1, 2. (a) Anni i pinakamangina nga pakkukua tam? (b) Anni ira nga kinakurug i tagibalorattam, anna ngatta? (Innan i letratu ira ta gafu na artikulo.)

ANNI i pinakamangina nga pakkukuam? Kayà mu kari nga itali yatun ta tadday nga gannug nga mas baddi i balorna? Para ta dedikadu nga maddayaw kani Jehova, simple laman i tabbag taw ira nga pakkiavu. I pinakamangina nga pakkukua tam ay i relasiottam kani Jehova, yayya nga kattam itali yatun ta maski anni. Tagibalorattam gapa i kinakurug ta Biblia, nga namapposible nittam nga mabbalin tu kofun ni Jehova.​—Col. 1:9, 10.

² Nonopan ngana laman i ngamin nga ituttuddu nittam na Katannangan nga Instruktor tam ta Biblia! Nipeturana i kinakurug meyannung ta ngaganna nga napannuan tu kebalinan anna ta makapakemmi ira nga kualidadna. Nitudduna nittam i kakkasta nga probision nga tavvu, nga meddu nga niyawana nittam gukaban na Anana nga si Jesus. Nipakannammu paga ni Jehova nittam i Mesianiko nga Pappatulan. Niddanna ittam tu iddanama para ta mappange​—nelangitan para ta nazelugan ira onu Paraiso ta davvun para ta “tanakuan nga karneru.” (Juan 10:16, NW) Iyesplikana nittam nu kunnasi nakuan i pattolay. Tagibalorattam danatun nga kinakurug megafu ta mamaddukko yatun nittam ta Namaratu.  Napeggan paga tu kakkasta nga gakkag i pattoletam.

3. Ikiddaw kari na Dios nga pagattam tu kuartu i kinakurug?

³ Minangngiyawa nga Dios si Jehova. Arianna iyetu i mapia ta magaleg ira ta kinakurug. Niyawa paga lagu ni Jehova i inango na meddu nga Anana bilang libre nga regalu. Siguradu nga ari ikiddaw na Dios nga pagattam tu kuartu i kinakurug. Kakuruganna, turi ta egga i mangngagan tu Simon nga kayàna pagan si apostol Pedro tapenu mapeggan tu autoridad nga mangiyawa tu masanto nga espiritu, pinoryan yayya ni Pedro nga kunna: “Paray nakuan tu madaral ka tuange ta kuartum ta abbattam-mu tu awayyam nga gatangan i regalu na Dios!” (King. 8:18-20) Anni gafu i kayà kagian na bilin na Biblia nga: “Gatangammu i kinakurug”?

4. Taw nga artikulo, anni i gigiammuattam meyannung ta kinakurug?

⁴ Bibbigan i Proverbio 23:23. Ariattam malegan i kinakurug ta Uvovug na Dios nu awan vuluvuga tu kingngua tam. Sigga-paran ittam nakuan nga isakrifisio i maski anni tapenu mala yatun. Gitta na nitura na masirib nga gumattura na Proverbio, oras tu ‘ginatang,’ onu ina tam, i “kinakurug,” mawag tu magimmugug ittam nga ari tu “ilaku,” onu wawanan, yatun. Gigiammuattam nu anni i kebalinan na ‘gatangan’ i kinakurug anna i mawag nga ipaga tam tatun. Mas gafu nga maponag tam i appresasiottam ta kinakurug anna mapasikan i determinasiottam nga ari vuluvuga nga “ilaku” yatun. Malippawa tam nu ngatta mas nabalor i kinakurug kani Jehova anne ta maski anni nga gannug.

5, 6. (a) Kunnasi tam gatangan i kinakurug nga ari mawag i kuartu? Iyilustra. (b) Kunnasi ittam mabenefisiowan ta kinakurug?

