1. Anni ira nga problema i meparubang nittam, ngem anni i rason nu ngatta magayayya lagapa si Jehova ta matalo ira nga aripanna? (Innan i letratu ta gafu na artikulo.)

SIGURADU nga umanugu ka nga ari mawanan tu problema i pattolay taw nga sistema. Aru ta wawwaragi i meparubang ta serioso ira nga taki. I karuan, maski bako onu lakay ngana ay tattangngawadda lagapa i papparientesda nga manakam gapa. Marigatan gapa i karuan nga iyawa i pakawagan na familiada, ari tu mangina ira nga gannug, nu ari maski i inaggaw nga pakawagadda. Ammu tam gapa nga aru i meparubang, ari laman ta tadday nga problema, nu ari, ta napporotung nga problema! Kawagan naw i aru nga oras, sikan, anna kuartu. Ngem, buu lagapa i pattalo mu ta promesa ira na Dios; matuyag lagapa i pangurug mu ta mas makasta nga mappange. Talaga magayayya si Jehova nu kunnatun!

2. Anni nga pamagaram i mala tam ta Isaias 40:29, ngem anni i serioso nga kamali i awayya tam nga makua?

² Matageno mu kari nu mittan nga gittana ariammu ngana maattamman i problema ira? Nu wan, ari laman tu sikaw i nakatageno tu kunna. Kagian na Biblia nga natageno gapa na matalo nga aripan ira gari nga kayàda ngana nga magimmang. (1 Pat. 19:4; Job 7:7) Ngem, imbes nga makkafi, nakkiddaw ira tu sikan kani Jehova. Ariadda nadismaya, megafu ta “mangiyawa [i Dios] tu  sikan ta tadday nga nabannag.” (Isa. 40:29) Kaddaraddam, natageno na karuan nga aripan na Dios i kapianan nga pangarubang ta problema ira ay ‘magimmang labbi masserbi,’ nga gittana mamakadammo i Cristiano ira nga aktibidad tam imbes nga bendision. Yatutta, nagimmang ira mabbibbig tu Uvovug na Dios, magatende tu study ira, anna mallayyagayya​—kagitta na iddanaman ni Satanas nga kuadda.

3. (a) Kunnasi tam malabanan si Satanas ta pamakkafina nittam? (b) Anni i paguruvovugattam taw nga artikulo?

³ Talaga ammu na Diablo nga massikan ittam nu makiparte ittam ta Cristiano ira nga aktibidad, ngem arianna kayà nga massikan ittam. Nu matageno mu gafu nga namammansu ka ngana ta pisikal anna emosional, ariammu iyarayyu i baggim kani Jehova. Mas umaranni ka paga sa, megafu ta “yaya mismu i mamasikan anna mamakaladda ta angngurug [mu].” (1 Ped. 5:10; Sant. 4:8) Taw nga artikulo, ikonsidera tam i dua nga situasion nga mamagimmang nittam ta passerbi ta Dios anna paguruvovugattam nu kunnasi iyaplika i prinsipio ira na Biblia nga makoffun nittam. Ngem maffokus ittam labbi ta abilidad ni Jehova nga pasikannan ittam, gittana mabibbig ta Isaias 40:26-31.

4. Anni i mala tam nga leksion ta Isaias 40:26?

⁴ (Bibbigan i Isaias 40:26. *) Awan paga tu nakabilang ta ngamin nga bitun ta uniberso. Ta pattantia na sientista ira, ma-400 billion i bitun ta Milky Way galaxy paga laman. Ngem, niddan ni Jehova tu ngagan i kada bitun. Anni i leksion para nittam? Nu egga i personal nga interes ni Jehova ta awan tu inangona nga naparatu, daddamman nu anni i matagenona nikaw nga masserbi sa, ari megafu ta nakaprograma ka nga kuan yatun, nu ari megafu ta ayatammu yaya! (Sal. 19:1, 3, 14) Talaga kilala naka na meddu nga Yama tam. “Maski paga i vu nu ay nabilang ngamin” na Yama tam. (Mat. 10:30) Nipasiguradu nittam na salmista: “Ammu ni Jehova i aggaggaw danuri awan tu kapaliwatadda.” (Sal. 37:18) Wan, masingan ni Jehova i problemam ira, anna meddannaka tu sikan nga attamman i kada tadday tatun.

