Dakal Kari i Pangikakuam ta Libru ni Jehova?
“Turi ta pakaginna nu ta uvovug na Dios . . . inalawa anna kinurug nu tu yaw ay uvovug na Dios.”—1 TES. 2:13.
KANSION: 114, 113
1-3. Anni nakuan i posible nga problema da Euodia anna Sintike, anna kunnasi malillitan i kunnatun ira nga problema? (Innan i letratu ta gafu na artikulo.)
KURUGA tagibaloran na aripan ira ni Jehova i masanto nga libruna, i Biblia. Megafu ta kina-imperfekto tam, makalawa ittam ngamin tu nebase-Biblia nga tabarang. Anni i reaksiottam? Ikonsidera da Euodia anna Sintike nga ollu-siglo Cristiano. Egga i limittuag tu serioso nga problema ta dua nga nazelugan nga babbay. Anni nga problema? Ari kinagi na Biblia. Tapenu meyilustra, ikonsidera tam i tumunug ira nga posibilidad.
2 Angngariganna, inimbita ni Euodia i wawwaragi ta balena tapenu kuman anna maggiristoria. Ari nembitan si Sintike, ngem naginnana nga nagenjoy i wawwaragi ta pagimbita ni Euodia. Awayya nakuan kagian ni Sintike: ‘Ariakku mangurug nga ariannà inimbita ni Euodia! Abbo ku mab-best friend kami.’ Mamegafu ngana nga madduda anna massuspetsa si Sintike kani Euodia megafu ta ekspektanna nga kavulu nakuan gapa yaya. Yatutta inimbitana lagapa i parehu nga wawwaragi tapenu maggarammammung ira—fuera kani Euodia! Makadaral
nakuan tu imammo na interu kongregasion i problema da Euodia anna Sintike. Ari nerekord ta Biblia i resultana yatun, ngem siguradu nga positibo i reaksion na dua nga sister ta meddu nga tabarang ni Pablo.—Fil. 4:2, 3.3 Egga gapa i kunnatun ira nga problema na wawwaragi ta kongregasion ira ni Jehova. Ngem masolba yatun onu malillitan nu iyaplika tam i tabarang nga malegattam ta Uvovug na Dios, i Biblia. Nu dakal i pangikakua tam ta mismu nga Libru ni Jehova, mattolay ittam mekunnay ta instruksionna ira.—Sal. 27:11.
I LIBRU NA DIOS ANNA EMOSION NA TOTOLAY
4, 5. Anni i tabarang na Uvovug na Dios nittam meyannung ta pangontrol tu emosion?
4 Mariga makontrol i emosiottam nu ta pagabbo tam ay nelloku onu natratu ittam tu ari makasta. Kaddaraddam nu ari patas i pattratuda nittam megafu ta naggafuattam, kulor na tabbi, onu ta itsura tam. Mas ngana nga mataki yatun nu naggafu ta kapangngurug tam! Moffunan kari ittam na Uvovug na Dios nu meparubang ittam ta kina-imperfekto na totolay?
5 Naobserba ni Jehova i pakilallang ira na totolay namegafu gari. Ammuna i mataga-tageno anna i kukukuattam. Nelagum ngana ira i taki na nono, nga awayyana nga makekagi anna makangngua ittam tu pabbabawyattam. Makasta nu iyaplika tam i tabarang na Biblia nga kontrolan i emosiottam anna ibita i insigida nga passinti! (Bibbigan i Proverbio 16:32; Eclesiastes 7:9.) Yatutta ari ittam nakuan nga minassinti, nu ari, mabbalin tu minappakoma. Serioso para kani Jehova anna kani Jesus i pamakoma. (Mat. 6:14, 15) Kawagammu kari nga mabbalin tu mas minappakoma onu mas nga gaggaddan i emosiommu?
6. Ngatta magimmugug ittam kontra ta pangipappan tu taki na nono?
6 Maruddu nga mangipappan tu taki na nono danuri ariadda gaggaddan i emosiodda. Megafu tatun, lillitan yaya na totolay ta pallevuna. Marake nga influwensia yaya ta kongregasion. Awayyana nga itataguna i paddaddamna onu maski i lussona, ngem megafu ta negatibo ira nga appana-panono ta futuna, “mapalattuag i kinarakena ta kongregasion.” (Prov. 26:24-26) Tabarangngan nakuan na elder ira i kunnatun nga indibidual nga awan tu lugar na paddaddam, lussaw, anna pangipappan tu taki na nono ta organisasion na Dios. Manawag i tabarang na Libru ni Jehova meyannung tatun. (Lev. 19:17, 18; Roma 3:11-18) Umanugu ka kari tatun?
