1, 2. Kunnasi usan ni Jehova i material nga pakkukuana?

MINANGNGIYAWA nga Dios si Jehova. Naggafu sa i ngamin nga pakkukua tam. Kukua ni Jehova ngamin nga vulawan anna pira kunne na gapa i natural ira nga kinariku na davvun, anna usanna yatun tapenu sustinian i inango. (Sal. 104:13-15; Hag. 2:8) Aru i mabibbig tam ta Biblia nu kunnasi nga milagro nga inusa ni Jehova i pakkukuana ira tapenu iyawa i pakawagan na totolena.

² Ta unag na 40 dagun, niddan ni Jehova tu manna anna danum i nasion na Israel durante nga egga ira ta tana-tana. (Ex. 16:35) Megafu tatun, “awan tu nakkurangadda.” (Neh. 9:20, 21) Gukaban ni profeta Eliseo, milagro nga pinakaru ni Jehova i manteka para ta matalo nga balu. Nakoffun yatun nga regalu na Dios tapenu mapaganna i gatuna anna mapeggan yaya tu makalanno nga kuartu tapenu ari matay i ánana. (2 Pat. 4:1-7) Gukaban na suporta ni Jehova, milagro nga nangiyawa si Jesus tu makan anna kuartu nu kawagan.​—Mat. 15:35-38; 17:27.

3. Anni i ikonsidera tam taw nga artikulo?

³ Egga pakawayya ni Jehova nga usan maski anni tapenu sustentuan i pinaratuna. Ngem, imbitanna lagapa ittam nga aripanna nga  usan i material nga ganna-gannug tam tapenu suportan i trabahu na organisasionna. (Ex. 36:3-7; bibbigan i Proverbio 3:9.) Ngatta ekspektan ni Jehova nga usattam i nabalor ira nga pakkukua tam ta pangiyawa sa? Kunnasi sinuportan ta finansial na matalo ira gari i aktibidad na representante ira ni Jehova? Kunnasi usan na organisasion i fundu nga medona ta maddaggun? Magigiammu tam taw nga artikulo i tabbag danaw nga pakkiavu.

4. Anni i mepasingattam kani Jehova nu suportattam i trabahuna?

⁴ Mangiyawa ittam kani Jehova megafu ta aya anna appresasiottam sa. Ariattam makapangurug nu manono tam i ngamin nga kingngua ni Jehova para nittam. Turi ta niyesplika ni Patul David i pakawagan ira ta pangipataddag tu templo, minammatanna i ngamin nga nalawa tam nga naggafu kani Jehova anna maski anni nga meyawa tam kani Jehova ay naggafu ta niyawana ngana nittam.​—Bibbigan i 1 Cronica 29:11-14.

5. Kunnasi ipasingan na Biblia nga importante nga aspeto na kurug nga paddayaw i ari makasarili nga pangiyawa?

⁵ Makedayaw gapa kani Jehova i pangiyawa tam sa. Ta sirmata, naginna ni apostol Juan i aripan ira ni Jehova ta langi nga makkagi: “Yafu anna Dios mi! Mekunnay nikaw i kekakua, dayaw anna pakapangngua! Ta pinaro mu ngamin i adde na; megafu ta paka-urem laggapa, pinaro mu anna sinolem ira.” (Nep. 4:11) Ari ka kari umanugu nga si Jehova laman i mepangngo ta ngamin nga gloria anna kekakua nga meyawa tam sa gukaban na pangisakrifisio ta kapianan nga pakkukua tam? Gukaban ni Moises, nimandu ni Jehova ta nasion na Israel nga zinagun nga umarubang sa ta tallu nga fiesta. Parte na paddayaw na Israelita tatun nga fiesta nga ari nga “umarubang kani Jehova nga limi-lima laman.” (Deut. 16:16) Kunnatun gapa ta maddaggun, importante nga aspeto na paddayaw kani Jehova i ari makasarili nga pangiyawa megafu ta pangappresia anna passuporta ta neravvunan nga parte na organisasionna.