5. Ngatta makasiguradu ittam nga mapasikan ittam ni Jehova?

⁵ Si Jehova i Naggafuan na dinamiko nga enerhia. (Isa. 40:28) Ikonsidera i karu na enerhia nga iyawana ta bilag laman. Naobserba na researcher nga si David Bodanis: “I sikan na passabug ta Bilag nga mabbalin tu enerhia kada segundo ay kagitta na [binillion nga atomiko] nga bomba ira.” Ta pattantia paga na tadday nga researcher, i bilag ay “mangilawan ta maddaggun . . . tu enerhia nga makalanno ta pakawagan na totolay para ta 200,000 dagun ta tanga-segundo”! Egga paga kari i maski sinni nga madduda nga i Tadday nga “mamaffunsina” ta bilag ay makeyawa tu sikan nga kawagattam tapenu marubang i maski anni nga problema?

6. Ngatta makagi nga alappaw laman i takkilu ni Jesus, anna anni nakuan i efekto natun nittam?

⁶ (Bibbigan i Isaias 40:29. *) Makapagayayya i passerbi kani Jehova. Kinagi ni Jesus ta disipulosna: “Kattuan nu i takkilù.” Tapus kunna paga: “Maleran nu i hustu nga pagibannag. Ta alappaw laman i takkilù anna malogon laman i ipakattú.” (Mat. 11:28-30) Talaga kuru-kurug yatun! Nu mittan, nababbannag ittam nga manaw ta baletam mappange ta study onu mallayyagayya. Ngem kunnasi i panageno tam sonu lubbe ittam?  Nabanna-bannayan​—anna mas preparadu ittam ngana nga arubangan i problema ira ta pattolay. Talaga alappaw laman i takkilu ni Jesus!

7. Iyistoria i ekspiriensa nga mangipasingan nga kurug i Mateo 11:28-30.

⁷ Mawag nga makillaban i tadday nga sister nga ngaganattam tu Kayla ta chronic fatigue syndrome, depresion, anna migraine. Yatutta, nu mittan marigatan yaya nga magatende ta study ira. Ngem, turi ta nappursigi yaya nga magatende tu study, niturana: “Meyannung ta pakkafi na nono i palappa. Empatiko anna minangngikavurung i nikepresenta na informasion yatutta makatangi ngà. Neperaddam niakan nga mawag ku magatende tu study ira.” Talaga magayayya yaya ta pinagatendena!

8, 9. Anni i kayà kagian ni Pablo turi ta niturana: “Ta nu makafi ngà, meddan ngà tu sikan”?

⁸ Maski paga aru i kalalakiattam, limitadu lagapa i makua tam ta mismu nga sikattam. (Isa. 40:30) Yatun i kinakurug nga mawag nga mammuattam ngamin. Maski paga maabilidad si apostol Pablo, egga lagapa ira i limitasionna nga nakefugag sa nga kuan i ngamin nga kayàna nga kuan. Turi ta nikagina i ngamin nga vuru-vurunna ta Dios, kunni Jehova sa: “Mas nga matageno i pakapangnguà nu makafi ka.” Nala ni Pablo i punto. Kinagina: “Ta nu makafi ngà, meddan ngà tu sikan.” (2 Cor. 12:7-10) Anni i kayàna nga kagian?

⁹ Nalippawa ni Pablo nga limitadu laman i makuana ta mismu nga sikanna. Kawaganna i uffun na tadday nga mas makapangngua. Pannuan na masanto nga espiritu na Dios yatun nga pakkurangan ni Pablo. Ari laman tu yatun, mapasikan paga yaya na espiritu na Dios tapenu matuppal i trabahu ira nga arianna vuluvuga nga mabalin ta mismu nga sikanna laman. Kunnatun gapa nittam. Nu naggafu kani Jehova i sikattam, siguradu nga massikattam!

10. Kunnasi inuffunan ni Jehova si David tapenu marubang i problemana ira?

¹⁰ Kanayun nga matageno na salmista nga si David i masanto nga espiritu na Dios. Nikansionna: “Iddam-mà tu sikan nga maggavva ta kontrà ira, anna pakawayya nga mamatulu ta sikad-da.” (Sal. 18:29) Egga ira i kontra tam​—karuan nga problema—​nga ariattam ‘mapatulu’ ta sikattam laman; kawagattam i uffun ni Jehova.

11. Iyesplika i papel na masanto nga espiritu ta panguffun nittam nga arubangan i problema ira.

¹¹ (Bibbigan i Isaias 40:31. *) Ari nga makapabbayag ta utun ta apaddu nga distansia i agila ta mismu nga sikanna laman. I enerhia ta umutun nga mapatu nga paddag i mangikagag ta agila, tapenu ari mofu i sikanna. Yatutta nu meparubakka ta mariga nga problema, daddamman i agila. Ipakimallo kani Jehova nga “ikagag” naka gukaban na “manguffun, i masanto nga espiritu.” (Juan 14:26, NW) Kappagayayya megafu ta makala tam tu kunnatun kada mawag tam—24 oras kada aggaw. Matageno tam nga mas mawag tam i uffun na Dios nu egga i ari pakkarantindiattam ta tadday nga wagi. Ngatta luttuag i kuddanatun?

