1. Ngatta mattolay ittam ta nerumu-ruma nga tiempo?

MATTOLAY ittam ta tiempo na historia na tolay nga talaga nerumu-ruma. Kagitta na niprofesiya na Biblia, pattaraddayan ni Jehova i “magaru nga totolay nga awan tu makabilang ta karu da! Madduma-ruma i naggafuanad-da nga nasion, rasa, tribu, anna madduma-ruma i paguvovug da.” Mabbuu ira tu “makapangngua nga nasion” na maturu nga walu million nga magayayya nga “aggaw-gabi nga masserbi [ta Dios].” (Nep. 7:9, 15; Isa. 60:22) Awan paga vuluvuga tu kunnatun dati nga karu danuri na mangaya ta Dios anna ta kasittoleda.

2. Anni nga mali nga klase na aya i masingan ta totolay nga arayyu ta Dios? (Innan i letratu ta gafu na artikulo.)

² Ngem, niprofesiya gapa na Katurakan nga ta kaggawattam, masingan i mali nga klase na aya​—nga nakivuan tu pakka-makasarili nga ipasingan na totolay nga arayyu ta Dios. Nitura ni apostol Pablo: “Ta pangurianan ira nga aggaw . . . , ayatan na totolay i baggi da laman, anna kuartu laman i agga-nono da . . . , anna i ala-alerad-da noka i pappaga-pagayaya laman anne ta Dios.” (2 Tim. 3:1-4) Yaw nga aya nga nakasentro ta baggi ay mekontra ta Cristiano nga aya; makkatulia yatun. Ari marresulta tu pagayayya nga ekspektan na totolay i pappursigi  ta makasarili ira nga addetan. Mamalattuag lallagu yatun tu makasarili nga mundo nga mamazziga ta pattolay na ngamin.

3. Anni i gigiammuattam taw nga artikulo, anna ngatta?

³ Nalippawa ni Pablo nga normal ngana laman i makasarili nga aya anna mamappeligro yatun ta Cristiano ira. Yatutta nanabarang yaya nga “arayyuam-mu” danuri mali i klase na ayada. (2 Tim. 3:5) Ngem ariattam talaga nga mebita nga makilallang ta kuddanatun nga tolay. Yatutta, kunnasi tam marayyuan i makamundo nga ugu-ugali nga egga ta pallevu tam anna mappursigi nga mapagayayya si Jehova, i Dios na aya? Paddumattam i makadios nga aya ta aya nga natukoy ta 2 Timoteo 3:2-4. Makoffun i pangngua tatun tapenu ma-usito anna mapakasta i aya nga mepasingattam, i klase na aya nga mangirattal tu kurug nga pakkakontento anna pagayayya.

4. Ngatta ari mali i balanse nga pangaya ta baggi?

⁴ “Ayatan na totolay i baggi da laman,” kunna nainspiran nga apostol. Mali kari para nittam nga ayatan i baggi tam? Ari, normal laman yatun, anna mekiddaw paga lagu i balanse nga pangaya ta baggi. Kunnatun i pinaddisenio nittam ni Jehova. Kinagi ni Jesus: “Ayatam-mu i ikattolem ta kunna pangaya mu ta baggim.” (Mar. 12:31) Nu ariattam ayatan i baggi tam, ariattam makepasingan tu aya ta kasittoletam. Mabibbig tam paga ta Katurakan: “Ayatan na lallaki i gi-attawad-da ta kunna pangaya da ta baggi da. I lalaki nga mangaya ta atawa na ay ayatan na i baggi na mismu. Ta awan tu tolay nga mangikalussaw ta baggi na, nu ari pakanan anna immuguran na.” (Efe. 5:28, 29) Yatutta i mepangngo nga pangaya ta baggi ay kawagan.

5. Anni i makagim turi ta sobra i pangayada ta baggida?

⁵ I pangaya ta baggi nga mabibbig ta 2 Timoteo 3:2 ay ari nga normal, anna ari nga balanse. Killu yatun anna makasarili nga aya. Nu sobra i pangaya na tadday ta baggina, dakal i paninganna ta baggina anne ta pakawagan. (Bibbigan i Roma 12:3.) Nakasentro i pattoleda ta baggida. Ariadda kuruga importan i tanakuan. Nu egga i marake nga mesimmu, egga tendensiada nga paliwatan i tanakuan imbes nga akseptan i responsibilidad. Niyarig na tadday nga komentariu ta Biblia danuri mangaya ta baggida ta “tadday nga hedgehog onu porcupine nga . . . mafforma tu gittana bola, tapenu yaya laman i mappatu gukaban na malapo nga dudduna, . . . anna . . . ilawanna i siggug ira nga sìna para ta tanakuan nga awan tu dudduda.” Ari tu kurug nga magayayya i kunnatun nga makasarili nga totolay.

