1, 2. Anni i nalippawa na brother nga kurang meyannung ta espiritual nga paddia-paddianna, anna anni i kingnguana?

TINEDYER nga nabawtisowan si Robert, ngem arianna sinerioso i kinakurug. Kunna: “Ariakku vuluvuga nangngua tu marake, ngem gittana rutina laman ngamin. Alle masikan ngà ta espiritual, kanayun ngà magatende ta study ira anna ma-auxiliary payunir ngà tu piga beses kada dagun. Ngem egga i kurang.”

² Ari nalippawa mismu ni Robert nu anni i kurang adde ta nangatawa yayya. Nu mittan pappasadda na atawana i tiempo gukaban na Bible game ira. Masikan ta espiritual i atawana anna malogon laman para sa nga tabbagan i pakkiavu ira, ngem kanayun mepasiranan si Robert anna kanna ammu nu anni i kagianna. Kunna: “Kagitta na awan tu ammù. Kukku ta baggì, ‘Nu sakan i espiritual nga ulu na atawà, mawag nga egga kuakku.’” Anni i kingnguana? Kunna: “Ginigiammù i Biblia anna ginigiammù paga anna mas paga nga ginigiammù, anna mas mekonektà ngana i ganna-gannug. Mas malippawa ku ngana anna, pinaka-importante, napeggannà tu madukko nga relasion kani Jehova.”

3. (a) Anni i magigiammu tam ta ekspiriensa ni Robert? (b) Anni ira nga importante nga punto i paguruvovugattam?

³ Makagigiammu ittam tu importante nga leksion ta ekspiriensa ni Robert. Puede nga egga i ammu tam ta Biblia anna regular ittam  nga makikavulu ta kongregasion, ngem danatun nga gannug ay ari mamabbalin nittam nga espiritual nga tolay. Onu napprogreso tam ngana, ngem turi ta mas paga nga inusito tam i baggi tam, nammuattam nga makapapprogreso tam paga ta espiritual. (Fil. 3:16) Tapenu moffunan ittam nga mebala-balayun i papprogreso, tabbagattam i tallu nga importante nga pakkiavu taw nga artikulo: (1) Anni i makoffun nittam tapenu magukug i konag na espiritualidad tam? (2) Kunnasi tam makultiba i espiritualidad anna tulu-tuloy nga mabbalin tu espiritual nga tolay? (3) Kunnasi makoffun i maladda nga espiritualidad ta inaggaw nga pattoletam?

4. Sinni i mangiyaplika ta tabarang nga mabibbig ta Efeso 4:23, 24?

⁴ Turi ta nabbalin ittam nga aripan na Dios, nanguli ittam. Ininfluwensian naw i ngamin nga aspeto na pattoletam. Ari yatun magimmang turi ta nabawtisowan ittam. Nekagi nittam nga ‘talibaguan [“itulu-tuloy nga ulian,” NW] i appana-panono anna affutu-futu tam.’ (Efe. 4:23, 24) Megafu ta imperfekto ittam, ngamin ittam ay mawag nga ari magimmang nga manguli. Maski danuri nabayag ngana nga aripan ni Jehova ay mawagda nga pattalupaddianan i espiritualidadda.​—Fil. 3:12, 13.

5. Anni ira nga pakkiavu i makoffun tapenu mosito tam i baggi tam?

⁵ Tapenu mapakasta anna mapattalupaddiattam i espiritualidad tam, mawag nga balanse nga usitakkan i baggi tam. Maski mabbing onu manakam, iyavu ta baggi tam: ‘Egga kari i napansin ku nga pangulì nga mangipasingan nga mapprogreso ngà ta pabbalin tu espiritual nga tolay? Mabbala-balin kari tu alle-Cristo i kata-katolè? Anni i kagian na disposision anna konduktà ta study ira meyannung ta konag na espiritualidad ku? Anni i ipasingan na i-istoriakku meyannung ta pakkaraga ku? Anni i kagian na rutina ta paggigiammù, assissinnun anna itsurà, onu reaksiokku ta tabarang meyannung niakan? Anni i kuakku nu meparubang ngà ta tentasion ira? Nammanakam ngà ngana kari kwenta Cristiano?’ (Efe. 4:13) Makoffun i pannono ta tabbag natun ira nga pakkiavu tapenu magukug tam i pinapprogreso tam ta espiritual.

