1, 2. (a) Kunnasi nga neruma i pattratu ni Jehova ta totolay kumpara ta makapangngua nga totolay? (b) Anni i ikonsidera tam taw nga artikulo?

MARUDDU nga danuri makapangngua anna mainfluwensia nga totolay ay “pakiyafuan” na tanakuan anna maddomina nira. (Mat. 20:25; Ecl. 8:9) Talaga katulia yatun ni Jehova! Maski Makapangngua-sa-ngamin yayya, kuruga makonsiderasion maski ta imperfekto nga totolay. Masippo yayya anna ikavurunganna i mataga-tageno anna nu anni i pakawagattam. Megafu ta “ammu na tu gavu ittam laman,” arianna vuluvuga ikiddaw i kattam meyawa.​—Sal. 103:13, 14.

² Ta Biblia, magigiammu tam nga talaga makonsiderasion si Jehova ta totolena. Innattam i tallu tatun. Ollu, i masippo nga pinanguffun na Dios ta abbing nga si Samuel tapenu mangipakoli tu mensahe na pamanunnu ta Atannang nga Pari nga si Eli; mekadua, i pappasensia ni Jehova kani Moises turi ta natagenona nga arianna mepangngo nga mabbalin tu lider na Israel; anna i makonsiderasion nga pinangilawan na Dios ta Israelita ira ta Ehipto. Durante nga pannonopattam danaw nga nesimmu, innattam nu anni i itudduna nittam meyannung kani Jehova anna i leksion ira nga meyaplika tam.

3. Anni i kappabbaw nga nesimmu ta abbing nga si Samuel mittan nga gabi, anna anni nga pakkiavu i palattuagan naw? (Innan i letratu ta gafu na artikulo.)

³ Si Samuel ay “massesserbi kani Jehova” ta tabernakulo namegafu ta kabbinna. (1 Sam. 3:1) Mittan nga gabi tagga ta nagidda ngana si Samuel, egga i tadday nga kappabbaw nga nesimmu. * (Bibbigan i 1 Samuel 3:2-10.) Nakaginna yayya tu boses nga magagal ta ngaganna. Ta pagabbona tu boses yatun na lakay nga Atannang nga Pari nga si Eli, nakkarela si Samuel sa anna kunna: “Egga ngà taw, megafu ta inagalammà.” Ngem kinagi ni Eli nga ari tu yayya i nagagal. Turi ta namiddua paga uli nga nesimmu yatun, nalippawa ni Eli nga i Dios i magagagal kani Samuel. Yayya nga sinudduanna i abbing nu kunnasi tubbag, anna sinuppal yatun ni Samuel. Ngatta ari insigida nga kinagi ni Jehova kani Samuel ta gafu pagalaman nga yayya i magagagal? Ari kagian na Biblia, ngem segun ta nesimmu masingan i pangikavurung ni Jehova ta mataga-tageno ni Samuel. Kunnasi?

4, 5. (a) Anni i reaksion ni Samuel ta nimandu sa na Dios, anna anni i nesimmu ta kinommananna? (b) Anni i ituddu natun nga rekord nittam meyannung kani Jehova?

⁴ Bibbigan i 1 Samuel 3:11-18. Nibilin na Dob ni Jehova nga irespeto na abbarabbing danuri mannakam, mas ngana danuri panakallan. (Ex. 22:28; Lev. 19:32) Manono mu kari si Samuel nga ta pallukagna ta umma nga umay kani Eli anna magutu nga kagian sa i madammo nga mensahe na pangukum? Siempre ari! Manawag nga kagian na rekord nga “maganassing si Samuel nga kagian kani Eli i meyannung ta sirmata.” Ngem, siniguradu na Dios kani Eli nga Yayya i magagagal kani Samuel. Yayya nga si Eli ngana mismu i nangimandu kani Samuel nga arianna ilimag maski i tadday ta ngamin nga kinagi na Dios nisa. Siminuttul si Samuel anna “nipakolina sa i ngamin.”

