1, 2. Anni i pinaka-mamattaradday nga okasion ta 2018, anna ngatta? (Innan i letratu ta gafu na artikulo.)

SONU Marso 31, 2018, ta pallammag na bilag, maggarammammung i totolay na Dios anna i aru nga interesadu para ta zinagun nga passelebra ta Pamugag na Yafu. Kada dagun, minillion i mattaradday tapenu selebran i Memorial na patay ni Cristo​—i pinaka-mamattaradday nga okasion ta interu davvun.

² Siguradu nga magayayya si Jehova anna si Jesus nga masingan nga kada oras, minillion i magatende taw nga espesial nga okasion ta interu mundo. Niprofesiya na Biblia nga egga “i magaru nga totolay nga awan tu makabilang ta karu da! Madduma-ruma i naggafuanad-da nga nasion, rasa, tribu, anna madduma-ruma i paguvovug da.” Ikulleda: “I kapaliag ay maggafu ta Dios tam nga agga-itubang ta trono, tuange gapa ta Kordero!” (Nep. 7:9, 10) Talaga kappabbaw nga medayaw si Jehova anna si Jesus gukaban naw nga zinagun nga passelebra ta Memorial!

3. Anni ira nga pakkiavu i tabbagan naw nga artikulo?

³ Egga ira i luttuag nga pakkiavu nga tabbagan naw nga artikulo.  (1) Kunnasi nga makapapprepara i kada tadday nittam para ta Memorial tapenu mabenefisiowan ta pagatende tatun? (2) Kunnasi nga afektan na Memorial i pattaradday na totolay na Dios? (3) Kunnasi tam makoffun tatun nga pattaradday? (4) Egga kari noka i ultimo nga Memorial? Nu wan, sonu anni?

4. Ngatta importante nga presente ittam ta Memorial adde ta posible?

⁴ Nonopan i importansia na pagatende ta Memorial. Daddamman nga parte na paddayaw tam i paggarammammung ira na kongregasion. Siguradu nga ammu ni Jehova anna ni Jesus i appursigi na kada tadday nga magatende taw nga pinaka-importante nga paggarammammung na dagun. Siempre kayà tam nga memammatadda nga presente ittam ta Memorial adde ta ipamavulun na gawa-gawayyan anna sirkumstansia tam. Nu masingan ta kukukuattam nga tagibalorattam i paggarammammung tam ira ta paddayaw, iddattam tu mas aru nga rason si Jehova nga pattalupaddianan i ngagattam ta “libru na panakkilalan”​—“libru na matolay”—​nga niketurakan na ngaga-ngagan danuri egga iddanamada nga mattolay tu mannanayun.​—Mal. 3:16; Nep. 20:15.

5. Piga aggaw nige na Memorial, kunnasi tam ‘mapurueban nu giminafu ittam ta angngurug’?

⁵ Piga aggaw nige na Memorial, iddattam tu tiempo nga sigga-pakimallo nga usitakkan tu mapia i personal nga relasiottam kani Jehova. (Bibbigan i 2 Corinto 13:5.) Anni kuattam? ‘Kannammuattam [“puruebattam,” NW] nu giminafu ittam ta angngurug.’ Tapenu makua yatun, makasta nu iyavu ta baggi tam: ‘Talaga kari nga mangurug ngà nga parte ngà na tattadday nga organisasion nga finaboranna nga mattuppal ta urena? Kuakku kari i adde na mawayyà nga ilayyagayya anna ituddu i mapia nga dumug na Pappatulan? Masingan kari ta kukukuakku nga talaga mangurug ngà nga yaw i pangurianan ira nga aggaw anna aranni ngana i panuppalan na pammaguray ni Satanas? Nanguli ngana kari i pakkomfiansà kani Jehova anna kani Jesus kumpara turi ta nidedikà i pattolè kani Jehova?’ (Mat. 24:14; 2 Tim. 3:1; Heb. 3:14) Makoffun i pannonono ta tabbag taw ira nga pakkiavu tapenu mapakurug tam nga talaga egga i pangurug tam.

6. (a) Anni i tattadday nga dalan mappange ta inango? (b) Kunnasi nga napprepara i tadday nga elder para ta Memorial kada dagun, anna kunnasim maparigan i kingnguana?

