1, 2. Anni nga kapurueba i neparubang kani Josue turi ta natay si Moises?

MANANAWAG paga kani Josue i kinagi sa ni Jehova: “Natay ngana i aripakku nga si Moises. Tumaddag ka gafu, maddaki ka ta Jordan, sikaw anna ngamin taw nga totolay, anna umekamu ta davvun nga iyawa ku nira.” (Jos. 1:1, 2) Gavva nga panguli yatun kani Josue, nga doroban ni Moises ta maggi 40 dagun!

² Megafu ta nabayag ngana nga lider na Israel si Moises, baka nanono ni Josue nu anni tamma i reaksion na ili na Dios ta pangirolluna. (Deut. 34:8, 10-12) Kunnaw i mabibbig ta tadday nga referensia ta Biblia, meyannung ta Josue 1:1, 2: “Ta ollu tiempo anna ta moderno nga tiempo, parehu nga i pattali na liderato i tadday ta pinakakritikal nga tiempo ta seguridad na nasion.”

3, 4. Kunnasi tam nammuan nga ari nakkamali si Josue ta pattalona ta Dios, anna anni ira nga pakkiavu i awayyana nga iyavu tam ta baggi tam?

³ Egga i rason ni Josue nga maganassing, ngem ta unag laman na piga aggaw, insigida nga sinuttulna i instruksion. (Jos. 1:9-11) Ari yayya nga nakkamali ta pattiwalana ta Dios. Gitta na ipasingan na rekord na Biblia, nidirekta ni Jehova si Josue anna i ilina, i Israel, gukaban na anghel. Rasonable gafu nga nonopan nga yaw nga anghel ay i Uvovug, i ollu nga Ana na Dios.​—Ex. 23:20-23; Juan 1:1.

 ⁴ Gukaban na uffun ni Jehova, alistu nga naaksepta na Israel i panguloli nga si Josue ngana i bagu nga liderda. Sittam gapa ay mattolay ta tiempo na darakal nga panguloli, yatutta baka manono tam, ‘Durante nga alistu nga magabante i organisasion na Dios, egga kari i maladda nga rasottam ira nga mattalo kani Jesus bilang natunno nga Lider?’ (Bibbigan i Mateo 23:10, NW.) Bueno, ikonsidera tam nu kunnasi nirolluan ni Jehova i ilina ta nappasa durante ta tiempo na panguloli.

5. Anni i nesimmu kani Josue turi ta aranni ngana yayya ta Jerico? (Innan i letratu ta gafu na artikulo.)

⁵ Ari nabbayag turi ta nakadaki ngana i Israel ta Jordan, egga i ari ekspektan nga nesimmu kani Josue. Turi ta aranni ngana yayya ta Jerico, egga i nadafunna nga lalaki nga agga-tammi tu espada. Megafu ta akkan tu kilala ni Josue yatun, niyavuna: “Egga ka kari ta panigmi onu ta panig na kalabammi?” Nakaddag si Josue megafu ta niyammammu na suddalu i baggina. Yayya i “panakallan na armada ni Jehova,” nga agga-paran nga idefensa i totolay na Dios. (Bibbigan i Josue 5:13-15 anna footnote.) Maski nu tinukoy ta karuan nga rekord nga si Jehova i direkta nga nakiyuvovug kani Josue, siguradu nga makikkiyuvovug i Dios gukaban na anghel nga representantena, gitta na maruddu nga kingnguana ta nappasa.​—Ex. 3:2-4; Jos. 4:1, 15; 5:2, 9; King. 7:38; Gal. 3:19.

6-8. (a) Ngatta imammatan na suddalu ira nga awan tu serbi na karuan nga instruksion ni Jehova? (b) Kunnasi napakurug nga masirib anna eksakto ta tiempo danatun nga instruksion? (Innan gapa i footnote.)