DADDAMMAN NU KUNNASI ITTAM MEYOROLLU
7, 8. (a) Kunnasi iyorollu ni Jehova i neravvunan nga parte na organisasionna? (b) Anni i karuan ta direksion nga mabibbig ta Uvovug na Dios, anna ngatta mawag nga tuppalattam yatun?
7 Iyorollu anna pakanan ni Jehova danuri neravvunan nga parte na organisasionna gukaban na “mekatalo anna nannono nga doroban” ta pangiyorollu ni Cristo, i ulu na kongregasion. (Mat. 24:45-47; Efe. 5:23) Kagitta na ollu-siglo nga manangngal nga baggi, kuruga dakal i pangikakuana yaw ira nga aripan na Dios ta pangalawada ta nainspiran nga uvovug onu mensahena. (Bibbigan i 1 Tesalonica 2:13.) Anni i karuan ta direksion, onu instruksion nga egga ta Biblia nga pakabenefisiowattam?
8 Ituddu na Biblia i regular nga pagatende tam ta study ira. (Heb. 10:24, 25) Ikiddona nga pakataddayattam i doktrina. (1 Cor. 1:10) Kagian na Uvovug na Dios nga pagolluattam i Pappatulan ta pattoletam. (Mat. 6:33) Ipagaram paga na Katurakan i responsibilidad anna pribilehio tam nga mallayyagayya ta babalay, ta informal, anna ta publiko ira nga lugar. (Mat. 28:19, 20; King. 5:42; 17:17; 20:20) Ibilin na Libru na Dios nga pattalupaddianan na elder ira nga marenu i kongregasionna. (1 Cor. 5:1-5, 13; 1 Tim. 5:19-21) Nidob paga ni Jehova nga marenu nakuan ta pisikal anna espiritual danuri egga ta organisasionna.—2 Cor. 7:1.
9. Sinni laman i usu-usan na Dios tapenu malippawa i Uvovugna?
9 Para ta karuan, ariadda ngana kawagan i uffun na tanakuan tapenu malippawa i Biblia. Ngem, sinunno ni Jesus i ‘mekatalo nga doroban’ tapenu ira laman i usanna nga mangitaneg tu espiritual nga makan. Namegafu ta 1919, usu-usan ngana na patul nga si Jesus yatun nga doroban tapenu uffunan i disipulosna nga matindian i Libru na Dios anna tuppalan i direksionna ira. Gukaban na panuttul ta instruksion ira nga mabibbig ta Biblia, ipagaram tam i kinarenu, imammo, anna pattaradday ta kongregasion. Iyavu tam ta baggi tam, ‘Mammakatalo ngà kari ta usu-usan ni Jesus ta maddaggun?’
ALISTU MAGGUYU-GUYU I KARUAHE NI JEHOVA!
10. Anni i nasingan ni Ezekiel nga sirmata meyannung ta nelangitan nga parte na organisasion ni Jehova?
10 Ipakannammu nittam na Uvovug na Dios i nelangitan nga parte na organisasionna. Angngariganna, nakasingan tu sirmata si profeta Ezekiel meyannung ta nelangitan nga karuahe nga mangirepresenta ta nelangitan nga parte na organisasion na Dios. (Eze. 1:4-28) Agga-takay ta karuahe si Jehova, anna magala-ali yatun nu sitaw nga maniobran na espirituna. Megafu tatun, influwensian na nelangitan nga parte na organisasionna i neravvunan nga parte. Siguradu nga magguyu-guyu ngana yatun nga karuahe! Nonopan i aru nga panguli ta organisasion ta nappasa nga dekada—anna daddamman nga si Jehova i egga ta likugna yatun ira nga papprogreso. Durante nga aranni ngana nga daralan ni Jesus anna na masanto ira nga anghel yaw nga marake nga sistema na mundo, alistu nga magguyu-guyu i karuahe ni Jehova ta pangidefensa ta soberania anna pamakasanto ta ngaganna!
Kuruga mappabalo ittam ta malallappo ira nga boluntario ta aru nga proyekto tam ta konstruksion! (Innan i parapo 11)
11, 12. Anni ira i metuttuppal na organisasion na Dios?