⁵ Ari ngana nga kakkadda-kaddag i mensahe ni Samuel kani Eli. Parehu yatun ta mensahe na ari nangaganan nga “profeta na Dios” nga dati nga nakiyuvovug kani Eli mismu. (1 Sam. 2:27-36) Ipasingan nittam na rekord kada Samuel anni Eli nu kunnasi nga si Jehova ay makonsiderasion anna masirib.

6. Anni nga leksion ira i magigiammu tam ta pinanguffun na Dios ta abbing nga si Samuel?

⁶ Tadday ka kari nga abbing? Nu wan, ipasingan na rekord meyannung ta abbing nga si Samuel nga ammu ni Jehova i problema ira nga arubangammu anna i mataga-tageno mu. Awayyana nga mappasirakka anna marigatakka nga ilayyagayya i mensahe na Pappatulan ta manakam ira onu maperuma ta kokkofummu ira. Makasiguradu ka nga kayà ni Jehova nga uffunakka. Yatutta ivuvvu mu sa i mayan na futum gukaban na pakimallo. (Sal. 62:8) Pannonopan i ehemplo ira ta Biblia na abbing ira gitta ni Samuel. Makistoria ta kasi-Cristiano ira​—abbing onu manakam​—nga nalampasadda i kapurueba ira nga gitta na ara-arubangammu. Siguradu nga ikagida nikaw i tiempo ira turi ta inuffunan ira ni Jehova​—danuri kingnguana nga ariadda inekspekta.

7, 8. Kunnasi nangipasingan si Jehova tu extraordinario nga konsiderasion kani Moises?

⁷ Tagga ta 80 anios si Moises, niddan yayya ni Jehova tu madammo nga annungan. Ilawanna i Israel ta ke-aripadda ta Ehipto. (Ex. 3:10) Megafu ta 40 dagun ngana yayya nga nasserbi bilang pastor ta Midian, siguradu nga nakaddag yayya turi ta nalawàna yaw nga annungan. “Sinni ngà tapenu umay kani Faraon tapenu ilawan i Israelita ira ta Ehipto?” kunna. Nipasiguradu na Dios kani  Moises: “Pakurugakku nga egga ngà nikaw.” (Ex. 3:11, 12) Nipromesana paga: “Siguradu nga ginnan [na mannakam na Israel] i ngaral mu.” Maski paga kunna, simibbag si Moises: “Kunnasi nu . . . ariaddà ginnan?” (Ex. 3:18; 4:1) Gittana tutturian ni Moises i Dios! Ngem nappasensia lagapa si Jehova. Kakuruganna, niddanna paga si Moises tu pakapangngua nga mammilagro. Si Moises i pinaka-ollu nga tolay ta Biblia nga neddan tu kunnatun nga pakapangngua.​—Ex. 4:2-9, 21.

⁸ Pinurueban paga ni Moises nga ililli i baggina ta annungan ta pakkagi nga ari yayya malalaki nga maguvovug. Ngem nitabbag na Dios: “Egga ngà nikaw nu maguvovug ka, ay ituddù nikaw nu anni i kagiammu.” Nakumbinsi ngana kari gabbalaman si Moises? Manawag nga ari, megafu ta masippo nga nikiddona ta Dios nga mangidog yayya tu tanakuan. Tatun nga punto, mepangngo nga napporay ngana si Jehova. Ngem ari gapa yayya nattagga-tagga. Lallagu, nikonsiderana mangana i mataga-tageno ni Moises, ta panunnona kani Aaron nga pannakasimu ni Moises.​—Ex. 4:10-16.