⁶ Bibbigan anna nonopan tu mapia i nebase-Biblia ira nga material nga mangipakanawag ta importansia na Memorial. (Bibbigan i Juan 3:16; 17:3.) Tapenu makalakag ta dalan mappange ta mannanayun nga inango, mawag i “pakannammu” kani Jehova anna ‘pangurug’ kani Jesus, i itatana nga Anana. Tapenu makapapprepara para ta Memorial, ngatta ariannu mappili tu karuan nga proyekto ta paggigiammu nga makoffun nikamu nga mas maddukko kani Jehova anna kani Jesus? Ikonsidera i kukukuan na tadday nga nabayag ngana nga elder. Ta nappasa nga daga-ragun, makkolekta yaya tu artikulo ira na Passifusifutan nga espesipiko nga mangivuru-vura ta Memorial anna ta aya nga nipasingan nittam ni Jehova anna ni Jesus. Piga ligguan nige na Memorial, bibbiganna uli danaw nga artikulo anna nonopanna tu mapia i importansia naw nga selebrasion. Sinaggi-mittan, ammunganna i koleksionna tu tadday onu dua tu artikulo. Nammuan naw nga elder nga gukaban na pabbibbig uli taw ira nga artikulo anna gukaban na pabbibbig anna pannono tu mapia ta neyiskediul nga mabibbig ta Biblia ta Memorial, makagigiammu yaya tu bagu ira nga gannug kada dagun. Pinaka-importante, matagenona nga mas umunag i ayana kani Jehova anna kani Jesus ta kada mappasa nga dagun. Makoffun i kunnatun nga proyekto tapenu maponag mu i aya anna appresasiommu kani Jehova anna kani Jesus anna tapenu mas mabenefisiowan tu mapia ta Memorial.

7. (a) Anni i nipakimallo ni Jesus ta gabi na ollu nga Pamugag na Yafu? (b) Anni i mangipasingan nga sinabbag ni Jehova i pakimallo ni Jesus?

⁷ Ta gabi na ollu nga Pamugag na Yafu, nakimallo si Jesus nga mattaradday nakuan i disipulosna anna magayayya ira ta parehu nga pattaradday nga tagibaloradda dua na Yamana. (Bibbigan i Juan 17:20, 21.) Talaga sinabbag ni Jehova yatun nga pakimallo na meddu nga Anana, yatutta minillion ngana i mangurug nga nidob ni Jehova i Anana. Kumpara ta karuan nga paggarammammung na aripan ira na Dios, ipasingan na Memorial i ari-meladdug nga ebidensia na pattaradday na Saksi ira ni Jehova. Mattaradday i totolay nga naggafu ta nadduruma nga nasion anna lahi ta lugar nga kesimmuan natun ta interu mundo. Ta karuan nga lugar, ari kurugan onu tagibadditan na tanakuan yaw nga relihioso nga paggarammammung na nadduruma nga lahi. Ngem kakkasta i paningan ni Jehova anna ni Jesus ta kunnatun nga pattaradday!

8. Anni nga mensahe i niyawa ni Jehova kani Ezekiel meyannung ta pattaradday?

⁸ Bilang totolay ni Jehova, ariattam ngana makaddag ta pattaradday nga maekspiriensa tam. Kakuruganna, niprofesiya yatun ni Jehova. Ikonsidera i mensahe nga niyawana kani profeta Ezekiel meyannung ta pattadday na dua nga kayu, i kayu “para ta Juda” anna i kayu “para ta Jose.” (Bibbigan i Ezekiel 37:15-17.) Iyesplika na “Mga Tanong Mula sa mga Mambabasa” na Ang Bantayan Hulio 2016: “Nangiyawa tu mensahe na iddanama si Jehova kani Ezekiel meyannung ta promesa nga pattaddayan i nasion na Israel kabalin nga netoli ira ta Nepromesa nga Davvun. Iprofesiya gapa natun nga mensahe i pattadday na totolay na Dios nga mamegafu nga mesimmu ta pangurianan nga aggaw.”

9. Kunnasi nga manawag nga metuppal i profesiya ni Ezekiel kada dagun ta Memorial?

⁹ Namegafu ta dagun 1919, sesenu nga inorganisa anna pinattadday uli ni Jehova i nazelugan ira, nga isimbolo na kayu “para ta Juda.” Tapus durante nga umara-aru danuri neravvunan i iddanamada nga isimbolo na kayu “para ta Jose”​—i mevulu ta nazelugan, mabbalin tu “tattadday nga kural” i dua nga grupo. (Juan 10:16; Zac. 8:23) Nipromesa ni Jehova nga pattaddayanna danaw nga dua nga kayu anna pabbalinanna tu tattadday nga kayu ta limana. (Eze. 37:19) Mapakatadday ngana nga masserbi yaw nga dua nga grupo ta sakup na tattadday nga Patul​—i naglorian nga si Jesu-Cristo, nga profetiko nga natukoy bilang i ‘aripan [na Dios] nga si David.’ (Eze. 37:24, 25) I kappabbaw nga pattaradday nga mabibbig ta Ezekiel ay manawag nga masingan kada dagun durante nga maggarammammung i nabattang paga nga nazelugan anna i tanakuan nga karneru tapenu selebran i Memorial na patay ni Cristo! Anni gafu i makua na kada tadday nittam tapenu pattalupaddianan anna ipoppollu i pattaradday?

