1. Anni nga importante nga topiko i tinukoy ni Jesus ta ultimo nga gabi kavulu i disipulosna?

TA ULTIMO nga gabi ni Jesus kavulu i disipulosna, namittrenta nga tinukoyna i aya. Espesipiko nga nidogna ta disipulosna nga “makka-aya-aya” ira. (Juan 15:12, 17) Nerumu-ruma yatun nga ayada ta kataggi-tadday nga yatun i panakkilaladda nga kurug nga disipulosna. (Juan 13:34, 35) Ari laman nga gannug nga matageno tam i aya nga tinukoy ni Jesus; yaw ay mafuersa anna minassakrifisio nga kualidad. Kunna: “I kadakallan nga pangaya nga mepasingan na tadday nga tolay ay i pangiyawa na ta inango na megafu ta kakkofun na. Ay kakkofut-takamu nu parulattan nu i bilik-ku.”​—Juan 15:13, 14.

2. (a) Anni i egga ta nattangngan na aripan ira na Dios? (b) Anni ira nga pakkiavu i tabbagattam taw nga artikulo?

² I napafutuan anna minassakrifisio nga aya anna i ari madaral nga pattaradday na aripan ira ni Jehova ta maddaggun i mangiyammammu nga totolay ira na Dios. (1 Juan 3:10, 11) Talaga dakal i appabalo tam nga masingi-singan i alle-Cristo nga aya ta nattangngan na aripan ira ni Jehova maski anni paga i lahi, tribu, lengguahe, onu naggafuadda! Ngem baka manono tam: ‘Ngatta kuruga importante i aya ta kaggawattam? Kunnasi ittam pasikannan na aya ni Jehova  anni Jesus? Kunnasi mepasingan na kataggi-tadday nittam i alle-Cristo nga aya nga “mamakaladda ta pavvurulun”?’​—1 Cor. 8:1.

3. Anni i efekto na “pangurianan ira nga aggaw” ta totolay?

³ Megafu ta napannu tu “ziga anna daddam” i pattolay, aru i mazziga-riga tu nadduruma nga emosional nga problema taw nga “pangurianan ira nga aggaw.” (Sal. 90:10; 2 Tim. 3:1-5) Aru i matupa ngana nga mattolay. Segun ta pattantia, maturu tu 800,000 nga totolay i mappakamatay kada dagun​—maggi-tadday i matay ta kada 40 segundo. Kaddaraddam nga egga i karuan nga Cristiano nga nappaffu ta kunnatun nga problema yatutta nappakamatay ira.

4. Sinni ira i karakter ta Biblia nga nakkagi nga kayàda ngana i matay?

⁴ Tagga ta tiempo na Biblia, egga ira matalo nga aripan na Dios nga nakkonsimision ira ta situasiodda, adde ta punto nga kayàda ngana i matay. Angngariganna, megafu ta sobra nga daddam ni Job, nidaginna: “Kala-kalussò i inango ku; ariakku ngana kayà i mattolay.” (Job 7:16; 14:13) Talaga nadismaya si Jonas ta nattuppalan na ganna-gannug ta annunganna, yatutta nakagina: “Sangawe, O Jehova, fabor bi nga patayammà ngana laman, megafu ta mas mapia nga matay ngà ngana anne ta matolay.” (Jon. 4:3) Kunne na gapa, egga i tiempo nga talaga nafektan si profeta Elias ta situasionna, yayya nga nikiddona ngana nga matay. Kunna: “Fustu ngana! Sangawe, O Jehova, apammu ngana i inango ku.” (1 Pat. 19:4) Ngem, tinagibalor ni Jehova danatun nga matalo nga aripan anna kayàna nga matolay ira. Imbes nga kondenan i mataga-tagenoda, inuffunanna ira nga affutan i pakkaragada nga matay anna pinasikanna ira gukaban na ayana tapenu metulu-tuloyda i matalo nga passerbi sa.

5. Ngatta kuruga kawagan na wawwaragi tam i aya ta maddaggun?

⁵ Maski nu ari gapa nga matupa nga mattolay i wawwaragi tam, aru sangawe i meparubang ta maka-stress ira nga situasion yatutta kawagadda i aya tapenu mapasikan. Attattamman na karuan i kadara-darum anna ke-uyu-uyaw. Biktima gapa i karuan ta pakkritika anna pamara-parake ta pattrabahuadda. Onu mababbannag ngana ira megafu ta pa-overtime ta trabahu onu ta kanayun nga paddaddag ta deadline. Arubangan gapa na tanakuan i makofu tu sikan nga problema ta familia, awayyana nga ira i puntiria na kritisismo na ari kapangngurug nga atawada. Megafu taw ira anna ta tanakuan paga nga problema, aru ta kongregasion i nofu ngana i sikadda ta pisikal anna paddudadda ngana i balorda. Sinni gafu i manguffun taw ira nga nakkafi i nonoda tapenu makapattulu-tuloy?