9. Kunnasi nakoffun ta annungan ni Moises i pasensia anna konsiderasion ni Jehova?

⁹ Anni i ituddu nittam naw nga rekord meyannung kani Jehova? Megafu ta si Jehova i Makapangngua-sa-ngamin nga Dios, puede nakuan nga ananassinganna si Moises tapenu mafuersana nga mattuppal. Ngem, mapasensia anna masippo si Jehova, nga nipasiguraduna ta minappasirang anna minappakalinno nga aripanna nga egga yayya sa. Efektibo kari yaw nga makonsiderasion nga metodo? Wan! Nabbalin si Moises tu malalaki nga lider nga nakilallang tu masippo anna makonsiderasion ta tanakuan nga kunna pinakilallang sa ni Jehova.​—Num. 12:3.

10. Nu mabbalittam tu makonsiderasion gitta ni Jehova, kunnasi ittam mabenefisiowan?

¹⁰ Leksion ira nga meyaplika tam: Atawa ka kari nga lalaki, magana, onu elder ta kongregasion? Nu wan, egga i autoridad mu. Kuruga importante gafu nga parigammu si Jehova gukaban na pabbalin tu makonsiderasion, masippo, anna mapasensia nu makilallang turi ira ta tattangngawammu! (Col. 3:19-21; 1 Ped. 5:1-3) Nu mappursigi ka nga parigan  si Jehova anna i Mas Dakal nga Moises, si Jesu-Cristo, mabbalikka tu mabi nga marannian anna makarefresko ta tanakuan. (Mat. 11:28, 29) Mabbalikka gapa tu ehemplo nga makasta nga parigan.​—Heb. 13:7.

11, 12. Durante nga irollu ni Jehova i Israelita ira ta pallawan ta Ehipto, kunnasina nipatageno nira nga memammo anna ari ira nga mappeligro?

¹¹ Ta nanaw i Israelita ira ta Ehipto turi 1513 B.C.E., awayyana nga maturu ira tu tallu million. Sakupanna i tallu onu appa paga lagu nga henerasion​—abbarabbing, bako anna lakay, anna siguradu nga kasali danuri mataki onu baldadu. Tapenu matangngal i kunnatun nga kakaru na totolay nga mallawan ta Ehipto, mawag i minangngalippawa anna makonsiderasion nga Lider. Gukaban na pangiyusana kani Moises, nipasingan ni Jehova nga kunnatun yayya nga lider. Yatutta memammo i Israelita ira maski nu panawadda i Ehipto nga nakasanayadda.​—Sal. 78:52, 53.

¹² Kunnasi nipatageno ni Jehova ta ilina nga memammo anna ari ira mappeligro? Inorganisana i nasion na Israel nga “nahilera nga kunna makiggerra.” (Ex. 13:18) Nipasiguradu na kunnatun nga pakka-organisa ta Israelita ira nga kontroladu na Dios i ganna-gannug. Manawag nga masingan gapa i presensia ni Jehova megafu ta “nu aggaw, kunam i en-na nga pinangirollu nira, ay nu gabi, nawag na afi i pinangituttul na.” (Sal. 78:14) Gittana kakkagian ni Jehova: “Ariannu mavurung. Egga ngà nikamu tapenu igiya anna protektan kamu.” Talaga kawagan na Israelita i kunnatun nga pangipasiguradu megafu ta mappange nga mesimmu!

13, 14. (a) Anni i makonsiderasion nga kingngua ni Jehova ta Israelita ira ta Uzzin nga Bebay? (b) Kunnasi nipasingan ni Jehova i pakapangnguana ta Ehipsio ira?

¹³ Bibbigan i Exodo 14:19-22. Imajinammu nga egga ka tari kavulu i Israelita ira. Awan ngana tu pattammangngannu. Tapus nagguyu i Dios. Nagali i arigi na kunam ta likug na kampu, yatutta naharang i Ehipto ira anna nakallabban ira tu zibbo. Ngem mananawag i interu nga kampunu megafu ta milagro. Kabalinna, nasingammu si Moises nga nisonnana i limana ta bebay, tapus egga i masikan nga paddag nga naggafu ta zigattu nga navvuka tu alawa nga dalan tapenu makadde kamu ta abbag. Yatutta, sikaw, i familiam, anna i aya-ayamnu ay liminakag ta mamaga na davvun na bebay nga organisadu kavulu i karuan paga. Kattaka-taka i masingan na matam. Ari tu finuyo anna ari ka meduya ta pinakagukag na bebay; mamaga yatun anna ari ka meludu-ludag, yatutta mabi laman nga lumakag. Yayya nga maski danuri mataki onu baldadu ay ari marigatan nga makadde ta abbag.