6. Anni i resulta na aya ta Dios?

⁶ Mangurug i karuan nga iskolar na Biblia nga i pangaya ta baggi ay ollu ta lista ni Pablo ta negatibo ira nga kualidad nga normal ngana laman ta pangurianan ira nga aggaw megafu ta yatun i mamalattuag ta tanakuan paga nga kualidad. Ngem, mangilawan danuri mangaya ta Dios tu talaga neruma nga klase na vunga. Nikonekta na Biblia i makadios nga aya ta pagayayya, imammo, pappasensia, kinasippo, kinapia, pangurug, kinalumamo, anna pangifugag ta baggi. (Gal. 5:22, 23) Nitura na salmista, “Magayayya i totolay nga i Diosda ay si Jehova!” (Sal. 144:15, NW) Magayayya nga Dios si Jehova, anna masingan gapa yatun nga kualidad ta totolena. Ari tu kagitta danuri mangaya ta baggida anna danuri kayàda laman i mangalawa, magayayya i aripan ira ni Jehova ta pangisakrifisio ta baggida para ta pammakapianan na tanakuan.​—King. 20:35.

7. Anni ira i pakkiavu nga makoffun nittam nga usitakkan i aya tam ta Dios?

⁷ Kunnasi tam mammuan nga takkabban ngana na pangaya ta baggi tam i pangaya tam ta Dios? Ikonsidera i tabarang ta Filipos 2:3, 4: “Arian nu nga kuan i maski anni nga gannug megafu laman ta ikaya nu nga mala i karagatan nu, onu megafu ta aya nu nga meyatannang. Mappakalinno kamu lallagu, anna ipay nu nga kanayun ta nono nu tu mas mapia i karuan  ira nga totolay anne nikamu. Arian nu nga nonopan i pammakapianan nu laggapa, nu ari i pammakapianan na kataggi-tadday nikamu.” Iyavu tam ta baggi tam: ‘Iyap-aplikà kari yatun nga tabarang ta pattolè? Talaga kari nga karagatakku nga kuan i uray na Dios? Kuakku kari i adde na mawayyà tapenu uffunan i tanakuan, ta kongregasion anna ta ministerio?’ Ari tu kanayun nga mabi i pangisakrifisio ta baggi tam. Kawagan i tiempo anna siki-sikan. Ngem egga paga kari i mas nga mamagayayya nittam anne ta pakannammu nga faboran ittam na Soberano ta interu uniberso?

8. Anni i kingngua na tanakuan megafu ta ayada ta Dios?

⁸ Napaguyu i karuan nga panawan i makasta nga trabahuda nga dakal i suelduna megafu ta aya ta Dios anna tapenu mas makapasserbi kani Jehova. Tadday nga doktor si Ericka nga taga-United States. Ngem imbes nga karagatanna i atannang nga posision ta medisina, nabbalin yaya tu regular payunir anna nasserbi ta aru nga nasion kavulu i atawana. Nu manonona i nappasa, kunna: “Talaga magayayya i pattolemi megafu ta aru nga ekspiriensami ta panguffun ta foreign language, kunne na gapa i pakikofun ira nga nabuumi. Doktor ngà lagapa, ngem megafu ta nakafokus i tiempò anna sikakku ta panguffun ta tanakuan nga moruan ta espiritual anna panangngaw ta kawagan na kongregasion, yatun i nangirattal niakan tu napafutuan nga pagayayya anna imammo.”

9. Ngatta ari makerattal tu kurug nga pagayayya i pangaya ta kuartu?

⁹ Nitura ni Pablo nga mabbalin i totolay tu “kuartu laman i agga-nono da.” Piga dagun ngana i nappasa, egga i nakayuvovug na tadday nga payunir ta Ireland meyannung ta Dios. Nilawan natun i pitakana, naddukku tu pinapel nga kuartu tapus niyodduna yatun, nga kunna: “Yaw i dios ku!” Maski nu ariadda aminan yatun, aru nga totolay i makatageno tu kunnatun. Ayatadda i kuartu anna i gannug ira nga magatang natun. Ngem, inabiso na Biblia: “I minangngaya tu pira ay ari noka nga makontento ta pira, maski i sinni nga minangngaya tu kinariku ari noka nga makontento ta pagaleganna.” (Ecl. 5:10) Kanayun nga karagatan na kunnatun nga totolay i mas aru nga kuartu, anna mappursigi ira nga ammungan paga, yatutta “nepallo nga daddam i nattuppalad-da.”​—1 Tim. 6:9, 10.

