, mabenefisiowan ngamin i totolay na Dios ta pangikonsidera ta ehemploda.

Nononopammu kari nu makayam talaga i mappayunir nga single ta tanakuan nga nasion? Si Anita nga 75 anios ay talaga madduda meyannung ta abilidadna ira. Neyana yaya ta England, anna namegafu mappayunir turi magedad tu 18. “Kakayà ku nga tudduan i totolay meyannung kani Jehova,” kunna, “ngem ariakku ekspektan nga makapasserbi ngà ta abroad. Ariakku naggigiammu tu tanakuan nga lengguahe anna kumbinsidu ngà nga ari ngà mabbalin tu malalaki tatun. Yatutta nakaddag ngà turi egga nalawà ku tu imbitasion para ta Gilead School. Ariakku mangurug nga i kagittà nga simple laman ay makalawà tu kunnatun nga imbitasion. Ngem nanono ku, ‘Nu ta pagimamma ni Jehova mawayyà yatun, puruebakku.’ Maturu tu 50 dagun i nappasa. Namegafu tatun, massesserbi ngà bilang misionero ta Japan.” Kunna paga ni Anita: “Nu mittan, makapagayaya nga kagiakku ta mabbing ira nga sister, ‘Magempake kamu ngana tapus mevulu kamu ta pinakamagayaya nga biahe ta ngamin nga tiempo!’ Magayaya ngà kagian nga aru i nangngua tatun.”

Aru ta sister ira nga nasserbi ta tanakuan nga nasion i mabbabang ta gafu. Kunnasi nassikan i nonoda?

“Durante nga dumakal ngà, kakayàku nga makasta i pabbalinan na pattolè, nga nakasentro ta panguffun ta tanakuan,” kunna 64 anios ngana nga si Maureen. Turi 20 anios yaya, nagali yaya ta Quebec, Canada, nu sitaw dakal i pakawagan para ta papayunir. “Ari nabbayag, nakalawa ngà tu imbitasion nga magatende ta Gilead School, ngem maganassinnà umay ta lugar nga ari ngà familiar anna nu ariakku kavulu i kokkofukku.” Kunna paga: “Mavurung ngà gapa nga panawan i yenà nga manangngaw ta mataki nga yamà. Aru nga gabi nga tumatangi ngà nga makimemallo kani Jehova meyannung tatun. Turi  ta nipakiyuvovug ku yatun ta magana ku, pinagaramdà nga akseptan i imbitasion. Natageno ku gapa i meddu nga suporta na kongregasion ta magana ku. Nakoffun niakan i pakaekspiriensà ta minangngikavurung nga lima ni Jehova nga mattalo sa nga tangngawannà gapa. Tatun nga punto, nakaprepara ngà ngana nga manaw!” Namegafu ta 1979, maturu tu 30 dagun ngana nga nasserbi bilang misionero si Maureen ta West Africa. Ta maddaggun, massesserbi lagapa nga espesial nga payunir si Maureen ta Canada durante nga tangngawanna i yenana. Meyannung ta daga-ragun nga pinasserbina ta tanakuan nga nasion, kunna: “Kanayun nga iyawa ni Jehova i pakawagakku anna nu kannì nga mawag yatun.”

Si Wendy nga 65 anios ay namegafu nappayunir ta Australia turi tinedyer yaya. Meraddammanna: “Minappasirannà anna marigatannà makibbida ta estrangheru ira. Ngem inuffunannà na pappayunir nu kunnasi makilallang ta ngamin nga klase na totolay, yatutta ziminakal i komfiansà. Natageno ku gabbalaman nga ari ngana tu isyu i komfiansà. Megafu ta pappayunir, natudduannà nga maddepende kani Jehova, yatutta egga ngana i komfiansà nga masserbi ta tanakuan nga nasion. Inimbitannà gapa na tadday nga sister nga nasserbi tu misionero ta Japan ta maturu tu 30 dagun, nga puruebakku mallayyagayya tu tallu vulan ta Japan. Megafu ta pakipattrabahu sa, ziminakal i pakkaraga ku nga magali ta abroad.” Turi 1986, nagali si Wendy ta Vanuatu, tadday nga isla nga nasion nga ma-1,770 kilometro ta zigattu na Australia.

