MAGAYAYYA ngà nga pinadakalnà na Cristiano nga magana, da Fred anni Edna Molohan, nga nangipatalatto niakan tu makadios nga debosion anna 20 dagun ngana nga aktibo nga Estudiante na Biblia (Saksi ni Jehova) nige ku neyana turi ta 1934. Maddian i familiami ta Parsons, baddi nga ili ta southeastern Kansas. Maggi ngamin nga kakongregasiokku ay nazelugan nga Cristiano. Makasta i rutina na familiami ta pagatende tu study ira anna ta pallayyagayya ta Uvovug na Dios ta tanakuan. Kada fugag na Sabadu ay tiempomi gapa para ta street work, nga public witnessing ta maddaggun. Nu mittan kabbannag yatun, ngem kanayun nakami nga banna-bannayan ni Daddy gukaban na pangilibrena nikami tu ice cream kabalin natun.

I baddi nga kongregasiommi ay daka-dakal i teritoriana nga kasali tatun i baraddi nga ili kunne na gapa i aru nga akkomanan. Nu layyagayyammi danuri kusetcheru, maruddu nga italimi i literaturami ta sarilida nga mula nga gugulay, illug (nga nala mismu ta umu), nu mittan matolay nga manu. Megafu ta dati ngana nga pinagan ni Daddy i literatura ira, yatun ngana i kanan na familiami.

Nakala i magana ku tu ponograpo, nga usu-usadda ta pallayyagayya. Baddi ngà paga tapenu usan yatun, ngem magenjoy ngà ta panguffukku kani Daddy anni Mommy durante nga i-playda i rekording ira na lektiur ni Brother Rutherford ta passinoli anna ta pangikondukta tu Bible study.

Nangikabit si Daddy tu dakal nga ispiker ta utun na takemi nga 1936 Ford, yari tu nabbalin i takemi tu sound car. Kuruga efektibo yaw nga sound car ta pangiwara ta mensahe na Pappatulan. Maruddu nga mappatoka labbi ta gafu tu musika tapenu mala i atension na totolay, tapus tumunug ngana gapa i nirekord nga lektiur ta Biblia. Sonu mabalin i pangipaginna ta rekording, mangiyofer kami tu literatura ta interesadu nga totolay.

 Ta ili na Cherryvale, Kansas, kinagi na pulis kani Daddy nga igammada i sound car ta parke na ili, nu sitaw aru nga totolay i marrelaks nu Liggu, ngem puede ta lawan na parke. Ari nga narreklamo si Daddy, nu ari, niyalina i kotse ta aranni nga kalye nga naka-arubang ta parke tapenu maginna lagapa danuri totolay tatun i mensahe, tapus nitulu-tuloyna ngana i programa. Tatun ira nga tiempo, kanayun nga enjoy ku nga kavulu si Daddy anna i manung ku nga si Jerry.

Nige na dekada 1940, egga i espesial ira nga kampaniami nga paspas nga mabalin i teritoria ira nu sitaw nepallo i pangokkontra. Malukag kami nige luttuag na bilag (gitta na kingnguami ta Joplin, Missouri) anna memmugugmi nga ipay i tract ira onu bukleta ta gukag na puerta na babalay. Kabalinna, massirimmu kami ta lawan na siudad tapenu innan nu egga i nagafu onu naaresto na pulis.

Tatun nga daga-ragun, egga mangana i tadday nga kakkasta nga aspeto na ministeriomi nga magalan tu information march. Tapenu meyanunsio i Pappatulan, mangiyellukkami tu plakard anna nakalinia nga mapparada ta siudad. Meraddammakku i tadday ta kunnatun nga pammarcha ta ilimi turi ta nangiyellung tu plakard i kokkofummi nga makkagi tu “Religion Is a Snare and a Racket” (I Relihion ay Silu Anna Pakkuartuan). Namegafu ira ta balemi, tapus liminakag ira tu mattanga-kilometro gaddua, kabalinna nanoli ira nikami. Pia ngana laman ta ariadda neparubang ta maski anni nga pangokkontra tatun nga pammarcha, ngem aru lallagu i nasimmuadda tu interesadu ira.

Kanayun nga mabbiahe i familiami ta Kansas adde ta Texas tapenu magatende tu kombension ira. Mattrabahu si Daddy ta Missouri-Kansas-Texas Railroad, yari tu makatakay kami ta tren tu libre nu bisitammi i paparientesmi anna nu magatende kami tu kombension. Maddian ta Temple, Texas, i manung ni Mommy nga si Fred Wismar anna i atawana nga si Eulalie. Nagigiammu ni Angkal Fred i kinakurug ta kabbinna ta gafu na dekada 1900, nappabawtiso, anna nitudduna i kinakurug ta wawwaragina nga nelagum ngana i yenà. Kilala yayya na wawwaragi ta interu nga central Texas, nu sitaw nasserbi yayya nga zone servant (manangngal ta sirkito ta maddaggun). Masippo yayya, minaggayayya nga tolay anna kanayun nga kappagayayya i makikavulu sa. Matalikarag yayya ta kinakurug, anna makasta nga influwensia niakan ta kabbikku.

