1. Kunnasi masingan i aya ta nattangngan na totolay na Dios?

TADDAY nga espiritual nga familia i totolay na Dios—makilala ira megafu ta aya. (1 Juan 4:16, 21) Nu mittan, darakal nga sakrifisio i kuadda para ta wawwaragida, ngem mas maruddu nga mangipasingan ira tu aya ta aru nga baraddi nga gannug nga kuadda para nira. Nu masippo anna makonsiderasion i tratu tam ta tanakuan, paparigattam i Dios nga kunna meddu nga ánana.​—Efe. 5:1.

2. Kunnasi nakepasingan si Jesus tu aya nga gittana aya na Dios?

² Perfekto nga pinarigan ni Jesus i Yamana. “Umay kamu niakan, sikamu ngamin nga nabanna-bannag anna agga-kattu ta madammo,” kunni Jesus, “ta pagibannagat-takamu . . . ta masippo anna minappakalinno ngà.” (Mat. 11:28, 29) Nu parigattam i Cristo gukaban na ‘pangikavurung ta mariga,’ malawà tam i fabor ni Jehova anna magayayya tam gapa. (Sal. 41:1) Innattam nu kunnasi makepasingan tu konsiderasion ta familia, ta kongregasion, anna ta ministerio.

3. Para ta atawa nga lalaki, anni i meyuffun na pangalippawa tapenu makepasingan tu konsiderasion? (Innan i letratu ta gafu na artikulo.)

³ Irollu nakuan na gi-attawan nga lallaki i pabbalin tu makonsiderasion ta miembro na familiana. (Efe. 5:25; 6:4) Angngariganna, netabarang nira nga mawag tu makilallang ta atawada nga babay “segun ta pakannammu”​—yaw nga termino ay awayyana gapa nga metransylet tu “mangipasingan tu konsiderasion; alippawatan ira.” (1 Ped. 3:7; NW, ftn.) Makoffun i pangalippawa tapenu makepasingan tu konsiderasion. Angngariganna, i minangngalippawa nga lalaki ammuna nga i atawana, kuenta ka-uffun, ay tanakuan nisa ta aru nga gannug, ngem ari vuluvuga nga mas alinno i babay. (Gen. 2:18) Ikonsidera gafu na lalaki i mataga-tageno na atawana, nga ikakuana anna tratuanna nga egga dignidadna. Tadday nga babay ta Canada i nakkomento meyannung ta atawana: “Arianna vuluvuga binalewala i mataga-tageno ku ni tu kinagina, ‘Akkammu nakuan matageno yatun.’ Malalaki gapa yayya nga magginna. Nu mawag tu itunungna i pagimamma ku meyannung ta tadday nga gannug, masippona nga kuan yatun.”

4. Ta pakilallang na sigga-atawan nga lalaki ta tanakuan nga babbay, kunnasina mepasingan i konsiderasion ta atawana?

⁴ Ikonsidera gapa na lalaki i mataga-tageno na atawana nu makilallang yayya ta tanakuan nga babbay. Ari nakuan vuluvuga maki-alembong nira onu mangipasingan tu ari mepangngo nga interes nira; ni tu mangipasingan tu kunnatun nga paginteres nu usan i social media onu Internet. (Job 31:1) Wan, ta ngamin nga gannug, mattalupaddian yayya nga matalo ta atawana nga babay, ari laman nga megafu ta iddukanna yayya, nu ari, megafu ta iddukanna i Dios anna kalussona i marake.​—Bibbigan i Salmo 19:14; 97:10, ftn.

5. Kunnasi nga mepasingan na babay i konsiderasion ta atawana?

⁵ Nu parigan na atawa nga lalaki i meddu nga ehemplo ni Jesu-Cristo bilang uluna, mas mabi para ta atawa nga babay nga “ikakua” yayya. (Efe. 5:22-25, 33) Nu egga i respeto na babay ta atawana, mapaguyu yayya nga mabbalin tu makonsiderasion ta atawana, netallugaring nu okupadu i lalaki ta teokratiko ira nga responsibilidad onu egga i nononopanna nga problema. “Nu mittan, mapansin na atawà nga egga i problemà megafu ta aburidu ngà,” kunna tadday nga lalaki nga taga-Britain. “Tapus iyaplikana i Proverbio 20:5, maski nu kayà kagian naw nga maginnag yayya tu mepangngo nga tiempo nga ‘tagabban’ onu palawanan i appana-panono ku nu yatun nga gannug ay gannug nga awayyami dua paguvovugan.”