10. Kunnasi ittam makoffun ta pattaradday na totolay na Dios?

¹⁰ I ollu nga makua tam tapenu makoffun ta pattaradday ay kultiban i kinapakalinno. Turi ta egga ta davvun si Jesus, sinabarangnganna i disipulosna nga mappakalinno ira. (Mat. 23:12) Nu mapakalinno i affutu-futu tam, ari tam mainfluwensian na espiritu na mundo nga pangipoppoddu ta baggi. Makoffun lallagu i kinapakalinno tam tapenu makimoray turi ira ta mangirollu, anna importante i kunnatun nga minattuppal nga espiritu para ta pattaradday na kongregasion. Pinaka-importante, mapagayayya na kinapakalinno tam i Dios, megafu ta “ikabatù na Dios i maparayag, ngem ikallo na i minappakalinno.”​—1 Ped. 5:5.

11. Kunnasi nga makoffun ta pattaraddetam i pannono tu mapia ta kebalinan na emblema ira na Memorial?

¹¹ I mekadua nga makua tam nga makoffun  ta pattaradday ay gukaban na pannono tu mapia ta kebalinan na emblema ira ta Memorial. Nige natun nga espesial nga gabi​—anna neerulay tatun nga gabi—​serioso nga nonopan i importansia na pan nga awan tu lebadurana anna i uzzin nga binarayang. (1 Cor. 11:23-25) Irepresenta na pan i awan tu tagarulina nga baggi ni Jesus nga nesakrifisio, anna isimbolo na binarayang i nevuvvu nga dagana. Ngem mas paga ta basta laman pakalippawa ta isimbolo natun ira nga emblema i kawagan. Daddamman nga nelagum ta sakrifisio nga tavvu ni Cristo i dua ta kadakallan nga pangipasingan ta aya​—i aya ni Jehova ta pinangiyawana nittam ta Anana, anna i aya ni Jesus nga sigga-paran nga nangisakrifisio ta inangona para nittam. I pannono tu mapia ta ayada i mamaguyu nakuan nittam nga ayatan gapa ira. I aya tam anna na kapangngurug tam kani Jehova ay gittana lubig nga mangigalu nittam ta kataggi-tadday anna mamasikan ta meggo nga pattaradday.

12. Ta ilustrasion ni Jesus meyannung ta patul nga makikuenta ta gata-gatu, kunnasi nga nipasingan ni Jesus nga ekspektan ni Jehova nga minammakoma tam nakuan?

¹² I mekatallu nga makua tam nga makoffun ta pattaradday ay gukaban na napafutuan nga pamakoma ta tanakuan. Nu pakomattam danuri nakataki nittam, mepasingattam nga appresiattam i nikapakoma na mismu nga liwi-liwa tam nga nabbalin tu posible megafu ta sakrifisio nga tavvu ni Cristo. Ikonsidera i ilustrasion ni Jesus nga mabibbig ta Mateo 18:23-34. Iyavu ta baggim: ‘Napaguyu ngà kari nga iyaplika i nituddu ni Jesus? Mapasensia anna minangngalippawa ngà kari ta wawwaragi? Sigga-paran ngà kari nga pakoman danuri nakaliwa niakan?’ Kurug tu nadduruma i dammo na liwa, anna mariga nga pakoman na imperfekto nga tolay i karuan tatun. Ngem ituddu naw nga ilustrasion i ekspektan ni Jehova nittam. (Bibbigan i Mateo 18:35.) Nituddu ni Jesus nga manawag nga arianna ittam pakoman ni Jehova ta liwi-liwa tam nu ariattam pakoman i wawwaragi tam nu rasonable nga kuattam yatun. Serioso nga gannug yaw! Maprotektan anna mapattalupaddiattam i nabalor nga pattaraddetam nu pakomattam i tanakuan gittana nituddu ni Jesus nga kuattam.

13. Kunnasi nga makoffun ta pattaradday i pamabbalittam ta baggi tam bilang minangngirattal tu imammo?

¹³ Nu pakomattam i tanakuan, mapakurug tam nga minangngirattal tam tu imammo.  Daddamman i tabarang ni apostol Pablo nittam: “Kuan nu ngamin i adde na awayya nu nga mamannanayun ta pia na pattaradday nu nga iyawa na Espiritu Santo gafu ta imammo nga mamakatadday nikamu.” (Efe. 4:3) Durante taw nga tiempo na Memorial anna netallugaring ta gabi na Memorial, nonopan tu mapia nu kunnasim tratuan i tanakuan. Iyavu ta baggim: ‘Manawag kari nga masingan niakan nga ari ngà mangipappan tu taki na nono? Kilala ngà kari nga kuakku i adde na awayyà tapenu irattal i imammo anna pattaradday?’ Serioso danaw nga pakkiavu nga pannonopattam taw nga tiempo na dagun.

