1, 2. Durante nga mapprogreso ittam ta espiritual, anni i magigiammu tam nga kuan? Iyilustra.

NEDDAN tu regalu i tadday nga abbing. Kunna maganana sa, “Ma-thank you ka gapa ngay.” Siminuttul i abbing, ngem napilitan laman. Durante ta pagadultona, malippawana ngana nu ngatta nonopan na maganana nga importante i mappabalo nu egga i makasta nga kingngua na tanakuan. Boluntariu ngana gapa yayya nga mappabalo tu napafutuan. Ngatta? Megafu ta nagigiammuna ngana i mappabalo.

² Kunne na gapa, turi ta ollu tam nammuan i kinakurug, nagigiammu tam i importansia na panuttul ta dorob ni Jehova. Ngem durante nga mapprogreso ittam ta espiritual, mas magigiammu tam i appanono ni Jehova​—i kayàna ira, manakina ira, anna nu kunnasina imammatan i ganna-gannug. Nu ipamavuluttam i appana-panono ni Jehova nga influwensian i paddesision anna agguyu-guyu tam, maparigattam i appanonona.

3. Ngatta mariga nu mittan i pamarig ta appana-panono ni Jehova?

³ Maski paga magayayya ittam ta paggigiammu ta appanono ni Jehova, mariga imammatan nu mittan i ganna-gannug nga kunna pagimammana. Angngariganna, baka marigatan ittam malippawa i pagimamma ni Jehova ta kinarenu ta moral, materialismo, ta pallayyagayya,  mali nga pangiyusa ta daga, onu ta tanakuan paga. Anni i makua tam? Kunnasi tam tulu-tuloy nga mapprogreso ta pamarig ta appana-panono na Dios? Anna anni nakuan i efekto na pangngua tatun ta agguyu-guyu tam ta maddaggun anna ta mappange?

4. Anni i nelagum ta tabarang ni Pablo nga ‘talibaguan i appana-panono tam’?

⁴ Bibbigan i Roma 12:2. Nitura taw ni apostol Pablo nu anni i nelagum ta paggigiammu nga parigan i pagimamma ni Jehova. Inuffunan ittam na nappasa nga artikulo nga appresian nga tapenu ‘ari matuttul i annangngua na totolay toye ta utun na davvun,’ mawag nga panakitattam nga patallungan i makamundo ira nga pagimamma anna ugu-ugali. Ngem kinagi paga ni Pablo i kawagan tapenu ‘talibaguan i appana-panono tam.’ Nelagum tatun i paggigiammu ta Uvovug na Dios nga gakkag nga malippawa yatun, monag nga pannono tatun, anna pangikunnay ta pagimamma tam ta pagimamma na Dios.

5. Iyesplika i nadduman na basta pabbibbig ta paggigiammu.

⁵ I paggigiammu ay ari laman tu basta pabbibbig, ni tu basta paggalli ta tabbag ira ta pakkiavu. Nu maggigiammu ittam, ikonsidera tam nu anni i ituddu na material nittam meyannung kani Jehova, ta dala-dalanna, anna ta pagimammana. Alippawatattam nu ngatta imandu na Dios i tadday nga gannug anna nu ngatta kondenanna i karuan. Nonopattam gapa nu anni ira nga panguli i mawag nga kuattam ta pattolay anna pagimamma tam. Maski ari nga mekonsidera ngamin danaw ta kada sesion na study, mabbenefisio tam nu usattam i oras tam​—awayyana nga gaddua ta tiempo na kada paggigiammu​—ta monag nga pannono tu mapia ta nabibbig tam.​—Sal. 119:97; 1 Tim. 4:15.

6. Anni i mesimmu nu monag nga pannonopattam i appana-panono ni Jehova?

⁶ Nu kanayuttam nga monag nga pannonopan i Uvovug na Dios, egga makapabbaw nga mesimmu. Mapakurug tam ta baggi tam, wan, makumbinsi tam i baggi tam nga perfekto i parrasa-rason ni Jehova ta ganna-gannug. Memammatattam i ganna-gannug segun ta pagimammana, anna umanugu ittam tatun. I nono tam ay ‘matalibagu,’ anna mapeggan ittam tu bagu nga appanono. Sisinu gapa nga maparigattam i appana-panono ni Jehova.

