TA INTERU mundo, tagibaloran na elder ira i pribilehioda ira ta nallatanan na totolay na Dios. Kuruga daka-dakal ira nga bendision ta nittam ngamin! Ngem, kanni laman, egga i panguli. Nekiddaw ta lakay ira nga elder nga ipasada i madammo ira nga responsibilidadda ta mas abbing ira nga elder. Kunnasi yatun?

I bagu nga unnug ay tu danuri manangngal ta sirkito anna field instructor ira ay iyemmadda ngana yatun nga klase na pribilehio nu magedad ngana ira tu 70 anios. Kunne gapa, danuri elder ira nga magedad tu 80 anios ay ipasada ngana ta mabbing ira nga elder i karuan nga asaymentda, gitta na pabbalin tu koordineytor na Branch Committee onu koordineytor na baggi na elder ira ta lokal nga kongregasion. Anni i reaksion danaw nga meddu nga lakay nga elder taw nga panguloli? Nipasingadda i kinamataloda kani Jehova anna ta organisasionna!

“Umanugu ngà tu fermi tatun nga desision,” nikomento ni Ken, nga nasserbi nga koordineytor na Branch Committee ta maturu tu 49 dagun. “Kakuruganna, ta mismu nga umma turi ta nammuakku yatun, nakimallo ngà kani Jehova, anna kinagì sa i pakawagan para ta mas abbing nga brother nga masserbi nga koordineytor.” I reaksion ni Ken ay  kaparehu na sentimientu na matalo nga mannakam ta interu-mundo. Siempre, megafu ta kakayàda nga passerbian i wawwaragi, egga i baddi nga pakkadismayada ta gafu.

“Mediu narraddam ngà,” kunni Esperandio, nga dati nga koordineytor na baggi na elder ira ta kongregasionna. Ngem inaminna, “Mawag ku i mas aru nga tiempo tapenu tangngallan i makkakafi nga gawa-gawayyakku.” Gitta na ekspektattam, tulu-tuloy lagapa nga matalo nga massesserbi si Esperandio kani Jehova anna mebilang nga bendision ta kongregasionna.

Kunnasi gapa danuri nabayag ngana nga traveling overseer gitta na manangngal ta sirkito nga mawag tu meyali ta tanakuan nga klase na serbisio? Kunni Allan nga traveling overseer ta unag na 38 dagun, “Ta nammuakku, nakaddagan ngà.” Ngem, nirekunnisina i benefisio na passanay ta mas abbing nga lallaki tatun nga trabahu, anna ari yayya nagimmang ta matalo nga passerbi.

Si Russell nga nasserbi tu traveling overseer anna field instructor ta unag na 40 dagun ay nakkagi nga nadismaya ira na atawana ta gafu. “Dakal i appresasiommi ta pribilehiomi anna matagenomi nga masikan paga i baggi anna nonomi nga mattulu-tuloy tatun nga pribilehio.” Usu-usan ni Russell anna na atawana i passanay anna ekspiriensada ta lokal nga kongregasion, nga pagayayya gapa na wawwaragi nga makipasserbi nira.

Maski kammu paga naekspiriensa i kunnatun nga situasion gitta na nakagi ta gafu, uffunan naka na rekord ta 2 Samuel tapenu malippawa i matageno danuri naka-ekspiriensa ta kunnatun.

Daddamman gapa turi ta narrebelde i mismu nga ana ni Patul David nga si Absalom nisa. Nanaw si David ta Jerusalem anna nattammang mappange ta Mahanaim, ta zigattu na Bannag Jordan. Tatun nga situasion, talaga magawag da David anna i kakavvuluna. Meraddammammu kari nu anni i nesimmu?

Egga tallu nga lalaki nga vuka i palagda nga nangiyangay nira tu pagiddan, aru nga maka-makan, anna mawag ira nga gamit. Tadday tatun nga lallaki si Barzilai. (2 Sam. 17:27-29) Turi ta napagimmang i rebelyon ni Absalom, makatoli ngana si David ta Jerusalem, anna vinulu yayya ni Barzilai adde ta Jordan. Kinumbinsi yayya ni David nga mevulu ta Jerusalem. Niyofer na patul kani Barzilai nga suplayanna yayya tu maka-makan ta Jerusalem, maski paga “kuruga mariku yayya nga lalaki” anna kanna kawagan danatun. (2 Sam. 19:31-33) Ngem siguradu nga naappresia ni David i kualidad ira anna i iyawa noka ira nga suhestion ni Barzilai. Makakkasta nakuan nga pribilehio para kani Barzilai i maddian anna mattrabahu ta palasio!

Megafu ta realistiko anna ammu ni Barzilai i limitasionna, nikagina nga 80 anios ngana yayya. Kunna paga: “Mapaddumà paga kari i mapia ta marake?” Anni i kayàna kagian? Siguradu nga aru nga kinasirib i nonnug ni Barzilai ta kapaddu na pattolena. Yayya nga makeyawa paga yayya tu  makasta nga tabarang, gittana kingngua na “lallakarakay” kani Patul Rehoboam. (1 Pat. 12:6, 7; Sal. 92:12-14; Prov. 16:31) I kinagi gafu ni Barzilai meyannung ta pamadduma ta mapia anna marake ay awayyana nga tumukoy ta pisikal ira nga efekto onu limitasionna gafu ta edadna. Inaminna nga afektadu ngana na pallakena i panattamna anna pagginnana. (Ecl. 12:4, 5) Yatutta, kinumbinsi ni Barzilai si David nga ivuluna ta Jerusalem i mas abbing nga si Chimham, nga awayyana nga anana nga lalaki.​—2 Sam. 19:35-40.

