‘Makkapasa-pasikakkamu Kagaggaw’
“Maguvovug kamu nu egga i awayya nu nga makagi tu pamasikan ta nono na totolay.”—KING. 13:15.
KANSION: 121, 45
1, 2. Ngatta importante i pamasikan ta nono?
“SAGGI-MITTAN laman nga komendannà na maganà ku ira, mas aru i papporayda. Mataki ira i kakkagiadda,” kunna 18-anios nga si Cristina. [1] “Kagiadda nga immature ngà, nga makafi i utò ku, anna mataba ngà. Makatatangi ngà anna ariakku kayà makibbida nira. Gittana awan tu kuentà.” Kuruga kaddaraddam i pattolay nu awan tu pamagaram!
2 Ngem, makasta talaga i resulta na pamasikan ta nono. “Aru nga dagun nga nilabanakku i pakatageno tu kawan tu kuenta,” kunni Rubén. “Ngem mittan, natageno na kavulu ku nga elder ta pallayyagayya nga marake i aggò. Nagginna yaya durante nga istoriakku i mataga-tageno ku. Tapus, niperaddamna niakan i makasta ira nga kukukuakku. Kinagina gapa i uvovug ira ni Jesus—nga mas nabalor ittam anne ta manabalay ira. Kanayukku meraddamman yatun nga teksto, anna matukkal lagapa i futù. Dakal i efektona yatun nga kinagi na elder.”—Mat. 10:31.
3. (a) Anni i kinagi ni apostol Pablo meyannung ta pamasikan ta nono? (b) Anni i ikonsidera tam taw nga artikulo?
3 Ipasingan na Biblia i pakawagan ta regular nga pamasikan ta nono. Nitura ni apostol Pablo ta Cristiano ira nga Hebreo: “Wawwagi ira ta angngurug, magimmugug kamu tapenu awan nikamu tu mabbalin nga marakay anna mawawan sa i angngurug, ay tu Heb. 3:12, 13) Malippawamu i importansia na tabarang nga pasikannan i nono na kataggi-tadday nu meraddammammu i tiempo turi ta napasikan i nonomu megafu ta kinagida nikaw. Yatutta ikonsidera tam yaw ira nga pakkiavu: Ngatta importante i pamasikan ta nono? Anni i magigiammu tam ta pamasikan ta nono ni Jehova, ni Jesus, anna ni Pablo ta tanakuan? Kunnasi mabbalin tu efektibo i pamasikattam ta nono?
likuran na i sigga-matolay nga Dios. Makkapasa-pasikak-kamu lagu tu nono kagaggaw . . . , tapenu ari mataggatan i futu na sinni laman nikamu megafu ta pangilogo na katagarulian.” (KAWAGAN NA TOTOLAY I PAMASIKAN TA NONO
4. Sinni i magawag tu pamasikan ta nono? Ngatta kurang yatun ta maddaggun?
4 Kawagattam ngamin i pamasikan ta nono, netallugaring nu magadulto tam ngana. “Kawagan na abbarabbing . . . i pamasikan ta nono gittana pakawagan na maseta ira ta danum,” kinagi na edukador nga si Timothy Evans. “Megafu ta pamasikan ta nono, matageno na abbarabbing nga nabalor anna maappresia ira.” Ngem mattolay tam ngana ta delikadu ira nga tiempo. Makasarili ira i totolay, manazza-tazzi, anna kurang i pamasikan ta nono. (2 Tim. 3:1-5) Egga ira i magana nga ari makkomenda ta ánada megafu ta ari ira nga kinomendan na maganada. Aru ta empleyadu ira i ari makomendan, yari tu marreklamo ira nga tallutaggi laman i mamasikan ta nonoda ta trabahuda.
5. Anni i nelagum ta pamasikan ta nono?
5 Nelagum ta pamasikan ta nono i pakkomenda ta tadday ta mapia nga kingnguana. Awayya tam gapa ‘pasikannan i nono na makafi i nono da’ gukaban na pangipasiguradu ta makasta ira nga kualidadda. (1 Tes. 5:14) I kebalinan na Griego nga termino nga netransleyt tu “pamasikan ta nono” ay “agalan ta biko.” Durante nga massesserbi ittam kavulu i wawwaragi, siguradu nga egga i tiansa tam nga makkagi tu pamagaram. (Bibbigan i Eclesiastes 4:9, 10.) Magala-aleg ittam kari tu mepangngo ira nga situasion tapenu kagian nga iddukan anna appresiattam i tanakuan? Nigemu tabbagan yatun nga pakkiavu, nonopan yaw nga akkagianan: “I uvovug nga nekagi ta mepangngo nga tiempo—anni mabba kastana yatun!”—Prov. 15:23.