⁵ Maski nu libre i tadday nga gannug mawag tu egga kuammu tapenu mala yatun. I Hebreo nga termino nga netransleyt tu ‘gatangan’ ta Proverbio 23:23 ay kayàna gapa kagian nga “apan.” Parehu nga kayà kagian natun nga mawag nga mappursigi onu itali i tadday nga gannug nga egga balorna. Tapenu malippawa tam nu kunnasi i paggatang ta kinakurug, ipetam nga mangiyofer i palengke tu libre nga dupo. Milagro kari nga luttuag yatun ta lamesa tam? Ari. Mawag nga mappursigi ittam nga umay ta paggatangan tapenu apan yatun. Libre kari yatun nga dupo? Wan, ngem mawag nga mappursigi ittam anna iddan tu tiempo nga umay ta paggatangan. Kunne na gapa, kattam mawag i kuartu tapenu gatangan i kinakurug. Ngem, mawag tam mappursigi nga apan yatun.

⁶ Bibbigan i Isaias 55:1-3. I uvovug ni Jehova nga nipeturana kani Isaias ay mas paga nga makoffun tapenu matindiattam i kebalinan na paggatang ta kinakurug. Taw nga rekord na Biblia, niyarig ni Jehova i uvovugna ta danum, gatto, anna binarayang. Gitta na malammin anna marenu nga danum, makarefresko gapa i kinakurug nga uvovug na Dios. Nu kunnasi gapa nga i gatto ay mamasikan nittam anna uffunan i abbarabbing nga dumakal, pasikannan anna uffunan ittam gapa na masustansia nga uvovug ni Jehova ta espiritual. Kunne na gapa, gittana binarayang i uvovug ni Jehova. Kunnasi? Ta Biblia, egga i koneksion na binarayang ta pagayayya. (Sal. 104:15) Ta pakkagi gafu ni Jehova ta totolena nga “gumatang tu binarayang,” nipasiguraduna nittam nga makapagayayya nittam i pattolay segun ta uvovugna. (Sal. 19:8) Anni na kastana nga pangiyilustra ta benefisio ira na paggigiammu anna pangiyaplika ta kinakurug nga uvovug na Dios! I presio nga pinappaga tam ay megitta ta appursigi nga kingngua tam. Yayya nga ikonsidera tam gafu i lima nga gannug nga paggatang ta kinakurug.

7, 8. (a) Ngatta mawag i tiempo tapenu gatangan i kinakurug? (b) Anni i kingngua na tadday nga estudiante, anna anni i resultana?

⁷ Tiempo. Yaw i ipaga na ngamin nga gumatang ta kinakurug. Mawag i tiempo tapenu  ginnan i mensahe na Pappatulan, bibbigan i Biblia anna literatura, mappersonal study, anna mapprepara para ta study ira. Mawag tu “gatangan,” onu apan, yatun nga tiempo ta karuan nga aktibidad nga ari kuruga importante. (Bibbigan i Efeso 5:15, 16, NW anna footnote.) Kunnasi kapaddu nga tiempo i mawag tam tapenu makala tu fustu nga pakannammu ta primeru ira nga tuddu na Biblia? Nakadepende yatun ta sirkumstansia tam. Awan tu limitasion na magigiammu tam meyannung ta kinasirib, metodo, anna ta metuppal ni Jehova. (Roma 11:33) Negitta na ollu nga isyu na Passifusifutan i kinakurug ta “ordinario nga lappaw” anna kunna: “Ariammu makontentu ta tadday laman nga lappaw na kinakurug. Nu makalanno ngana nakuan i tadday, awan ngana tu tanakuan. Magunnug paga, magaleg paga.” Iyavu ta baggi tam, ‘Kunnasi ngana kakaru i nonnug ku nga lappaw na kinakurug?’ Maski paga mattolay ittam tu mannanayun, magga egga lagapa i magigiammu tam meyannung kani Jehova. Ngem ta maddaggun, mas importante nga masirib nga usattam i tiempo tam tapenu gatangan i mas aru nga kinakurug adde ta ipamavulun na sirkumstansia tam. Ikonsidera tam i angngarigan na tadday nga talaga karagatanna i kinakurug.

