NORMAL nga kayà na totolay nga magayayya i pattoleda. Ngem taw nga pangurianan nga aggaw, meparubang i ngamin ta “ziga-riga” nga mariga arubangan. (2 Tim. 3:1) I kawan tu hustisia, taka-taki, kawan tu pagalegan, daddam, onu tanakuan paga i mamavvurung anna mamarraddam nga sisinu nga mangalsa ta pagayayyada. Puede lagapa makkafi i nono anna mapakarianan i pagayayya maski danuri masserbi ta Dios. Nu nesimmu nikaw yaw, kunnasi ka mapeggan uli tu pagayayya?

Tapenu tabbagan yatun nga pakkiavu, alippawatattam labbi nu anni i kurug nga pagayayya anna nu kunnasi nattalupaddian nga magayayya i tanakuan maski egga i kapurueba ira. Tapus mannammuattam nu anni i kuattam tapenu mapattalupaddian i pagayayya tam anna ammungan yatun.

Ariattam nakuan malitu nga basta laman masaya onu paggala-galo i pabbalin tu magayayya. Tapenu iyilustra: Kabalin minimum tu aru nga binarayang, baka makagala-galo i tadday nga minaggillellaw. Ngem, turi nappasa ngana i illona, arianna ngana nga gumala-galo, tapus nanoli ngana yaya ta problemadu nga pattolay. I temporario nga ayayyana ay ari tu kurug nga pagayayya.​—Prov. 14:13.

I pagayayya ay pang-unag nga kualidad na futu. Tinukoy yaw bilang “i emosion nga mapalattuag megafu ta kapeggan onu ekspektasion para ta mapia.” I pagayayya ay pakatageno tu kinasaya nga mattalupaddian maski nu makasta onu marake i situasiottam. (1 Tes. 1:6) Kakuruganna, puede nga mavurung i tadday megafu ta tadday nga problema ngem egga lagapa i pagayayya ta futuna. Angngariganna, nalalatigo i apostol ira megafu ta pakiyuvovugda meyannung ta Cristo. Ngem, “ta panaw na apostol ira ta arubang na Sanhedrin, kuruga magayaya ira ta nekwenta ira tu mekunnay nga magattam ta kepasa-pasiran megafu kani Jesus.” (King. 5:41) Siempre ari ira magayayya ta kalalatigoda. Ngem kwenta aripan na Dios, nalegadda i kurug nga pagayayya megafu ta pinattalupaddiadda i integridadda sa.

Ariattam neyanakan nga egga pagayayyana; onu automatiko nga mapeggan tu kunnatun. Ngatta? Megafu ta aspeto na vunga na masanto nga espiritu na Dios i pagayayya. Ta uffun na espiritu na Dios, makultiba tam i “natalibagu nga kata-katolay,” nga nelagum i pagayayya. (Efe. 4:24; Gal. 5:22) Nu mapeggan ittam tu pagayayya, mas marubattam i pakavurungan ira ta pattolay.

Ginakkag ni Jehova nga mesimmu i makasta ira nga gannug ta davvun, ari tu marake ira nga gannug nga masingi-singattam ta maddaggun. Ngem, ari nalsa natun i pagayayya ni Jehova. Mabibbig ta Uvovug na Dios: “Sikan anna pagayayya i lugar nga paddiananna.” (1 Cro. 16:27) Kunne na gapa, danuri ganna-gannug nga tuttuppalan na aripanna ay ‘mamagayayya ta futu’ ni Jehova.​—Prov. 27:11.

