1. Ngatta magayayya danuri massesserbi kani Jehova? (Innan i letratu ta gafu na artikulo.)

AWAN tu duda nga i Saksi ira ni Jehova ay magayayya nga totolay. Kada makkaravulu ira​—ta study, asembli, onu okasion ira, maggiristoria anna maggaralo ira. Ngatta fermi i ayayyada? Simple laman i rason​—gafu ta ammammuda si Jehova, “i magayayya nga Dios,” massesserbi ira sa anna paparigadda yayya. (1 Tim. 1:11, NW; Sal. 16:11) I Dios i Paggafuan na pagayayya, yatutta kayàna nga magayayya ittam, anna iddiddanna ittam tu aru nga rason tapenu magayayya.​—Deut. 12:7; Ecl. 3:12, 13.

2, 3. (a) Anni i pagayayya? (b) Ngatta mariga nga mabbalin tu magayayya?

² Siko ngay? Magayayya ka kari gapa? Puedem paga kari nga mas magayayya? I kebalinan na pagayayya ay “makasta nga kondision nga ari insigida mappasa. Nelagum taw i emosion mamegafu ta pakkakontentu adde ta monag anna fermi nga pagayayya ta pattolay, anna i gagangay nga pakkaraga nga mattulu-tuloy yatun.” Ipasingan na Biblia nga i kurug nga pagayayya ay tumukoy ta kondision na tadday nga bebbendisionan ni Jehova. Ngem sangawe, mariga ngana i mabbalin tu magayayya. Ngatta?

³ Mawawan i pagayayya tam nu egga ira i kakkonsimision nga  mesimmu, gitta na nu egga iddeddukattam nga matay onu madisfellow, nu meparubang ta pakigungay ta atawa onu diborsio, anna nu malsa ta trabahu. Awayyana nga makalsa ta makasta nga paddia-paddian i paddarama na familia anna i kawan na makasta nga komunikasion. Mari i pagayayya tam nu uyu-uyawan ittam na katrabahu onu kaklase tam, anna nu mefuku onu mapersigi ittam megafu ta Saksi ittam. Nelavu paga tatun i makkakafi nga gawa-gawayyan, grabe nga taki, onu depresion. Ngem kakayà ni Jesu-Cristo, “i marayaw [“magayayya,” NW] anna tattadday nga Mammaguray,” nga banna-bannayan anna pagayayyatan i totolay. (1 Tim. 6:15; Mat. 11:28-30) Ta Sermon ta Vukig ni Jesus, sinaggi-taddena i kualidad ira nga makoffun tapenu magayayya ittam maski nu egga ira problema ta mundo ni Satanas.

4, 5. Kunnasi tam mabbalin anna mattalupaddian nga magayayya?

⁴ Kuruga importante i ollu nga gannug nga tinukoy ni Jesus: “Magayayya danuri sigga-nono ta espiritual nga kawagadda, megafu ta kukuada i Pappatulan na langa-langi.” (Mat. 5:3, NW) Kunnasi tam mepasingan nga sigga-nono ittam tatun nga pakawagan? Makua tam yatun nu mangiponag ittam tu espiritual nga makan, tagibalorattam i espiritual ira nga kualidad, anna pagolluattam i paddayaw tam ta magayayya nga Dios. Nu kuattam danatun nga dakkua, dumakal i pagayayya tam. Mapasikattam i pangurug tam ta mappange nga ketuppal na promesa ira na Dios. Mapagaram tam paga na “magayayya nga iddanama” nga ikagi na Uvovug na Dios para ta kurug ira nga maddayaw sa.​—Tito 2:13, NW.

⁵ Tapenu mattalupaddian ittam nga magayayya, mawag tu mapeggan ittam tu maladda nga relasion kani Jehova. Nainspiran si apostol Pablo nga mangitura: “Magayaya kamu nga kanayun ta ketadday nu ta Yafu [nga Jehova]. Uliak-ku nga kagian: magayaya kamu!” (Fil. 4:4) Tapenu mapeggan tu kunnatun kabalor nga relasion, mawag tu manga ittam tu sirib na Dios. Kagian na Uvovug na Dios: “Magayayya i tolay nga nakaleg tu sirib anna i tolay nga egga pakalippawana. Yaw ay kayu na inango turi ira ta manammi tatun, anna danuri maggafù tu mapia tatun ay magalan tu magayayya.”​—Prov. 3:13, 18.