Pinammanakitan ni Barzilai i pribilehio megafu ta edadna, yayya nga nepasinganna nga realistiko yayya. I panguloli nga nakagi ta gafu ay nakua gapa megafu ta kunnatun nga rason. Yari tu ta maddaggun, gittana ta situasion ni Barzilai, ari laman tu i sirkumstansia anna abilidad ira na tadday i mekonsidera. Mawag gapa nga realistiko nga ikonsidera nu anni i kapianan para ta matalo ira nga massesserbi nga elder ta interu mundo.

Malippawa danaw nga mapakalinno nga lallakarakay nga elder nga mas makapapprepara ta mappange i organisasion ni Jehova nu masanay ngana sangawe i mabbing ira nga brother nga mangiyabaga ta nabayag ngana nga responsibilidad na mannakam. Ta mas aru nga situasion, danuri lakay ira nga brother i nassanay ta mas abbing ira, gittana pinassanay ni Barzilai ta anana nga lalaki anna ni apostol Pablo kani Timoteo. (1 Cor. 4:17; Fil. 2:20-22) Napakurug danaw nga mabbing nga brother nga ira ngana ta maddaggun ay “regalu” ta totolay, anna egga pakawayyada nga ‘masserbi kani Cristo tapenu mapasikan i iglesia nga baggi na.’​—Efe. 4:8-12; ikumpara i Numeros 11:16, 17, 29.

Aru turi ira ta totolay na Dios ta interu mundo nga nipasada i karuan nga responsibilidad ay napeggan tu tiansa ta bagu onu mas alawa nga oportunidad ira ta organisasion ni Jehova.

“Ipamavulun na bagu nga situasiokku nga uffunan danuri ari-Saksi nga atawa na sister ira ta kongregasiommi,” kunni Marcos nga 19 dagun nga traveling overseer.

“Tadday ta gakkagmi i panguffun ta inaktibo ira anna pangikondukta ta mas aru paga nga paggigiammu tu Biblia,” kunni Geraldo nga 28 dagun ta traveling work. Kunna nga 15 nga Bible study i ikonduktada na atawana anna egga i piga nga dati nga inaktibo i magata-atende ngana ta study ira.

Kunna gapa ni Allan nga nakagi ta gafu: “Mas aru ngana i tiempomi sangawe ta mas aru nga aspeto na ministerio. Kakayàmi i public witnessing, pallayyagayya ta lugar na negosio, anna ta karrubami, nga dua ngana i minay ta Kingdom Hall.”

Nu mawayyam paga i masserbi anna matalo ka nga brother nga nakalawa ta bagu nga asayment ta passerbi ta Dios, egga paga i espesial nga makuam tapenu makoffun. Puedem suportan i trabahu ni Jehova gukaban na pangibillem ta nabala-balor nga ekspiriensam ta mas abbing nga lallaki ta kongregasion. “Si Jehova ay sana-sanayan anna usu-usanna danuri dakal i potensialda, anna talentadu nga kabataan nga lallaki,” kunni Russell, nga nakagi ta gafu. “Mammakapia i wawwaragi ta matalikarag nga panuddu anna pas-shepherding-da!”​—Innan i kahon nga “ Uffunan i Kabataan nga Lallaki nga Gawatan i Buu nga Potensialda.”

Mappositibo ka nakuan maski nu nanguli i klase na serbisiom. Aru ngana nga totolay i noffunammu megafu ta napafutuan nga pinasserbim, anna awayyam itulu-tuloy yatun. Inayadaka anna siguradu nga tulu-tuloy i ayada nikaw.

Mas importante, nemarka ngana yatun nga kingnguam ta futu ni Jehova. “Arian na nga kattaman i kingngua nu, onu i pangaya nu sa, nga nipasingan nu ta panguffun nu ta kakavvulu nu ta angngurug anna paddaggunan nu nga ipasingan adde sangoye.” (Heb. 6:10) Ipasiguradu nittam natun nga nainspiran nga teksto nga nelagum ta promesana maski i ngamin nga pinasserbi tam ta  nappasa. Nabala-balor ka kani Jehova yayya nga arian naka vuluvuga makattaman megafu ta kingnguam ta nappasa anna ta tulu-tuloy nga appursigim nga pagayayyatan yayya!

Kunnasi nu ari tu sikaw mismu i nanguli i asaymentna gittana nakagi ta gafu? Yaw nga gannug ay egga lagapa direkta nga koneksionna nikaw. Kunnasi?

Nu ta maddaggun ay egga i kavulu mu nga matalo nga lakay nga brother nga nanguli ngana i asaymentna, mabbenefisio ka ta kinamanakamna anna ta aru nga dagun nga ekspiriensana. Makitabarang sa. Makkiddaw sa tu suhestion ira. Obserban nu kunnasina nga matalo nga iyaplika i ekspiriensana ta maddaggun nga asaymentna.

Maski nu lakay ka nga bagu ngana i asayment mu onu brother onu sister nga egga ta posision nga mabbenefisio, daddamman nga tagibaloran ni Jehova i kinamatalo danuri nabayag ngana nga massesserbi sa anna tulu-tuloyda nga kuan yatun.