10. Anni i kagian na Biblia meyannung ta kinariku anna kinapobre?

¹⁰ Siempre, mawag tam ngamin i kuartu. Makeyawa gapa yaw tu proteksion. (Ecl. 7:12) Ngem talaga kari nga makapagayayya i tadday maski nu makalanno laman para ta inaggaw nga pakawagan i egga sa? Wan! (Bibbigan i Eclesiastes 5:12.) Nitura ni Agur nga ana ni Jakeh: “Ariammà iddan tu kinapobre onu kinariku. Pagurayammà nga mofu ku i billè nga makan.” Malippawa tam i rasonna nu ngatta arianna kayà nga mabbalin tu sobra i kapobrena. Niyesplikana nga manakina nga matenta nga makkoko megafu ta mepasiranan i Dios. Ngem ngatta nipakimallona nga ari nga marriku? Kunna: “Tapenu ariakku makontento tapus iniga taka anna kagiakku, ‘Sinni si Jehova?’” (Prov. 30:8, 9) Siguradu nga egga i manono mu tu totolay nga mas mattalo ira ta kinarikuda anne ta Dios.

11. Anni i tabarang ni Jesus meyannung ta kuartu?

¹¹ Danuri mangaya ta kuartu ay ariadda nga mapagayayya i Dios. Kinagi ni Jesus: “Awan tu tolay nga mapparehu i passerbi na ta dua nga pakiyafuan. Ta awayya na tu ikalussaw na i tadday anna iddukan na i tadday. Onu mas napasikkal i passerbi na ta tadday anna uyu-uyawan na i tadday. Arian na nga awayya tu maggiddan i pangaya ta Dios anna pangaya ta kuartu.” Kinagina paga: “Ari kamu nga magunnug ta kukua ira nga masserbi nikamu toye ta utun na davvun. Ta danaw ay kanan na angi, magattay, onu tallungan na makkoko. Magunnug kamu lagu ta  kukua ira nga masserbi nikamu ta langi. Tari, i kukua ira ay ari nga kanan na angi, ari nga magattay, anna ari nga matallung na makkoko.”​—Mat. 6:19, 20, 24.

12. Kunnasi makoffun i simple nga pattolay tapenu mas makapasserbi ta Dios? Mangistoria tu ekspiriensa.

¹² Nemammatan na aru nga ari laman tu mas makapagayayya i pattolay tu simple, nu ari, mas paga nga napeggan ira tu tiempo nga masserbi kani Jehova. Nilaku ni Jack nga taga-United States i dakal nga balena anna negosiona megafu ta ammuna nga nu kuanna yatun mas posible para nira anna na atawana nga mappayunir. Nanonona: “Mariga nga panawan i makakkasta nga balay anna negosiomi. Ngem ta aru nga dagun, maruddu nga lubbe ngà ta balay nga mataki i ulù megafu ta problema ira ta trabahu. Ngem kanayun nga magayayya i atawà nga regular payunir. Kagian na atawà, ‘I boss ku i pinakamasippo ta ngamin!’ Sangawe nga payunir ngà ngana, parehu ngana i boss-mi, si Jehova.”

13. Kunnasi tam ma-usito i pagimamma tam ta kuartu?

¹³ Tapenu ma-usito i pagimamma tam ta kuartu, innattam nu anni talaga i tabbag tam taw ira nga pakkiavu: ‘Talaga kari nga kurugakku anna mattolay ngà segun ta kagian na Biblia meyannung ta kuartu? Mas pagolluakku kari i magaleg tu kuartu? Mas nabalor kari niakan i material ira nga gannug anne ta relasiokku kani Jehova anna ta totolay? Talaga kari nga mattalo ngà nga iyawa ni Jehova i pakawagakku ira?’ Makapattiwala ittam nga ari pagurayan ni Jehova danuri magiddanama sa.​—Mat. 6:33.

14. Anni i rasonable nga pagimamma ta pappaga-pagayayya?

¹⁴ Kagitta na neprofesiya, aru nga totolay ta maddaggun i mangaya ta “pappaga-pagayaya.” Nu kunnasi nga awan gapa tu marake ta rasonable nga pagimamma ta baggi anna ta kuartu, awan gapa tu marake ta balanse nga pagimamma ta pappaga-pagayayya. Ari kayà ni Jehova i nepallo nga pangiyetu tam ta baggi onu ari vuluvuga nga pakiparte ta marenu ira nga dibersion nga mamagayayya. Ipagaram na Biblia ta matalo ira: “Umeka, sigga-pagayayya nga kanan i kanammu, anna minum tu binarayang nga sigga-pagayayya i futu.”​—Ecl. 9:7.