14. Kunnasi tam ‘ipasingan i pakka-aya-aya ta pakkapasa-pasensia ta kataggi-tadday nittam’?

¹⁴ I meka-appa nga makoffun ta pattaradday ay pangipasingan ta aya bilang pamarig kani Jehova, i Dios na aya. (1 Juan 4:8) Ariattam vuluvuga kayà nga kagian ta wagi tam, “Mawag tu ayatakku ira ngem ariakku kawagan nga magustuan ira”! I kunna nga pannono ay mekontra ta tabarang ni Pablo nga ‘ipasingan i pakka-aya-aya ta pakkapasa-pasensia ta kataggi-tadday nittam.’ (Efe. 4:2) Daddamman nga arianna laman kinagi nga ‘makkapasa-pasensia ittam ta kataggi-tadday.’ Kinagina paga nga ‘makka-aya-aya ittam.’ Madduma yatun. Nadduruma nga klase na tolay i egga ta kongregasiottam, nga niyaranni ni Jehova sa. (Juan 6:44) Megafu ta si Jehova mismu i nangiyaranni nira sa, masinganna i aru nga rason nga ayatan ira. Ngatta gafu ta ukuman na maski sinni nittam i kapangngurugna nga ari mepangngo ta aya tam? Ariattam nakuan iyetu i aya nga nibilin ni Jehova nga mawag tu ipasingattam!​—1 Juan 4:20, 21.

15. Kunnasi tam nammuan nga egga noka i ultimo nga Memorial?

¹⁵ Egga noka i aggaw nga ultimo ngana i keselebra na Memorial. Kunnasi tam nammuan yatun? Ta ollu nga nainspiran nga tura ni Pablo ta nazelugan ira nga Cristiano ta Corinto, kinagina nga gukaban na passelebra ta patay ni Jesus kada dagun, “ilammuyag [da] i patay na Yafu adde ta paddattalna.” (1 Cor. 11:26, NW) Ta orihinal nga ketransleytna, i uvovug nga “adde ta paddattalna” ay parehu i kebalinanna ta “duttal” nga tinukoy ni Jesus ta profesiyana meyannung ta tiempo na panuppalan. Meyannung ta dakal nga ziga nga aranni ngana duttal nittam, kunna: “Mappasingan noka i takkilala na Ana na tolay ta langi, anna mabbinunga noka i ngamin nga tribu na davvun megafu ta daddamda, anna masingadda noka i Ana na tolay nga duttal ta kunam ira na langi nga egga pakapangngua anna dakal nga gloriana. Anna doban [ni Jesus] noka i anghelna ira gukaban na pamaguni tu masikan ta dakal nga trumpeta, anna ammungadda noka i pinilina ira ta appa nga paddag, mamegafu ta tadday nga dugu na langa-langi adde ta abbag nga dugu danatun.” (Mat. 24:29-31, NW) Tukuyan na ‘pangammung ta pinili na Dios’ i tiempo sonu alawatan na ngamin nga nazelugan nga Cristiano nga nabattang paga ta davvun i nelangitan nga bala-baloda. Mesimmu yatun kabalin na pamegafu na dakal nga ziga ngem nige na gerra na Armagedon. Tapus mevulu kani Jesus i ngamin nga 144,000 ta pakillaban ta pata-patul na davvun. (Nep. 17:12-14) I ultimo nga Memorial nige naw nga pangammung na nazelugan ira ta langi i ultimo nga keselebra natun, megafu ta ‘zimittal’ ngana noka si Jesus.

16. Ngatta determinadu ka nga magatende ta Memorial taw nga dagun?

¹⁶ Determinadu tam nakuan nga benefisiowan i baggi tam gukaban na pagatende ta Memorial sonu Marso 31, 2018. Kiddawattam gapa kani Jehova nga uffunan ittam nga kanayun nga makoffun ta pattaradday na totolena! (Bibbigan i Salmo 133:1.) Daddamman nga egga noka i Memorial nga iselebra tam nga ultimo ngana. Nige natun, kuattam nakuan i adde na mawayya tam nga presente tatun, anna tagibalorattam nakuan i kakkasta nga pattaradday nga maekspiriensa tam ta Memorial.