Ta 1941 nabbiahe i familiami gukaban na tren ta St. Louis, Missouri, para ta dakal nga kombension. Ngamin nga kabataan ay nekiddaw nga mavvurulu nga magitubang ta espesial nga seksion ta arena tapenu ginnan i palappa ni Brother Rutherford nga “Children of the King.” Ta konklusion na palappa, nasurpresa i kataggi-tadday nikami ta grupo nguri ta personal nga niyalawa nikami ni Brother Rutherford anna na kaduffunna ira i libru nga Children. Egga i maturu tu 15,000 nga kabataan nga nagenjoy taw nga espiritual nga bendision.

Turi ta Abril 1943 nagatende kami ta “Call to Action” nga Asembli ta Coffeyville, Kansas. Tatun, neyanunsio nga egga i bagu nga eskuela ta ngamin nga kongregasion​—i Theocratic Ministry  School. Nakalawa kami gapa tu tadday nga bukleta nga egga i 52 nga leksionna ira nga meyusa tatun nga eskuela. Tatun nga dagun, neyarubang ku i ollollu nga asayment ku bilang estudiante. Espesial gapa niakan yatun nga asembli megafu ta nabawtisowan ngà ta malammin nga weg ta koman, kavulu i dua paga nga lalaki.

Naggradua ngà ta hayskul turi 1951 anna mawag ku nga maddesision meyannung ta pattolè. Talaga kakayà ku i masserbi ta Bethel, nu sitaw dati nga nattrabahu si Manung Jerry, yari tu nangipasa ngà tu aplikasion ta ofisina ta Brooklyn. Yaw nga desision ay talaga daka-dakal i uffunna ta espiritual. Ari nabbayag, naapruban i aplikasiokku, anna nembita ngà nga masserbi ta Bethel turi Marso 10, 1952.

Ekspektakku nga makapattrabahu ngà ta printery tapenu makoffun ngà ta produksion na magazina anna literatura ira. Ngem, neyasayn ngà nga mattrabahu bilang waiter anna turi kua ta kusina, nga talaga na-enjoy ku anna aru i nagigiammù. Kakku vuluvuga napeggan tu pribilehio nga mattrabahu ta printery. Ngem, nadduruma i shift na mattrabahu ta kusina yayya nga egga i libre nga tiempò ta tangaggaw. Maruddu nga umay ngà ta Bethel library anna usan i libru ira tatun tapenu mappersonal study. Nakoffun yatun tapenu mammanakam ngà ta espiritual anna massikan i pangurug ku. Pinasikan gapa naw i determinasiokku nga masserbi kani Jehova ta Bethel adde ta mawayyà. Nallawan si Manung Jerry ta Bethel turi 1949 anna inatawana si Patricia, ngem maddian lagapa ira aranni ta Brooklyn. Kanayuddà nga uffunan anna pagaramman turi ta bagu ngà pagalaman ta Bethel.

Ta paddattal ku ta Bethel, magala-aleg ira tu brother ira nga meyammudda ta lista na mappalappa nga maggafu ta Bethel . Danuri brother nga egga ta lista ay meyasayn nga mabbisita tu kongregasion magadde ta 322 kilometro ta pallevu na Brooklyn tapenu mappalappa ta publiko anna makipallawang ta kongregasion. Pribilehiò nga melagum tatun nga lista. Mannerbios ngà ta ollu nga palappa ku, nga tangoras paga tagga. Maruddu nga mattren ngà nga umay ta kongregasion ira. Meraddammakku mittan nga fugag na Liggu ta winter na 1954. Nattren ngà panoli ta New York anna gabi nakuan i dattal ku ta Bethel. Ngem, masiki-sikan i paddag anna grabe i snow. Nadaral i makina na tren, yayya nga alas-singko ta umma na Lunes ngà ngana nakadattal ta New York City. Tatun, nattakay ngà ta tren mappange ta Brooklyn anna nadderechu ngà nattrabahu ta kusina, na-late ngà tu piga minuto anna nababbannag ngà ta tanga-gabi nga kakku nakakatrug ta tren. Ngem danatun nga sakrifisio ay sulit megafu ta egga i pribilehiò nga passerbian i wawwaragi anna makasimmu tu bagu ira nga kofun tatun nga espesial ira nga passerbi ta weekend.

