TOPIKO NA VUNGUN | ANNI I EGGA TA LANGI?
Pakkiavu ira Meyannung ta Mundo na Espiritu
Pinannonopammu ngana kari i meyannung ta mundo na espiritu anna danuri maddian tatun? Nu wan, ari laman tu sikaw. Nabayag ngana nga aru i kakkagian na totolay meyannung tatun. Kurugan na karuan nga maddian ta espiritu na mundo danuri naggafuan na familia tam nga kawagan nga dayawan. Nonopan gapa na tanakuan nga lugar yatun na imammo nga nagalan tu langi, nga paddianan na anghel ira anna masippo ira nga natay. Kunna gapa na tanakuan, lugar yatun na minillion nga dios.
Aru i makkagi nga ariattam mannammuan ngamin i meyannung ta mundo na espiritu megafu ta awan paga tu nakasingan anna minay tatun tapenu magistoria nittam. Ngem ugo yatun nga parrasa-rason. Naddian si Jesus ta langi, ta mundo na espiritu, nigena minay ta davvun. Mananawag i pinakkagina ta ollu-siglo ira nga lider na relihion: “Ta minulug ngà nga naggafu ta langi tapenu kuak-ku i uray na naddog niakan, ari tu i urè laggapa.” Megafu ta naekspiriensa mismu yatun ni Jesus, nakagina ta apostolesna: “Napakaru i lugar nga paddianan ta balay na Yamà.”—Juan 6:38; 14:2.
Siempre, i Dios i Yama ni Jesus, nga mangngagan tu Jehova, anna egga ta langi i ‘balena.’ (Salmo 83:18) Yatutta awan tu pinakamapia nga magistoria meyannung ta ari masingan nga mundo nu ari i Dios nga Jehova anna si Jesu-Cristo. Nangiyawa ira tu aru nga informasion ta matalo ira meyannung ta mundo na espiritu gukaban na makapabbaw ira nga sirmata.
Iyesplika na tumunug nga artikulo i parte ira na Biblia nga makkagi ta sirmata ira nga nasingan na lallaki. Durante nga ikonsidera yaw ira nga sirmata, daddamman nga ari tu pisikal i mundo na espiritu, nga paddianan na gannug nga ariattam matammi onu masingan. Yari tu imbes nga meyesplika i ganna-gannug ta espiritual ira nga termino, nga ariattam matindian, nangusa i Dios tu sirmata ira ta termino nga matindiattam. Makoffun yatun ira nga sirmata tapenu malippawa tam danuri maddian ta ‘napakaru ira nga lugar’ ta mundo ta espiritu.
