1, 2. (a) Anni nga trabahu i sentro na pattolay ni Jesus, anna ngatta? (b) Anni i kuattam tapenu mavviktoria bilang ‘katrabahu na Dios’?

SI Jesu-Cristo ay tadday nga karpinteru anna mestru. (Mar. 6:3; Juan 13:13) Parehu yayya nga malalaki tatun nga trabahu. Bilang karpinteru, ammuna nga usan i rimienta ira tatun nga trabahu, nga pabbalinan tu gamit i kayu ira. Bilang mestru na mapia nga dumug, efektibona nga neyusa i pakannammuna ta Katurakan tapenu uffunan danuri ordinario nga totolay tapenu alippawatan i kinakurug ta Uvovug na Dios. (Mat. 7:28; Luc. 24:32, 45) Ta edad nga 30, niyemmang ni Jesus i pakkarpinteru megafu ta ammuna nga mas importante nga trabahu i pabbalin tu mestru. Kinagina nga i pangilayyagayya ta mapia nga dumug na Pappatulan na Dios i tadday nga rason nu ngatta zinog yayya na Dios ta davvun. (Mat. 20:28; Luc. 3:23; 4:43) Nisentro ni Jesus i pattolena ta ministerio, anna kayàna nga vulunan yayya na tanakuan tatun nga trabahu.​—Mat. 9:35-38.

² Ari ittam nga karpinteru, ngem mestru ittam na mapia nga dumug. Kuruga importante yatun nga trabahu yayya nga nelagum i Dios; nagalan ittam nga ‘katrabahu na Dios.’ (1 Cor. 3:9, NW; 2 Cor. 6:4) Rekunnisiattam nga “i dorob [ni Jehova] ay ta kakurug i nanaddaggad-da.” (Sal. 119:159, 160) Yayya nga kayà tam siguraduan nga ‘hustu i pangituddu tam meyannung ta uvovug na kakurug’ ta ministerio tam. (Bibbigan i 2 Timoteo 2:15.) Yari tu, kanayuttam nakuan nga pakastan i abilidad tam nga usan i Biblia, i primeru nga rimienta nga usattam tapenu ituddu i kinakurug  meyannung kani Jehova, kani Jesus, anna ta Pappatulan. Tapenu efektibo ittam ta ministerio tam, nangiyawa i organisasion ni Jehova tu importante ira nga rimienta nga mawag nga kabisaduan nga usan. Magalan danatun tu Teaching Toolbox tam.

3. Anni nakuan i fokus tam durante nga egga paga i tiempo tam nga mallayyagayya, anna segun ta Kingngua 13:48, sinni nakuan i alegattam?

³ Baka manono mu nu ngatta nagalan yatun tu Teaching Toolbox imbes nga Preaching Toolbox. I kebalinan na “pallayyagayya” ay pangipakannammu ta mensahe; ngem i “panuddu” ay iponag yatun nga mensahe ta nono anna futu na tadday nga tolay, tapenu magguyu yayya segun ta magigiammuna. Durante nga egga paga i tiempo tam nga mallayyagayya, nakafokus tam nakuan ta pangigafu tu paggigiammu tu Biblia anna panuddu tu kinakurug ta totolay. Kebalinan natun i pagaleg turi ira ta “dana nga natullo [“mepangngo,” NW] nga meddan ta mannanayun nga pattolay.”​—Bibbigan i Kingngua 13:44-48.