⁶ Nakalawa si Josue tu manawag nga instruksion ta anghel nga Lider nu kunnasi tallungan i Jerico. Ta gafu, gittana ari tu makasta nga estratehia i karuan ta instruksion ira. Angngariganna, nimandu ni Jehova nga mappakugi onu mappabanggi i ngamin nga lallaki, yatutta ariadda awayya i makillaban ta piga aggaw. Mepangngo kari yatun nga tiempo tapenu mappabanggi danatun nga lallaki?​—Gen. 34:24, 25; Jos. 5:2, 8.

⁷ Baka nanono na suddalu ira, ‘Kunnasi tam protektan i familia tam ira nu atakeyan na kalaban i kampu tam?’ Ngem egga i gavva nga nesimmu! Imbes nga atakeyan na lallaki na Jerico i Israelita ira, naganassing lallagu ira nira. Mabibbig tam: “Neserra tu mapia i Jerico megafu ta Israelita ira; awan tu maski sinni nga mallawan anna awan tu maski sinni nga mattallung.” (Jos. 6:1) Siguradu nga mas paga nga nattalo ta direksion na Dios i Israelita ira megafu taw nga dumug!

⁸ Kunne na paga, nemandu ta Israelita ira nga ariadda atakeyan i Jerico, nu ari, mammarcha ira ta pallevu na siudad. Kuadda yatun mittan ta tangaggaw ta unag na annam nga aggaw anna mamippitu ta mekapitu nga aggaw. Awayyana nga nanono na karuan nga suddalu, ‘Kenga laman i tiempo anna sikattam!’ Ngem ammu na ari masingan nga Lider na Israel nga si Jehova nu anni i kuanna. Megafu taw nga estratehia, ari laman tu napasikan i pangurug na Israelita ira, nu ari, nelisi paga ira ta direkta nga pakillaban ta masiki-sikan nga suddalu ira na Jerico.​—Jos. 6:2-5; Heb. 11:30. *

9. Ngatta tuttulattam nakuan i instruksion ira nga malawà tam ta organisasion na Dios? Mangiyawa tu angngarigan.

⁹ Anni i magigiammu tam tatun nga rekord? Egga ira i tiempo nga kattam malippawa i rason ira na bagu nga direksion na  organisasion. Angngariganna, baka kinuestiottam ta gafu i pangiyusa tu gadget para ta personal study, ta ministerio, anna ta study ira. Ngem siguradu nga nalippawa tam ngana sangawe i benefisio na pangiyusa tatun nu posible. Nu masingattam i positibo ira nga resulta na kunnatun ira nga papprogreso maski paga madduda ittam, dumakal i pangurug tam anna mattaradday ittam.

10. Sinni i nangidirekta ta importante nga miting na manangngal nga baggi ta Jerusalem?

¹⁰ Ma-13 dagun kabalin nga nakumberte si Cornelio, tuttuttulan pagalaman na karuan nga Judio nga Cristiano i pakkugi. (King. 15:1, 2) Turi ta egga i ari pakkarantindian ta Antiokia, nekiddaw kani Pablo nga idulo i problema ta manangngal nga baggi ta Jerusalem. Ngem sinni i naggafuan natun nga direksion? Kunni Pablo: “Nanoli ngà [ta Jerusalem] ta nipakannammu na Dios niakan nga mawag tu umay ngà tari.” Manawag nga nidirekta ni Cristo i ganna-gannug tapenu masolba na manangngal nga baggi i ari pakkarantindian.​—Gal. 2:1-3.

11. (a) Anni nga isyu meyannung ta pakkugi i nabayag nga naresolba ta Judio ira nga Cristiano? (b) Kunnasi nipasingan ni Pablo i sigga-pakalinno nga passuporta ta mannakam ta Jerusalem? (Innan gapa i footnote.)