⁸ Si Mariko * ay abbing nga babay nga Japanese nga minay ta New York City, U.S.A. tapenu magiskuela. Tatun nga tiempo, miembro yayya na tadday nga relihion ta Japan nga nabuu ta 1959. Nakayuvovug na tadday nga sister nga payunir si Mariko ta pamala-balay. Turi ta magigiammuna ngana i kinakurug ta Biblia, talaga magayayya yayya yatutta nikiddona ta payunir nga sister nga mamiddua ira maggigiammu tu Biblia ta tanga-ligguan. Maski paga okupadu i iskediulna ta eskuela anna egga i part-time nga trabahuna, nagatende lagapa yayya ta study ira. Niyemmanna gapa i karuan nga dibersion tapenu makagatang yayya tu tiempo para ta kinakurug. Nakoffun i kunnatun nga sakrifisiona ira ta alistu nga pinapprogresona ta espiritual. Ta unag laman na tanga-ragun, nabawtisowan yayya. Kabalin na annam nga vulan, turi 2006, nappayunir yayya, anna payunir lagapa adde ta maddaggun.

9, 10. (a) Anni i efekto na paggatattam ta kinakurug ta pagimamma tam ta material ira nga gannug? (b) Anni nga tiansa i nisakrifisio na abbing nga babay, anna anni i natagenona tatun?

⁹ Material nga ganna-gannug. Tapenu magatang i kinakurug, awayyana nga mawag tu panawattam i trabahu onu karera nga dakal i suelduna. Turi ta inagalan ni Jesus i gumaggimmanango nga da Pedro anni Andres nga ‘manga tu totolay,’ ‘pinanawadda i iko da.’ (Mat. 4:18-20) Arianna kayà kagian naw nga nu nagigiammum ngana i kinakurug, mawag tu panawammu i trabahum. Egga i nebase-Biblia nga obligasiodda. (1 Tim. 5:8) Ngem, maruddu nga danuri nakagigiammu ta kinakurug ay mawagda nga ulian i pagimammada ta material ira nga gannug anna i prayoridadda ira. Manawag yaw ta kinagi ni Jesus: “Ari kamu nga magunnug ta kukua ira nga masserbi nikamu toye ta utun na davvun . . . Magunnug kamu lagu ta kukua ira nga masserbi nikamu ta langi.” (Mat. 6:19, 20) Ikonsidera i ekspiriensa na tadday nga abbing nga babay.

¹⁰ Naenjoy ni Maria i paggayang tu golf namegafu paga ta kabbinna. Mas paga nabbalin yayya tu malalaki ta hayskul adde ta nakala tu scholarship ta tadday nga unibersidad. Nakasentro ta golf i pattolena, anna ambisionna nga mabbalin tu profesional golfer anna kumita tu dakal. Tapus nigafu ni Maria i maggigiammu tu Biblia, anna kakayàna i kinakurug. Magayayya yayya ta panguli nga nakua na kinakurug ta pattolena. Kunna: “Durante nga ulu-uliakku i ugalì anna i istilo na pattolè segun ta estandarte na Biblia, mas nagayayya ngà.” Nalippawa ni Maria nga mariga para sa nga mappursigi ta espiritual anna material nga kinariku. (Mat. 6:24) Yatutta  naddesision yayya nga isakrifisio i ambisionna nga mabbalin tu profesional golfer kunne na gapa i tiansa nga mabbalin tu mariku anna sikat. Ngem megafu ta ginatanna i kinakurug, massesserbi ngana yayya sangawe bilang payunir anna maenjoyna i “pinakakappagayayya, anna pinakamakakontentu nga pattolay nga posible.”