4. Kunnasi tam mammuan nu sinni danuri “mepangngo nga meddan ta mannanayun nga pattolay,” anna kunnasi tam ira malegan?

⁴ Kunnasi tam mammuan nu sinni danuri “mepangngo nga meddan ta mannanayun nga pattolay”? Gittana tagga ta ollu nga siglo, malegan laman danatun nga totolay gukaban na pallayyagayya. Yari tu, mawag nga kuattam i nibilin ni Jesus: “Nu makarattal kamu ta tadday nga ili onu bario, magaleg kamu ta tolay nga maya nga mamadulo nikamu.” (Mat. 10:11) Kattam ekspektan nga mangalawa tu mapia nga dumug danuri ari sinsero, minappakatannang, onu danuri awan tu pagimportada ta espiritual. Alegattam danuri sinsero, minappakalinno, anna mabisin ta kinakurug. Megitta tam yaw nga pagaleg ta kingngua ni Jesus bilang karpinteru, nga pagaleg ta mepangngo nga kayu para ta muebles, puerta, takkilu, onu ta tanakuan paga. Nu nakaleg ngana yayya tu mepangngo nga material, apanna ngana i rimientana, usan i abilidadna, anna paddayan yatun nga gannug. Kunnatun gapa nakuan i kuattam durante nga mattrabahu ittam nga kuan tu disipulos danuri mapia i giffutuadda nga totolay.​—Mat. 28:19, 20.

5. Anni i mawag nga ammuattam ta rimienta ira ta Teaching Toolbox? Iyilustra. (Innan i letratu ta gafu na artikulo.)

⁵ Gitta na maski anni nga toolbox, egga i espesipiko nga keyusan na kada rimienta. Kuan nga angngarigan i rimienta ira ta pakkarpinteru nga inusa ni Jesus. * Mawagna i rimienta ta paggukug anna pammarka; paggappo, pallattù, anna pafforma ta kayu; anna pannibel, anna patturuvvug ta kayu ira. Kunne na gapa, egga i espesipiko nga keyusan na kada rimienta ta Teaching Toolbox tam. Yayya nga, innattam i toolbox tam anna nu kunnasi usan danaw nga importante nga rimienta nga neyawa nittam.

6, 7. (a) Kunnasim ngana neyusa i contact card? (b) Anni i doble nga gakkag na imbitasion para ta study na kongregasion?

⁶ Contact Card. Baraddi yaw ngem efektibo nga rimienta nga meyusa tapenu iyammammu tam ta totolay nu sinni ittam anna pangidirekta nira ta website tam, nu sitaw mas paga nga mammammuda ittam anna makaparrequest paga ira tu Bible study. Ta maddaggun, maturu 400,000 i nalawà nga online request tu Bible study ta jw.org, anna ginatu paga i marrequest kada aggaw! Awayyam mangivulu kanayun tu piga nga contact card tapenu maapprobetsam i oportunidad ira nga mallayyagayya ta inaggaw nga aktibidad mu.

⁷ Imbitasion. I tuktukuyattam nga imbitasion para ta study na kongregasion ay doble i gakkagna. Mabibbig tatun: “Membita ka nga gigiammuan i Biblia kavulu i Saksi ni Jehova.” Tapus egga i opsiommu nga kuan yatun  “ta study mi” “onu egga mattuddu nikaw.” Yari tu, yaw nga rimienta ay ari laman nga mangiyammammu nittam, nu ari, mangimbita gapa turi ira ta “sigga-nono ta espiritual nga kawagadda” nga makipaggigiammu tu Biblia nittam. (Mat. 5:3, NW) Siempre, malawà i totolay ta study tam ira maski paga akseptadda onu ari i paggigiammu tu Biblia. Nu magatende ira, masingadda nu anni paga i mawag nga gigiammuadda ta Biblia.

