TALAGA makapagaram anna makapabannay i maka-ekspiriensa tu kinasippo! Nu matageno tam nga egga i mangikavurung nittam, talaga mappabalo ittam. Megafu ta appresian na kada tadday nittam i katratu tu masippo, kunnasi ittam mapeggan tu kunnatun nga makakkasta nga kualidad?

Nelagum ta kinasippo i sinsero nga paginteres ta pammakapianan na tanakuan​—paginteres nga masingan ta makakoffun ira nga uvovug anna kondukta. Megafu ta i kinasippo ay mepasingan ta annangngua, ari laman yaw nga masingan ta pabbalin tu marespeto onu minangngikakua. I kurug nga kinasippo ay navulunan tu monag nga aya anna empatia. Fuera paga tatun, aspeto gapa na vunga na masanto nga espiritu na Dios i kinasippo nga mawag nga kultiban na Cristiano ira. (Gal. 5:22, 23) Mawag nga kultibattam i kinasippo, yayya nga gigiammuattam nu kunnasi nipasingan ni Jehova anna na Anana yaw nga kualidad anna nu kunnasi tam maparigan i ehemploda.

Masippo anna makonsiderasion si Jehova ta ngamin, maski ta “ari makannammu nga mabbala-balo sa tuange ta marakay ira.” (Luc. 6:35) Angngariganna, “nawagan na Dios ta bilag na i marakay anna mapia nga totolay. Anna mapparehu gapa nga iddan na Dios tu uran i mangngua ta mapia tuange ta mangngua ta marakay.” (Mat. 5:45) Yari tu, maski danuri ari marrekunnisi nga si Jehova i Namaratu nira ay mabbenefisio lagapa ta masippo nga probisionna ira anna makapagayayya.

Makala ittam tu kakkasta nga ehemplo na kinasippo ni Jehova ta kingnguana para kada Adan anni Eva. Ari nabbayag kabalin nga nakaliwa da Adan anni Eva, “naddage ira tu don ira na igos anna namadday ira tu panakkag ta awada.” Ngem ammu ni Jehova nga mawagda paga i mepangngo nga sinnun tapenu makapattolay ta lawan na Eden, nu sitaw i davvun ay nebariaw nga “mamattalovu yatun tu mulu-mula nga makasi anna makatubbo.” Yayya nga masippo nga niyawa ni Jehova i pakawagadda gukaban na pagangnguana tu “apparaddu nga sinnun nga napadday ta tabbi” para nira.​—Gen. 3:7, 17, 18, 21.

Nu masippo si Jehova ta “mapia tuange ta mangngua ta marakay,” mas ngana gafu nga kayàna nga mangipasingan tu kinasippo ta matalo ira nga aripanna. Angngariganna, ta kaggawan ni profeta Zacarias, mavurung i tadday nga anghel megafu ta pakasinganna nga permanente nga nagimmang i pangipataddag uli ta templo ta Jerusalem. Gininna ni Jehova i vuru-vurung na anghel anna simibbag yayya ta “masippo anna makapabannay ira nga uvovug.” (Zac. 1:12, 13) Kunnatun gapa i kingngua ni Jehova kani profeta Elias. Mittan, sobra daddam na profeta yari tu nikiddona nga patayan ngana laman yayya ni Jehova. Talaga malippawa ni Jehova i mataga-tagenona yatutta naddog yayya tu anghel tapenu pasikannan si Elias. Nipasiguradu paga na Dios ta profeta nga ari yayya nga magitetadday. Kabalin ni Elias nga nakalawa tu kunnatun nga uvovug anna uffun, natuppalna lagapa i asaymentna. (1 Pat. 19:1-18) Ta ngamin nga aripan na Dios, sinni i interamente nga nangipasingan ta makakkasta nga kualidad ni Jehova nga kinasippo?

Ta ministerio ni Jesus ta davvun, kilala yayya nga masippo anna makonsiderasion. Ari yayya nga vayolente onu dominante. Sigga-empatia nga kunna: “Umay kamu niakan, sikamu ngamin nga nabanna-bannag anna agga-kattu ta madammo, ta pagibannagat-takamu. . . . Ta alappaw laman i takkilù.” (Mat. 11:28-30) Megafu ta kinasippo ni Jesus, zinaddanan yayya na totolay maski sitaw i angngayanna. Megafu ta “ziminatu i allo” ni Jesus, pinakanna ira, pinammapiana i makkataki nira, anna sinudduanna ira “tu aru nga ganna-gannug” meyannung ta Yamana.​—Mar. 6:34; Mat. 14:14; 15:32-38.