¹⁴ Bibbigan i Exodo 14:23, 26-30. Durante nga mesimmu yaw, zinaddag ira na minappakatannang anna matagga i uluna nga si Faraon. Sinonna mangana ni Moises i limana ta bebay. Yatutta, nadabba anna navvanomvor i massiddammang nga nattagga nga pader na dana-danum. Sinavvunan na makkadafung nga dana-danum da Faraon tuange ta suddaluna ira. Natay ira ngamin!​—Ex. 15:8-10.

15. Anni i ituddu nikaw naw nga rekord meyannung kani Jehova?

¹⁵ Nasifutattam taw nga rekord nga si Jehova ay Dios na unnug​—kualidad nga makoffun nittam tapenu matageno i imammo anna seguridad. (1 Cor. 14:33) Ipasingan gapa ni Jehova nga meddu nga pastor yayya nga tattangngawanna i totolena ta praktikal ira nga gannug. Meddu nga gaggappanna ira anna protektan ta kalabadda ira. Kuruga makapabannay nittam danaw nga kinakurug durante nga arubangattam i pangultimo na maddaggun nga sistema na ganna-gannug!​—Prov. 1:33.

16. Kunnasi ittam mabenefisiowan ta parrepaso ta pinangipaliag ni Jehova ta Israelita ira?

 ¹⁶ Tattangngallan gapa ni Jehova i totolena ta maddaggun bilang grupo​—ta espiritual anna ta pisikal. Tulu-tuloy nga kuanna yatun adde sonu duttal i umara-aranni ngana nga dakal nga ziga. (Nep. 7:9, 10) Yari tu, maski abbing onu manakam, makasta i gawa-gawayyanna onu mataki, ari vuluvuga nga maganassing i totolay na Dios sonu dakal nga ziga. * Kakuruganna, katulia natun i kuadda! Agga-nonoda i kinagi ni Jesu-Cristo: “Tumaddag anna tumangag kamu ta aranni ngana i kapaliag nu.” (Luc. 21:28) Kanayun ira nga sigga-komfiansa tatun maski sonu meparubang ira ta pangatake na Gog​—koalision na nasa-nasion nga kuruga mas makapangngua anne ta kani Faraon gari. (Eze. 38:2, 14-16) Ngatta makapakkomfiansa i totolay na Dios? Kumbinsidu ira nga ari manguli si Jehova. Pakuruganna mangana nga minangngikavurung anna makonsiderasion yayya nga Minangngipaliag.​—Isa. 26:3, 20.

17. (a) Kunnasi ittam mabenefisiowan ta rekord ira na Biblia meyannung ta pangikavurung ni Jehova ta totolena? (b) Anni i ikonsidera tam ta tumunug nga artikulo?

¹⁷ Danaw nga angngarigan taw nga artikulo ay karuan laman ta aru nga mangipasingan ta masippo anna makonsiderasion nga panangngal, pangidirekta, anna pangipaliag ni Jehova ta totolena. Durante nga monag nga pannonopammu danatun nga rekord, usitakkan i detalye ira nga mangipasingan ta aspeto na kualidad ira ni Jehova. Nu kuammu yatun, mas mepatalatto danatun nga makkarasta nga kualidad ta nono anna futum anna mas massikan i aya anna pangurug mu ta Dios. Magigiammu tam ta tumunug nga artikulo nu kunnasi tam parigan si Jehova ta pangipasingan tu konsiderasion ta tanakuan. Maffokus ittam ta familia, ta Cristiano nga kongregasion, anna ta tana na ministerio.