11. Nu gatangattam i kinakurug, anni i awayyana nga mesimmu ta relasiottam ta tanakuan?

¹¹ Relasion ta tanakuan. Nu pinili tam i mattolay segun ta kinakurug ta Biblia, awayyana nga manguli i relasiottam ta kokkofuttam anna ta paparientes tam. Ngatta? Nipakimallo ni Jesus meyannung ta disipulosna: “Pabbalinam-mu ira tu masanto gafu ta kakurug; i uvovug mu ay kakurug.” (Juan 17:17) Ta orihinal nga neketransleyt na “pabbalinam-mu ira tu masanto,” nosa i termino nga “isina ira.” Ta oras nga inalawa tam i kinakurug, nesina ittam ngana ta mundo megafu ta ari ittam ngana nga mappamolde tatun. Tanakuan ngana i paningan na totolay nittam megafu ta nanguli ngana i ugu-ugali tam. Mattolay ittam ngana segun ta estandarte ira na Biblia. Maski kattam kayà nga mabbalin tu rason na passirina, awayyana nga dumistansia i karuan ta kofun anna madukko nga kafamilia ta nittam onu kontradda paga lagu i bagu nga pangurug tam. Kattam nga makaddag tatun. Kunni Jesus: “I kontra noka na tadday nga tolay, ay danuri i kabbalay na gabbalaman.” (Mat. 10:36) Ngem nipasiguraduna gapa nga i bendision ira ta paggatammu ta kinakurug ay sulit anne ta nipagam.​—Bibbigan i Marcos 10:28-30.

12. Anni i nipaga na tadday nga Judio para ta kinakurug?

¹² Ta kabbing na Judio nga negosiante nga si Aaron, netuddu sa nga mali nga vuyatan i ngagan na Dios. Ngem, mapangal ta kinakurug si Aaron. Nagayayya yayya turi ta nipasingan na tadday nga Saksi nisa nga gukaban na pangiyammung tu vowel ira ta appa nga Hebrew consonant na ngagan na Dios, awayyana nga mevuyà yatun tu “Jehova.” Magayayya yayya nga minay ta sinagoga tapenu ikagi ta rabbi ira i kakkasta nga nadiskubrena. Ngem tanakuan i reaksiodda ta ekspektanna. Imbes nga makitappagayayya ira ta nisa ta nagigiammuna nga kinakurug meyannung ta ngagan na Dios, nilusagadda yayya anna nifuerada. Nadaral i relasionna ta familia. Ngem nitulu-tuloyna lagapa nga ginatang i kinakurug anna magutu nga nasserbi bilang Saksi ni Jehova ta interu pattolena. Gitta ni Aaron, mawag gafu nga sigga-parattam nga akseptan i panguli na relasiottam ta tanakuan megafu ta nagigiammu tam i kinakurug.

13, 14. Anni nga panguli ta appana-panono anna kondukta tam i kawagan tapenu gatangan i kinakurug? Mangistoria tu ekspiriensa.

¹³ Ari-makadios nga appana-panono anna kondukta. Tapenu malawà i kinakurug anna mattolay segun ta moral ira nga estandarte na Biblia, mawag nga sigga-parattam nga ulian i appana-panono anna kondukta tam. Sifutan i nitura ni Pedro meyannung taw nga panguloli: “Kunna minakkimoray nga ana na Dios, arian nu nga ipamavulun tu pammagurayan nakamu na neravvunan nga pakkaraga, ta kunne ta nesimmu gari nage nu paga nga nakannammu ta kurug. Ngem mappakasanto kamu paray ta ngamin nga kuan nu.” (1 Ped. 1:14, 15) Megafu ta imoral i totolay ta siudad na Corinto, mawagda i dakal nga panguli ta istilo na pattoleda tapenu magatadda i kinakurug. (1 Cor. 6:9-11) Tapenu magatang gapa na aru i kinakurug ta maddaggun, mawagda likuran i ari-makadios nga konduktada. Niperaddam paga ni Pedro ta Cristiano ta kaggawanna: “Hustu ngana yuri i tiempo nga nipappagustu nu nga nangngua ta gannug ira nga ikaya na Hentil ira nga kuan. Nattolay kamu ta ari mefugu-fugag anna nepattaggan nga pakkaraga na baggi, kanayun nga pagillellaw, nepallo nga pappaga-pagayaya nga mattuppal ta kappasiran ira nga trabahu, magulu nga pamippissan  ta pattaraddayan tuange ta kanninipang nga paddaya-rayaw ta sinan-dios ira.”​—1 Ped. 4:3.

