NEPARUBANG si Esteban ta grupo na vayolente nga lallaki. Kasali ta pinakamakapangngua nga lallaki ta nasion danatun nga 71 nga ukum nga miembro na Sanhedrin, i katannangan nga korte ta Israel. Pinattaradday ira na Atannang nga Pari nga si Caifas​—i nangirollu ta korte nga nanentensia kani Jesus tu patay, piga laman nga vulan i nappasa. (Mat. 26:57, 59; King. 6:8-12) Durante nga sinaggi-tadday nga niyarubadda ta korte i laddug ira nga testigu, nappabbaw ira kani Esteban megafu ta “nasingad-da tu i muka na ay kagitta na muka na anghel.”​—King. 6:13-15.

Ngatta kalmadu anna memammo lagapa si Esteban tatun nga kappaganassing nga situasion? Nige yayya nga neyangay ta Sanhedrin, kuruga okupadu si Esteban ta ministeriona ta uffun na makapangngua nga influwensia na espiritu na Dios. (King. 6:3-7) Turi ta neyarubang yayya ta korte, yatun lagapa nga espiritu i egga nisa, parehu nga nasserbi nga mamanna-bannay anna mangiperaddam. (Juan 14:16) Durante nga magutu nga nangidefensa si Esteban, nga mabibbig ta Kingngua kapitulo 7, niperaddam na masanto nga espiritu ta nonona i maggi 20 onu maturu paga nga istoria nga mabibbig ta Hebreo nga Katurakan. (Juan 14:26) Ngem mas paga nga napasikan i pangurug ni Esteban nguri ta nasirmatana si Jesus nga agga-taddag ta ziwanan na Dios.​—King. 7:54-56, 59, 60.

Posible nga egga noka i situasion nga meparubang ittam ta pangananassing anna panara-darum. (Juan 15:20) Gukaban na regular nga pakkakan ta Uvovug na Dios anna pabbalin tu aktibo ta ministerio, ipamavuluttam nga mattrabahu i espiritu ni Jehova ta nittam. Makonnug tam gapa tu sikan tapenu attamman i pangokkontra durante nga pattalupaddianattam i memammo nga panageno tam.​—1 Ped. 4:12-14.