6. Ngatta makasta para nittam i pangiyawa? (Innan i letratu ta gafu na artikulo.)

⁶ Makasta para nittam i mangiyawa. Pammakapianattam nu minangngiyawa ittam anna ari laman tu minangngalawa. (Bibbigan i Proverbio 29:21.) Awayya tam manono i tadday nga abbing nga marregalu ta maganana nga naggafu ta baddi nga balunna nga niyawada sa. Ari kari nga talaga appresian na magana yatun nga regalu? Puede manguffun ta magana para ta paggastuan ta balay i tadday nga maginganay onu bagitolay nga payunir nga ana nga makipaddian paga ta baleda. Maski ari nga ikiddaw yatun na magana ira, awayyada lagapa nga alawatan danatun nga regalu megafu ta ammuda nga yatun i pangipasingan na anada tu appresasion ta ngamin nga kingnguada para sa. Kunnatun gapa, ammu ni Jehova nga makasta para nittam nu mangiyawa ittam ta nabalor ira nga pakkukua tam.

7, 8. Kunnasi nangipasingan tu ehemplo na paddona i totolay ni Jehova ta tiempo na Biblia (a) para ta espesipiko ira nga proyekto? (b) para suportan i trabahu?

⁷ Ta Biblia, magigiammu tam nga nakkontribusion gapa i totolay ni Jehova tapenu suportan i trabahuna. Ta karuan nga situasion, naddona ira para ta espesipiko ira nga proyekto. Angngariganna, nakkiddaw tu donasion si Moises para ta pappataddag tu tabernakulo, kagitta gapa na kingngua ni Patul David para ta pappataddag tu templo. (Ex. 35:5; 1 Cro. 29:5-9) Ta tiempo ni Patul Jehoas, inusa na papari i kuartu nga nakolekta tapenu pakappian i balay ni Jehova.  (2 Pat. 12:4, 5) Ta ollu-siglo nga Cristiano nga kongregasion, turi ta nammuan na wawwaragi nga egga i pakawagan megafu ta bisin, “dinisidi na disipulo ira tu mangituvug i kataggi-tadday nira ta anni laman nga awayya da nga meyuffun ta wawwagi ira ta angngurug nga taga-Judea.”​—King. 11:27-30.

⁸ Ta karuan nga situasion, mangiyawa i totolay ni Jehova tu finansial nga suporta turi ta mangirollu ira ta trabahu. Ta Mosaiko nga Dob, awan tu mana na Levita ira kumpara ta tanakuan nga tribu. Ngem, iddan ira na Israelita tu pakkafulu, nga nakoffun nira tapenu makapaffokus ira ta trabahuda ta tabernakulo. (Num. 18:21) Nammakapia gapa si Jesus anna i apostolesna ta pangiyawa na babbay nga “naggafu laggapa nira i ginasto da nga nanguffun.”​—Luc. 8:1-3.

9. Sitaw i naggafuan na karuan ira nga kontribusion gari?

⁹ Siempre, nadduruma i naggafuan na donasion ira. Turi ta makkontribusion para ta pamataddag tu tabernakulo ta tana-tana, siguradu nga nelagum ta niyawa na Israelita ira i gannug nga nalada ta Ehipto. (Ex. 3:21, 22; 35:22-24) Ta ollu-siglo, nilaku na karuan nga Cristiano i pakkukuada ira, gittana koman onu babalay, tapus niyawada i kuartu ta apostoles. Binilli-billay gapa na apostoles yaw nga fundu turi ta magawag ira. (King. 4:34, 35) Mangipappan gapa i karuan tu kuartu anna regular nga maddona tapenu suportan i trabahu. (1 Cor. 16:2) Yatutta, ngamin nga klase na totolay​—danuri mariku kunne na gapa i pobre—​ay makebillay.​—Luc. 21:1-4.

10, 11. (a) Kunnasi tam maparigan danuri napafutuan nga nangiyawa nga aripan ira ni Jehova ta tiempo na Biblia? (b) Anni i matageno mu ta pribilehio nga suportan i trabahu na Pappatulan?

¹⁰ Ta maddaggun, awayyana gapa nga mekiddaw nga maddona ittam para ta espesipiko nga gakkag. Angngariganna, egga kari i plano na kongregasionnu nga mamataddag tu bagu nga Kingdom Hall? Onu maddaggun kari nga mapakappian i Kingdom Hall nu? Awayya nga nekagi nittam i pakawagan ta finansial para ta pappakappia ta lokal nga panga nga ofisina tam, ta kombension nga pagatendeyattam, onu panguffun ta wawwaragi kabalin na kalamidad. Maddona tam gapa tapenu suportan danuri mattrabahu ta world hedkuarter anna ta panga ira nga ofisina ta interu mundo. Suportan na donasiottam i misionero ira, espesial nga papayunir, anna danuri manangngal ta sirkito. Siguradu gapa nga egga i maddaggun nga resolusion na kongregasionnu tapenu manguffun ta finansial ta interu mundo nga programa na pamataddag tu Assembly Hall anna Kingdom Hall ira, nga pakabenefisiowan na wawwaragi tam ta interu-mundo.