15. Anni nga klase na pappaga-pagayayya i mabibbig ta 2 Timoteo 3:4?

¹⁵ Mabibbig ta 2 Timoteo 3:4 i appursigi ta  pappaga-pagayayya nga ari nelavu i Dios. Innan nga ari kinagi na bersikulo nga mas ayatan na totolay i pappaga-pagayayya anne ta Dios, nga kebalinanna nga egga i baddi nga ayada para sa. Mabibbig tatun nga “anne ta Dios.” Nitura na tadday nga iskolar: “Ari kebalinan naw [nga bersikulo] nga egga gapa i pangayada ta Dios. Kayàna kagian nga awan vuluvuga tu pangayada ta Dios.” Talaga serioso nga tabarang turi ta makkaraga ta ari mepangngo nga pangaya ta pappaga-pagayayya! Tukuyan na uvovug ira nga “ala-alerad-da noka i pappaga-pagayaya” danuri nataga ta “neravvunan nga pappaga-pagayaya.”​—Luc. 8:14.

16, 17. Anni nga ehemplo i nipasingan ni Jesus meyannung ta pappaga-pagayayya?

¹⁶ Perfekto nga nipasingan ni Jesus i balanse nga pagimamma ta pappaga-pagayayya. Nagatende yaya tu “boda” anna “dakal nga funsion” onu langang. (Juan 2:1-10; Luc. 5:29) Ta boda, milagro nga pinabbalinna tu binarayang i danum, nga nangammung ta abasto nga makkurang ngana. Ta tadday paga nga okasion, pinammanakitanna i sobra nga pappakatunung nga pagimamma danuri makkritika sa megafu ta pakkakan anna paginum.​—Luc. 7:33-36.

¹⁷ Ngem, ari nisentro ni Jesus i pattolena ta pappaga-pagayayya. Pinagolluna si Jehova anna inusana i pattolena tapenu passerbian i tanakuan. Sigga-paran yaya nga attamman i mataki nga kapatay ta estaka tapenu mepaliag i totolay. Kinagi ni Jesus turi ta maya nga tumuttul ta dakkuana: “Mapalag kamu nu ipasa-pasiranad-dakamu, dara-darumad-dakamu, anna para-paraketad-dakamu, megafu laman niakan. Magayaya anna mappalupagia kamu lagu, ta dakal i bala-balo nu noka ta langi. Kunnaw gapa i nikaziga-riga na profeta ira gari ta katolay da.”​—Mat. 5:11, 12.

18. Anni ira nga pakkiavu i makoffun nittam tapenu ma-usito i konag na pangaya tam ta pappaga-pagayayya?

¹⁸ Kunnasi tam mammuan i konag na pangaya tam ta pappaga-pagayayya? Iyavu tam ta baggi tam: ‘Segunda laman kari i study ira anna ministerio ta dibersion? Sigga-paran ngà kari nga iyetukan i baggì tapenu makapasserbi ta Dios? Meyannung ta dibersion, ikonsiderà kari i pagimamma ni Jehova ta piliakku ira?’ Nu talaga ayatattam i Dios, lisiattam nakuan ari laman danuri mamallussaw sa, nu ari, danuri gannug nga pagabbo tam nga mamallussaw sa.​—Bibbigan i Mateo 22:37, 38.

19. Sinni danuri ari vuluvuga nga mabbalin tu kurug nga magayayya?

¹⁹ Kabalin na ma-6,000 dagun nga pazziga-riga na totolay, aranni ngana nga mangultimo i mundo ni Satanas. Napannu ngana i davvun tu totolay nga nakafokus ta pangaya ta baggi, kuartu, anna pappaga-pagayayya. Ira danuri pursigidu nga mala i karagatadda, anna nakasentro i pattoleda ta gustuda laman. Ari vuluvuga nga mabbalin nga kurug nga magayayya i kuddanatun. Ngem kagitta na kinagi na salmista: “Mapalag i tolay nga uffunan na Dios ni Jacob; i pagiddanaman na ay i YAFU nga Dios na.”​—Sal. 146:5.

20. Kunnasi nga nangirattal nikaw tu pagayayya i aya ta Dios?

²⁰ Dumakal i aya ta Dios ta nallatanan na totolay ni Jehova, anna makkaru ira kada dagun. Ebidensia yaw nga mammaguray ngana i Pappatulan na Dios anna aranni ngana nga mangirattal tu napakaru nga bendision ta davvun. Maggafu i kurug anna mannanayun nga pagayayya ta pagangngua ta uray na Dios anna ta pakannammu nga mapagayayya tam i Supremo nga Dios. Danuri mangaya kani Jehova ay makapagayayya adde ta mannanayun! Ta tumunug nga artikulo, ikonsidera tam i karuan nga kualidad nga resulta na makasarili nga aya anna innan nu kunnasi nga mekontra danaw ta kualidad ira nga masingan ta aripan ira ni Jehova.