12, 13. (a) Ngatta luttuag i ari pakkarantindian ta Cristiano ira? (b) Anni i ituddu nittam na nesimmu kani Jose meyannung kani Jehova?

¹² Luttuag i ari pakkarantindian megafu ta imperfekto ittam ngamin. Nu mittan, egga ira i tiempo nga mairita ittam ta kakkagian onu kukukuan na kapangngurug tam​—onu ira gapa i mairita nittam. Serioso nga kapurueba yaw. Kagitta na karuan nga kapurueba, ipamavulun ni Jehova nga pakurugattam i integridad tam gukaban na makasta nga pakipattrabahu ta wawwaragi nga ayatanna lagapa maski imperfekto ira.

 ¹³ Masingan ta nesimmu kani Jose nga ari fugaddan ni Jehova nga mapurueban i aripanna ira. Ta kabbinna, nelaku si Jose na wagina ira ta yama ta pakka-aripan anna neyangay ta Ehipto. (Gen. 37:28) Nasingan ni Jehova i nesimmu anna siguradu nga naddaddam yaya turi ta naobserbana i pattratuda ta kofunna, i matunung nga si Jose. Ngem ari lagapa yaya nga naki-alam. Turi ta naakusan si Jose nga finuersana i atawa ni Potifar nga makibbiko sa anna nefuku yaya, ari uli nga naki-alam si Jehova. Ngem talaga kari nga pinagurayan na Dios si Jose? Ari. Kagian na Biblia: “Pinavviktoria ni Jehova i maski anni nga kuan [ni Jose].”​—Gen. 39:21-23.

14. Anni i espiritual anna pisikal nga bentaha nga mala tam nu “pappasan i poray”?

¹⁴ Yaw paga i tadday nga angngarigan. Piga laman i marake i nikatratuna nga gitta ni David. Ngem, ari nipamavulun natun nga kofun na Dios nga mapannu yaya tu taki na nono. Niturana lallagu: “Ari ka nga mavvuru-vurung anna mappoporay, ta danaw ay parattalad-da laman i marakay.” (Sal. 37:8) I pinaka-importante nga rason nu ngatta ‘ari mappoporay’ [“pappasan i poray,” NW] ay tapenu maparigan si Jehova, nga “arian na ittam nga kastigowan ta kunna kepangngattat-tam.” (Sal. 103:10) Ngem egga ira i praktikal nga bentaha na “pappasan i poray.” Marresulta tu problema ta gawa-gawayyan i poray gittana high blood anna mariga nga paginango. Makafekto gapa yatun ta agal anna ta pali, anna marresulta tu problema ta pattunaw ta makan. Nu mapporay ittam, maruddu nga ari tu manawag i appanono tam. Nu mittan marresulta yatun tu mabayag nga depresion. Ngem kagian na Biblia: “I kalmadu nga futu ay mangiyawa tu inango ta baggi.” (Prov. 14:30) Yatutta anni i kuattam nu natakitan ittam na tanakuan, anna kunnasi ittam makippakoma ta wagi tam? Awayya tam nga iyaplika i masirib nga tabarang na Biblia.

15, 16. Kunnasi tam nakuan arubangan i tadday nga nakataki nittam?

¹⁵ Bibbigan i Efeso 4:26. Ariattam ngana makaddag nu marake i pattratu nittam na totolay na mundo. Ngem nu kapangngurug onu miembro na familia i nakakagi onu nakakua nittam tu marake, talaga mattaki i nono tam. Kunnasi nu ariattam mapappasa i nesimmu? Ipamavuluttam kari nga mangipappan tu taki na nono, nga magadde ta piga dagun? Onu tuttulattam i masirib nga tabarang nga solban yatun insigida? Nu mas pabbayagattam nga solban i problema, mas mariga para nittam nga makippakoma ta wagi tam.