6. Ngatta kayà na Diablo nga makkafi i nono tam? Mangiyawa tu angngarigan.
6 Kakayà ni Satanas nga madismaya ittam megafu ta ammuna nga awayya tam makkafi ta espiritual anna ta tanakuan paga nga gannug. “Nu nakkafi i nonomu ta aggaw na ziga,” kunna Proverbio 24:10, “bumaddi noka i sikammu.” Parehu nga inusa ni Satanas i kalamidad anna akusasion tapenu mapakafi i nono na matunung nga si Job, ngem ari nesimmu i marake nga planona. (Job 2:3; 22:3; 27:5) Malabanattam i annangngua ira na Diablo gukaban na pamasikan ta kafamilia anna kongregasiottam. Makoffun yatun tapenu mabbalin tu lugar na pagayaya anna imammo i balay anna Kingdom Hall tam.
EHEMPLO IRA TA BIBLIA NA PAMASIKAN TA NONO
7, 8. (a) Anni ira nga angngarigan ta Biblia i mangipasingan nga importante para kani Jehova i pamasikan? (b) Anni i kuan na magana ira tapenu matuttul i ehemplo ni Jehova? (Innan i letratu ta gafu na artikulo.)
7 Jehova. Nikansion na salmista: “Si Jehova ay aranni ta nabigaran i futuna; paliaranna danuri nakkafi i nonoda.” (Sal. 34:18, NW, ftn.) Turi naganassing anna nakkafi i nono na matalo nga profeta nga si Jeremias, pinatuyag ni Jehova i pakkomfiansana. (Jer. 1:6-10) Nonopan nu kunnasi napasikan i lakay nga profeta nga si Daniel turi ta zinog na Dios i anghel tapenu patuyaggan yaya. Inagalan natun nga anghel si Daniel nga “kuruga nabala-balor,” onu “kuruga mekakua” nga lalaki! (Dan. 10:8, 11, 18, 19; ftn.) Mawayyam kari gapa nga pasikannan ira i publisher, payunir, anna i lallakay anna babbako nga makkafa-kafi ngana?
8 Ari natageno na Dios nga megafu ta binillion nga daga-ragun nga nakkavulu nga nattrabahu ira ni Jesus, ari ngana mawag tu komendan anna pasikannan yaya turi ta keggana ta davvun. Ta dua nga situasion, naginna ni Jesus i Yamana nga naguvovug ta langi nga kinagina: “Yaw i ideddukak-ku nga Ana ku nga kuruga makapagayaya niakan!” (Mat. 3:17; 17:5) Kinomendan anna nipasiguradu na Dios nga mapia ira i kukukuanna. Siguradu nga napasikan si Jesus turi namidduana nga naginna yatun—ta gafu na pamministeriona anna pangultimo na pattolena ta davvun. Naddog gapa tu anghel si Jehova tapenu patuyaggan si Jesus turi ta mazziga-riga yaya ta gabi nige na patena. (Luc. 22:43) Nu magana ittam, parigattam nakuan i ehemplo ni Jehova gukaban na regular nga pamasikan ta ána tam anna pakkomenda ta mapia nga kingnguada. Mas paga nakuan suportattam ira nu mapurueban i kinamataloda ta eskuela kada aggaw.
9. Anni i magigiammu tam ta pattratu ni Jesus ta apostolesna?
9 Jesus. Ta gabi turi nigafu ni Jesus i Memorial, nasinganna nga pappakatannang i tadday ta negatibo nga ugali na apostolesna. Sigga-pakalinno nga binaggawan ni Jesus i takkida, ngem maddiskusion paga laman ira nu sinni i katannangan nira; tapus sobra i komfiansa ni Pedro ta baggina. (Luc. 22:24, 33, 34) Ngem, kinomendan ni Jesus i matalo nga apostolesna ta ariadda pangibattang sa maski ta kapuruebana ira. Niprofesiyana nga mas dakal paga i makuada anne ta kingnguana, anna nipasiguraduna nga iddukan ira na Dios. (Luc. 22:28; Juan 14:12; 16:27) Iyavu ta baggi tam, ‘Paparigakku kari si Jesus gukaban na pakkomenda ta abbarabbing anna ta tanakuan ta mapia ira nga kingnguada anne tu maffokus ta pakkurangadda?’
10, 11. Kunnasi nga nipasingan ni apostol Pablo nga mawag tu pasikannan i tanakuan?
