1, 2. (a) Kunnasi nga mafektan ta gavva nga panguloli i tadday nga Cristiano? (Innan i letratu ta gafu na artikulo.) (b) Segun ta Salmo 131, anni nga kualidad i makoffun tapenu memammo i nono tam?

KABALIN na maturu nga 25 dagun nga passerbi da Lloyd anni Alexandra ta Bethel, nare-asayn ira bilang payunir. Talaga maddaddam ira ta gafu. Kunni Lloyd: “Para niò, ammammudà ngana na tanakuan megafu ta egga ngà ta Bethel anna megafu ta asayment ku tatun. Ta nono ku, matindiakku i rason naw nga panguli, ngem nappasa i linigguan anna vinulan, maruddu nga makatageno ngà nga napammanakitan ngà. Sangawe, positibo ngà; ngem bibbinnay madepres ngà.”

² Nu gavva nga manguli i pattoletam, awayyana nga maganassing onu ma-stress ittam ta emosion megafu ta arubangattam ira nga panguli. (Prov. 12:25) Baka marigatattam paga lagu nga akseptan danatun nga panguloli. Tatun ira nga situasion, kunnasi nga mattalupaddian nga ‘kalmadu anna memammo’ i kararua tam? (Bibbigan i Salmo 131:1-3, NW.) Ikonsidera tam nu kunnasi nga napattalupaddian na karuan nga karakter ta Biblia anna moderno-aggaw nga aripan ira ni Jehova i memammo nga panageno maski nu manguloli i sirkumstansia.

3. Anni i nabbalin tu situasion ni Jose?

³ Ma-17 anios si Jose turi ta nilaku yayya na wawwaragina bilang aripan megafu ta passilda. Nige natun, si Jose i paborito na yamana. (Gen. 37:2-4, 23-28) Ta maggi 13 dagun, inattamman ni Jose i ka-aripan anna kefuku ta Ehipto, nga ararayyu ta meddu nga yamana nga si Jacob. Anni i nakoffun kani Jose nga ari makatageno tu pakkadismaya anna taki na nono?

4. (a) Ta anni nga nakafokus i nono ni Jose durante nga agga-fuku? (b) Kunnasi nga sinabbag ni Jehova i pakimallo ira ni Jose?

⁴ Maski mazziga-riga si Jose ta affukutan, nakafokus i nonona ta ebidensia na pamendision ni Jehova. (Gen. 39:21; Sal. 105:17-19) I profesiya ira nga sinatageno ni Jose ta kabbinna ay nangiyawa gapa sa tu komfiansa nga egga sa i fabor ni Jehova. (Gen. 37:5-11) Siguradu nga ari laman tu mittan nga nivuvvuna i mataga-tagenona kani Jehova. (Sal. 145:18) Sinabbag ni Jehova i napafutuan ira nga pakimallona, gukaban na pangipasiguradu nisa nga ‘arianna yaya nga pinanawan’ ta ngamin nga kapuruebana.​—King. 7:9, 10. *

5. Anni i efekto na ‘imammo na Dios’ ta nittam maski nu maziga i situasion?

⁵ Maski nu kunnasi kaziga na situasion, awayya tam lagapa maekspiriensa sangawe i ‘imammo na Dios’ nga mamakkalma nittam. (Bibbigan i Filipos 4:6, 7.) Nu mappoffun ittam kani Jehova nu gittana matavvunan ittam ngana tu vuru-vurung, awayya nga pasikannan na imammo na Dios i determinasiottam nga gawatan i espiritual ira nga addetattam anna immuguran ittam kontra ta tendensia nga makkafi. Ikonsidera tam i karuan nga moderno nga ehemplo nga mamakurug taw.

6, 7. Kunnasi makoffun i pabbalin tu espesipiko ta pakimallo tam tapenu manoli i memammo nga panageno? Mangistoria tu ekspiriensa.

⁶ Nguri ta nekagi kada Ryan anna Juliette nga magultimo ngana i asaymentda nga temporario nga espesial payunir, nakkafi i nonoda. “Insigida nga nipakimallomi yaw kani Jehova,” kunni Ryan. “Ammumi nga egga espesial nga oportunidadmi nga ipasingan i pattalo sa. Aru ta kakongregasiommi i bagu pagalaman ta kinakurug, yayya nga nipakimallomi kani Jehova nga uffunan nakami nga mangipasingan tu makasta nga ehemplo na pangurug.”

⁷ Kunnasi sinabbag ni Jehova i pakimalloda? Istorian ni Ryan: “Ganganalaman kabalin na pakimallo, nawawan i negatibo nga panageno anna vuru-vurummi ta gafu. Agga-bantay ta futu anna nonomi i imammo na Dios. Nalippawami nga awayyami paga nga mabbalin tu aru keyusanna kani Jehova nu pattalupaddianammi i fustu nga pagimamma.”

8-10. (a) Anni i meyuffun nittam na espiritu na Dios ta pangarubang ta vuru-vurung? (b) Anni ira i iyuffun ni Jehova nittam nu nakafokus ittam ta passerbi?