8. Ngatta importante para ta totolay nga umay ta study tam ira maski mittan laman? Mangistoria tu ekspiriensa.

⁸ Importante nga kanayuttam magimbita tu totolay nga magatende ta study tam ira maski mittan laman. Ngatta? Mapaddumada i abundansia ta espiritual nga study tam ira anna i pakallallo ta espiritual nga paddia-paddian na Babilonia nga Dakal. (Isa. 65:13) Inistoria na magatawa nga da Ray anni Linda nga taga-United States i nesimmu nira piga dagun ngana i nappasa. Naddesision ira nga mawag tu makimisa ngana ira. Mangurug ira ta Dios anna natagenoda i espiritual nga pakawagan, yari tu sinaggi-taddeda nga atendeyan i nadduruma nga kapilya ta siudadda. Ara-aru i relihion anna nadduruma i sekta tatun. Ta gafu, dua nga kondision i mawag nga masingadda ta maski anni nga relihion nigeda makimiembro. Ollu, mawag nga egga i magigiammuda ta misa, anna mekadua, i miembro na relihion ay mawag nga disente i itsurada nga mepangngo turi ira ta makkagi nga irepresentada i Dios. Kabalin na piga dagun, maggi nangayadda ngana ngamin i simbahan ta diadda, ngem nadiskursonada laman ira. Awan vuluvuga tu nagigiammuda, anna ari tu disente i itsura danuri makisimba. Ta pallawadda ta ultimo nga simbahan ta listada, nadderechu si Linda ta trabahuna anna milubbe gapa si Ray. Ta pallabbe ni Ray, natalebaranna i Kingdom Hall tapus nanonona, ‘Ngatta kakku purueban umay anna innan nu anni i egga tari?’ Siempre, yatun i kapianan nga ekspiriensa ta ngamin! Masippo anna minakkikofun i ngamin ta Kingdom Hall anna disente i assissinnudda. Nagitubang si Ray ta arubang anna nagustuanna i nagigiammuna! Kagitta yatun na nekagi ni apostol Pablo ta tolay nga ollollu pagalaman nga minay ta paggarammammung na Cristiano nga nakkagi: “Kurug nga egga nikamu i Dios!” (1 Cor. 14:23-25) Kabalin natun, kada Liggu ngana nga nagatende si Ray; tapus nagatende ngana gapa ta study ta midweek. Nagatende ngana gapa si Linda, anna maski maturu tu 70 ngana i dagudda, inalawada lagapa i paggigiammu tu Biblia anna nabawtisowan ira.

9, 10. (a) Ngatta mabi laman nga usan i tract ira? (b) Iyesplika nu kunnasi usan i tract nga Anni i Pappatulan na Dios?

⁹ Tract. Egga i walu nga tract tam nga alistu laman nga meyusa anna efektibo nga rimienta ta pangigafu tu pakiyuvovug. Namegafu turi ta nelawan yaw ira nga tract ta 2013, mallima billion ngana i neyimprenta! I kakastan taw nga rimienta ira ay nu ammum ngana nga usan i tadday taw, ammum ngana gapa nga usan i ngamin megafu ta para-parehu laman i formatna. Kunnasim meyusa i tract tapenu makiyuvovug nikaw i tolay?

¹⁰ Awayyam iyusa i tract nga Anni i Pappatulan na Dios? Ipasingan ta tolay i pakkiavu ta arubang durante nga iyavu mu: “Nanono mu ngana kari nu anni i Pappatulan na Dios? Yaw kari ay . . . ?” Kabalinna iyavu mu nu anni i tabbagna ta tallu nga pappilian. Maski ariammu kagian nu fustu onu mali i tabbagna, vukatan i “I Kagian na Biblia” ta unag, anna ibibbig sa i neyusa nga teksto, Daniel 2:44 anna Isaias 9:6. Nu posible, ituloy i paguvovug. Ta ultimo, iyavu i egga ta likug ta subtitulo nga “Nonoppammu”: “Kunnasi panò i pattolay sonu mammaguray i Pappatulan na Dios?” Yatun sangaw i fundasion para ta pakiyuvovug uli nisa. Nu massimmu kamu uli, awayyam usan i leksion 7 na brosiur nga  Makakkasta nga Balita Naggafu ta Dios!, nga tadday ta rimienta taw ta pangigafu tu paggigiammu tu Biblia.

11. Para ta anni nga nadisenio i magazina tam ira, ngem anni nakuan i ammuattam ta kada magazina?

¹¹ Magazina. I Passifusifutan anna Malukag! ay i pinaka-alawa i sirkulasion anna transleysionna nga magazina ta interu mundo! Megafu ta interu-mundo i sakup danatun, nadisenio i topiko na vungun nga magustuan na maski anni klasena nga totolay. Usattam nakuan danatun tapenu padakallan i interes na totolay ta gannug ira nga kuruga importante ta inaggaw nga pattolay. Tapenu mepalima tam danaw nga magazina ta mepangngo nga totolay, mawag nga ammuattam nu para ta anni nga klase na tolay nga nadisenio i kada magazina.