6. Tapenu mosito tam i espiritualidad tam, anni paga i mawag tam?

⁶ Tapenu magukug i kinamanakam tam ta espiritual, egga ira i tiempo nga mawag tam i uffun na tanakuan. Kinagi ni apostol Pablo nga ari masingan na nepattaggan nga tolay nga mali i sinaddagna ta arubang na Dios. Ngem, malippawa na espiritual nga tolay i pagimamma na Dios kunne na gapa i mali nga annangngua na pisikal nga tolay. (1 Cor. 2:14-16; 3:1-3) Megafu ta alle-Cristo i appanono na elder ira, masingadda i seniales na nepattaggan nga appana-panono. Nu kagiadda yatun nittam, alawatattam kari anna iyaplika i tabaradda? Nu kuattam yatun, mepasingattam i pakkaraga tam nga makultiba i espiritualidad tam.​—Ecl. 7:5, 9.

7. Ngatta ari makalanno i kapeggan tu pakannammu ta Biblia tapenu mabbalin tu sigga-nono ta espiritual nga tolay?

⁷ Daddamman nga ari makalanno i kapeggan tu pakannammu ta Biblia tapenu mabbalin tu tolay nga sigga-nono ta espiritual. Napakaru i ammu ni Patul Solomon gari meyannung ta dala-dalan ni Jehova. Nabbalin tu parte na Biblia i akkagiananna ira. Ngem, arianna napattalupaddian i kinamatalona kani Jehova nga kunna espiritual nga tolay. (1 Pat. 4:29, 30; 11:4-6) Yatutta fuera paga ta pakannammu ta Biblia, anni i mawag? Mawag tam nga tulu-tuloy nga mapprogreso ta espiritual. (Col. 2:6, 7) Ngem kunnasi tam makua yatun?

8, 9. (a) Anni i makoffun nittam tapenu makultiba i matuyag nga espiritualidad? (b) Anni i gakkag mu nu maggigiammu ka anna monag nga pannonopan yatun? (Innan i letratu ta gafu na artikulo.)

⁸ Pinagaram ni Pablo danuri ollu-siglo nga  Cristiano nga “gigiammuan i mangompleto ta pakannammu” [“mapprogreso ta kinamanakam,” NW]. (Heb. 6:1) Tapenu meyaplika i tabarang ni Pablo, anni ira nga dakkua i kuattam? Tadday nga importante nga dakkua i paggigiammu ta publikasion nga “Mattalupaddian ta Ayâ na Dios.” Makoffun i paggigiammu tatun nga libru tapenu masingan nu kunnasi meyaplika i prinsipio ira na Biblia ta pattoletam. Nu nabalimmu ngana nga gigiammuan yatun nga libru, puede ka kari nga magali ta tanakuan nga material ta paggigiammu nga makoffun ta pamattalupaddiammu ta pangurug mu? (Col. 1:23) Sigga-pakimallo mu kari nga pannonopan nu kunnasim nga iyaplika ta pattolem i gigiammuammu ira?

⁹ Daddamman nga durante nga maggigiammu ittam anna monag nga pannonopan yatun, ikagumattam nakuan nga kultiban i napafutuan nga pakkaraga nga mapagayayya i futu ni Jehova anna tuttulan i dorobna. (Sal. 40:8; 119:97) Ibita tam gapa danuri gannug nga makefugag ta espiritual nga papprogreso tam.​—Tito 2:11, 12.

10. Anni i makua na kabataan ira tapenu makultiba i espiritualidadda?

¹⁰ Nu kabataan ka, manawag kari i espiritual ira nga addetammu? Kada magatende ta sirkito asembli, niyugali na tadday nga brother nga masserbi ta Bethel nga kiyuvovugan i kandidato ira ta bawtismo nige na programa. Aru nira i kabataan. Iyavu na brother nira nu anni i espiritual ira nga addetadda. Aru nira i egga manawag nga planoda nu anni i kuadda ta passerbi kani Jehova​—awayyana nga pattallung ta karuan nga klase na ngamin-tiempo serbisio onu passerbi nu sitaw dakal i pakawagan para ta mangilayyagayya ta Pappatulan. Ngem egga gapa danuri kabataan ira nga awan tu kakkagiadda. Indikasion kari yatun nga ari paga ira determinadu ta futuda nga mapeggan nakuan tu manawag nga espiritual ira nga addetadda? Nu kabataan ka, iyavu ta baggim: ‘Makipartisipa ngà kari ta espiritual ira nga aktibidad megafu ta ekspektan na magana ku nga kuakku yatun? Egga kari i maddukko nga relasiokku ta Dios?’ Siempre, ari laman ta kabataan meyaplika i tabarang nga kapeggan tu espiritual ira nga addetan. Makoffun nittam ngamin nga aripan ni Jehova i kapeggan tu kunnatun nga addetan tapenu maponag i espiritualidad tam.​—Ecl. 12:1, 13.

