“NU GINNAKKU i ekspiriensa na kokkofukku nga nasserbi ta lugar ira nga dakal i pakawagan para ta papayunir, kayà ku gapa nga sissiman yatun, kunni Sylviana, tadday nga payunir nga ma-25 anios. “Ngem,” kunna, “maganassing ngà nga ari ipamavulun na situasiokku i mabbalin tu need-greater.”

Matageno mu kari gapa i natageno ni Sylviana? Kakayà mu kari gapa nga masserbi ta teritoria nu sitaw aru i pakawagan para ta mangilayyagayya ta Pappatulan ngem nononopammu nu makayam yatun? Nu kunnatun, pasikannammu i nono mu! Gukaban na uffun ni Jehova, rinivu nga wawwaragi i nangarubang ta problema ira nga mangifugag nira nga palawan i ministerioda. Tapenu mammuan nu kunnasi inuffunan ni Jehova i karuan nira, umay ittam ta Madagascar, i meka-appa nga pinakadakal nga isla ta mundo.

Ta nappasa nga mafulu ragun, maturu tu 70 nga matalikarag nga publisher anna papayunir ta 11 nga nasion * i minay nga nasserbi taw nga progresibo nga tana ta Africa, nu sitaw aru nga tolay i mangirespeto ta Biblia. Sigga-paran gapa nga nagali i aru ta lokal nga publisher tapenu manguffun ta kewara na mensahe na Pappatulan taw nga dakal nga isla. Kilalattam i karuan nira.

Da Louis anni Perrine, magatawa nga ma-30 i dagudda, ay nagali ta Madagascar nga naggafu ta France. Piga-ragudda ngana nga nononopan nga palawan i ministerioda gukaban na pagali ta tanakuan nga nasion, ngem magalangan si Perrine nga magali. Niyesplikana: “Maganassing ngà umay ta lugar nga kakku ammu. Mavurung ngà nga panawan i familiami, kongregasion, apartment, i nakasanayan nga pallevu, anna i rutinami. Kakuruganna, i vuru-vurukku i talaga nga mangifugag niakan.” Ta 2012, nakonnug tu sikan na nono si Perrine, tapus nagali ira ni Louis. Anni i natagenona ta desisionna? “Nu lipayakku i nappasa, makagì nga talaga makapatuyag tu pangurug nga masingan i lima ni Jehova ta pattolemi.” Kunna paga ni Louis, “Fugurammu, ta ollu nga Memorial-mi ta Madagascar, mafulu ta study-mi i nagatende!”

Anni i namatuyag ta magatawa nga mattalupaddian ta asaymentda nu egga luttuag nga problema?  Nakimemallo ira nga iddan ira ni Jehova tu sikan nga makapagattam. (Fil. 4:13) Kunni Louis: “Naekspiriensami nga sinabbag ni Jehova i pakimallomi anna niddan nakami tu ‘imammo.’ Makapaffokus kami ngana ta pagayayya nga irattal na passerbimi. Mangisend tu e-mail anna tura i kokkofummi ta lugarmi tapenu pagaramman kami nga ari magimmang.”​—Fil. 4:6, 7; 2 Cor. 4:7.

Talaga binendisionan ni Jehova i pagattam nga nipasingan da Louis anni Perrine. “Turi ta Oktubre 2014, nagiskuela kami tu Bible School for Christian Couples * ta France,” kunni Louis. “Ari makattaman nga regalu nga naggafu kani Jehova i pagatendemi tatun nga eskuela.” Ta paggraduada, magayayya i magatawa nga neyasayn ta Madagascar.

Maturu tu 50 anios ngana i magatawa nga da Didier anni Nadine nga taga-France turi ta nagali ira ta Madagascar. Inistoria ni Didier: “Nappayunir kami turi ta kabbimmi, tapus napeggakkami tu tallu nga ána. Nguri ta ziminakal ngana ira, nanonomi nga masserbi ta tanakuan nga nasion.” Inamin ni Nadine: “Nonopakku paga laman nga meyarayyu ta ána ku mabbabang ngà ngana, ngem kudda nikami: ‘Nu magali kamu ta tanakuan nga nasion tapenu masserbi ta mas dakal nga pakawagan, proud kami saw nikamu!’ Megafu ta kinagida, napagaram kami nga magali. Maski arayyu kami ngana ta ánami, magayayya kami nga kanayummi nga kiyuvovugan ira.”