Maparigattam si Jehova gukaban na ari tu sobra nga pavvurung nu ari nga nesimmu i gannug  ira nga ekspektattam. Imbes nga mapakarianan i pagayayya tam, maffokus tam lallagu ta makasta ira nga gannug ta maddaggun anna mapasensia nga innaggan i mas makasta paga ira nga gannug ta mappange. *

Makaleg tam paga tu aru nga ehemplo ta Biblia nga napattalupaddiadda i pagayayyada maski egga problemada. Tadday tatun si Abraham nga inattammanna i situasion ira nga namappeligro ta inangona anna kapurueba megafu ta tanakuan. (Gen. 12:10-20; 14:8-16; 16:4, 5; 20:1-18; 21:8, 9) Maski ta mariga ira nga situasion, napattalupaddian lagapa ni Abraham i pagayayya ta futuna. Kunnasina nga nakua yatun? Mananawag ta nonona i iddanama nga matolay ta napabagu nga mundo ta pammaguray na Mesias. (Gen. 22:15-18; Heb. 11:10) Kinagi ni Jesus: “Nagayaya si Abraham nga yama nu ta iniddanaman na tu masingan na i aggaw na dattal ku.” (Juan 8:56) Maparigattam si Abraham gukaban na pannonono ta mappange ira nga pagayayya.​—Roma 8:21.

Kagitta ni Abraham, nakafokus gapa ta promesa ira na Dios si apostol Pablo anna i kavuluna nga si Silas. Maladda i pangurugda, anna magayayya lagapa ira maski ta marake ira nga ekspiriensa. Angngariganna, kabalidda naekspiriensa i grabe nga kapala-palu anna ketabbo ta affukutan, “ta mattangnga na gabi, maddasa-dasal anna makkakkansion ta imno da Pablo anni Silas tu paddaya-rayaw da ta Dios.” (King. 16:23-25) Fuera paga ta passikan da Pablo anni Silas megafu ta iddanama, magayayya lagapa ira megafu ta mazziga-riga ira para ta ngagan na Cristo. Maparigattam si Pablo anni Silas gukaban na pannono ta makasta ira nga resulta na matalo nga passerbi ta Dios.​—Fil. 1:12-14.

Aru ta wawwaragi tam ta maddaggun i nakapattalupaddian nga magayayya maski aru i problema. Angngariganna, turi Nobiembre 2013, kinanna na Super Typhoon Yolanda i Pilipinas, nga nanaral ta maturu 1,000 nga babalay na Saksi ira. Kinagi ni George nga nadaral i balena nga taga-Tacloban: “Maski paga ta nesimmu, magayayya lagapa i wawwaragi. Ariakku meyesplika i pagayayya ku.” Kada maka-ekspiriensa tam tu grabe nga ziga, mapattalupaddiattam i pagayayya tam nu sigga-appresia nga nonopan tu mapia i kingngua ira ni Jehova nittam. Anni paga i kingngua ni Jehova nga mamagayayya nittam?

Anni paga i mas makapagayayya nittam anne ta relasiottam ta Dios? Nonopan yaw: Ammu tam nu sinni i Soberano ta interu Uniberso. Yayya i Yama, i Dios, anna i Kofuttam!​—Sal. 71:17, 18.

Tagibalorattam gapa i regalu nga inango anna i abilidad tam nga magayayya tatun. (Ecl. 3:12, 13) Bilang intelihente nga naparatu nga neyaranni kani Jehova, malippawa tam i uray na Dios nittam. (Col. 1:9, 10) Yatutta, egga i gakkag anna direksion na pattoletam. Ngem aru ta totolay ay awan tu klaro nga konseptoda ta gakkag na pattolay. Mekontra yaw ta nitura ni Pablo: “‘I ari paga nga nasingan anna ari paga nga naginna, i ari nga napanono na tolay tu awayya na nga makua, ay yaw mismu i niparan na Dios ta totolay nga mangaya sa.’ Ngem gafu ta Espiritu, sittam i nangipakannammuan na Dios ta sekreto na.” (1 Cor. 2:9, 10) Ari kari nga magayayya ittam megafu ta nalippawa tam i uray anna gakkag ni Jehova?