Egga paga ta Vanuatu si Wendy anna massesserbi ta remote translation office. “Dakal nga pagayaya para niakan nu makasingannà tu grupo anna kongregasion ira nga mabuu ta arayyu ira nga rehion,” kunna. “Daka-dakal nga pribilehio nga mapeggan tu maski baddi nga parte ta trabahu ni Jehova taw ira nga isla.”

Si Kumiko nga 65 anios, ay masserbi bilang regular payunir ta Japan turi ta nirekomenda na partnerna nga payunir nga magali ira ta Nepal. “Pakatotoliannà nga niyavu meyannung tatun, ngem kanayukku gapa pammanakitan yatun,” kunni Kumiko. “Mavurung ngà ta paggigiammu tu bagu nga lengguahe anna ta pakibagay ta bagu nga pallevu. Egga paga i problema ta finansial nga pakawagan nu magali ta tanakuan nga nasion. Durante nga paddesisionakku danaw ira nga problema, nadisgrasia ngà ta motor tapus neyospital ngà. Tapus nanono ku: “Sinni i makannammu nu anni i tumunug nga mesimmu niakan? Baka mattaki ngà tu grabe tapus awan ngana tu tiansà makapappayunir ta tanakuan nga nasion. Awayyà kari masserbi maski tanga-ragun laman?’ Napafutuan nga nakimallo ngà kani Jehova tapenu makapaddesisionnà.” Turi nallawan si Kumiko ta hospital, nappasiar yaya ta Nepal, tapus nagali ira tatun na partnerna nga payunir.

 Nu daddamman ni Kumiko i ma-10 ragun nga pinasserbina ta Nepal, kunna: “Nelisi tu kagitta na Uzzin nga Bebay i problema ira nga kavurungakku. Magayaya ngà nga nasserbi ngà ta lugar nga dakal i pakawagan. Maruddu nga nu ilayyagayya i mensahe na Biblia ta balay na tadday nga familia, lima onu annam nga karruba i umay magginna. Masissippo nga makkiddaw niakan tu tract meyannung ta Biblia maski i abbarabbing. Kappagayaya i mallayyagayya ta teritoria nga aru i magginna.”

Neparubang gapa ta kapurueba yatun ira nga nainterviu nga sister nga awan tu atawada. Kunnasida inarubang yatun?

“Ta gafu, narigatannà nga meyarayyu ta familià,” kunni Diane, nga taga-Canada. Nasserbi yaya tu maturu 20 dagun ta Ivory Coast (Côte d’Ivoire ngana) anna 62 anios ngana yaya. “Nikiddò kani Jehova nga uffunannà nga ayatan i totolay ta asayment ku. Nipakanawag na tadday ta instruktor ku ta Gilead nga si Brother Jack Redford, nga ta gafu, awayyana tu mavurungan, onu makaddagakkami paga lagu ta paddia-paddian ira ta asaymentmi, netallugaring nu meparubang ta grabe nga ziga. Ngem kinagina: ‘Ariannu innan i ziga. Innannu i totolay, i mukada anna i matada. Obserbannu i reaksiodda nu makaginna ira tu kinakurug ta Biblia.’ Yatun i kingnguà, anna talaga bendision yatun! Durante nga ilayyagayyà i makapabannay nga mensahe na Pappatulan, masingakku nga makkilyag ta ayaya i mukada!” Anni paga i nakoffun kani Diane tapenu makapasserbi ta tanakuan nga nasion? “Naddukko i relasiokku ta Bible study ira anna natageno ku i monag nga pagayaya turi ta nabbalin ira tu matalo nga aripan ni Jehova. Nabbalin tu balè i asayment ku. Napeggannà tu yena, yama, anna wawwaragi ira ta espiritual gitta na nipromesa ni Jesus.”—Mar. 10:29, 30.