⁸ Pakkalman ittam na espiritu na Dios, anna idirekta ittam natun ta teksto ira ta Biblia nga makoffun nittam nga malippawa nu anni talaga i importante ta pattolay. (Bibbigan i Juan 14:26, 27.) Innan i nesimmu kada Philip anna Mary, nga nasserbi ta Bethel tu maggi 25 nga dagun. Ta pallawadda ta Bethel, ta unag laman na appa nga vulan, parehu nga natay i yenada anna tadday paga nga parientes ni Philip, anna mawag tu tangngalladda i yama ni Mary, nga egga dementia-na.

⁹ Neraddamman ni Philip: “Abbo ku nu kayang-kayà, ngem egga lapa i kurang. Nabibbig ku i Colosas 1:11 ta tadday nga magigiammu nga artikulo na Passifusifutan. Fustu nga magattattam ngà, ngem kurang i pagattam ku. Mawag nga ‘mapasensia nga attammakku  ngamin i mesissimmu niakan anna sigga-pagayaya.’ Nituddu niakan naw nga teksto nga i pagayayya ku ta pattolay ay nakadepende, ari tu ta sirkumstansia, nu ari ta efekto na espiritu na Dios ta pattolè.”

¹⁰ Megafu ta nattalupaddian nga nakafokus da Philip anna Mary ta passerbi kani Jehova, aru i bendisionna nira. Turi ta nanaw ngana ira ta Bethel, nakaleg ira parehu tu progresibo ira nga Bible study nga maya maggigiammu tu maturu tu mittan kada ligguan. Nu lipayan ni Mary i nappasa, kunna, “Ira i pagayayyami anna inusa ira ni Jehova tapenu kagian nikami nga makkasta lagapa noka i ngamin nga gannug.”

11, 12. (a) Kunnasi nga niddan ni Jose si Jehova tu rason nga mamendision? (b) Anni i bala-balo ni Jose megafu ta pagattamna?

¹¹ Nu gavva nga manguli i pattoletam, baka sobra i vuruttam nga agga-nono tam ngana laman i problema tam ira. Puede nakuan nga nesimmu kani Jose yatun. Ngem imbes tu kunna, pinilina nga kuan i adde na mawayyana ta situasionna, yayya nga niddanna si Jehova tu rason nga bendisionan yayya. Maski nu egga si Jose ta affukutan, nappursigi yayya nga ituppal i maski anni nga ipakua na panakallan nga ofisial, gitta na kingnguana ta pinattrabahuna kani Potifar.​—Gen. 39:21-23.

¹² Tadday nga aggaw, netalo kani Jose i panangngal ta dua nga presu nga dati nga ofisial ta palasio ni Faraon. Megafu ta nasingadda nga masippo si Jose, komfortable i lallaki nga ikagi nisa i problemada anna i kavvuru-vurung nga tatagenoda ta gabi nige natun. (Gen. 40:5-8) Ari paga ammu ni Jose tatun nga tiempo, ngem yatun nga paguruvovug i mamalawan noka nisa ta affukutan. Kabalin na dua ragun, napalawan yayya anna nabbalin tu makapangngua nga mammaguray ta Ehipto. Si Faraon laman i mas atannang i posisionna sa.​—Gen. 41:1, 14-16, 39-41.

13. Kunnasi tam iddan si Jehova tu rason nga mamendision maski anni paga i situasiottam?

¹³ Kagitta ni Jose, baka egga i situasion nga kattam kontroladu. Ngem nu mattalupaddiattam nga mapasensia anna mappursigi tapenu makua i adde na mawayya tam ta sirkumstansia tam, iddattam si Jehova tu gannug nga bendisionanna. (Sal. 37:5) Kurug, nu mittan makatageno ittam tu “padduda,” ngem kunna kinagi ni Pablo, ‘ari ittam vuluvuga mawanan tu pagiddanama.’ (2 Cor. 4:8) Mabbalin tu kurug nittam yaw nga kinagi ni Pablo, netallugaring nu agga-fokus tam ta ministerio tam.

14-16. Kunnasi nattalupaddian nga nakafokus ta ministerio si Felipe nga evanghelisador maski ta manguloli nga sirkumstansiana?

¹⁴ Si Felipe nga evanghelisador ay makasta nga ehemplo na nattalupaddian nga  nakafokus ta ministerio maski nu manguloli i sirkumstansia. Tatun nga tiempo, magayayya si Felipe ta bagu nga pribilehiona ta passerbi. (King. 6:1-6) Ngem nanguli ngamin. Egga natturunug nga pameppersigi ta Cristiano ira nga nattuppal ta kapatay ni Esteban. * Megafu tatun, nakkapanaw ta Jerusalem i Cristiano ira. Ngem kayà ni Felipe nga kanayun nga okupadu ta passerbi kani Jehova, yayya nga minay yayya ta Samaria, nu sitaw mawag nga maginna na totolay i mapia nga dumug.​—Mat. 10:5; King. 8:1, 5.