Para kada Didier anni Nadine, mariga nga gigiammuan i lengguahe nga Malagasy. “Ari ngana tu 20 anios i dagummi,” agga-ngizzi nga kinagi ni Nadine. Kunnasi ira navviktoria? Ta gafu, nagatende labbi ira ta kongregasion nga French. Tapus, turi ta preparadu ngana ira para ta lokal nga lengguahe, nagali ira ta kongregasion nga Malagasy. Kunni Nadine: “Aru ta nasimmuammi ta pallayyagayyami ay kakayàda i maggigiammu tu Biblia. Maruddu nga mappabalo ira ta pabbisitami. Ariakku mangurug ta gafu. Kakayà ku mappayunir taw nga teritoria. Kada umma, ta pallukag ku, kagiakku ta baggì, ‘Anni ‘na kastana—mallayyagayya ngà sangawe nga’ggaw!”

Makagalo si Didier kada meraddammanna turi ta gafuna nga maggigiammu tu Malagasy. “Mangikondukta ngà tu study ta kongregasion ngem ariakku malippawa i tabbag ira na wawwaragi. Maruddu nga ‘Mabbalo’ laman i makagì. Kabalikku nga mappabalo ta tadday nga sister ta tabbagna, nassenias danuri egga ta likugna nga mali i nitabbagna. Insigidà nga inagalan i tadday nga brother tapenu iyawa i fustu nga tabbag—siguru gapa, fustu i kinagina.”

Turi ta 2005 nga kombension, nagiraw ni Thierry anna na atawana nga si Nadia, i video nga “Pursue Goals That Honor God.” Meyannung kani Timoteo yatun nga drama ta Biblia nga nakatukkal ta futuda anna mas namagaram nira nga masserbi nu sitaw  dakal i pakawagan para ta mangilayyagayya ta Pappatulan. Kunni Thierry: “Ta pangultimo natun nga drama, durante nga mappoppo kami, niyananibig ku ta atawà, ‘Sitaw i angngayatta?’ Kinagi na atawà nga yatun gapa i nononopanna.” Ari nabbayag, nangngua ngana ira tu dakkua tapenu madde yatun nga goal. Inistoria ni Nadia, “Sesenu nga pinakarianammi i gamitmi ira adde ta nakkasia ngana laman ta appa nga maleta yatun!”

Zimittal ira ta Madagascar turi ta 2006 anna namegafu tatun, magayayya ira ta ministerioda. Kunni Nadia, “Dakal i ayayyami megafu ta totolay nga masimmuammi.”

Ngem kabalin na annam nga dagun, neparubang i magatawa ta tadday nga kapurueba. Neduya anna nakattu i limana anna netotto i ulu na yena ni Nadia nga si Marie-Madeleine, nga maddian ta France. Kabalin nga nakikonsulta i magatawa ta doktor ni Marie-Madeleine, nikiddoda ta yenada nga mevulu anna maddian yaya nira ta Madagascar. Maski 80 anios ngana yaya tatun nga tiempo, sigga-pagayayya nga inakseptana yatun nga kiddoda. Anni i matagenona ta paddian ta tanakuan nga nasion? Kunna: “Nu mittan mariga nga makibagay, ngem maski baddi laman i makuà, matageno ku nga makoffunnà tu mapia ta kongregasion. Anna i makapagayayya talaga niakan ay i paddiakku taw i mangipamavulun ta ana ku anna ta atawana nga ituloyda i progresibo nga ministerioda taw.”

Bente dos anios laman i brother nga si Riana. Ziminakal yaya ta Alaotra Mangoro, ta zigattu nga parte na Madagascar. Atannang i graduna ta eskuela anna kayàna nga makkolehio. Ngem kabalinna nga maggigiammu tu Biblia, nanguli i nonona. Kunna: “Nappursigi ngà nga mas mabi nga balinan i haiskul anna nipromesà kani Jehova, ‘Nu ipasà i final exam, mappayunir ngà ngana.’” Ta paggradua ni Riana, kinurugna i promesana. Nagali yaya kavulu i tadday nga payunir nga brother, nagaleg tu part-time nga trabahu, anna namegafu nappayunir. Kunna, “Yatun i kapianan nga desision nga kingnguà.”

Ngem ari malippawa na parientes ni Riana nu ngatta arianna ituloy i sekular nga karera. Inistoriana: “Pinagaramnà na yamà, tiyù, anna wagi na lolà nga ituloy nga makkolehio. Ngem kakku kayà magimmang nga mappayunir ta maski anni nga rason.” Ari nabbayag, kayà ngana ni Riana nga masserbi nu sitaw dakal i pakawagan. Ngatta kunnatun ngana laman i pakkaragana? Kunna: “Sinallung na koko ira i paddianammi tapus kinokoda i aru ta gamit ku. Megafu tatun nga nesimmu, ninono ku tu mapia i kinagi ni Jesus meyannung ta pagunnug tu ‘kukua ira ta langi.’ Nadisidì nga mas paga asiguran i pagunnug tu espiritual nga kukua.” (Mat. 6:19, 20) Nagali yaya ta zità nga parte na nasiodda​—mamaga-maga nga rehion nga 1,300 kilometro i karayyuna ta paddiananna. Yatun i paddianan na Antandroy nga totolay. Ngatta minay yaya tatun?