11. (a) Tapenu mapprogreso ta espiritual, anni nakuan i kuattam? (b) Anni nga ehemplo ta Biblia i puede tam parigan?

¹¹ Sonu nasingattam ngana i gannug ira nga papprogresowattam, mangngua ittam tu positibo ira nga dakkua tapenu addetan danatun. Importante i pabbalin tu espiritual nga tolay. Kakuruganna, inango onu patay i kebalinan natun. (Roma 8:6-8) Ngem, i pammanakam ta espiritual ay ari pabbalin tu perfekto. Uffunan ittam na espiritu ni Jehova tapenu makapapprogreso. Ngem, mawag tam mappursigi. Kunnaw i nikomento ni John Barr, nga nasserbi nga miembro na Manangngal nga Baggi, meyannung ta Lucas 13:24: “Aru i ari nakatallung ta atazzi nga puerta megafu ta ariadda kingngua i adde na mawayyada.” Parigattam nakuan si Jacob, nga ari nagimmang nakiggavvu ta anghel adde ta malana i bendision. (Gen. 32:26-28) Maski paga makapagayayya i paggigiammu tu Biblia, kattam nakuan ekspektan nga gittana nobela i Biblia nga netura tapenu paddibersionattam. Mawag tam mappursigi nga magaleg tu espiritual nga minas nga makoffun nittam.

12, 13. (a) Anni i makoffun nittam tapenu iyaplika i 1 Corinto 2:16? (b) Kunnasi makoffun nittam i ehemplo anna tabarang ni apostol Pedro? (c) Anni i makuam tapenu kultiban i espiritualidad mu? (Innan i kahon nga “ Dakkua ira nga Makuam Tapenu Mapprogreso ta Espiritual.”)

¹² Durante nga kultibattam i espiritualidad, pasikannan ittam na masanto nga espiritu tapenu ulian i appanono tam. Gukaban na uffun na espiritu, sisinu tam maparigan i appana-panono ni Cristo. (1 Cor.  2:16.) Makoffun paga yatun nga battulan i nepattaggan ira nga pakkaraga anna makultiba i kualidad ira nga makapagayayya ta Dios. (Gal. 5:16, 22, 23) Nu matageno tam nga guggunan ittam na nono tam ta materialistiko onu nepattaggan nga pakkaraga, pasikannattam i nono tam. Ipakimemallo i espiritu, anna uffunannaka ni Jehova nga itoli i fokus mu ta mepangngo ira nga gannug. (Luc. 11:13) Daddamman si apostol Pedro. Namikkaru yayya nga ari nagguyu nga espiritual nga tolay ta pattolena. (Mat. 16:22, 23; Luc. 22:34, 54-62; Gal. 2:11-14) Ngem, arianna nagimmang. Ta uffun ni Jehova, sisinu nga napeggan si Pedro tu alle-Cristo nga appanono. Makua tam gapa yatun.

¹³ Kakuruganna, nitura ni Pedro i gannug ira nga puede tam kuan. (Bibbigan i 2 Pedro 1:5-8.) Durante nga ‘kuattam i adde na awayya tam’ tapenu kultiban i kualidad ira gittana pangifugag ta baggi, aggatta-attam, anna pagiddu ta wawwaragi, makoffun yatun tapenu metulu-tuloy tam nga mabbalin tu tolay nga sigga-nono ta espiritual. Kada aggaw, iyavu ta baggi tam: ‘Anni i awayyà nga kuan sangawe nga aggaw tapenu mapprogreso ta espiritual?’

14. Kunnasi influwensian na pabbalin tu sigga-nono ta espiritual i pattoletam?

¹⁴ Influwensian na alle-Cristo nga appanono i paguvovug, i kondukta tam ta trabahu onu ta eskuela, anna i desisiottam ta inaggaw. Masingan ta desisiottam ira i appursigi tam nga tuttulan si Cristo. Nu espiritual ittam nga tolay, lillitattam i maski anni nga makadaral ta relasiottam ta nelangitan nga Yama tam. Nu meparubattam ta tentasion, uffunan ittam na alle-Cristo nga kualidad tapenu labanan yatun. Nu maddesision, magimmang anna pannonopan tu mapia yaw ira nga pakkiavu: ‘Anni ira nga prinsipio na Biblia i makoffun niakan nga maddisidi? Anni pano i kuan ni Cristo taw nga situasion? Anni nga desision i makapagayayya kani Jehova?’ Tapenu masanay ittam nga mannono tu kunnatun, ikonsidera tam i karuan nga situasion. Ta kada situasion, ammuattam i nebase-Biblia nga prinsipio nga makoffun nittam tapenu masirib nga maddesision.