6. Sitaw nga nakadepende i kurug nga pagayayya tam?

⁶ Ngem tapenu mattalupaddian i pagayayya tam, ariattam laman nakuan bibbigan i Biblia, nu ari, iyaplika paga yatun. Nipatalatto ni Jesus i importansia na pangiyaplika tam ta nagigiammu tam: “Sangoye ta ammu nu ngana ngamin danaw, mapalag [magayayya, NW] kamu nu kuan nu ira.” (Juan 13:17; bibbigan i Santiago 1:25.) Yatun i kurug nga mamannu ta espiritual nga pakawagammu anna kurug nga mamagayayya nikaw. Ngem kunnasi nga magayayya ittam nu napakaru i makalsa ta pagayayya tam? Usitakkattam i tumunug nga kinagi ni Jesus ta Sermon ta Vukig.

7. Kunnasi nga mabbalin tu magayayya danuri maraddam?

⁷ “Magayayya danuri maraddam, ta mabanna-bannayan ira noka.” (Mat. 5:4, NW) Baka nonopan na karuan, ‘Posible kari nga magayayya maski danuri maraddam?’ Ari tu danuri ngamin nga marraddam i tuktukuyan ni Jesus taw. Maski danuri marake nga totolay ay maddaging ta kaddaraddam ira nga problema megafu ta “ziga-riga” taw ta pangurianan ira nga aggaw. (2 Tim. 3:1) Ngem agga-nonoda laman i baggida, ari nga si Jehova, yatutta awan tu makasta nga relasiodda sa, anna ariadda mabbalin tu magayayya. I tuktukuyan ni Jesus ay danuri  sigga-nono ta espiritual nga pakawagadda. Maraddam ira megafu ta aru nga totolay i ari maddayaw ta Dios onu mattolay segun ta urena. Ammuda nga minakkaliwa ira anna masingadda i terible ira nga mesissimmu ta mundo. Masingan ni Jehova nu sinni danuri sinsero i parraddamda; banna-bannayan anna bendisionanna ira gukaban na Biblia, anna pagayayyatanna ira ta pattoleda.​—Bibbigan i Ezekiel 5:11; 9:4.

8. Iyesplika nu kunnasi mamagayayya i pabbalin tu mapakalinno.

⁸ “Magayayya danuri mapakalinno, megafu ta irensiada noka i davvun.” (Mat. 5:5, NW) Kunnasi nga mamagayayya nittam i pabbalin tu mapakalinno? Kabalin nga nammuan na totolay i fustu nga pakannammu ta kinakurug, nanguli ira. Dati, awayyana nga maporay ira, minakkiddama, anna agresibo. Ngem binaruasiadda ngana i baggida tu “bagu nga kata-katolay” anna nabbalin ira tu “minaggallallo, minaggiddu, minappakalinno, mappakasippo, anna minappasensia.” (Col. 3:9-12) Megafu tatun, nabbalin ngana ira sangawe nga memammo, minaggiddu, anna mas magayayya. Ipromesa paga na Biblia nga danatun nga totolay noka ay “irensiad-da i davvun.”​—Sal. 37:8-10, 29.

9. (a) Anni i kayà kagian ni Jesus ta pakkagina nga danuri mapakalinno ay “irensiada i davvun”? (b) Ngatta magayayya danuri “mabisin anna mapangal ta kinatunung”?

⁹ Anni i kayà kagian ni Jesus ta pakkagina nga danuri mappakalinno ay “irensiada i davvun”? Irensia noka na nazelugan nga disipulos ni Jesus i davvun sonu mammaguray ira tatun bilang patul anna pari. (Nep. 20:6) I tanakuan gapa nga minillion nga ari tu nagalan ta langi ay irensiadda noka i davvun megafu ta mepamavulun nira nga mattolay taw ta davvun tu mannanayun. Mabbalin ira noka tu perfekto, memammo, anna magayayya. Ira gabbalaman danuri magayayya megafu ta “mabisin anna mapangal [ira] ta kinatunung.” (Mat. 5:6, NW) Mapannuan laman yatun nga kapangal anna kabisin ta espiritual sonu duttal i napabagu nga mundo. (2 Ped. 3:13) Tatun nga tiempo, mabbalin noka tu magayayya i matunung nga totolay anna ari ngana ira vuluvuga nga maddaddam megafu ta marake nga kukukuan na marake nga totolay.​—Sal. 37:17.

10. Anni i kayà kagian na mabbalin tu minaggallallo?

¹⁰ “Magayayya danuri minaggallallo, megafu ta mekallo noka ira.” (Mat. 5:7, NW) I Hebreo nga termino (verb) nga egga koneksionna ta allo ay kebalinanna “magganga, mappatu megafu ta pagiddeddu; . . . mabbalin tu minangngikabbi.” Maski ta Griego nga termino (verb), nelavu gapa i pakatageno tu simpatia ta tanakuan. Ngem, ari laman tu basta emosion i allo. Ta Biblia, nelagum tatun i aktibo nga pangipasingan ta pangikabbi gukaban na minaggallallo nga pagguyu.