¹⁶ Kunnasi nu natakitannaka na tadday nga wagi tapus ariammu makattaman yatun? Anni ira nga dakkua i kuammu tapenu makippakoma? Ollu, arannian si Jehova gukaban na napafutuan nga pakimallo. Ipakimallo nga uffunannaka nga mapeggan tu makapagaram nga pakiyuvovug ta wagim.  Daddamman​—kofun yaya ni Jehova. (Sal. 25:14) Iddukan yaya ni Jehova. Masippo i pattratu ni Jehova ta kokkofunna, anna ekspektanna nga kunnatun ka gapa. (Prov. 15:23; Mat. 7:12; Col. 4:6) Tumunug, nonopan tu mapia nu anni i kagiammu. Ariammu nonopan nga sinadya na wagi nga takitakka. Awayyana nga mali i pagimamma mu ta situasion. Akseptan i posibilidad nga awayyana nga sikaw i naggafuan na problema. Awayyam igafu i pakiyuvovug gukaban na pakkagi: “Baka sensitibo ngà laman, ngem turi ta egga i kinagim niakan kagabi, natageno ku nga . . . ” Nu ari makasta i resulta na pakiyuvovug mu, magaleg mangana tu tiansa tapenu makippakoma. Awayyam labbi lallagu nga ipakimallo i wagim; ikiddaw kani Jehova nga bendisionanna yaya. Ipakimallo kani Jehova nga makapaffokus ka ta positibo ira nga kualidadna. Maski anni paga i resultana, makasiguradu ka nga magayayya si Jehova ta napafutuan nga appursigim nga makippakoma ta wagim​—nga kofun ni Jehova.

17. Anni i usan ni Jehova tapenu uffunan ittam nga mapalubbangan ta liwa, anna ngatta approbetsattam nakuan yatun nga probision?

¹⁷ Matageno na karuan nga ari ira mepangngo nga masserbi kani Jehova megafu ta madammo nga liwada. Alsan na pakkakonsensia i imammo, pagayayya, anna i sikammu. Kunnaw i kinagi ni Patul David nga narigatan megafu ta pakkakonsensia: “Turi ta ariak-ku nga nilammuyag i katagaruliak-ku, nakkafi ngà lallagu ta paddagi-raging ku. Aggaw-gabi i pangastigom niakan, O AFU.” Kappagayayya, magutu nga inarubang ni David i problema kagitta na tadday nga espiritual nga lalaki. “Ta kunnuri, nilammuyag ku nikaw i katagaruliak-ku,” niturana, “ay pinakomam-mu ngamin danaw.” (Sal. 32:3-5) Nu nakaliwa ka tu serioso, sigga-paran si Jehova nga uffunakka tapenu mapalubbangakka. Ngem, mawag mu nga akseptan i uffunna gukaban na kongregasion. (Prov. 24:16; Sant. 5:13-15) Ariammu italattan​—nakadepende tatun i mannanayun nga inango mu! Kunnasi nu maski nabayag ngana nga napakoma i liwa mu ngem makokkonsensia ka lagapa tatun?

18. Kunnasi makoffun i ehemplo ni Pablo turi ta marigatan ira ta pakatageno tu kawan tu serbi?

¹⁸ Manawag nga egga ira i tiempo nga nakkafi i nono ni Pablo megafu ta nappasa ira nga liwana. Kunna: “Sakan i kalinnakkan ta paddia-paddian ta ngamin nga apostol. Ari ngà paga lagu nga mepangngo nga magalan tu apostol ta zinara-darum ku i iglesia na Dios.” Kunna paga: “Ngem megafu ta allo na Dios, nabbalin ngà tu apostol.” (1 Cor. 15:9, 10) Ammu ni Jehova nga imperfekto si Pablo. Ngem inalawana lagapa si Pablo nu anni yaya, anna kayàna nga mammuan yatun ni Pablo. Nu talaga mabbabawi ka ta kingnguam anna nipakiyuvovug mu yatun kani Jehova, anna ta elder ira nu kawagan, siguradu nga pakomannaka ni Jehova. Yatutta makkomfiansa ka nga pinakoma naka ngana ni Jehova, anna alawatammu i pamakomana!​—Isa. 55:6, 7.

19. Anni i teksto tam para ta 2018, anna ngatta mepangngo yatun?

¹⁹ Durante nga aranni ngana i pangultimo naw nga sistema, ekspektattam nga mas maggrabe i ziga ta pattolay. Ngem makasiguradu ittam nga i Dios nga ‘mangiyawa tu sikan ta tadday nga nabannag anna buu nga sikan turi ira ta makkurang tu sikan’ ay makeyawa nikaw tu maski anni nga kawagammu tapenu makapattuloy ka. (Isa. 40:29; Sal. 55:22; 68:19) Ta interu nga 2018, meperaddam nittam yaw nga importante nga kinakurug kada magatende ittam tu study ta Kingdom Hall. Masingattam yatun ta uvovug ira nga nakadispley ta teksto tam ta dagun: “Danuri magiddanama kani Jehova ay metoli i siki-sikadda.”​—Isa. 40:31.