¹¹ Gukaban na direksion ni Cristo, manawag nga nipakannammu na manangngal nga baggi ta ari-Judio nga Cristiano nga ariadda mawag i makikugi. (King. 15:19, 20) Ngem piga dagun kabalin na desision, itulu-tuloy lagapa na Cristiano ira nga Judio i pakkugi ta ánada. Turi ta nepadumug ta mannakam ta Jerusalem nga ari tuttuttulan ni Pablo i Mosaiko nga Dob, niddadda yayya tu ari ekspektan ira nga instruksion. * (King. 21:20-26) Nikiddoda nga mangivulu yayya tu appa nga lalaki ta templo tapenu pakurugan i ‘panuttul na mismu ta Dob.’ Awayya nakuan nga kinuestion ni Pablo i kinasirib na ipakuada sa, anna marrason nga i kurug nga diferensia ay egga ta Judio ira nga Cristiano nga kurang i pakalippawada ta isyu meyannung ta pakkugi. Ngem megafu ta kayà ni Pablo nga ipasingan i suportana ta pakkaraga na mannakam  nga mapeggan tu pattaradday ta Cristiano ira, sigga-pakalinnona nga sinuppal i bilin ira nga neyawa sa. Baka manono mu, ‘Ngatta nipamavulun ni Jesus nga mabayag nga masolba yaw nga isyu maski nu inarian ngana na patena i Mosaiko nga Dob?’​—Col. 2:13, 14.

12. Ngatta nipamavulun ni Cristo nga mappasa i tiempo nigena niresolba i isyu meyannung ta pakkugi?

¹² Mabayag para ta karuan nga alawatan i bagu nga pakalippawa. Mawag na Judio ira nga Cristiano i makalanno nga tiempo tapenu ulian i pagimammada. (Juan 16:12) Mariga ta karuan nga akseptan nga ari ngana nga mawag i pakkugi tapenu makagi nga egga i espesial nga relasiodda ta Dios. (Gen. 17:9-12) Maganassing gapa i karuan nga mapersigi ira nu maperuma ira ta tanakuan nga Judio. (Gal. 6:12) Ngem ta pappasa na tiempo, nangiyawa paga si Cristo tu direksion gukaban na nainspiran ira nga tura kani Pablo.​—Roma 2:28, 29; Gal. 3:23-25.

13. Anni i makoffun nittam tapenu appresian i pangirollu ni Cristo ta maddaggun?

¹³ Nu kattam malippawa tu mapia i rason ira ta karuan nga panguloli ta organisasion, nonopattam nakuan nu kunnasi i pinangirollu ni Cristo ta nappasa. Maski paga ta kaggawan ni Josue onu ta ollu-siglo, kanayun mangiyawa si Cristo tu masirib nga desision tapenu protektan i totolay na Dios, tapenu patuyaggan i pangurugda, anna pattalupaddianan i pattaradday ta aripanna ira.​—Heb. 13:8.

14-16. Kunnasi nga manawag nga masingan i pangikavurung ni Cristo ta espiritual nga gawa-gawayyattam gukaban na “mekatalo anna nannono nga doroban”?

¹⁴ Manawag nga masingan i meddu nga pangikavurung ni Jesus ta espiritual nga gawa-gawayyattam ta eksakto nga tiempo ira nga direksion naggafu ta “mekatalo anna nannono nga doroban.” (Mat. 24:45) Kunni yama nga si Marc, nga appa i anana: “Pakkafian ni Satanas i kongregasion gukaban na pangatake ta familia ira. Megafu ta pamagaram nga maffamily worship kada ligguan, manawag i mensahe para ta ulu ira na familia​—immugurannu i familianu!”

¹⁵ Nu malippawa tam i direksion ni Cristo, matageno tam nga kuruga interesadu yayya ta espiritual nga papprogreso tam. Kunna gapa ni Patrick nga tadday nga elder: “Ta gafu, gittana madismaya i karuan gafu ta grupo-grupo ngana i pallawan nu weekend. Ngem i tadday ta kakastan nga kualidad ni Jesus​—i interesna ta pakallallo ira​—ay mananawag nga masingan taw nga unnug. Mas natageno ngana danuri minappasirang anna ari kuruga aktibo ta ministerio nga wawwaragi nga maappresia ira anna egga i meyuffudda, nga narresulta ta papprogresoda ta espiritual.”