11. Anni i magigiammu tam ta pabbalin tu minaggallallo ta ilustrasion na mapia nga Samaritano?

¹¹ Bibbigan i Lucas 10:30-37. Manawag nga masingan ta ilustrasion ni Jesus ta mapia nga Samaritano nu anni i kayà kagian na pangipasingan tu allo. Megafu ta napafutuan nga pangikabbi anna allo na Samaritano, egga positibo nga kingnguana tapenu palubbangan i mazziga-riga nga biktima. Kabalin nga niyistoria ni Jesus yatun nga ilustrasion, kunna: “Umay ka ngana anna kunnatun gapa i kuam-mu.” Yatutta, awayya tam iyavu ta baggi tam: ‘Kunnatun kari gapa i kuakku? Kukukuakku kari i gittana kingngua na minangngikallo nga Samaritano? Awayyà kari nga mas mangipasingan paga tu allo anna mangngua tu kinasippo turi ira ta mazziga-riga? Angngariganna, awayyà kari mangiyofer tu praktikal nga uffun ta bako anna lakay ngana nga kapangngurug, balu, anna danuri abbing nga ulila ta espiritual? Ipoppollù kari nga ‘pasikannan i nono na makafi i nono da’?’​—1 Tes. 5:14; Sant. 1:27.

12. Kunnasi nga mamagayayya i pabbalin tu minaggallallo?

 ¹² Ngem kunnasi nga mamagayayya i pabbalin tu minaggallallo? Nu ikallo tam i tanakuan, matageno tam i ayayya nga maggafu ta pangiyawa. Kunne na gapa, ammu tam nga mapagayayya tam si Jehova. (King. 20:35; bibbigan i Hebreo 13:16.) Meyannung ta tadday nga mangipasingan tu konsiderasion, kunni Patul David: “Iyegu anna paliaran na YAFU i inango na; pagayaya ta utun na davvun i iyawa na sa.” (Sal. 41:1, 2) Nu ikallo anna ikabbi tam i tanakuan, ikallo gapa ittam ni Jehova anna magayayya tam tu mannanayun.​—Sant. 2:13.

13, 14. Anni i koneksion na marenu nga futu ta pagayayya?

¹³ “Magayayya danuri marenu i affutu-futuadda,” kunni Jesus, “megafu ta masingadda noka i Dios.” (Mat. 5:8, NW) Tapenu kanayun nga marenu i futu tam, mawag tu marenu nakuan i kononaggattam anna marenu nakuan i appana-panono anna pakkaraga tam. Mawag tu pattalupaddianattam nga marenu i appana-panono tam nu kayà tam nga alawatan ni Jehova i paddayaw tam.​—Bibbigan i 2 Corinto 4:2; 1 Tim. 1:5.

¹⁴ Danuri marenu i futuda ay mapeggan tu marenu anna magayayya nga sinaddag ta arubang ni Jehova, nga nakkagi: “Mapalag [magayayya, NW] danuri i mamakarenu ta kapa da.” (Nep. 22:14) Anni i kayà kagian na “mamakarenu ta kapa”? ‘Marenu i kapa’ na nazelugan ira megafu ta marenu ira ta arubang ni Jehova anna meddan ira tu imortal nga inango anna mannanayun ira nga magayayya ta nelangitan nga posisiodda. Danuri magaru gapa nga magiddanama nga mattolay ta davvun ay makapagayayya ta matunung nga sinaddagda bilang kokkofun na Dios. Kagian na Biblia nga “nababbalan anna napafuraw i kapa da ta daga na Kordero.”​—Nep. 7:9, 13, 14.

15, 16. Kunnasi nga danuri marenu i futuda ay ‘masingadda i Dios’?

¹⁵ Kunnasi gafu nga danuri marenu i futuda ay ‘masingadda i Dios’ nu “awan tu tolay nga makasingan [ta Dios] kabalinna ay matolay”? (Ex. 33:20) I Griego nga termino nga netransleyt tu “masingan” ay kayàna kagian “masingan gukaban na pannono, pangalippawa, pangammu.” Danuri makasingan ta Dios ta “ginnonopan” ay danuri talaga makannammu sa, nga mangappresia ta kualidadna ira. (Efe. 1:18) Perfekto nga nipasingan ni Jesus i personalidad na Dios, yatutta makagina: “I nakasingan niakan ay nasingan na ngana gapa i Yama.”​—Juan 14:7-9.

¹⁶ Fuera paga ta pangammu ta kualidad ira na Dios, danuri kurug nga maddayaw ay ‘masingadda i Dios’ kada maekspiriensada i panguffunna ta pattoleda. (Job 42:5) Masingadda paga i Dios nu nakafokus i ‘ginnonopadda’ ta makapabbaw ira nga bendision nga iyawa na Dios turi ira ta mangikaguman nga mattalupaddian nga marenu anna sigga-matalo nga masserbi sa. Siempre, literal noka nga masingan danuri mapaginnolay  nga nazelugan si Jehova sonu malawàda i nelangitan nga bala-baloda.​—1 Juan 3:2.