¹¹ Awayya nga makasuporta na kada tadday nittam ta trabahu ni Jehova taw nga pangurianan nga aggaw. Awan tu makannammu nu sinni i naggafuan na magaru tatun nga donasion. Nu mangidanna tam tu kontribusion ta kahon ta Kingdom Hall ira onu maddona ta online gukaban na jw.org, ariattam kagian ta tanakuan nu piga i nidona tam. Awayyana nga matageno tam nga awan tu serbi na baddi nga donasiottam. Ngem, i kakaruan nga fundu na donasion ta maddaggun ay naggafu ta napakaru nga baraddi nga donasion imbes nga naggafu ta darakal nga donasion ngem pilippiga laman. I wawwaragi tam, maski danuri pobre, ay kagitta na taga-Macedonia ira nga “nepallo i kapobre da” ngem nakimemallo ira nga meddan tu pribilehio nga mangiyawa anna napafutuan nga kingnguada yatun.​—2 Cor. 8:1-4.

12. Kunnasi mappursigi i organisasiottam tapenu meyusa ta kapianan i nedona ira nga fundu?

¹² Gukaban na sigga-pakimallo nga pangikonsidera, mappursigi i Manangngal nga  Baggi nga mabbalin tu matalo anna memmugug ta pangusa ta fundu na organisasion. (Mat. 24:45) Mabilla-billay anna magasto tu mapia i fundu ira nga malawa. (Luc. 14:28) Ta tiempo na Biblia, tuttulan danuri manammi ta dedikadu ira nga fundu i unnug tapenu masiguradu nga meyusa i donasion ira para laman ta espesipiko nga gakkag. Angngariganna, turi ta nanoli si Ezra ta Jerusalem aggavuluna i gannug ira nga nidona na patul na Persia​—vulawan, pira, anna karuan paga nga nabalor nga material ira nga maturu tu $100 million (U.S.) i balorna ta maddaggun. Nikonsidera ni Ezra nga boluntario nga donasion para kani Jehova yaw ira nga fundu anna siniguraduna nga maprotektan yaw ira nga kayamanan ta peligroso nga biahe ta delikadu nga teritoria. (Ezra 8:24-34) Nangolekta gapa tu fundu si Pablo tapenu moffunan i wawwaragi ta Judea. Siniguraduna nga “mangngua ta tunung, ari laman ta arubang na Yafu, ngem maski ta arubang na tolay” danuri makattammi ta fundu. (Bibbigan i 2 Corinto 8:18-21.) Ta pamarig ta ehemplo da Ezra anni Pablo, tuttulan gapa na organisasiottam ta maddaggun i memmugug nga unnug meyannung ta panammi anna paggasto ta fundu ira nga nedona.

13. Kunnasi tam nakuan imammatan i pappasimple nga kingngua na organisasion?

¹³ Awayyana nga ulian na tadday nga familia i paggastoda tapenu mebagayda i paggastoda ta sueldu onu ikonsiderada nu kunnasi nga pasimpleyan i pattoleda anna pabaddikan i gastoda tapenu mas makapasserbi ira kani Jehova. Kunnatun gapa ta organisasion ni Jehova. Kanni laman, aru i makakkasta ira nga bagu nga proyekto. Nu mittan, narresulta yaw ta mas aru nga gasto anne ta nalawa nga fundu. Yatutta, inusito na organisasion nu kunnasida nga pabaddikan i gasto anna pasimpleyan i trabahu tapenu meyusa adde ta posible i ngamin nga napafutuan nga donasion.

14-16. (a) Anni ira i netuppal na donasionnu ira? (b) Kunnasi ka nabenefisiowan taw ira nga probision?

¹⁴ Aru ta nabayag ngana nga aripan ni Jehova i nakkagi nga ariadda paga nasingan i kunnaw nga tiempo nga napakaru i espiritual nga probision. Nonopan yaw! Ta nappasa ira nga dagun, negafu i jw.org anna JW Broadcasting. Nepublisa i New World Translation of the Holy Scriptures ta mas aru paga nga lengguahe. Turi 2014/2015, nesimmu i tallu-aggaw nga “Keep Seeking First God’s Kingdom!” nga Internasional nga Kombension ta pinakadakal ira nga istadium ta 14 nga siudad ta interu mundo. Talaga nagayayya danuri nagatende tatun.