¹⁴ Ta aru nga dagun, minaggillellaw da Devynn anni Jasmine. Maski paga malalaki nga bookkeeper si Devynn, ari yayya makala tu permanente nga trabahu megafu ta illawen yayya. Kilala gapa si Jasmine nga agresibo anna vayolente. Mittan, turi ta nellaw nga makalalakag ta dalan si Jasmine, nakasimmu yayya tu magatawa nga misionero nga Saksi. Nangiyunnug tu paggigiammu tu Biblia danaw nga misionero, ngem ta paddattalda ta balay da Devynn ta tumunug nga ligguan, nellaw da Jasmine anni Devynn. Kadda makapangurug nga minay paga mismu ta baleda i misionero ira gafu ta pangikavurudda. Ngem nanguli ngana i situasion ta tumunug. Ta ollu pagalaman nga pagistudy da Jasmine anni Devynn, nabbalin ira tu malappo nga estudiante na Biblia anna niyaplikada ngana i giggigiammuadda. Ta unag laman na tallu vulan, niyemmadda i paginum tu binarayang anna legal ira nga nakkasal. Aru i nakannammu ta pinangulida, yayya nga aru i napaguyu nga maggigiammu tu Biblia ta lugarda.

15. Anni i tadday ta pinakamariga nga ipaga para ta kinakurug, anna ngatta?

¹⁵ Kostumbre anna annangngua nga ari mamagayayya ta Dios. Tadday ta pinakamariga nga ipaga para ta kinakurug ay i pangiyemmang ta kostumbre anna annangngua nga ari mamagayayya ta Dios. Maski paga mabi laman ta karuan nga akseptan i pakanawag na Biblia nu ngatta mawag nga panawan danaw nga annangngua, awayyana nga magalangan i karuan nga massakrifisio megafu ta pamipilit na kafamilia, katrabahu, anna madukko nga kokkofun. Posible nga mabbalin tu emosional i situasion, mas ngana nu nelagum ta kostumbre i ritual nga pangikakua ta natay nga parientes. (Deut. 14:1) I magutu nga ehemplo na tanakuan i makoffun nittam tapenu kuan i mawag ira nga panguli. Innattam i magutu nga kingngua na karuan nga taga-Efeso turi ollu-siglo.

16. Anni i kingngua na karuan nga taga-Efeso tapenu gatangan i kinakurug?

¹⁶ Madumu-rumug i Efeso megafu ta salamangka. Anni i kingngua danuri na bagu-kumberte nga Cristiano nga dati nga salamangkeru tapenu battangan danatun nga ari-nebase Biblia nga annangngua anna gatangan i kinakurug? Kunna Biblia: “Napakaru turi ta salamangkeru ira i nangiyangay ta libru da ira ay pinattaradday da ira anna sinuggi da. Turi ta bilangad-da i ngina na libru ira ay nabbalor tu lima-rivu [50,000, NW] nga pira. Megafu taw nga mekapalla nga nesimmu, mas nga nawwara anna nassikan i pakapangngua na uvovug na Yafu.” (King. 19:19, 20) Sigga-paran danuri matalo nga Cristiano nga itabbo i mangini-ngina ira nga libruda, yari tu binendisionan ira ni Jehova megafu tatun.

17. (a) Anni ira nga gannug i melagum ta ipaga tam para ta kinakurug? (b) Anni ira nga pakkiavu i ikonsidera tam ta tumunug nga artikulo?

¹⁷ Anni i nipagam ta kinakurug? Sittam ngamin ay nangusa tu tiempo tapenu magunnug tu lappaw ira na kinakurug. Pinagan gapa na karuan i kinakurug gukaban na pinangisakrifisio ta material ira nga gannug anna ta relasiodda ta tanakuan. Mawag gapa nga ulian na magaru i appana-panono anna konduktada anna battangan i kostumbre anna annangngua nga ari mamagayayya ta Dios. Maski anni paga i nisakrifisio tam, kumbinsidu ittam nga sulit i kinakurug ta Biblia anne ta maski anni nga nipaga tam. Iyawa natun i pinakamangina nga pakkukua tam, i madukko nga relasion kani Jehova. Nu nononopattam i bendision ira na pakannammu ta kinakurug, marigatan ittam nga anugutan nga egga danuri mayà nga mangilaku tatun. Ngatta mesimmu yatun, anna kunnasi tam malillitan nga kuan i kunnatun nga serioso nga kamali? Ikonsidera tam danatun nga pakkiavu ta tumunug nga artikulo.