17. Anni i papel na imammo ta pabbalin tu magayayya?

¹⁷ Tumunug nga kinagi ni Jesus: “Magayayya danuri mangirattal tu imammo.” (Mat. 5:9, NW) Egga rason nga magayayya danuri mangirollu nga mangirattal tu imammo. Nitura na disipulo nga si Santiago: “Katunung i vunga nga gataban na minakkaraga ira ta imammo nga mammula ta vullung na imammo.” (Sant. 3:18) Nu marigatakka nga makasundu i tadday ta kakongregasion onu kafamiliam, awayyam ipakimemallo i uffun na Dios tapenu makerattal ka tu imammo. Nu kunnatun i kuammu, iyawa ni Jehova nikaw i masanto nga espirituna, uffunan naka nga mangipasingan tu nacristianuan nga kualidad, anna mabbalikka tu mas magayayya. Nipatalatto ni Jesus i importansia na magollu nga makippakoma turi ta kinagina: “Yatun tu nu umay ka ta altar nga mangitavvung ta regalum ta Dios, anna keraddammam-mu tu egga i taki na nono na wagim nikaw, panawam-mu labbi i regalum ta altar anna umay ka sa nga makippakoma. Ta kabalin na, toliam-mu ngana nga itavvung ta Dios i regalum.”​—Mat. 5:23, 24.

18, 19. Ngatta magayayya i Cristiano ira maski nu mapeppersigi ira?

¹⁸ “Magayayya kamu nu ipasa-pasiranadda kamu, dara-darumadda kamu, anna para-paraketadda kamu, megafu laman niakan.” (Mat. 5:11, NW) Anni i kayà kagian ni Jesus? Nituloyna: “Magayaya anna mappalupagia kamu lagu, ta dakal i bala-balo nu noka ta langi. Kunnaw gapa i nikaziga-riga na profeta ira gari ta katolay da.” (Mat. 5:12) Kabalin nga napala-palu i apostoles anna nedog nira nga magimmang mallayyagayya, “ta panaw [da] ta arubang na Sanhedrin, kuruga magayaya ira.” Siempre, ariadda nagustuan i taki na malalatigo. Ngem magayayya ira “ta nekwenta ira tu mekunnay nga magattam ta kepasa-pasiran megafu kani Jesus.”​—King. 5:41.

¹⁹ Ta tiempo tam, magayayya nga magattam i totolay ni Jehova nu mazziga-riga ira megafu ta ngagan ni Jesus onu nu meparubang ira ta mariga ira nga kapurueba. (Bibbigan i Santiago 1:2-4.) Gitta na apostoles, ariattam gapa magayayya ta maski anni nga klase na paniga-riga. Ngem nu pattalupaddianattam i integridad tam ta Dios maski nu mapurueban, moffunan ittam ni Jehova nga matuyag nga magattam. Angngariganna, turi ta Agosto 1944, niyangay na autoridad ira na rehimen nga totalitario si Henryk Dornik anna i manungna ta tadday nga kampu konsentrasion. Ngem, inanugu na kumokkontra ira sa: “Kitezziga ira nga kumbinsian. Mas kayàda paga lagu nga mappakamartir.” Niyesplika ni Brother Dornik: “Ariakku gapa kayà i mappakamartir, ngem magayayya ngà megafu ta mazziga-riga ngà nga egga sikan na nono anna dignidad ku nga mammakatalo kani Jehova. . . . Naddukko ngà kani Jehova gafu ta fermi ira nga paddasal ku, anna pinakurugna nga yayya i siguradu nga Manguffun niakan.”

20. Ngatta magayayya ittam nga masserbi ta “magayayya nga Dios”?

²⁰ Nu mala tam i fabor na “magayayya nga Dios,” magayayya ittam lagapa maski nu madara-darum ittam megafu ta pangurug tam, pangontra na kafamilia, taki, onu pallakay onu pabbako. (1 Tim. 1:11, NW) Maekspiriensa tam gapa i pagayayya megafu ta kakkasta ira nga promesa na Dios tam, nga “ari vuluvuga nga malladdug.” (Tito 1:2) Kuruga kappagayayya noka i ketuppal na promesa ira ni Jehova, adde ta makattamattam ngana i ngamin nga problema tam ta maddaggun. Ta mappange nga Paraiso, mas paga anne ta imajinattam nga bendision i iyawa ni Jehova nittam. Anna maekspiriensa tam noka i nerumu-ruma nga pagayayya. Wan, magayayya ittam noka anna ‘mattolay ta imammo nga mannanayun.’​—Sal. 37:11.