6. Kunnasi tam mepagaram ta abbarabbing nga mabbalin tu makonsiderasion ta tanakuan, anna kunnasi ira mabenefisiowan?

⁶ Nu egga i konsiderasion ta kataggi-tadday na yama anna na yena, makepasingan ira tu ehemplo para ta ánada. Siempre, i mappagana i primeru nga makarresponsibilidad nga tudduan i ánada nga mabbalin tu makonsiderasion. Angngariganna, tudduan nakuan na mappagana i ána nga ari ira makukkul ta Kingdom Hall. Nu egga ira okasion, awayya kagianan na mappagana i ánada nga pagolluadda i lakay onu bako nu makifila ira nga manga tu makan. Siempre, makoffun gapa ta mappagana i ngamin ta kongregasion. Komendattam nakuan i abbarabbing nu egga nakuada nga makasta, gitta na nu vinukatadda i puerta para nittam. Magayayya i abbing anna magigiammuna nga “mas dakal i pagayaya ta pangiyawa anne ta pangalawa.”​—King. 20:35.

7. Kunnasi nangipasingan si Jesus tu konsiderasion ta bangngag nga lalaki, anna anni ira nga leksion i magigiammu tam ta ehemplo ni Jesus?

⁷ Mittan, turi ta egga si Jesus ta rehion na Decapolis, niyangay sa na totolay i “tadday nga lalaki nga bangngag anna umal.” (Mar. 7:31-35) Imbes nga uruan yayya ni Jesus ta arubang na totolay, “niyarayyu[na] yuri i  lalaki ta totolay” tapus pinammapiana. Ngatta? Posible nga mappasirang ta totolay yatun nga lalaki megafu ta diferensiana. Awayyana nga natageno yatun ni Jesus yatutta inuruna yayya nga ira laman dua. Siempre, akkattam makapammilagro. Ngem mawayya tam​—anna mawag nakuan​—nga mangipasingattam tu konsiderasion para ta kawagan anna mataga-tageno na kapangngurug tam ira. Nitura ni apostol Pablo: “Ay nonopat-tam nu kunnasi na pakka-uffu-uffut-tam nga mangipasingan ta aya anna pangngua ta mapia.” (Heb. 10:24) Nalippawa ni Jesus nu anni i mataga-tageno na lalaki yatutta makonsiderasion i pinattratuna sa. Anni ngana kastana nga ehemplo para nittam!

8, 9. Anni ira makua tam tapenu makepasingan tu konsiderasion ta mannakam anna ta mataki ira? Mangiyawa tu angngarigan ira.

⁸ Mangipasingan tu konsiderasion ta lakay anna bako anna ta mataki ira. Magukug i approgreso na kongregasion, ari tu base ta karu na makuada, nu ari, megafu ta aya. (Juan 13:34, 35) Yatun nga aya i mamaguyu nittam nga massakrifisio tapenu uffunan i mannakam anna danuri baldadu nga maka-atende ta study ira anna makapallayyagayya. Kuattam yatun maski paga limitadu ngana laman i makuada. (Mat. 13:23) Si Michael, nga nakadepende ngana laman ta wheelchair, ay talaga appresianna i uffun nga iyawa na familia anna na wawwaragi ira ta grupona ta pallayyagayya. “Megafu ta uffudda ngamin niakan,” kunna, “maka-atende ngà ta study ira anna regular ngà nga makapamministerio. Guggustù i public witnessing.”

⁹ Aru nga familia na Bethel i egga i mannakam anna mataki nga miembrona. Ipasingan na meddu ira nga overseer ta Bethel i konsiderasion taw ira nga matalo nga aripan gukaban na pangiyunnug nira nga makiparte ta letter writing anna phone witnessing. “Appresiammi i pribilehio nga makapadday tu tura ira,” kunni Bill, nga 86 anios anna mattutura ta teritoria ira nga ararayyu. Si Nancy, nga ma-90 anios ngana ay nakkomento: “Kakku imammatan i pattura nga basta pangikarga ta sobre. Tadday yaw nga pamministerio. Mawag tu mammuan na totolay i kinakurug!” Kunni Ethel nga neyana turi 1921: “Parte ngana na pattolè i pagattam tu taki. Egga ira aggaw nga marigatang ngà maski nu massinnun laman.” Maski kunna, kakayàna i ma-telephone witnessing anna egga ira makasta nga passinolina. Si Barbara, nga 85 anios ay nakkagi: “Megafu ta makafi ngana i gawa-gawayyakku, marigatang ngà ngana nga regular nga mallawang. Ngem makibbidà i tanakuan megafu ta phone witnessing. Mabbalo, Jehova!” Awan paga tu tanga-ragunna, yatun nga grupo na meddu nga mannakam ay nangiyusa tu 1,228 nga oras ta ministerio, nakapadday tu 6,265 nga tura, nakakua tu maturu tu 2,000 nga phone call, anna nakepalima tu 6,315 nga publikasion! Siguradu nga napagayayya na kunnaw nga appursigi i futu ni Jehova!​—Prov. 27:11.