7, 8. (a) Anni i pagimamma ni Jehova ta material nga kinariku? (Innan i letratu ira ta gafu na artikulo.) (b) Nu parigattam i pagimammana, anni nakuan i kanayun nga prayoridad tam?

⁷ Ari laman nga afektan na appana-panono tam i mataga-tageno tam ta ganna-gannug, nu ari, maski i kukukuattam. (Mar. 7:21-23; Sant. 2:17) Mas maappresia tam yaw nu mangikonsidera ittam tu karuan nga angngarigan. Angngariganna, manawag nga ipasingan nittam na Evanghelio ira i pagimamma ni Jehova meyannung ta material nga ganna-gannug. I Dios mismu i namili kada Jose anni Maria nga mamadakal ta Anana maski simple laman i pattoleda. (Lev. 12:8; Luc. 2:24) Tagga ta neyana si Jesus, ‘pinagidda yayya ni Maria ta lutung ta awan ngana tu paddianad-da ta addagatan nga balay.’ (Luc. 2:7) Nu kayà laman ni Jehova, awayyana nakuan nga nangiyawa tu mas makasta nga paddianan para ta keyanakan na Anana. Ngem kayàna nga dumakal si Jesus ta familia nga pagolluadda i paddayaw ta Dios. Yatun i pinaka-importante nga gannug kani Jehova.

⁸ Taw nga rekord na Biblia meyannung ta keyana ni Jesus, maappresia tam i pagimamma ni Jehova ta material nga ganna-gannug. Kayà na karuan nga magana nu anni i kapianan ta ánada ta material, maski paga isakrifisioda i espiritualidadda. Ngem manawag  nga ikonsidera ni Jehova nga i espiritual nga ganna-gannug i pinaka-importante. Parigammu kari gapa i pagimamma ni Jehova? Anni i kagian na agguyu-guyum?​—Bibbigan i Hebreo 13:5.

9, 10. Kunnasi tam mepasingan nga paparigattam i pagimamma ni Jehova ta pangisiddukal ta tanakuan?

⁹ Tadday paga nga angngarigan ay i pagimamma na Dios ta pangisiddukal ta tanakuan. Kunni Jesus: “I sinni laman nga kegafuan na keyawawan na pangurug niakan na tadday taw ira nga abbing, ay mas mapia tatun nga tolay tu mabesinan tu dakal nga aggilingan nga batu i vullaw na anna metabbo ta bebay.” (Mar. 9:42) Manawag nga kuruga serioso nga gannug kani Jesus i pangisiddukal ta tanakuan! Megafu ta perfekto nga ipasingan ni Jesus i personalidad na Yamana, makasiguradu ittam nga matageno gapa ni Jehova nga serioso nga gannug nu ari ikonsidera na tadday nu makesiddukal i agguyu-guyuna ta tadday ta disipulos ni Jesus.​—Juan 14:9.

¹⁰ Paparigattam kari i pagimamma ni Jehova anni Jesus meyannung ta pangisiddukal ta tanakuan? Anni i ipasingan na agguyu-guyu tam? Angngariganna, baka maengganio ittam ta tadday nga istilo na assissinnun anna itsura nga awayyana nga makesiddukal ta karuan ta kongregasion onu makapannono ira tu imoral. Paguyuan ittam kari na meddu nga pangikavuruttam ta kapangngurug nga ari ipilit i istilo ira nga gustu tam?​—1 Tim. 2:9, 10.

11, 12. Kunnasi ittam maprotektan na pangultiba ta pagimamma na Dios ta kinarake anna na pangifugag ta baggi kontra ta pagangngua tu marake?

¹¹ Yaw i mekatallu nga angngarigan: Kala-kalussaw ni Jehova i ari matunung. (Isa. 61:8) Siempre, ammuna nga mariga para nittam nga kuan nu mittan i matunung megafu ta imperfekto ittam. Ngem, kayàna nga mannono ittam nga kagittana anna ikalussaw tam gapa i marake. (Bibbigan i Salmo 97:10.) Makoffun i monag nga pannono nu ngatta kalussaw ni Jehova i kinamarake tapenu maparigattam i pagimammana, nga mamasikan gapa nittam nga labanan i pangngua tu marake.