11 Daddamman nu anni ngana i metuttuppal na organisasion na Dios taw nga pangurianan ira nga aggaw. Konstruksion. Ginatu nga boluntario ira i mattattrabahu ta pappataddag ta bagu nga hedkuarter na Saksi ira ni Jehova ta Warwick, New York, U.S.A. Ta panangngal na Worldwide Design/Construction Department, rinivu nga boluntario i malallappo nga mamataddag tu bagu ira nga Kingdom Hall anna mattrabahu ta panga ira nga pasilidad. Kuruga dakal i pappabalo tam ta appursigi na sigga-paran ira nga boluntario ta kunnatun ira nga proyekto! Daddamman nga bendisionan ni Jehova danuri mangilammuyag
ta Pappatulan ta interu mundo nga sigga-pakalinno anna matalo nga manguffun ta finansial ta kunnatun ira nga proyekto.—Luc. 21:1-4.12 Edukasion. Ikonsidera i nadduruma nga eskuela nga mamagaram ta edukasion nga naggafu ta Dios. (Isa. 2:2, 3) Kagitta na Pioneer Service School, School for Kingdom Evangelizers, Gilead School, Bethel Entrants’ School, School for Circuit Overseers and Their Wives, School for Congregation Elders, Kingdom Ministry School, anna School for Branch Committee Members and Their Wives. Talaga kakayà ni Jehova nga tudduan i totolena! Mepagaram gapa i paggigiammu tu Biblia ta website tam nga jw.org, nga egga ira i literatura nga malà ta ginatu nga lengguahe. Egga i espesial nga seksion na website para ta ána anna ta familia anna seksion para ta news item ira. Usu-usammu kari i jw.org ta ministeriom anna ta family worship?
MAMMAKATALO KANI JEHOVA ANNA SUPORTAN I ORGANISASIONNA
13. Anni i responsibilidad tam bilang matalo nga maddayarayaw kani Jehova?
13 Talaga dakal nga pribilehio i mebilang ta organisasion ni Jehova! Megafu ta ammu tam i ikikkiddaw anna estandarte ira na Dios, responsibilidad tam nga mangngua tu mapia anna idefensa i soberaniana. Durante nga mattulu-tuloy i kinamarakena yaw nga mundo, parigattam nakuan si Jehova nga “mangikalussaw ta marakay.” (Sal. 97:10) Pammanakitan danuri ari makadios nga makkakkagi: “Mapia i marake anna marake i mapia.” (Isa. 5:20) Megafu ta kayà tam nga mapagayaya i Dios, mappursigi ittam nga kanayun nga marenu ta pisikal, moral, anna espiritual. (1 Cor. 6:9-11) Ayatattam si Jehova anna iyawa tam i komfiansa tam sa; mepasingattam i kinamatalo tam sa gukaban na pattolay mekunnay ta estandartena ira nga netura ta nabalor nga Libruna. Kuattam ngamin i mawayya tam tapenu tuppalan yatun ira nga estandarte ta balay, kongregasion, trabahu, eskuela anna ta maski sitaw. (Prov. 15:3) Ikonsidera paga ira i karuan nga makua tapenu mapakurug tam i kinamatalo ta Dios.
14. Kunnasi mepasingan na magana ira nga pattalakkadda i Dios?
14 Pamadakal ta ána. Mepasingan na Cristiano ira nga magana i pattaloda kani Jehova nu usadda i Uvovugna ta passanay ta ánada. Ari nga afektan na lokal ira nga kostumbre na pamadakal tu ána i makadios ira nga magana. Ari mepangngo ta balay na Cristiano i makamundo nga espiritu. (Efe. 2:2) Ibita nakuan nga nonopan na Saksi nga yama nga, ‘Ta lugarmi babbay i manuddu ta ána.’ Klaro i kagian na Biblia meyannung tatun: “Sikamu nga yama, . . . padakallannu [i ánanu] ta disiplina anna panabarang [instruksion; giya] ni Jehova.” (Efe. 6:4, NW) Kayà na yama anna yena ira nga maganassing ta Dios nga dumakal i ánada tu kagitta ni Samuel megafu ta egga si Jehova sa durante nga magadulto yaya.—1 Sam. 3:19.
15. Kunnasi tam mepasingan i kinamatalo kani Jehova nu mangngua ittam tu darakal nga desision?
15 Paddesision. Nu dakal nga desision i kuattam ta pattolay, mepasingattam nga pattalakkattam i Dios nu mappoffun ittam ta Uvovug anna ta organisasionna. Tapenu meyislustra i importansiana yatun, ikonsidera tam i sensitibo nga topiko nga makafekto ta aru nga magana. Nabbalin tu kostumbre na karuan nga nagabroad nga ilabbe i ánada tapenu tangngawan ira na parientesda. Nu kunnatun, tulu-tuloy ira nga makapattrabahu ta abroad. Wan, personal nga desision yaw, ngem nonopattam nga tattabbagattam ta Dios i kuattam ira nga desision. (Bibbigan i Roma 14:12.) Kinasirib kari nu mangngua ittam tu darakal nga desision meyannung ta familia onu ta trabahu tam ngem ariattam labbi makkonsulta ta Biblia? Siempre ari! Kawagattam i uffun na nelangitan nga Yama tam megafu ta ariattam mawayya nga itunung i dala-dalattam.—Jer. 10:23.