10. Kunnasi ittam makoffun ta wawwaragi nga mabbenefisio tu mapia ta study ira?

¹⁰ Mangipasingan tu konsiderasion ta study ira. Kayà tam nga mabbenefisio tu mapia i wawwaragi tam ta study ira. Nu makonsiderasion ittam, posible yatun. Kunnasi? I tadday ay i paddattal ta eksakto nga oras tapenu ariattam makaistorbo. Siempre, awayyana nga egga ira i ari-menanaman nga mesimmu yatutta akkattam makadattal ta oras nu mittan. Ngem nu neyugaliattam i duttal nu namegafu ngana i study, mawag tu nonopattam tu mapia nu kunnasi ittam mabbalin tu mas makonsiderasion. Daddamman gapa nga i nagimbita nittam ay si Jehova anna i Anana. (Mat. 18:20) Siguradu nga mepangngo ira ta monag nga respeto tam!

11. Ngatta mawag nakuan tu tuttulan danuri egga parteda ta study i direksion ta 1 Corinto 14:40?

¹¹ Nelavu ta pabbalin tu makonsiderasion ta wawwaragi i panuttul taw nga instruksion: “Ngem mawag tu ngamin i gannug ay kuan nu ta kunna mepangngo anna egga i unnug na.”  (1 Cor. 14:40) Mepasingan na brother ira i panuttulda tatun nga direksion nu fustu i oras na pangitaddagda ta parteda ta study. Nu kunnatun i kuadda, mepasingadda i konsiderasion, ari laman tu ta tumunug nga ispiker, nu ari pati ta kongregasion. Egga i wawwaragi nga mabbiahe paga tu arayyu palabbe ta baleda. Maddepende gapa i karuan ta publiko nga transportasion. I karuan nga wawwaragi ay ari gapa tu Saksi i atawada, anna egga i oras nga ekspektadda nga pallabbe na atawada.

12. Ngatta mepangngo i elder ira ta respeto anna aya tam? (Innan i kahon nga “ Mangipasingan tu Konsiderasion ta Mangirollu Ira.”)

¹² Mepangngo ta respeto anna aya i elder ira nga malallappo ta kongregasion anna matalikarag nga mangirollu ta ministerio. (Bibbigan i 1 Tesalonica 5:12, 13.) Siguradu nga appresiammu i appursigi ira na elder para ta pammakapianammu. Mawag gafu tu kuammu i adde na mawayyam nga mangipasingan tu napafutuan nga kooperasion anna suporta. Yaw ay megafu ta “ira i manangngal nikamu, tabbagad-da noka ta Dios nu kunnasi na nipamarulo da taw.”​—Heb. 13:7, 17.

13. Anni i magigiammu tam ta pinattratu ni Jesus ta totolay?

¹³ Meyannung kani Jesus, nitura ni Mateo: “Danuri i makafi nga kunna sikal nga napedda, tuange turi ta awan tu iddanama nga kunna makuro nga lampara, ay arian na noka ira nga mas parigatan.” (Mat. 12:20) Megafu ta aya ni Jesus ta totolay, nabbalin yayya tu minakki-empatia. Nalippawana i mataga-tageno danuri alle-napedda nga sikal onu na makuro nga lampara. Yari tu nabbalin yayya nga makonsiderasion, masippo, anna minappasensia. Maski abbarabbing ay mayà nga umaranni sa. (Mar. 10:14) Siempre, awan tu pakalippawa anna abilidad tam nga manuddu nga kagitta na kani Jesus! Ngem mawayya tam​—anna mawag​—nga mabbalin tu makonsiderasion ta totolay ta teritoria tam. Nelagum tatun nu kunnasi tam makibbida nira, nu kanni ittam nga makibbida, anna nu kunnasi kabayag yatun.