¹⁵ Sigga-paran si Felipe nga umay maski sitaw i pamaddoban nisa na espiritu na Dios, yayya nga inusa yayya ni Jehova tapenu mangivuka tu bagu ira nga teritoria. I ari-mangireruma nga metodona ay siguradu nga namanna-bannay ta Samaritano ira, nga sanay ngana nga matratu tu marake anna mekalussaw na Judio ira. Ari gafu kakkadda-kaddag nga “kinagumanad-da nga ginnan yaya ta mapia”!​—King. 8:6-8.

¹⁶ Nidirekta na espiritu na Dios si Felipe ta Asdod anna Cesarea, dua nga siudad nga dakal i populasion na Hentil. (King. 8:39, 40) Ma-20 nga dagun kabalin na ollu nga pinallayyagayyana ta Samaria, manawag nga nanguli mangana i sirkumstansia ni Felipe. Yama ngana yayya anna arianna ngana makapanaw ta teritoriana. Maski ta nanguli nga sirkumstansiana, naffokus si Felipe ta ministeriona, anna megafu tatun, yayya anna i familiana ay abundansia nga binendisionan ni Jehova.​—King. 21:8, 9.

17, 18. Kunnasi makoffun nittam i paffokus ta ministerio tapenu mattalupaddian nga balanse ta tiempo na panguloli?

¹⁷ Pakurugan na aru nga ngamin-tiempo nga aripan nga nakoffun nira i paffokus ta ministerio tapenu mattalupaddian nga balanse maski ta manguloli nga sirkumstansia. Turi ta nanaw ta Bethel i magatawa nga South African nga da Osborne anni Polite, abboda nga insigida ira makaleg tu trabahu anna paddianan. “Ngem kammi insigida nakaleg tu sekular nga trabahu gitta na ekspektammi,” kunni Osborne. Meraddamman gapa na misisna nga si Polite: “Kammi nakaleg tu trabahu ta tallu vulan anna awan tu unnugmi. Talaga mariga yatun.”

¹⁸ Anni i nakoffun nira tapenu malampasan yatun nga maka-stress nga situasion? Kunni Osborne: “Dakal i neyuffun nikami na pallayyagayya kavulu i kongregasion tapenu mattalupaddian nga nakafokus anna positibo i nonomi. Nadisidimi nga mabbalin tu okupadu ta pallayyagayya imbes nga manunggo tapus  mavuru-vurung, yatutta nagayayya kami. Komforme i nagalegammi tu trabahu, tapus turi kua nakaleg kami balaman.”

19-21. (a) Anni i makoffun nittam tapenu mapeggan tu memammo nga panageno? (b) Anni ira nga benefisio i mala mu ta pakibagay ta bagu ira nga sirkumstansia?

¹⁹ Gitta na ipasingan naw ira nga angngarigan, nu kuattam i adde na mawayya tam anna sigga-matalo nga maginnag kani Jehova maski anni paga i sirkumstansia tam, mapattalupaddiattam i memammo nga panageno. (Bibbigan i Mikias 7:7.) Baka mammuattam paga lagu nga mas dakal i bentaha tam ta espiritual megafu ta nakibagay ittam ta bagu ira nga sirkumstansia. Base ta ekspiriensana ni Polite nga nakagi ta gafu, kunna: “Megafu ta nare-asayn ngà, nakannammuakku i talaga kebalinan na pattalo kani Jehova maski mariga i pattolay. Mas naddukko i relasiokku sa.”

²⁰ Si Mary nga nakagi ta gafu ay tattangngawanna lagapa i lakay ngana nga yamana durante nga mappayunir. Inaminna: “Nagigiammù nga nu mavurung ngà, mawag tu magimmang ngà, makimallo, tapus marrelaks. I pangitalo ta ganna-gannug ta limi-lima ni Jehova i kadakallan nga leksion nga nagigiammù, anna talaga mawag ku noka yatun ta mappange.”

²¹ Inamin da Lloyd anni Alexandra nga nakagi ta gafu, nga napurueban i pangurugda ta gannug ira nga ariadda inekspekta megafu ta nanguli nga sirkumstansiada. Ngem kudda: “I kapurueba ira ta pangurug ay mamakurug nu i pangurug tam ay napafutuan anna nu egga pakawayya natun nga suportan anna banna-bannayan ittam ta tiempo na ziga-riga. Nabbalikkami tu mas mapia nga totolay.”

22. Nu kuattam i adde na mawayya tam ta maddaggun nga situasiottam, anni i masiguradu tam?

²² Nu gavva nga egga i panguli ta pattolem—awayyana nga megafu ta panguli ta teokratiko ira nga asayment, taka-taki, onu bagu nga responsibilidad ta familia​—makasiguradu ka nga ikavurungan naka ni Jehova anna uffunan naka ta eksakto nga tiempo. (Heb. 4:16; 1 Ped. 5:6, 7) Ngem ta maddaggun nga situasiommu, kuammu labbi i adde na mawayyam. Maddukko ka ta nelangitan nga Yamam gukaban na pakimallo, anna gigiammuan nga italo i baggim ta minammendision nga limi-limana. Nu kunnatun, mapattalupaddiammu i memammo nga panageno maski ta manguloli nga sirkumstansia.