Ta gabi nige na patay ni Jesus, sinabarangnganna i apostolesna nga ari makkaraga tu prominente nga posision ta kapangngurugda. Kunna: “I patul ira na Hentil ay egga i pakapangngua da ta totolay nga pammagurayad-da. I karuan taw ira nga mammaguray ay ngaganad-da i baggi da laggapa tu ‘Minangnguffun ta Totolay.’ Ngem mawag tu ari tu kunnatun nikamu.”​—Luc. 22:25, 26.

Sinni danuri Minangnguffun ta Totolay nga tinukoy ni Jesus? Ipasingan na mabibbig ira ta batu, barya, anna dokumento ira nga kostumbre gari na Griego anna Romano ira nga komunidad nga idayaw i prominente nga totolay anna mammaguray gukaban na pangiyawa nira tu titulo nga Euergetes, onu Minangnguffun ta Totolay [Benefactor]. Meyawa yaw nga dayaw megafu ta egga i importante nga pinasserbi ta publiko danatun nga lallaki.

Egga gapa i patul ira nga nagalan tu Minangnguffun ta Totolay. Kasali taw i Ehipsio ira nga mammaguray nga kilala bilang Ptolemy III Euergetes anna si Ptolemy VIII Euergetes II. Kunnatun gapa i titulo nga neyawa ta Romano nga mammaguray nga da Julius Caesar anni Augustus tuange kani Herod the Great, nga patul na Judea. Ta kaso ni Herodes, posible nga nalana yatun nga dayaw turi ta giminatang yayya tu trigu tapenu pawanan i bisin ta sakupna ira anna nangiyawa yayya tu sinnung ira ta pobre.

Segun ta iskolar na German Bible nga si Adolf Deissmann, popular i pangiyusa tu titulo nga Minangnguffun ta Totolay. Kunna paga: “Ari tu mariga nga maka-unnug maggafu ta inskripsion ira, ta baddi laman nga tiempo, tu maturu tu magatu nga angngarigan [na pangiyusa tu kunnaw nga titulo].”

Anni gafu i kayà kagian ni Jesus turi ta kinagina ta disipulosna: “Ngem mawag tu ari tu kunnatun nikamu”? Kakkagian kari ni Jesus nira nga ariadda nakuan nga uffunan i tanakuan nga totolay, nga ariadda nakuan ikavurungan i pammakapianan danuri egga ta pallevuda? Ari vuluvuga. I ikavurungan ni Jesus ay i motiboda ta pabbalin tu minangngiyawa.

Ta kaggawan ni Jesus, karagatan na mariku ira i makasta nga reputasion para ta baggida gukaban na pagisponsor tu pagiraw anna pagayang ta arena, pamataddag tu parke anna templo ira, anna passuporta ta parehu ira nga aktibidad. Ngem kingnguada yatun tapenu medayaw, massikat, onu meboto. “Maski paga egga ira i sinsero nga pangiyawa maggafu ta kunnatun ira nga minangngiyawa,” kunna tadday nga referensia, “maruddu nga i kunnatun nga annangngua ay para ta makasarili nga pulitikal nga interes.” I kunnatun nga pagambision anna pabbalin tu makasarili i nitabarang ni Jesus nga ibita na disipulosna.

Ta pappasa na piga dagun, nepatalatto ni apostol Pablo yatun nga parehu nga importante nga kinakurug meyannung ta kapeggan tu marenu nga motibo ta pangiyawa. Niturana ta kasi-Cristianona ta Corinto: “Mawag gafu tu mangiyawa i kataggi-tadday segun ta madisidi na nga iyawa, anna awan tu taki na nono na, onu nafersa laman. Ta ayatan na Dios i sigga-pagayaya nga mangiyawa.”​—2 Cor. 9:7.