14. Ngatta magimmugug tam nakuan nu kunnasi i pakiyuvovug tam ta totolay?

¹⁴ Kunnasi ittam makiyuvovug ta totolay?  Minillion ta maddaggun i “mavuru-vurung ira anna awan tu awa-awayya da” megafu ta darogas anna awan tu alloda nga negosiante, pulitiko, anna relihioso nga totolay. (Mat. 9:36) Yayya nga aru nga totolay i marigatan nga mattalo ta tanakuan anna awan tu iddanamada. Kuruga importante gafu nga mabbalittam tu masippo anna minangngikabbi ta pappili tam tu uvovug ira nga kagiattam anna i tono na boses tam! Kakuruganna, aru i maginteres ta mensahe tam, ari laman tu megafu ta pakannammu tam ta Biblia onu ta malalaki nga pakanawag, nu ari, megafu ta sinsero nga interes tam nira anna i masippo nga konsiderasiottam.

15. Anni ira i praktikal nga makua tam tapenu makepasingan tu konsiderasion ta totolay nga layyagayyattam?

¹⁵ Aru ira i praktikal nga makua tam tapenu makepasingan tu konsiderasion ta totolay nga layyagayyattam. Angngariganna, efektibo ta panuddu i pakkiavu ira. Mawag tu masippo anna marespeto i akkiavu tam. Ta teritoria na tadday nga payunir, aru i ari kuruga mattattannug anna minappasirang, yatutta nagigiammuna nga ibita i makkiavu tu gannug ira nga awayyana tu makepasirang. Nelagum tatun i pakkiavu ira nga awayyana tu marigatan nga matabbag na tadday nga tolay onu baka mali i metabbagna. Angngariganna, nilillitanna i makkiavu tu gitta na, ‘Ammum kari i ngagan na Dios?’ onu, ‘Ammum kari nu anni i Pappatulan na Dios?’ Imbes lallagu, kunnaw i kagianna, “Nagigiammù ta Biblia nga egga i ngagan na Dios. Puedè kari ipasingan niko nu anni yatun nga ngagan?” Siempre, madduruma i kultura anna i totolay, yatutta ariattam mangipay tu regulasion. Ngem, mawag tu kanayun ittam nakuan nga makonsiderasion anna marespeto, nga nelagum tatun i pangammu tu mapia ta lokal nga totolay.

16, 17. Kunnasi tam makepasingan tu konsiderasion ta (a) oras na pamala-balay tam? (b) kapaddu na pakiyuvovug tam ta tadday nga tolay?

¹⁶ Anni i kakastan nga tiempo nga layyagayyan i totolay? Nu umay tam nga mamala-balay, ari ittam nembitan nga mabbisita. Kuruga importante gafu nga mallayyagayya ittam ta tiempo nu kanni mas kombiniente nira i magginna! (Mat. 7:12) Angngariganna, mas kayà kari na totolay ta teritorianu i makkatrug paga nu Sabadu onu Liggu? Nu kunnatun, awayyana nga pegafuanammu i ministeriom gukaban na pa-street witnessing, public witnessing, onu passinoli ta totolay nga ammum tu lukag ngana anna puede nga mabisita.

¹⁷ Kunnasi ittam kabayag? Okupadu i aru nga totolay, yayya nga mepangngo tu mabi tam laman nga mabbisita ta gafu. Mas makasta nu balinan insigida i pakiyuvovug imbes nga mabbayag. (1 Cor. 9:20-23) Nu masingan na totolay nga matindiattam i sirkumstansiada onu i okupadu nga iskediulda, mas agga-paran ira nga magginna nittam otru uli. Manawag nga i vunga na espiritu na Dios ay masingan nakuan ta ministerio tam. Nu kunnatun i ipasingattam, mabbalin ittam tu ‘katrabahu na Dios’​—anna puede nga iyusa ittam paga lagu ni Jehova tapenu uffunan i tanakuan nga magigiammu i kinakurug.​—1 Cor. 3:6, 7, 9, NW.

18. Nu makonsiderasion ittam ta tanakuan, anni ira nga bendision i meddanamattam nga alawatan?

¹⁸ Yayya nga kuattam i adde na mawayya tam nga mabbalin tu makonsiderasion ta tanakuan​—ta familia tam, ta kongregasion, anna ta ministerio. Nu kuattam yatun, makalawa ittam tu aru nga bendision sangawe anna ta mappange. Kunna Salmo 41:1, 2: “Mapalag i tolay nga mangikavurung ta mariga, ta uffunan na YAFU nu duttal sa i ziga. . . . pagayaya ta utun na davvun i iyawa na sa.”