Si Anne nga 46 anios, ay masserbi ta tadday nga lugar ta Asia nga megamma i trabahu tam. Kunna: “Ta daga-ragun nga passerbì ta nadduruma nga lugar ta abroad, nakavvulu ku i sister ira nga tanakuan i naggafuan anna personalidadda niakan. Nu mittan, kegafuan yatun na ari pakkarantindian anna taki na nono. Nu mesimmu yatun, mas ammammuakku i kakavvulu ku ta balay tapenu mas malippawa ku i kostumbreda. Mappursigi ngà gapa nga mas meddu anna rasonable nira. Magayaya ngà ta navvunga i appursigì anna narresulta tu aru nga monag anna mannanayun nga pakikkofun nga nakoffun niakan tapenu makapagattam ta asayment ku.”

 Turi 1993, si Ute nga taga-Germany nga 53 anios, ay ne-asayn bilang misionero ta Madagascar. Kinagina: “Ta ollu, narigatannà nga gigiammuan i lokal nga lengguahe, makibagay ta mapatu nga klima, anna ta pallaban ta malaria, amoeba ira, anna ta alipo onu ipo ira. Ngem nakalawa ngà tu aru nga uffun. Inuffunannà na sister ira, na ánada, anna na estudiantè ira ta Biblia nga gigiammuan i lengguaheda. Meddu nga tangngawannà na partner ku nga misionero nu mattaki ngà. Ngem pinaka-importante, inuffunannà ni Jehova. Regular nga ivuvvu ku sa i pakavurungakku gukaban na pakimallo. Tapus mapasensia nga innaggakku​—nu mittan piga nga aggaw, mittan piga nga vulan—​nige nga matabbag ira i pakimallo ku. Sinolba ngamin ni Jehova i problema.” Ma-23 dagun ngana nga massesserbi ta Madagascar si Ute.

Kagitta na aru nga need-greater onu masserbi ta dakal i pakawagan, maruddu nga kagian na sister ira nga masserbi ta tanakuan nga nasion nga napeggan tu aru nga bendision i pattoleda. Anni ira nga bendision i nalawàda?

Si Heidi nga taga-Germany nga 73 anios, ay massesserbi bilang misionero ta Ivory Coast (Côte d’Ivoire ngana) turi paga 1968. “I dakal nga pagayaya nga nalawà ku,” kunna, “ay masingan i espiritual ira nga ánaku nga ‘mattolay ira segun ta kurug.’ Papayunir anna elder ta kongregasion ngana i karuan ta datì ira nga Bible study. Aru nira i magagal niakan tu Mama onu Lola. Imammataddà nga kafamilia na tadday tatun ira nga elder kunne na gapa na atawana anna ánana. Yatutta, niddannà ni Jehova tu ana nga lalaki, manugang, anna tallu nga afu onu afuku.”—3 Juan 4.

Si Karen nga taga-Canada ay 72 anios, nga nasserbi tu maturu 20 dagun ta West Africa. Kunna: “Sinudduannà na pammisionero nga mabbalin tu mas minassakrifisio, meddu, anna mapasensia. Nakoffun gapa i kapeggan tu kavulu tu nadduruma i nasionalidadda nga mas mapalawa i pagimamma ku. Nagigiammù nga egga i nadduruma nga metodo na pangngua ta ganna-gannug. Kuruga dakal nga bendision ta maddaggun nga mapeggan tu kokkofun ta interu mundo! Nanguli ngana i pattolay anna asaymentmi ira, ngem ari tu nanguli i pakkofummi.”

Si Margaret nga 79 anios nga taga-England, ay nasserbi bilang misionero ta Laos. Kunna: “Nakoffun i passerbì ta tanakuan nga nasion tapenu maekspiriensà mismu nu kunnasi alawatan ni Jehova ta organisasionna i totolay ta nadduruma nga lahi. Napatuyagna yatun i pangurug ku. Buu i pattalo ku nga si Jehova i mangidirekta ta organisasionna anna metuppal ngamin i gakkagna.”

Wan, napakurug na sister ira nga awan tu atawada nga masserbi ta tanakuan nga nasion i kapianan nga rekord ta Cristiano nga ministerio. Mepangngo ira ta napafutuan nga komendasion. (Uk. 11:40) Umaru paga i biladda. (Sal. 68:11) Molim kari i sirkumstansiam anna tuttulan i dakkua ira na matalikarag nga sister ira nga nainterviu taw nga artikulo? Nu wan, siguradu nga “i pia na Yafu ay en-nu mismu nga kakkapan.”​—Sal. 34:8.