6. Kunnasi pasikannan ni Jehova i aripanna ira?

⁶ Pasikannan ni Jehova i maddayarayaw sa gukaban na pangipasiguradu nira ta ari maffaliu nga ayana. Kuruga makapagaram para ta matalo ira nga Israelita nga ginnan yaw nga uvuvog ni Jehova: “Nabbalikka tu nabalor ta paningakku, nedayaw ka, anna iniddu taka. . . . Ari ka maganassing, megafu ta egga ngà nikaw”! (Isa. 43:4, 5) Megafu ta aripan naka ni Jehova, makasiguradu ka nga kuruga iddeddu naka ni Jehova. * Kunnaw i promesa na Uvovug na Dios turi ira ta mappursigi ta marenu nga paddayaw: “Bilang i Tadday nga makapangngua, mangipaliag yayya. Makitappagayayya yayya nikaw tu dakal nga pagayayya.”​—Zef. 3:16, 17.

7. Kunnasi nga si Jehova ay kagitta na minaggiddu nga yena? (Innan i letratu ta gafu na artikulo.)

⁷ Maski anni paga nga kapurueba i arubangan na totolay ni Jehova, nipromesana  nga suportan anna banna-bannayanna ira. “Sikaw ay melallallay anna magabbay ta siwa, anna medandayaw ka ta tug. Nu kunnasi nga banna-bannayan na yena i anana, banna-bannayattaka gapa kanayun.” (Isa. 66:12, 13) Anni mabba kastana nga eksena​—tadday nga meddu nga yena nga agga-gabbayna i anana ta siwana onu dandayawanna ta tugna! Taw nga ilustrasion, nipatageno ni Jehova nga kuruga iddeddukan naka anna kayàna nga kammu mavurung ta tangngallan naka. Ariammu vuluvuga kuestionan nga kuruga nabalor anna meddu ka mismu kani Jehova.​—Jer. 31:3.

8, 9. Kunnasi ittam pasikannan na aya ni Jesus?

⁸ Egga gapa i rason na kurug ira nga Cristiano nga meyaranni ta aya na Dios: “Kuruga iddukan na Dios i mundo. Yatun tu zinog na i tattadday nga Ana na, tapenu ngamin i mangurug sa ay ari nga matay nu ari matolay ira adde ta ngangangay.” (Juan 3:16) Anni mabba nga aya i nipasingan ni Jesus ta pinangiyawana ta inangona para nittam! Awan tu duda nga para nittam yatun nga aya! Ipromesa na Biblia nga maski i “guru-guru” onu “ziga-riga” ay ari “makawayya nga mangigungay nittam ta aya ni Cristo.”​—Roma 8:35, 38, 39.

⁹ Nu makiggavvu ittam ta kapurueba nga makofu tu sikan ta pisikal, emosional, onu espiritual, i mafuersa nga aya na Cristo i makeyawa nittam tu sikan tapenu makapagattam. (Bibbigan i 2 Corinto 5:14, 15.) Egga i pakapangngua na aya ni Jesus nga sustinian anna pasikannan ittam tapenu ari makkafi i nono tam, maski ta arubang na problema ira gitta na kalamidad, pameppersigi, pakkadismaya, onu pavvuru-vurung.

10, 11. Sinni i makarresponsibilidad nga pasikannan danuri wawwaragi nga nakkafi i nonoda? Iyesplika.

¹⁰ I tadday nga usan ni Jehova tapenu pasikannan ittam gukaban na ayana ay i Cristiano nga kongregasion. Mebalo na kataggi-tadday nittam i aya na Dios gukaban na pangiddu anna pamasikan ta kapangngurug tam ari laman ta espiritual nu ari pati ta emosional. (1 Juan 4:19-21) Pinagaram ni apostol Pablo i Cristiano ira: “Makkapasa-pasikan kamu gafu ta nono, anna makka-uffu-uffun kamu, kunna kuan nu ngana toye ta maddagga-raggun.” (1 Tes. 5:11) Wan, maparigan na ngamin nga egga ta kongregasion​—ari laman tu elder ira​—si Jehova anni Jesus ta pamanna-bannay anna pamasikan ta wawwaragi.​—Bibbigan i Roma 15:1, 2.