16. Turi nagana i tadday nga yena, anni i pappilian nga neparubang sa, anna anni i nakoffun tapenu makapaddesision yaya tu fustu?
16 Egga i abbing nga neyana na yenana ta abroad, tapus nononopan na yena nga ilabbe yaya ta diadda tapenu tangngawan na kako anna kakena. Kabalin nga nagana na babay, namegafu ngana gapa yaya nga makipaggigiammu ta Saksi ni Jehova. Napprogreso yaya anna nalippawana nga naggafu ta Dios i responsibilidad nga pamadakal ta anana. (Sal. 127:3; Prov. 22:6) Nivuvvuna i futuna kani Jehova gitta na kagian na Katurakan nittam. (Sal. 62:7, 8) Nikagina i ngamin nga mataga-tagenona ta manuddu sa ta Biblia anna ta kongregasion. Maski pili-pilitan yaya na parientes anna kofunna ira nga ilabbe i anana ta kako anna kakena, napaddesisionanna nga ari tu mepangngo nga kuan yatun. Napagaram i atawa nga lalaki yatutta namegafu ngana yaya mab-bible study anna magantende ta study ira kavulu i mattenana megafu ta napakurugna nga nakoffun i kongregasion nira. Makagim kari nga sinabbag ni Jehova i napafutuan nga pakimallo na yena? Siguradu nga kunnatun i natagenona.
17. Anni nga suhestion i nalawà tam meyannung ta estudiante tam ira ta Biblia?
17 Panuttul ta direksion. Makapammakatalo ittam ta Dios nu tuttulattam i direksion nga malawà tam ta organisasionna. Angngariganna, innattam i suhestion ira nga neyawa nittam meyannung ta estudiante tam ira ta Biblia. Nerekomenda nga nu kabalin nga magigiammu i libru nga Anni Talaga i Ituttuddu na Biblia? mangà ittam tu piga minuto ta kada study tapenu medirekta i atensiodda ta organisasion. Makua tam yatun gukaban na pangusa ta video nga Anni i Kukukuadda ta Kingdom Hall? anna i brosiur nga Sinni i Magaggangngua ta Uray ni Jehova ta Maddaggun? Nu mabalittam ituddu i libru nga Ituttuddu na Biblia ta progresibo nga study, nerekomenda nga gigiammuan i libru nga “Mattalupaddian ta Ayâ na Dios,” maski nu bawtisado ngana yaya. Nibilin yaw na organisasion tapenu “pasikannan i angngurug” na babbaragu nga disipulos. (Col. 2:7) Tuttuttulammu kari yatun ira nga suhestion nga naggafu ta organisasion ni Jehova?
18, 19. Anni ira i rason nu ngatta mappabalo ittam kani Jehova?
18 Napakaru i rason nu ngatta mappabalo ittam kani Jehova! Gatu tam sa i inango tam, ta nu awan yaya, awan tu makua tam anna awan ittam. (King. 17:27, 28) Niddanna ittam tu kuruga nabalor nga regalu—i mismu nga libruna, i Biblia. Mappabalo ittam nga alawatan yatun bilang mensahe na Dios, nu kunnasi gapa i pinangalawà tatun na Cristiano ira nga taga-Tesalonica.—1 Tes. 2:13.
19 Megafu ta kegga na netura nga Uvovug na Dios, mas naddukko ittam kani Jehova anna naddukko gapa yaya nittam. (Sant. 4:8) Niddan ittam na nelangitan nga Yama tam tu makapabbaw nga pribilehio nga melavu ta organisasionna. Kuruga appresiattam yatun ira nga bendision! Makasta i pinangikansion na salmista: “Mabbala-balo kamu ta Yafu, ta mapia yaya; i aya na ay mannanayun adde noka.” (Sal. 136:1) Mami-26 nga mabibbig ta Salmo 136, nga “i aya na ay mannanayun adde noka.” Nu pakurugattam nga matalo tam kani Jehova anna ta organisasionna, matageno tam nga kurug yatun ira nga makapagaram nga uvovug megafu ta mattolay ittam tu mannanayun!