Ikonsidera nu anni paga i kingngua ni Jehova ta totolena. Ari kari nga magayayya ittam ta mapakoma i tagaruli tam ira? (1 Juan 2:12) Megafu ta allo na Dios tam, egga i iddanama tam nga matolay ta napabagu nga mundo nga aranni ngana nga duttal. (Roma 12:12) Maski ta maddaggun, aru nga kofun i iyawa ni Jehova nga kavvulu tam maddayaw sa. (Sal. 133:1) Ipasiguradu gapa na Uvovug na Dios nga protektan ittam ni Jehova kontra kani Satanas anna ta demoniona ira. (Sal. 91:11) Nu pannonopattam tu mapia ngamin nga bendision nga naggafu ta Dios, matageno tam nga mas maponag anna dumakal i pagayayya tam.​—Fil. 4:4.

Awayyana kari paga nga mas magayayya i tadday nga Cristiano? Kinagi ni Jesus: “Kagiak-ku danaw tapenu i pagayaya ku ay egga gapa nikamu, ay tu awan tu pakkurangan na pagayaya nu.” (Juan 15:11) Kayà kari kagian natun nga ariattam ngana mabbalin tu mas magayayya? Mekumparam i appursigim nga padakallan i pagayayya mu ta pappakaddul ta afi. Mawag nga duppangammu tapenu mas magganga. Kunnatun gapa, mawag nga duppangattam i espiritualidad tam tapenu mas magayayya ittam. Daddamman: Mapalattuag na espiritu na Dios i pagayayya. Yatutta, nu kayà tam nga mas magayayya, kanayuttam nakuan kiddawan i espiritu ni Jehova gukaban na pakimallo. Kanayuttam nakuan gapa nga monag nga pannonopan i Biblia, nga nainspiran na masanto nga espiritu.​—Sal. 1:1, 2; Luc. 11:13.

Mas makapagayayya ittam paga gukaban na pagaktibo ta trabahu nga makapagayayya kani Jehova. (Sal. 35:27; 112:1) Ngatta? Megafu ta naparatu ittam nga ‘maganassing ta kurug nga Dios anna tuppalan i bili-bilinna, ta yaw i interu nga obligasion na tolay.’ (Ecl. 12:13) Kebalinanna, nadisenio ittam nga kuan i uray na Dios. Nu masserbi ittam gafu kani Jehova, mas makapagayayya ittam ta pattolay. *

Durante nga kultibattam i makadios nga pagayayya, ariattam laman matageno i benefisio ira. Angngariganna, mas faboran ittam na nelangitan nga Yama tam durante nga sigga-pagayayya nga massesserbi ittam sa maski anni nga problema i meparubang nittam. (Deut. 16:15; 1 Tes. 5:16-18) Megafu ta kurug nga pagayayya, mebita tam i materialistiko nga klase na pattolay anna mas massakrifisio ittam lallagu para ta Pappatulan na Dios. (Mat. 13:44) Nu masingattam i makasta nga metuppal naw, dumakal i pagayayya tam, maekspiriensa i mas makasta nga paddia-paddian, anna mangammung ta pagayayya na karuan.​—King. 20:35; Fil. 1:3-5.

“Nu magayayya ka anna kakayà mu i pattolem ta maddaggun, siguradu nga mas makasta i gawa-gawayyammu ta mappange.” Yatun i nitura na tadday nga researcher ta University of Nebraska ta United States kabalinna nga nirepaso i aru nga paggigiammu ta gawa-gawayyan. Mekunnay yaw ta kagian na Biblia: “I magayayya nga futu ay makasta nga panguru.” (Prov. 17:22) Wan, nu mas nga magayayya ka, mapeggakka tu mas makasta nga gawa-gawayyan.

Yatutta maski mattolay tam ta mariga ira nga tiempo, makultiba tam lagapa i kurug anna mannanayun nga pagayayya durante nga mala tam i masanto nga espiritu gukaban na pakimallo, paggigiammu, anna monag nga pannono ta Uvovug ni Jehova. Mas magayayya ittam paga durante nga pannonopattam i maddaggun ira nga bendision, parigan i pangurug na tanakuan, anna mappursigi nga kuan i uray na Dios. Nu kuattam ngamin yatun, mapakurug tam gapa i Salmo 64:10, nga kunna: “Magayaya ngamin i matunung ira; yaya i ed-da pakaleran ta kapaliag da.”