¹⁶ Fuera paga ta panangngal ni Cristo ta espiritual nga pakawagattam, uuffunanna ittam nga maffokus ta pinaka-importante nga trabahu ta davvun ta maddaggun. (Bibbigan i Marcos 13:10.) Si André, nga bagu natunno nga elder, ay kanayun nga sigga-paran nga tumuttul ta bagu ira nga direksion na organisasion na Dios. Kunna: “Megafu ta napakarianan i miembro na panga nga ofisina, ipasingan natun nu kunnasi kaapuradu na tiempo anna i importansia nga ifokus i siki-sikattam ta trabahu nga pallayyagayya.”

17, 18. Ngatta pammakapianattam i pannono ta benefisio ira nga mala tam ta pakibagay ta bagu nga panguloli?

¹⁷ Gitta na masingan ta aktibo nga pangirolluna, i nakoronan nga Patul, si Jesu-Cristo, ay siguradu nga sigga-nono ta mappange. Yari tu, magayayya ittam ta benefisio ira nga mala tam ta pakibagay ta bagu nga panguloli. Makoffun nu gigiammuan ta paddayarayaw na familia nu kunnasi kamu nabenefisiowan ta panguloli ta linigguan nga study ira onu ta ministerio.

 ¹⁸ Nu malippawa tam i espiritu ta likug na instruksion ira nga malawà tam ta organisasion ni Jehova anna i benefisiona nittam, siguradu nga sigga-pagayayya tam nga tuttulan yatun. Talaga appresiattam gapa nga napakarianan i karu na literatura nga meyimprenta para makatipid tu kuartu; mas masuportan i trabahu na Pappatulan ta interu-mundo megafu ta pangusa tu bagu ira nga teknolohia. Nu kunnaw i pagimamma tam, mapaguyu ittam nga mas paga nga usan i elektroniko ira nga publikasion anna media adde ta posible. Nu kuattam yatun, mepasingattam i pangikavurung ta masirib nga pangusa ta pakkukua na organisasion, gitta ni Cristo.

19. Ngatta suportattam nakuan i direksion ni Cristo?

¹⁹ Nu napafutuan tam nga suportan i direksion ni Cristo, mapatuyag tam i pangurug na tanakuan anna makoffun ittam ta pattaradday. Kunnaw i kagian ni André meyannung ta panguloli ta bilang na familia na Bethel ta interu mundo: “I makasta nga espiritu nga nipasingan na dati ira nga Bethelite nga nakibagay ta kunnatun ira nga panguli ay nakoffun niakan nga mapeggan tu pattalo anna pangirespeto. Makiggidang ira ta pagabante na karuahe ni Jehova gukaban na pabbalin tu magayayya ta maski anni nga asayment nga meyawa nira.”

20, 21. (a) Ngatta makapattalo ittam ta Lider tam nga si Cristo? (b) Anni nga pakkiavu i ikonsidera tam ta tumunug nga artikulo?

²⁰ I natunno nga Lider tam, si Jesu-Cristo, ay arannina ngana nga ‘patulukan i kontra na ira’ anna ‘ituppal i kappabbaw ira nga gannug.’ (Nep. 6:2; Sal. 45:4, NW) Sangawe, paddaggunanna nga iprepara i totolay na Dios ta tiempo kabalin na sistema na ganna-gannug sonu i kada tadday nittam ay makiparte ta alalawa nga panuddu anna pamataddag nga trabahu nga metuppal durante ta pamaginnolay.

²¹ Mavviktoria noka i natunno nga Patul ta pangirolluna nittam ta napabagu nga mundo, nu pattalupaddianattam i buu nga pattalo ta maski anni nga panguloli na sirkumstansia. (Bibbigan i Salmo 46:1-3.) Awayya nga marigatan ittam ta panguloli, mas ngana nu sittam i afektadu ta gavva nga panguli. Kunnasi tam gafu mapattalupaddian i memammo nga panageno anna i buu nga pattalo kani Jehova? Matabbag yatun nga pakkiavu ta tumunug nga artikulo.