12. (a) Para ta anni nadisenio i Malukag!, anna anni i gakkagna? (b) Kunnasim nga efektibo nga neyusa yaw nga rimienta?

¹² I magazina nga Malukag! ay nadisenio para ta mabbibbig ira nga baddi onu awan tu ammuda ta Biblia. Awayyana nga awan tu ammuda ta tuddu ira na Cristiano, awan tu tiwalada ta relihion, onu kadda ammu nga egga i praktikal nga benefisio na Biblia. I primeru nga gakkag na Malukag! ay kumbinsian i mabbibbig nga egga i Dios. (Roma 1:20; Heb. 11:6) Gakkag gapa natun nga uffunan i mabbibbig nga patuyaggan i pangurugna nga i Biblia ay ‘kurug tu yaw ay uvovug na Dios.’ (1 Tes. 2:13) I tallu nga topiko na vungun para ta 2018 ay: “I Dalan na Pagayayya,” “12 nga Sekreto na Magayayya nga Familia,” anna “Uffun Para ta Natayan Ira.”

13. (a) Para ta anni nadisenio i publiko nga edision na Passifusifutan? (b) Kunnasim ngana nga efektibo nga neyusa yaw nga rimienta?

¹³ I publiko nga edision na Passifusifutan ay nakafokus ta espiritual ira nga gannug para turi ira ta mangirespeto ta Dios anna ta Uvovugna. Maski egga i baddi nga ammuda ta Biblia, ari tu fustu i pakalippawada ta tudduna ira. (Roma 10:2; 1 Tim. 2:3, 4) I tallu nga topiko na vungun para ta 2018 ay mattabbag taw ira nga pakkiavu: “Praktikal Kari Paga Sangawe i Biblia?,” “Anni i Mesimmu ta Mappange?,” anna “Ikavurungan Naka Kari na Dios?”

14. (a) Anni i gakkag na appa nga video tam ta Teaching Toolbox tam? (b) Kunnasim nga efektibo nga neyusa danaw nga video?

¹⁴ Video. Ta kaggawan ni Jesus, manu-mano nga rimienta laman i usan na karpinteru. Ngem ta maddaggun, mangusa i karpinteru ira tu de-kuryente nga rimienta nga paggaggal, pabbarina, paffinu, pappato, anna karuan paga. Fuera paga ta neyimprenta ira nga publikasion, egga i makkarasta nga video tam nga mepagiraw ta totolay​—appa i egga ta toolbox tam: Ngatta Gigiammuammu i Biblia?, Kunnasi i Paggigiammu tu Biblia?, Anni i Kukukuadda ta Kingdom Hall?, anna Sinni i Saksi ira ni Jehova? Efektibo i video ira nga maturu laman tu tanga-minuto ta gafu nga pallayyagayya. I mas apparaddu ay puede nga meyusa ta passinoli turi ira ta mas aru i tiempoda. Danaw nga makkarasta nga rimienta ay mamaguyu ta totolay nga gigiammuan i Biblia anna magatende ta study tam ira.

15. Iyistoria i efekto na pappagiraw ta tadday ta video tam ira ta mismu nga lengguahe na tadday.

¹⁵ Tapenu iyilustra, turi ta nakasimmu i tadday nga sister tu babay nga naggafu ta Micronesia nga maguvovug tu Yapese, nipagirona i Ngatta Gigiammuammu i Biblia? ta lengguahena. Turi ta namegafu ngana i video, kunna babay: “Yaw i lengguahè. Kakku makapangurug! Makagì ta puntona nga parehu i naggafuammi nga isla. Maka-uvovug yayya tu lengguahè!” Kabalin natun, kinagina nga bibbigan anna girawanna i ngamin nga egga ta jw.org ta lengguahena. (Ikumpara i Kingngua 2:8, 11.) Ikonsidera i tadday  paga nga ekspiriensa. Na-email i tadday nga sister ta United States ta kanakanna ta tanakuan nga nasion tu link na parehu nga video ta lengguahena. Ginirona yatun tapus simibbag ta email: “Yari i parte nga egga i marake nga espiritu nga makkokkontrol ta mundo i nakala ta atensiokku. Narrequest ngà tu Bible study.” Maddian i kanakanna ta nasion nga megamma i trabahu tam!