Turi ta bagu ngà pagalaman ta Bethel, nembitan ngà nga makiparte ta radio broadcast ta istasion nga WBBR. I lokasion paga tagga na studio ira ay ta mekadua palapag na 124 Columbia Heights. Tadday ngà ta mangi-akto ta programa nga paggigiammu tu Biblia nga linigguan nga maginna. Si Brother A. H. Macmillan, nga nabayag ngana nga miembro na familia na Bethel, ay regular nga makipartisipa tatun ira nga programa ta radio. Kilala yayya na wawwaragi nga Brother Mac, anna kakkasta yayya nga ehemplo na pagatta-attam ta passerbi kani Jehova ta nikami nga mas abbing nga miembro na familia na Bethel.

Ta 1958, nembita ngà nga mattrabahu ta Gilead School. I trabahù ay uffunan danuri naggradua ta pangàda tu visa anna pagayus ta pabbiahe danaw nga matalikarag nga lallaki anna babbay. Mangini-ngina i mageroplano tatun nga tiempo, yayya nga piga laman ta naggradua ira i mabbiahe gukaban natun. Aru ta mabbiahe mappange ta Africa anna ta Asia ay mattakay gukaban na barku nga pangkargamento. Turi ta namegafu i pampubliko nga eroplano, nammappo i pamasahe ta eroplano yayya nga aru ta misionero ira i mageroplano ngana mappange ta asaymentda.

Nalawa i trabahù turi 1960 megafu ta sakan ngana i mangarkila tu eroplano ta United States  mappange ta Europe para ta 1961 nga internasional nga kombension. Nevulu ngà ta biahe na narentan nga eroplano ta New York adde ta Hamburg, Germany, tatun nga kombension. Kabalin na kombension, sakan anna i tallu paga nga Bethelite nga brother ay narrenta tu takay anna naddalakkami ta Germany adde ta Italy, tapus binisitami i panga nga ofisina ta Rome. Tapus minay kami ta France, ziminalakkami ta Pyrenees Mountains, anna nappakazza ta Spain, nu sitaw megamma i trabahu tam. Nakeyawa kami tu literatura ta wawwaragi ta Barcelona, nga navungunan tu gittana regalu. Masaya kami ta nasimmuammi ira. Nabbiahe kami ta Amsterdam tapus nageroplano kami panoli ta New York.

Kabalin na tanga-ragun, kasali ta annungakku i pangiyunnug ta pabbiahe na napili ira nga delegadu para ta espesial ira nga serye na internasional nga kombension ta nadduruma nga parte na mundo. Yaw ay i “Everlasting Good News” nga Asembli ta 1963. Neyunnug para ta 583 nga delegadu nga mabbiahe ta interu mundo tapenu magatende ta kombension ira ta Europe, Asia, anna ta South Pacific, tapus mabalin i pabbisitada ta Honolulu, Hawaii, anna ta Pasadena, California. Bisitadda gapa i Lebanon anna Jordan para ta espesial nga pappasiar ta lugar ira ta Biblia. Fuera paga ta pangiskediul ta flight-da anna ta paddianadda nga hotel, i departmentmi gapa ta Bethel i manga ta visada ira nga mawag ta nadduruma nga nasion nga bisitadda.

Importante gapa niakan i dagun 1963 megafu ta espesial nga rason. Ta Hunio 29, inatawà si Lila Rogers nga taga-Missouri, nga tallu dagun ngana nga Bethelite. Tanga-ligguan kabalin na kasalmi, nevulu kami ni Lila ta interu-mundo nga pappasiar anna binisitami i Greece, Egypt, anna i Lebanon. Nageroplano kami ta Beirut mappange ta baddi nga airport ta Jordan. Megafu ta megamma i trabahu ta Jordan anna nekagi nikami nga ari makala tu visa i Saksi ira ni Jehova tapenu makatallung tatun, ninonomi nu anni i mesimmu ta paddattalmi tari. Talaga nasurpresa kami ta paddattalmi megafu ta nasingammi i totolay ta terminal na airport nga egga i banner nga netura “Welcome Jehovah’s Witnesses”! Makapagayayya gapa innan mismu danuri lugar ira ta Biblia! Binisitami i lugar ira nga naddianan gari na patriarka ira, lugar nga pinallayyagayyan ni Jesus anna na apostoles, anna nu sitaw namegafu i Cristianismo adde ta nawwara ta tuppu-tuppag na davvun.​—King. 13:47.