¹² Moffunan ittam na kapeggan tu pagimamma ni Jehova ta ari matunung tapenu marekunnisi nu marake i karuan nga annangngua, maski ari nga espesipiko nga natukoy ta Uvovug na Dios. Angngariganna, tadday nga klase na imoral nga kondukta i lap dancing nga normal ngana laman ta mundo ta maddaggun. Awayyana nga irason na karuan nga ari mabba kaparehu yatun na aktual nga seksual nga relasion. * Ngem ipasingan kari natun i pagimamma na Dios, nga mangikalussaw ta kada klase na kinarake? Arayyuattam nakuan i pagangngua tu marake gukaban na pangultiba tu pangifugag ta baggi anna pangikalussaw ta ikalussaw ni Jehova.​—Roma 12:9.

13. Ngatta mawag nga nonopattam ngana nu kunnasi makoffun i pagimamma ni Jehova ta mappange ira nga desisiottam?

¹³ Nu maggigiammu ittam, nonopattam nakuan i meyuffun na pagimamma ni Jehova ta situasion ira nga awayyana nga meparubang nittam ta mappange. Nu egga noka i situasion nga magawag tu alistu nga paddesision, preparadu ittam anna ammu tam nu anni i kuattam. (Prov. 22:3) Ikonsidera tam i karuan nga ehemplo ta Biblia.

14. Anni i nagigiammu tam ta tabbag ni Jose ta atawa ni Potifar?

¹⁴ Gukaban na insigida nga pallilli ni Jose  ta pamurueba na atawa ni Potifar nga bensian yayya, nipasinganna nga nikonsiderana i pagimamma ni Jehova ta kinamatalo ta pagatawa. (Bibbigan i Genesis 39:8, 9.) Kunne na paga, i tabbagna ta atawa ni Potifar nga: “Yari tu kunnasi nga makuà yaw nga kinamarake anna ta kakuruganna, makaliwa ta Dios?” ay mangipasingan nga papariganna i pagimamma na Dios. Kunnasi ittam gapa? Anni i kuattam nu maki-alembong i katrabahu tam nittam? Kunnasi nu egga i makatenta nga mensahe onu letratu nga ne-send ta cellphone mu? * Mas alistu nga mattalupaddian nga matalo kani Jehova nu dana ngana nga ammu tam anna akseptan i pagimamma ni Jehova ta ganna-gannug anna dana ngana nga ammu tam nu anni i kuattam.

15. Kunnasi ittam mattalupaddian nga matalo kani Jehova gitta na tallu nga Hebreo?

¹⁵ Ikonsidera tam ngana i ehemplo na tallu nga Hebreo nga da Sadrac, Mesac, anni Abednego. Ipasingan na determinadu nga pammanakida nga makkummag ta vulawan nga imahe nga nipataddag ni Patul Nabucodonosor anna i manawag nga tabbagda ta patul nga dana ngana nga pinannonopadda nu anni i nelagum ta pattalupaddian nga matalo kani Jehova. (Ex. 20:4, 5; Dan. 3:4-6, 12, 16-18) Kunnasi nu makkiddaw tu donasion i amom para ta mappange nga selebrasion nga egga i koneksionna ta falsu nga relihion? Anni i kuammu? Imbes nga innaggan nga meparubang tatun ira nga situasion, ngatta kammu dati pannonopan sangawe i kunnatun nga gannug segun ta pagimamma ni Jehova? Tapenu sonu luttuag i kunnatun nga situasion, mas alistu ngana para nikaw nga kuan anna kagian i fustu, gittana kingngua na tallu nga Hebreo.

16. Kunnasi makoffun nittam i manawag nga pangalippawa ta pagimamma ni Jehova ta papprepara para ta medical emergency?

¹⁶ Makoffun gapa i dati nga pannono nga mawag tu mattalupaddian nga matalo nu egga i medical emergency. Talaga determinadu ittam nga lillitan i pappatubbo tu puro nga daga onu ta maski anni ta appa nga component natun. Ngem ta karuan nga proseso melagum i daga, kawagan i personal nga desision base ta prinsipio ira na Biblia nga mangipasingan ta pagimamma ni Jehova. (King. 15:28, 29) Siguradu nga i kapianan  nga tiempo nga maddesision tatun ay ari tu sonu egga ittam ta hospital, nga posible nga grabe ngana i taki tam onu pilitadda ittam nga maddesision insigida. Sangawe ngana i tiempo nga marresearch, kumpletuan i legal ira nga dokumento ta medikal nga niketurakkan na kiddom ira, anna makiyuvovug ta doktor mu. *

17-19. Ngatta importante nga gigiammuan ngana sangawe i pagimamma ni Jehova? Mangiyawa tu situasion nga kawagattam nga nakaprepara.