16. Iyesplika i espesipiko nga gakkag na kada brosiur: (a) Magginna Ka ta Dios Tapenu Mattolay Ka tu Mannanayun. (b) Makakkasta nga Balita Naggafu ta Dios! (c) Sinni i Magaggangngua tu Uray ni Jehova ta Maddaggun?

¹⁶ Brosiur. Kunnasim metuddu i kinakurug ta tadday nga arianna kuruga ammu i mabbibbig onu awan tu literatura ta lengguahena? Egga i rimienta tam para tatun​—i brosiur nga Magginna Ka ta Dios Tapenu Mattolay Ka tu Mannanayun. * I kapianan nga rimienta tapenu megafu i paggigiammu ay i brosiur nga Makakkasta nga Balita Naggafu ta Dios! Puedem ipasingan ta tolay i 14 nga topiko nga nelista ta likug na vungun anna iyavu mu sa nu anni tatun i kuruga paginteresanna. Kabalinna, tatummu nga leksion nga igafu i paggigiammu. Pinuruebammu ngana kari yaw nga metodo ta passinolim ira? I mekatallu nga brosiur ta toolbox tam ay Sinni i Magaggangngua tu Uray ni Jehova ta Maddaggun? Nadisenio yaw tapenu idirekta i estudiante ira ta organisasion. Tapenu mammuan nu kunnasi meyusa yaw ta kada Bible study, innan i Marso 2017 nga isyu na Pattolay Anna Ministerio Tam nga Cristiano​—Workbook ta Study.

17. (a) Anni i espesipiko nga gakkag na kada libru ta paggigiammu? (b) Anni i mawag para turi ira ta napprogreso adde ta bawtismo, anna ngatta?

¹⁷ Libru. Nu negafu ngana i paggigiammu ta brosiur, awayyam nga iyali ta maski anni nga tiempo i paggigiammu ta libru nga What Can the Bible Teach Us? * Makoffun yaw nga rimienta tapenu umaru i pakannammu na estudiante ta pamegafuanan ira nga tuddu na Biblia. Nu nabalin ngana tatun nga libru anna nu mapprogreso ta espiritual i estudiante, ituloy i paggigiammu ta libru nga How to Remain in God’s Love. * Uffunan naw nga rimienta i estudiante nu kunnasi iyaplika i prinsipio ira na Biblia ta inaggaw nga pattolena. Daddamman nga maski nabawtisowan i babbaragu, mawagda lagapa nga itulu-tuloy i paggigiammu tatun ira nga libru adde sonu mabalidda i dua. Makoffun yatun tapenu megamu ira tu fustu ta kinakurug.​—Bibbigan i Colosas 2:6, 7.

18. (a) Anni i ipagaram nittam nga kuattam na 1 Timoteo 4:16 bilang mangituddu ta kinakurug, anna anni i resultana? (b) Durante nga usattam i Teaching Toolbox tam, anni nakuan i gakkag tam?

¹⁸ Bilang Saksi ni Jehova, netalo nittam i “kurug nga uvovug nga yaya i Mapia nga Dumug” nga mangirattal tu mannanayun nga inango para ta totolay. (Col. 1:5; bibbigan i 1 Timoteo 4:16.) Yayya nga neddan ittam tu Teaching Toolbox nga napannu tu rimienta ira nga mawag tam. (Innan i “ Teaching Toolbox.”) Efektibo tam nakuan nga usan danaw nga rimienta adde ta posible. I publisher lagapa i maddesision nu anni nga literatura ta toolbox i usanna ta interesadu anna nu sonu anni. Ngem i gakkag tam ay ari laman nga basta mangipalima tu literatura; onu mangibattang tu literatura ta totolay nga awan tu interesda ta mensahe tam. I gakkag tam ay magangngua tu disipulos nga sinsero, minappakalinno, anna mabisin ta espiritual​—danuri totolay nga “mepangngo nga meddan ta mannanayun nga pattolay.”​—King. 13:48, NW; Mat. 28:19, 20.