Minangngalippawa anna ammu ni Jesus i makilallang ta tanakuan, megafu ta kuruga masippo yayya. Kakuruganna, maski ari nga kombiniente sa i ikikkiddaw na totolay, “mapia” lagapa i pinangalawana nira. (Luc. 9:10, 11) Nonopan ngana laman nu anni i nesimmu ta babay nga massesse tu daga. Kakayàna i mammapia, yari ta sinukkalna i sinnun ni Jesus. Ngem segun ta Mosaiko nga Dob, arianna awayya nga kuan yatun ta mebilang yayya nga maritta. (Lev. 15:25-28) Megafu ta allo ni Jesus tatun nga babay nga 12 dagun ngana nga marigi-rigatan, kinagina sa: “Ana ku, nammapia ka ngana megafu ta angngurug mu. Lubbe ka ngana nga sigga-imammo ta nammapia ka ngana.” (Mar. 5:25-34) Talaga kakkasta nga pangipasingan tu kinasippo!

Ta ehemplo ira nga nakagi, masingattam nga i kurug nga kinasippo ay mawag nga mavulunan tu aksion. Nipasingan ni Jesus i pakawagan ta aksion ta ilustrasion meyannung ta masippo nga Samaritano. Maski nu ari nga makkavuyu-vuya i Samaritano anna i Judio ira, nikallo lagapa na Samaritano i lalaki nga Judio nga nakokotan, napala-palu, anna newalang nga magimmamatay. Kinasippo i namaguyu ta Samaritano nga manguffun. Pinakarenuan anna binabbaddanna i bigi-bigag na lalaki anna niyangena ta addagatan nga balay. Pinagan paga na Samaritano i makakkua ta addagatan nga balay tapenu tangngawan i nabigaran nga lalaki anna pinaganna i maski anni paga nga magastona.​—Luc. 10:29-37.

Maski maruddu nga mepasingan i kinasippo gukaban na aksion, mepasingan gapa yaw ta masippo anna makapagaram ira nga uvovug. Maski i “pavvuru-vurung ta futu na tolay i mamakkummag sa,” ngem kunna Biblia “i mapia nga uvovug i mamagayayya tatun.” (Prov. 12:25) Nu masippo anna mapia ittam ta tanakuan, makkagi ittam tu makapagaram ira nga gannug nga makoffun nira tapenu mas magayayya. * Ipasingan na masippo nga paguvovug tam nga ikavurungattam ira. Megafu ta napagaram tam ira ta masippo nga paguvovug, mas mabi ngana laman nira nga attamman i ziga-riga ta pattolay.​—Prov. 16:24.

Megafu ta naparo ittam “ta imahe na Dios,” puede tam ngamin nga kultiban i kualidad nga kinasippo. (Gen. 1:27) Angngariganna, turi ta nabbiahe si apostol Pablo kavulu i ofisial na suddalu na Romano nga si Julio nga makakkargo sa, nangipasingan si Julio tu “allo” [“kinasippo,” NW] kani Pablo. “Nipamavulun na tu mabbisita yaya ta kakkofun na tari [ta Sidon] tapenu awayya da yaya nga uffunan ta mawag na.” (King. 27:3) Ari nabbayag, nangipasingan gapa i taga-Malta ira tu ‘kuruga mapia nga affutu-futu’ kani Pablo anna ta tanakuan turi ta nadaral i barkuda. Nappakaddul paga lagu tu pappapatuan i taga-isla ira tapenu ari malammingan i biktima ira. (King. 28:1, 2) Maski paga makomendan i kingnguada, ari laman nga sinaggi-mittan nga pangipasingan tu mapia i kinasippo.

Tapenu interamente nga mapagayayya i Dios, mawag tam kultiban i kinasippo nga mabbalin tu permanente nga parte na personalidad anna  pattoletam. Megafu taw, nibilin ni Jehova nittam nga ‘ibaruasi tam’ i kinasippo. (Col. 3:12, NW) Ngem ammu tam nga ari kanayun nga alistu nga pabbalinan tu parte na kata-katoletam yaw nga makadios nga kualidad. Ngatta? Awayyana nga magalangan ittam nga mangipasingan tu kinasippo megafu ta pasiran, kawan na komfiansa, pangokkontra, onu seniales paga na pabbalin tu makasarili. Ngem malampasattam lagapa danatun nu mappoffun ittam ta masanto nga espiritu anna pamarig ta pangipasingan tu kinasippo ni Jehova.​—1 Cor. 2:12.