10 Si apostol Pablo. Aru i makasta nga kinagi ni Pablo ta turana ira meyannung ta kapangngurugna. Aru dagun nga kavuluna ta pabbisi-bisita i karuan nira yatutta siguradu nga ammuna nu anni ira pakkafiadda, ngem makasta ira kinagina meyannung nira. Angngariganna, kinagi ni Pablo nga ‘iddeddukan anna pammakatalakkanna nga ana ta Yafu’ si Timoteo, nga napafutuan i pangikavurunna ta paddia-paddian na karuan nga Cristiano. (1 Cor. 4:17; Fil. 2:19, 20) Kinomendan na apostol si Tito ta turana ta kongregasion na Corinto nga kinagina nga “kavulu anna i kiyoffuk-ku ta passerbi nikamu.” (2 Cor. 8:23) Siguradu nga napasikan i nono da Timoteo anna Tito turi nammuadda i kinagi ni Pablo meyannung nira!
11 Nappeligro i inango da Pablo anna Bernabe megafu ta panolida ta lugu-lugar nga maggi natayadda. Angngariganna, nanoli ira ta Listra tapenu pasikannan i bagu ira nga disipulos nga mattalupaddian ta pangurug maski nu grabe i pangokkontra tari. (King. 14:19-22) Neparubang si Pablo ta maggaggazzi nga grupo na totolay. Nerekord ta Kingngua 20:1, 2: “Ta kabalin na gulu ta Efeso, nipagal ni Pablo i mangurug ira anna pinasa-pasikan na i nono da. Ay nappabattang ngana anna minay ta Macedonia. Naddaga-dagà yaya ta lugu-lugar ira tari, anna pinasa-pasikan na gapa i nono na mangurug ira. Ay nakarattal ngana yaya ta Grecia.” Siguradu nga importante kani Pablo i pamasikan ta nono.
PASIKANNAN I NONO NA KATAGGI-TADDAY
12. Kunnasi nga makoffun i study ira tapenu makeyawa anna makalawà tam tu pamasikan?
12 Meddu nga niyunnug ni Jehova nga regular nga magistudy ittam tapenu makeyawa anna makalawà tam tu pamagaram tari. (Bibbigan i Hebreo 10:24, 25.) Kagitta na ollu ira nga disipulos ni Jesus, mattaraddetam gapa tapenu maggigiammu anna mapasikan. (1 Cor. 14:31) Kinagi ni Cristina ta gafu na artikulo: “Kakayà ku i study ira megafu ta aya anna pamasikan tu nono nga malà ku tari. Nu mittan madepres ngà ta dattal ku ta Kingdom Hall. Ngem aranniannà na sister ira, gakkopaddà, anna kagiadda tu guapa ngà. Kagiadda nga ideddukaddà anna magayaya ira nga makasingan ta papprogresò. Kakkasta i panageno ku megafu ta pamagaramda!” Talaga makapabannay nu “makkapasa-pasikan” ittam ngamin!—Roma 1:11, 12.
13. Ngatta mawag na ekspiriensadu ira nga aripan na Dios i pamasikan ta nono?
13 Kawagan maski na ekspiriensadu ira nga aripan na Dios i pamasikan tu nono. Ikonsidera si Josue. Aru dagun nga matalo nga nasserbi yaya ta Dios. Ngem kinagi ni Jehova kani Moises nga pagarammanna yaya: “Dobammu si Josue anna pasikannan i nonona anna patuyaggammu yaya, megafu ta yaya i mangikantay ta totolay anna yaya i rason tapenu marensiada i davvun nga masingammu.” (Deut. 3:27, 28) Aranni ngana nga iyabaga ni Josue i responsibilidad nga iyorollu i Israelita ira ta panalludda ta Nepromesa nga Davvun. Meparubang ira ta aru nga pakillaban anna ari laman tu mittan nga maffu i armadana. (Jos. 7:1-9) Mawag gafu nga mapagaram anna mapasikan i nono ni Josue! Personal gapa nga pagarammattam i elder ira, maski i manangngal ta sirkito ira, nga mabbabbannag ta panangngal ta karneru na Dios. (Bibbigan i 1 Tesalonica 5:12, 13.) “Nu mittan iddan na kami na wawwaragi tu thank-you letter nu kunnasi ira nga napagayaya ta pabbisitami,” kinagi na tadday nga manangngal ta sirkito. “Ipappappammi yaw ira nga tura tapus bibbigammi nu marraddam kami. Talaga makapasikan tu nono danatun.”