Tanga-vulan nige nakokotan si Riana, nigafuna i Bible study ta dua nga Antandroy. Nakagigiammu yaya tu piga nga ekspresion ta lengguaheda anna nanonona danuri aru nga Antandroy nga ari paga nga naddetan na mensahe na Pappatulan. Kunna, “Nakimallo ngà kani Jehova nga uffunannà nga magali ta rehion nga maguvovug tu Tandroy.”

Nagali si Riana, tapus insigida yaya nga neparubang ta problema. Ari yaya makaleg tu trabahu. Kinagi na tadday nga lalaki sa: “Ngatta minay ka taw? Umay ta lugar nga naggafuammu i totolay taw tapenu magaleg tu trabahu!” Kabalin na dua ligguan, nanaw tatun si Riana nga maggi awan tu kuartuna tapenu magatende tu rehional nga kombension anna mappakanonono nu anni i kuanna. Ta ultimo nga aggaw na kombension, egga i nibolsa na tadday nga brother ta amerikana ni Riana. Dakal yatun nga kuartu nga makalanno tapenu makapabbiahe yaya panoli ta Antandroy anna mangigafu tu baddi nga negosio nga mallaku tu yogurt. Kunni Riana: “Natageno ku i minangnguffun nga lima ni Jehova ta eksakto nga tiempo. Metuloy ku ngana nga uffunan danuri awan tu tiansada nga makilala si Jehova!” Aru gapa i trabahu ta kongregasion. Kunna paga ni Riana: “Neyasaynnà nga mappalappa kada dua ligguan. Sanayannà ni Jehova gukaban na organisasionna. Ta maddaggun, mangilayyagayya lagapa si Riana tu  mensahe na Pappatulan ta aru nga totolay nga maguvovug tu Tandroy nga maya nga makannammu kani Jehova.

Ipasiguradu ni Jehova nittam nga “sinni laman nga magaleg tu bendision para ta baggina ta davvun ay mabendisionan gukaban na Dios na kinakurug.” (Isa. 65:16) Nu mappursigi ittam nga arubangan i makefugag ira ta pamalawa ta ministerio tam, maekspiriensa tam i pamendision ni Jehova. Ikonsidera tam si Sylviana, nga nakagi ta gafu na artikulo. Daddamman nga maganassing yaya nga mabbalin tu need-greater megafu ta ari ipamavulun na situasionna. Ngatta nakagina yatun? Niyesplikana: “Mas ababba tu tallu-gaddua pulgada i ziwanan nga takkì. Mazzizzimpilay ngà nga lumakag anna mabi ngà nga mabannag.”

Ngem turi ta 2014, nakipartner yaya ta mabbing nga payunir nga kakongregasionna nga si Sylvie Ann, tapus nagali ira ta baddi nga ili nga 85 kilometro i karayyuna ta lugarda. Maski kunnatun i situasionna, natuppal i pakkaraga ni Sylviana​—anna talaga makakkasta nga bendision i nalawana! “Kabalin laman na tanga-ragun nga passerbi ta bagu nga asaymentna,” inistoriana, “si Doratine nga mabbing nga yena nga estudiantè ta Biblia ay nabawtisowan ta asembli sirkitomi.”

Kagitta na ipasingan na makapagaram ira nga istoria naw nga need-greater ira, nu mappursigi ittam nga arubangan i makefugag ira ta pamalawa tam ta ministerio tam, maekspiriensa tam mismu i kinakurug na promesa ni Jehova ta aripanna ira: “Patuyaggattaka, wan, uffunattaka.” (Isa. 41:10) Megafu tatun, mas maddukko i relasiottam kani Jehova. Nu sigga-paran nga isakrifisio i baggi tam—ta lugar tam onu ta tanakuan nga nasion​—iprepara ittam natun para ta teokratiko ira nga aktibidad nga maginnennag nittam ta bagu nga mundo. Kagitta na kinagi ni Didier, “makasta nga passanay para ta mappange i passerbi ta dakal i pakawaganna!” Paray nakuan tu aru nga sigga-paran nga trabahador i mangigafu gapa tu kunnatun nga passanay!