 ¹¹ I karuan ta kongregasion nga egga i problemada ta emosion ay mawagda i uffun na doktor anna uru. (Luc. 5:31) Sigga-pakalinno nga rekunnisian na elder ira anna na tanakuan ta kongregasion nga ari ira nga doktor nga eksperto tatun. Ngem, parehu nga egga i importante nga papelda nga ‘pasikannan i nono na makafi i nono da, uffunan i makafi anna pasa-pasensian ira ngamin.’ (1 Tes. 5:14) Mawag nga ipasingan na ngamin nga Cristiano i meddu nga empatia anna pappasensia, nga maguvovug tu makapabannay tapenu pasikannan danuri nakkafi i nonoda. Sikaw kari ay paggafuan na banna-bannay anna pamasikan? Nu ammu tam i mangiyawa tu kunnatun nga uffun, mas mabbalin tu efektibo i appursigi tam.

12. Mangistoria tu ekspiriensa na tadday nga napasikan megafu ta aya na kongregasion.

¹² Kunnasi mapasikan na aya tam danuri makaekspiriensa tu problema ta emosion? “Egga ira i tiempo nga manono ku i mappakamatay,” kunna tadday nga sister ta Europe. “Ngem egga danuri totolay nga agga-paran nga manguffun niakan. Ariakku nawawan i inango ku megafu ta kongregasiokku. Kanayun nga makapagaram anna meddu i wawwaragi. Maski baddi laman i makannammu nga depres ngà, kanayun nga suportannà na kongregasion. Egga i magatawa nga gittana magana ku ta espiritual. Sinangngodà tu mapia, anna sigga-paran ira nga manguffun niakan 24 oras kada aggaw.” Kurug, ari tu para-parehu i meyuffun na ngamin. Ngem dakal i efekto na napafutuan nga pangipasingattam tu suporta turi ira ta mazziga-riga ta emosion. *

13. Anni i mawag nga kuattam nu kayà tam pasikannan i tanakuan?

¹³ Magginna tu mapia. (Sant. 1:19) Pangipasingan tu aya i pagginna nga navulunan tu empatia. Puedem nga mataktika anna masippo nga makkiavu anna igakkag mu nga alippawatan i mataga-tageno na tadday nga problemadu. Nu kunnatun, makepasingakka tu empatia anna mapasikammu i kapangngurug mu. Masingan nakuan ta ekspresion na muka mu i sinsero anna meddu nga pangikavurummu. Nu kayà na tadday nga Cristiano nga idetalye i ganna-gannug, pasa-pasensiammu nga ginnan anna pagurayammu laman yayya nga magistoria. Nu mapasensia ka nga magginna, mas malippawa mu i mataga-tagenona. Makoffun yatun ta problemadu nga kapangngurug nga makkomfiansa nikaw anna mas magginna nikaw nu kayà mu nga pasikannan yayya. Nu mepatageno mu nga sinsero i panguffummu, talaga makapabannay i meddu nga pangikavurummu.

14. Ngatta kayà tam lillitan i minakkritika nga espiritu?

¹⁴ Lillitan i minakkritika nga espiritu. Nu kritikattam i nadepres ira, mas marigatan ira anna kakenga i napafutuan nga appursigi tam nga pasikannan ira. “I ari tu pinannonopan nga uvovug ay gitta na kattag na espada, ngem i zila na masirib ay makoru.” (Prov. 12:18) Siempre, ariattam sadya nga ‘kattaggan’ onu duddugan tu makapataki nga paguvovug danuri nadepres. Maski nu kattam intension nga patakitan i tadday nga depres ta uvovug tam, awayya nga matakitattam ira tu grabe nu maguvovug tam nga kattam pinannonopan. Tapenu gafu makapasikan anna makapagaram ta tanakuan i aya tam, mawag tam i empatia anna i pakipattageno ta situasiodda adde ta posible.​—Mat. 7:12.