¹⁵ Aru i nakkagi ta appresasiodda ta benefisio ira nga nalawada ta organisasion  ni Jehova. Angngariganna, meyannung ta JW Broadcasting, kinagi na tadday nga magatawa nga masserbi ta tadday nga nasion ta Asia: “Ta baddi nga siudad i asaymentmi. Yatutta matagenomi nga mesisina kami, anna alistumi laman nga makattamman i kalawa na trabahu ni Jehova. Ngem turi ta nagiromi i nadduruma nga programa ta JW Broadcasting, neraddammammi nga parte kami na internasional nga pawwaragi. Talaga abangan na meddu ira nga wawwaragi tam i JW Broadcasting. Maruddu nga maginna tam nga kakkagiadda nga kabalin na paggiroda ta vinulan nga programa, matagenoda nga mas maddukko ngana ira ta miembro ira na Manangngal nga Baggi. Mas ngana nga magayayya ira nga parte ira na organisasion na Dios.”

¹⁶ Ta interu mundo, ma-2,500 nga Kingdom Hall ira i mepataddag onu mapakappian. Kabalin nga niyusa na wawwaragi i bagu nga Kingdom Hall-da ta Honduras, niturada: “Talaga magayayya kami nga parte kami na interu-uniberso nga familia ni Jehova anna magayayya ta interu-mundo nga pawwaragi tam, nga parehu nga nakoffun nikami tapenu matuppal i iddanamami nga mapeggan tu Kingdom Hall ta lugarmi.” Aru gapa i makkagi tu kunnatun nga appresasion kabalidda nga nalawa i Biblia anna i karuan nga publikasion nga netransleyt ta mismu nga lengguaheda, turi noffunan ta tiempo na kalamidad, onu kabalidda nga nasingan i resulta na metropolitan anna public witnessing ta komunidadda.

17. Kunnasi tam nammuan nga supu-suportan ni Jehova i organisasionna ta maddaggun?

¹⁷ Ari matindian na makasingan ira nu kunnasi posible nga makua tam ngamin yaw nga trabahu gukaban laman na boluntariu ira nga donasion. Kabalin na pabbisita ta fasilidad tam nga pagimprentan, tadday nga panakallan na dakal nga kompania i nappabbaw ta ngamin nga trabahu nga netuppal gukaban na ari masuelduan nga totolay, boluntariu ira nga donasion, anna awan tu maski programa nga pallaku onu pagunnug tu fundu. Kinagina nga imposible yatun nga kukukuattam. Umanugu ittam tatun! Ammu tam nga posible laman yatun megafu ta suportan ni Jehova i trabahu.​—Job 42:2.

18. (a) Anni ira nga bendision i malawa tam nu suportattam i Pappatulan? (b) Kunnasi tam masanay i ána tam anna babbaragu nga mangiyawa?

¹⁸ Iddan ittam tu dignidad ni Jehova gukaban na oportunidad nga suportan i kadakallan nga trabahu nga mesissimmu ta maddaggun. Siniguraduna nga makalawa tam noka tu bendision ira nu suportattam i Pappatulan. (Mal. 3:10) Nipromesa ni Jehova nga i tadday nga minangngiyawa ay mabendisionan. (Bibbigan i Proverbio 11:24, 25.) Mas gapa nga magayayya ittam nu mangiyawa ittam, megafu ta “mas dakal i pagayaya ta pangiyawa anne ta pangalawa.” (King. 20:35) Gukaban na paguvovug anna ehemplo, egga i pribilehio tam nga sanayan i ána tam anna i babbaragu nga appresian nu kunnasi ira nga mangiyawa anna kunnasida nga malawa i aru nga bendision bilang resulta natun.

19. Kunnasi ka nga napagaram naw nga artikulo?

¹⁹ Naggafu i ngamin nga gannug nga egga nittam kani Jehova. I pangiyawa tam sa ay mangipasingan nga ayatattam anna appresiattam i ngamin nga kingnguana para nittam. (1 Cro. 29:17) Turi ta naddona ta pappataddag tu templo, “nagayayya i magili ta boluntariu nga pangitavvudda, megafu ta kingnguada i boluntariu nga pangitavvung kani Jehova gukaban na buu nga futu.” (1 Cro. 29:9) Tulu-tuloy tam nakuan nga magayayya ta pangiyawa tam kani Jehova ta gannug ira nga niyawana mismu nittam.