Puede tam kari ammuan i aspeto nga mawag tam pakastan paga tapenu mapprogreso ittam ta pangipasingan tu kinasippo? Iyavu ta baggi tam: ‘Sigga-empatia ngà kari nga magginna? Alerto ngà kari ta pakawagan na tanakuan? Kanni i ultimo nga masippo ngà ta tadday nga ari tu kafamilià onu madukko nga kofun?’ Tapus puede nga igakkag tam nga mas paga nga ammammuan i totolay ta pallevu tam, netallugaring ta Cristiano nga kongregasion. Nu kunnatun, alerto ittam ta ngamin nga situasiodda anna ta pakawagadda. Tumunug, mangipasingattam tu kinasippo ta tanakuan tapenu kunnatun gapa i kinasippoda nittam. (Mat. 7:12) Bendisionan ni Jehova i appursigi tam nga kultiban i kinasippo nu mappoffun ittam sa.​—Luc. 11:13.

Turi ta nilista ni apostol Pablo i panakkilalanna bilang ministro na Dios, nisalina i “kinasippo.” (2 Cor. 6:3-6, NW) Kakayà na totolay si Pablo megafu ta personal nga interesna nira, nga nipasinganna gukaban na masippo nga kikkingngua anna kinagina. (King. 28:30, 31) Kunnatun gapa, maginteres i totolay ta kinakurug nu masippo ittam. Nu masippo ittam ta ngamin, maski ta mangokkontra nittam, awayyana nga mapalapo tam i futuda anna mapawan i lussoda nittam. (Roma 12:20) Ta pappasa na tiempo, maginteres gapa ira ta mensahe na Biblia.

Ta Paraiso, masippo ngana ta kataggi-tadday i ngamin. Masippo gapa i pattratu turi ira ta napaginnolay, awayyana nga ollolluda pagalaman. Megafu ta pappabaloda, mapaguyu gapa ira nga mangipasingan tu kinasippo ta tanakuan. Nu sinni gafu danuri mammanaki nga mangipasingan tu kinasippo anna uffun ta tanakuan ay ari nga mattalupaddian tu mannanayun ta Paraiso. Ngem danuri finaboran na Dios nga mattolay tu mannanayun ay meddu anna masippo noka i pattratuda ta kataggi-tadday. (Sal. 37:9-11) Tatun nga tiempo awan ngana tu peligro anna talaga memammo! Ngem, nige duttal natun nga makakkasta nga tiempo, kunnasi ittam mabenefisiowan ta pangipasingan tu kinasippo?

“I masippo nga tolay mabenefisiowanna i baggina,” kunna Biblia. (Prov. 11:17) Guggustu na totolay danuri masippo, anna magga masippo gapa ira sa. Kunni Jesus: “Ta i gukug nga iyusanu nga paggukug ay yatun gabbalaman i paggukugda nikamu.” (Luc. 6:38, NW) Yayya nga alistu laman nga makikkofun anna mapeggan tu mapia nga kokkofun i masippo nga tolay.

Pinagaram ni apostol Pablo i kongregasion ta Efeso nga ‘makka-alla-allo, makka-iddu-iddu anna makkapaka-pakoma ira.’ (Efe. 4:32) Talaga mabenefisiowan i kongregasion nu i miembrona ira ay minakki-empatia nga Cristiano nga mangipasingan tu kinasippo anna manguffun ta kataggi-tadday. Ariattam nakuan vuluvuga nga kritikan i wawwaragi, ichismis ira, onu makkagi tu makapataki nga uvovug maski nu ilafa-lafug laman. Lallagu, kanayun nakuan nga makoffun anna makapagaram i kakkagiattam. (Prov. 12:18) Nu kunnatun, mattuyag i kongregasion anna magayayya ira nga masserbi kani Jehova.

Wan, i kinasippo ay kualidad nga mepasingan ta kakkagian anna kukukuan. Nu masippo ittam, ipasa-pasingattam i meddu anna vuka-palag nga personalidad na Dios tam, si Jehova. (Efe. 5:1) Mapatuyag tam gapa i kongregasion anna mapaginteres tam i tanakuan ta marenu nga paddayaw. Paray nakuan tu kanayun nga mammammu ittam bilang masippo nga tolay!