15, 16. Mangiyawa tu angngarigan nu kunnasi makoffun i alle-Cristo nga appanono nu maddesisiottam ta (a) pappili tu atawa. (b) pappili tu kakavvulu.

¹⁵ Pappili tu atawa. Mabibbig i prinsipio na Biblia ta 2 Corinto 6:14, 15. (Bibbigan.) Manawag ta nitura ni Pablo nga talaga ari makasta i pattadday na espiritual nga tolay anna pisikal nga tolay. Makkakontra i pagimammada ta ganna-gannug. Kunnasi meyaplika yaw ta pappili tu atawa?

¹⁶ Pakikavvulu. Innan i prinsipio na Biblia ta 1 Corinto 15:33. (Bibbigan.) Ari makilivi-livu i makadios nga tolay turi ta mamappeligro ta espiritualidadna. Anni ira nga pakkiavu i makoffun nikaw tapenu meyaplikam yatun? Angngariganna, kunnasi meyaplika yaw ta social networking? Onu anni i mawag mu nga kuan nu imbitannaka na estrangheru nga maggayang tu online game ira?

17-19. Kunnasi makoffun nikaw i kapeggan tu espiritual nga pagimamma ta (a) pangibita ta gannug ira nga awan tu kebalinanna? (b) kapeggan tu addetan ta pattolay? (c) pangarubang ta ari pakkarantindian?

¹⁷ Aktibidad ira nga makefugag ta espiritual nga papprogreso. Pamappalan i kinagi ni Pablo  ta kasi-Cristianona. (Bibbigan i Hebreo 6:1.) Anni i “gannug ira nga awan tu kebalinan” nga mawag tam ibita? Maski anni nga aktibidad nga ari makoffun nittam nga massikan ta espiritual. Makoffun yaw nga prinsipio ta pakkiavu ira nga luttuag ta pattoletam, gittana: ‘Yaw kari nga aktibidad ay makagi nga nepattaggan nga annangngua? Mesali ngà kari taw nga klase na negosio? Ngatta ariakku mevulu ta grupo nga puruebadda nga ulian i situasion na mundo?’

¹⁸ Espiritual ira nga addetan. Manawag i pangigiya na kinagi ni Jesus ta Sermon ta Vukig meyannung ta paggawa ta addetan ira. (Mat. 6:33) Pagolluan na espiritual nga tolay i espiritual ira nga addetan. Makoffun i pannono taw nga prinsipio tapenu matabbag tam i pakkiavu ira nga: ‘Karagatakku paga kari nga mapplano para ta atannang nga edukasion? Alawatakku kari yaw nga klase na trabahu?’

¹⁹ Ari pakkarantindian. Kunnasi makoffun nittam i tabarang ni Pablo ta kongregasion ta Roma ta pangarubang ta ari pakkarantindian? (Roma 12:18) Megafu ta disipulos ittam ni Cristo, kayà tam nga “memammo ta ngamin nga totolay.” Anni i reaksiottam nu egga luttuag nga ari pakkarantindian? Marigatan ittam kari nga mappakalinno, onu kilala ittam nga ‘minakkaraga ta imammo’?​—Sant. 3:18.

20. Ngatta kayà mu mapprogreso ta espiritual?

²⁰ Piga laman yaw ta angngarigan nga mangipasingan nu kunnasi makoffun i pannono ta makadios ira nga prinsipio tapenu mapakurug na desisiottam ira nga tadday tam nga espiritual nga tolay. Makoffun i pabbalin tu sigga-nono ta espiritual tapenu mas makapagayayya anna mas malanna-lanno i inaggaw nga pattoletam. Kunni Robert nga nekonsidera i ekspiriensana ta gafu na artikulo: “Turi ta napeggannà tu kurug nga relasion kani Jehova, mas nappia ngà nga atawa anna yama. Kontentu ngà anna masaya.” Maekspiriensa tam gapa i kunnatun nga bendision nu prayoridad tam i papprogreso ta espiritual. Bilang espiritual nga totolay, mas makapagayayya ittam ta makakontentu nga pattolay ta maddaggun anna ta “kurug nga pattolay” ta mappange.​—1 Tim. 6:19.