EGGA ira tiempo nga meyaplika. Ikonsidera i tadday nga ehemplo. Kagian na Deuteronomio 24:14, 15: “Ariammu nakuan illokuan i nataddanan nga trabahador nga magawag anna pobre, maski nu tadday yaya ta wawwaragim onu dayu ta lugarnu . . . Ta nu ari, mappakurag yaya kani Jehova kontra nikaw, anna makaliwa ka.”

Egga i tadday nga netura nga rekord na kunnatun nga kaso na pakikurag nga napetsan tu mekapitu siglo B.C.E. Nalegan yatun aranni ta Asdod. Awayyana nga netura para ta tadday nga trabahador nga naakusan tu kurang i ginapasna ta mekiddaw sa, kunnaw i kagian na dokumento nga netura ta bakka na banga: “Kabalin na aripammu [i makikurag] nga magunnug tu apit ta piga aggaw i nappasa, zimittal si Hoshayahu nga ana ni Shobay anna inana i sinnun na aripammu. . . . Testigu i ngamin nga kavulu ku nga naggapas durante nga fermi i patu na bilag . . . nga kurug i kinagì. Inosente ngà ta maski anni nga liwa. . . . Nu ari ikonsidera na gobernador nga obligasionna nga ipetoli i sinnun na aripanna, kuanna nakuan megafu ta allo! Ariammu nakuan nga magimammo nu awan tu sinnun na aripammu.”

Yaw nga pakikurag “kagianna nittam ari laman i pakkadesperadu na trabahador nga metoli [i sinnunna],” kunna historiador nga si Simon Schama. “Ipasingan gapa naw nga i makkiddaw tu uffun ay egga i ammuna meyannung ta regulasion na Dob nga mabibbig ta Biblia, tallugaring ta reglamento ta Levitico anna ta Deuteronomio kontra ta marake nga pattratu ta pobre.”