15. Anni ira nga rimienta i makoffun nittam tapenu makapasikan ta tanakuan i aya tam?

¹⁵ Usan i Biblia nga mamanna-bannay.  (Bibbigan i Roma 15:4, 5.) I Masanto nga Tura ay aggipappannan nga paggafuan na banna-bannay anna pamagaram. Naggafu i Biblia ta “Dios nga paggafuan na pasensia anna sikan na nono.” Fuera paga ta makapabannay ira nga teksto, ara-aru paga i makoffun nga rimienta ta paggigiammu tu Biblia. Puede tam usan i Watch Tower Publications Index anna i Research Guide for Jehovah’s Witnesses. Makoffun danatun tapenu malegattam i nebase-Biblia ira nga pamasikan tapenu malabanan i ngamin nga klase na problema. Uffunan ittam danatun nga rimienta tapenu makeyawa ittam tu makapabannay ira nga pamasikan anna mabbalin tu mas efektibo i meddu nga appursigi tam.

16. Anni ira nga kualidad i mawag tam nu kayà tam pagaramman i tadday nga problemadu nga Cristiano?

¹⁶ Mabbalin tu masippo anna malumamo. Danaw ay nabalor nga aspeto na ari makasarili nga aya nga mepasingattam nu pagarammattam anna pasikannan i tadday. Si Jehova mismu ay “minaggallallo nga Yama anna Dios nga paggafuan na ngamin nga uffun,” anna “minaggiddeddu” yayya ta aripanna ira. (Bibbigan i 2 Corinto 1:3-6; Luc. 1:78; Roma 15:13) Makasta i ehemplo ni Pablo taw nga gannug, nga niturana: “Nipasingam-mi lallagu i aggiddeddu mi nikamu, kagitta na aggiddeddu na yena ta ána na ira. Megafu ta pangaya mi nikamu, sigga-parak-kami nga mangibillay nikamu, ari laman ta Mapia nga Dumug na Dios, nu ari maski paga ta pangiserbi mi ta mismu nga baggi mi, ta kuruga napafutu i pagiddu mi nikamu!” (1 Tes. 2:7, 8) Nu mangipasingan ittam tu alle-dios nga kinasippo, puede nga sittam i tabbag ta pakimallo na tadday nga problemadu.

17. Anni nga balanse nga pagimamma ta wawwaragi tam i makapasikan nira?

¹⁷ Ari ekspektan nga perfekto i wawwaragi. Mapeggan tu balanse nga pagimamma ta kapangngurug tam. Ari realistiko anna makadismaya nu nonopan nga ari makaliwa i wawwaragi tam. (Ecl. 7:21, 22) Daddamman nga realistiko si Jehova ta ikikkiddona ta aripanna ira. Nu parigattam i ehemplona, preparadu ittam nga pasa-pasensian i kina-imperfekto na tanakuan. (Efe. 4:2, 32) Imbes nga ipatageno nira nga kurang i kukukuadda, komendan lallagu ira ta gannug ira nga kukukuadda. Yatun i makapagaram nira. Makoffun i sinsero nga komendasion tapenu mapasikan i tanakuan anna moffunan ira nga ‘magayaya ta kingnguada’ nga sagrado nga passerbi. Anni mabba kastana nu kunnatun i kuattam imbes nga makkagi tu makapataki nga pangiparig ta tanakuan.​—Gal. 6:4.

18. Anni nga bala-balo i mala tam nu pasikannattam i tanakuan?

¹⁸ I kada tadday nga karneru ni Jehova ay nabala-balor sa anna kani Jesus. (Gal. 2:20) Talaga ayatattam i meddu nga espiritual nga wawwaragi tam. Yari tu kayà tam nga masippo anna meddu nga uffunan ira. Tapenu paggafuan ittam na banna-bannay, “igakkag tam nga kuan i ganna-gannug ira nga makeyawa ta imammo anna mamasikan ta angngurug na kataggi-tadday.” (Roma 14:19) Talaga iddanamattam noka i tiempo sonu awan ngana tu mamakkafi ta nono tam​—ta Paraiso! Awan noka tu taka-taki, geggerra, narensia nga patay, pameppersigi, paddarama na familia, anna pakadismayan ira. Sonu mangultimo ngana i Milenio, mabbalin ngana tu perfekto i totolay. Danuri malampasadda i ultimo nga kapurueba ay maampun noka bilang neravvunan nga ána ni Jehova anna mapeggan tu “makapabbaw nga kapalubbang na ána na Dios.” (Roma 8:21) Ikagumattam nakuan nga kanayun nga mangipasingan tu aya nga makapasikan anna duffunan i kataggi-tadday tapenu maddetan yatun nga makapagayayya nga bala-balo.