¹⁷ Ikonsidera tam ngana i insigida nga tabbag ni Jesus ta ari masirib nga tabarang ni Pedro: “Afu, ikallo mu i baggim.” Manawag nga dati ngana nga pinannonopan ni Jesus i uray na Dios sa anna i profesiya ira meyannung ta pattolay anna patena taw ta davvun. Yaw nga pakannammu i namasikan ta desisionna nga kanayun nga mabbalin tu matalo anna minassakrifisio anna ari vuluvuga nga makkafi.​—Bibbigan i Mateo 16:21-23, NW.

¹⁸ Ta maddaggun, uray na Dios ta totolay nga mapeggan ira tu pakikkofun sa anna kuan i adde na mawayyada ta pallayyagayya. (Mat. 6:33; 28:19, 20; Sant. 4:8) Gitta ni Jesus, egga danuri makasta gapa i intensiodda ngem pakkafiadda i nono tam nga kuan yatun. Angngariganna, kunnasi nu oferan naka na amom tu promosion anna mas dakal nga sueldu ngem makefugag yatun ta espiritual ira nga aktibidad mu? Onu magiskuela ka paga, tapus neddakka tu oportunidad nga umarayyu ta lugarnu tapenu makalawa paga tu mas atannang nga edukasion. Tatun ira nga situasion, mawag mu paga kari nga marresearch, makkonsulta ta familiam onu ta elder ira, nige mu maddesision? Ngatta ariammu nga gigiammuan ngana sangawe i pagimamma ni Jehova ta kunnatun ira nga gannug anna parigan yatun? Tapus, nu meparubakka ta kunnatun ira nga oportunidad, ari ngana nga tentasion danatun nikaw. Ammum ngana nu anni i eksakto nga kuammu megafu ta datim ngana nadisidi nga maffokus ta passerbi kani Jehova.

¹⁹ Awayya nga egga paga i manono mu nga tanakuan nga situasion nga gavva nga luttuag. Siempre, kattam makaprepara ta ngamin nga puede nga mesimmu. Ngem nu pannonopattam tu mapia i pagimamma ni Jehova durante na personal study tam, siguradu nga meraddammattam i nagigiammu tam ira tapenu meyaplika ta espesipiko ira nga situasion nga luttuag. Mabbalin ittam gafu nakuan tu sensitibo nga tagenappan i appanono ni Jehova ta ganna-gannug, anna ikonsidera tam nu kunnasi nga afektan na kapeggan tu kunna Dios nga pagimamma i kuattam ta maddaggun anna ta mappange.

20, 21. (a) Anni nga klase na kapalubbang i maekspiriensa tam ta bagu nga mundo? (b) Kunnasi ittam makapagayayya ta maddaggun?

²⁰ Sittam ngamin ay inninnaggattam ngana i bagu nga mundo. Karagatan na aru nittam i mannanayun nga inango ta paraiso nga davvun. Ta pammaguray na Pappatulan, mapalubbangan noka i totolay ta daddam ira nga normal taw nga sistema na ganna-gannug. Siempre, maski sonu mesimmu yatun, egga lagapa i lallaguretam. Mappili lagapa i kada tadday nittam base ta kayà anna karagatanna.

²¹ Siempre, akkan nga awan tu limitasion na kunnatun nga kapalubbang. Sonu mawag na minappakalinno i mappili nu anni i fustu ta mali, mawagda maddesision base ta dorob anna pagimamma ni Jehova. Marresulta yatun noka tu pagayayya anna abundansia nga imammo. (Sal. 37:11) Ngem ta maddaggun, mapeggan tam lagapa tu pagayayya durante nga paparigattam i appana-panono ni Jehova.