Mapprogreso i ána tam nu sinsero nga komendan ira (Innan i parapo 14)
14. Anni i mangipasingan nga efektibo i komendasion anna pamagaram nu manabarang ittam?
14 Ammu na elder anna magana ira nga efektibo i komendasion anna pamagaram tapenu mepatalatto i tabarang na Biblia. Nguri ta kinomendan ni Pablo i taga-Corinto ira megafu ta niyaplikada i tabaranna, siguradu nga napasikan i nonoda nga ibala-balayudda nga kuan i matunung. (2 Cor. 7:8-11) Kinagi ni Andreas nga egga dua nga ánana: “Makoffun i pamasikan tu nono tapenu mapprogreso ta espiritual anna emosional i abbarabbing. Mepatalattomu i tabarang gukaban na pangiyawa tu komendasion. Maski nu ammu na ánami nu anni i fustu, normal ngana laman nira i pangngua ta fustu gukaban na kanayun nga pamasikammi nira.”
NU KUNNASI MANGIYAWA TU EFEKTIBO NGA PAMASIKAN TA NONO
15. Anni i makua tam tapenu mapasikan i tanakuan?
15 Appresian i positibo nga kualidad anna appursigi na kapangngurug. (2 Cron. 16:9; Job 1:8) Tagibaloran ni Jehova anna ni Jesus i ngamin nga kuattam tapenu suportan i interes na Pappatulan, maski limitadu i kontribusion anna makua tam megafu ta situasiottam. (Bibbigan i Lucas 21:1-4; 2 Corinto 8:12.) Angngariganna, marigatan ngana i karuan ta meddu nga lallakay anna babbako nga magatende ta study anna regular nga mallayyagayya. Ari kari nga mepangngo nga komendan anna pasikannan i nonoda?
16. Ngatta ariattam fugaddan i baggi tam ta pamasikan ta tanakuan?
16 Magaleg tu tiansa nga pasikannan i nono na tanakuan. Nu egga masingattam nga mepangngo ta komendasion, ngatta fugaddattam? Ikonsidera i nesimmu kani Pablo anna kani Barnabas turi ta keggada ta Antiokia ta Pisidia. Kinagi nira na ofisial ira na sinagoga: “Wawwagi ta angngurug, ikaya mi tu maguvovug kamu nu egga i awayya nu nga makagi tu pamasikan ta nono na totolay.” Napaguyu si Pablo nga mappalappa. (King. 13:13-16, 42-44) Ngatta ariattam iyistoria i makapagaram ira nga gannug? Nu iyugali tam nga mamasikan ta nono na tanakuan, siguradu nga pasikannadda gapa ittam.—Luc. 6:38.
17. Kunnasi nga mas efektibo nga mamagaram?
17 Mabbalin tu sinsero anna espesipiko. Makoffun i pamasikan anna pakkomenda, ngem nipasingan na mensahe ni Jesus ta Cristiano ira ta Tiatira nga mas makasta nu mabbalin ittam tu espesipiko. (Bibbigan i Nepakannammu 2:18, 19.) Nu magana ittam, awayya tam kagian ta ána tam nu anni i appresiattam ta papprogresoda ta espiritual. Awayya tam kagian ta tadday nga single mother nu anni i makasta nga kukukuanna meyannung ta pamadakal ta ánana maski nu mariga i situasionna. Dakal i meyuffun na kunnatun nga komendasion anna pamasikan!
18, 19. Kunnasi tam mapagaram danuri magawag tu sikan na nono?
18 Ari tu personal nga makkagi nittam si Jehova nga pagarammattam i partikular nga indibidual gittana kinagina kani Moises nga pasikannan anna pagaramman si Josue. Ngem, magayaya si Jehova nu makapasikan i pakiyuvovug tam ta kapangngurug anna ta tanakuan. (Prov. 19:17; Heb. 12:12) Angngariganna, awayya tam kagian ta nappalappa nu kunnasi nakoffun i tabaranna tapenu malippawa i tadday nga teksto. “Maski piga minuto tam laman nga nagergo,” kunna tadday nga sister ta nappalappa, “natagenomu i dammo na futù, anna binnanna-bannayannà. Kayàku nga mammuammu nga ta masippo nga pappalappamu anna pakiergom niakan, natageno ku nga gittana regalu yatun nga naggafu kani Jehova.”
19 Siguradu nga makaleg ittam tu aru nga tiansa tapenu mapasikan i tanakuan ta espiritual nu determinadu ittam nga iyaplika i tabarang ni Pablo: “Makkapasa-pasikan kamu gafu ta nono, anna makka-uffu-uffun kamu, kunna kuan nu ngana toye ta maddagga-raggun.” (1 Tes. 5:11) Mapagayaya tam si Jehova nu ‘makkapasa-pasikattam kagaggaw.’
^ [1] (parapo 1) Natalianan i karuan nga ngagan.