Ta unag na 55 dagun, si Lila i matalo nga kavulu ku ta ngamin nga asayment ku. Namippigami nga nabisita i Spain anna i Portugal turi ta megamma paga i trabahu tatun. Mapagarammi i wawwaragi anna iyangemi nira i literatura ira anna i tanakuan paga nga mawagda. Nabisitami paga lagu i karuan nga wawwaragi nga nefuku ta dati nga kampu na militar ta Cádiz, Spain. Magayayya i futù megafu ta mapagaram ku ira gukaban na nebase-Biblia nga palappa.

Ta daga-ragun namegafu ta 1963, pribilehiò nga mangorganisa tu pabbiahe para ta internasional ira nga kombension ta Africa, Australia, Central anna South America, Europe, the Far East, Hawaii, New Zealand, anna ta Puerto Rico. Na-enjoymi  ni Lila i aru nga ari makattaman nga kombension, nelagum ngana i tadday ta Warsaw, Poland, ta 1989. Aru nga wawwaragi ta Russia i naka-atende tatun nga dakal nga kombension anna yatun pagalaman i ollollu nga kombension nga nagatendeyadda! Aru nga wawwaragi nga nakilalami i nefuku tu piga dagun ta affukutan ta Soviet megafu ta pangurugda.

Talaga makapagayayya nga pribilehio para niakan i pabbisita ta panga ira nga ofisina ta interu mundo tapenu pasikannan anna pagaramman i familia na Bethel kunne na gapa i misionero ira. Ta ultimo nga branch visit-mi ta South Korea, nakilalami i 50 nga wawwaragi ta affukutan ta Suwon. Positibo lagapa i pagimamma danatun nga brother anna iinnaggadda sonu makipartisipa mangana ira ta ministerio. I pinassimmumi nira i pinakamakapagaram ta ngamin!​—Roma 1:11, 12.

Nemammatakku nu kunnasi binendisionan ni Jehova i totolena gukaban na pakkaruda ta daga-ragun, namegafu ta 100,000 nga publisher ira tagga ta nabawtisowan ngà turi 1943 tu maturu nga 8,000,000 nga massesserbi ngana kani Jehova ta 240 nga davvun ta maddaggun. Megafu yaw ta matalikarag nga pallayyagayya nga nirollu na naggradua ira ta Gilead. Anni mabba i kastana nga makipattrabahu taw ira nga misionero ta daga-ragun anna ta panguffun nira nga makadde ta asaymentda ta tanakuan nga nasion!

Magayayya ngà nga naddesision ngà ta kabbikku nga palawan i ministeriò gukaban na pagaplay ta Bethel. Abundansia nga binendisionannà ni Jehova ta kada dakkua nga kingnguà. Fuera paga ta pagayayya ta passerbi ta Bethel, na-enjoymi gapa ni Lila i maturu tu 50 dagun nga pribilehio nga pinattrabahu ta ministerio kavulu i kongregasion ira ta Brooklyn, nu sitaw nakaleg kami tu kurug nga kokkofun.

Tulu-tuloy lagapa i passerbì ta Bethel megafu ta uffun ni Lila kadaggaw. Maski paga maturu 84 anios ngana i edad ku, magayayya ngà lagapa ta egga i meyuffukku, i panguffun ta pagayus ta tura ira na branch.

Anni mabba i ayayyana nga mabbalin tu parte na kappabbaw nga organisasion ni Jehova anna masingan i dakal nga nadduman danuri masserbi kani Jehova anna danuri ari masserbi sa. Mas ngana nga malippawami i uvovug ta Malakias 3:18: “Masingannu uli i pakkaduman ta nallatanan na matunung nga tolay anna na marake nga tolay, ta nallatanan na tadday nga massesserbi ta Dios anna na tadday nga ari tu massesserbi sa.” Ta kada pappasa na aggaw, masingattam nga sisinu nga maggrabe i sistema ni Satanas, nga napannu tu totolay nga awan tu iddanamada anna baddi laman i pagayayyada ta pattolay. Ngem danuri mangaya anna masserbi kani Jehova ay magayayya i pattoleda anna siguradu i iddanamada ta mappange, maski taw nga kritikal ira nga tiempo. Talaga pribilehio tam nga iwara i mapia nga dumug na Pappatulan! (Mat. 24:14) Iinnaggattam i dattal na tiempo sonu daralan na Pappatulan na Dios yaw nga dana nga mundo anna irattal i napabagu nga mundo tuange ta ngamin nga nepromesa nga bendision natun, nelagum ngana i makasta nga gawa-gawayyan anna i mannanayun nga inango. Magayayya noka i matalo ira nga aripan ni Jehova nga mattolay tu mannanayun taw ta davvun.