Organisado Base ta Libru na Dios
“Nipataddag na Dios i davvun gukaban na kinasirib. Maladda i nipamataddagna ta langa-langi gukaban na pakalippawa.”—PROV. 3:19.
KANSION: 105, 107
1, 2. (a) Anni i makagi na karuan ta kegga na organisasion na Dios? (b) Anni i paguvovugattam taw nga artikulo?
EGGA kari i organisasion na Dios? “Ariammu mawag i organisasion nga mangidirekta nikaw,” kunna karuan. “Basta egga personal nga relasiommu ta Dios.” Fustu kari yatun nga pagimamma? Anni i pakurugan na ebidensia ira?
2 Taw nga artikulo, paguvovugattam i ebidensia ira nga si Jehova, nga Dios na unnug, ay awan tu kegittanna nga Organisador. Ikonsidera tam paga nu kunnasi iyaplika i direksion ira nga alawatattam ta organisasion ni Jehova. (1 Cor. 14:33, 40) Namegafu ta ollu siglo C.E. anna ta kaggawattam, nakoffun i Katurakan ta neravvunan nga parte na organisasion ni Jehova tapenu ilayyagayya i mapia nga dumug ta karayyuan ira nga lugar. Megafu ta mappegiya ittam ta Biblia anna tuttulan i instruksion ira na organisasionna, ipagaram tam i kinarenu, imammo, anna pattaradday na interu kongregasion.
SI JEHOVA—I AWAN TU KEGITTANNA NGA ORGANISADOR
3. Anni makakumbinsi nikaw nga awan tu kegittanna nga Organisador si Jehova?
3 Napakurug na pamaratu nga awan tu kegittanna nga Organisador Proverbio 3:19: “Nipataddag na Dios i davvun gukaban na kinasirib. Maladda i nipamataddagna ta langa-langi gukaban na pakalippawa.” Ammu tam laman i “aggaggig na dala-dalanna,” anna “ananibig laman i magigginna sa.” (Job 26:14) Baddi laman i ammu tam meyannung ta planeta, bitun, anna galaxy ira, ngem makagi tam nga kappabbaw i nika-organisana yaw ira nga pinaratu ta langi. (Sal. 8:3, 4) Egga i minillion nga biti-bitun ta galaxy ira, nga organisado i nikepuestuna ta langi. Ngatta? Makaliligo ta pallevu na bilag i planeta ira ta orbit-da ta solar system gittana egga i tuttuladda nga dorob na trafiko! Siguradu nga makoffun nittam yatun nga makapabbaw nga ebidensia tapenu masingan nga si Jehova nga “namaratu ta langi” anna ta davvun, ay mepangngo ta dayaw, pattalo, anna kekakua.—Sal. 136:1, 5-9.
i Dios. Kinagi na4. Ngatta ari matabbag na siensia i aru ira nga pakkiavu?
4 Aru ngana i nadiskubre na siensia meyannung ta uniberso anna ta mundo tam, nga nammakapianattam ta nadduruma nga aspeto na pattoletam. Ngem aru paga nga pakkiavu i ari nga matabbag na siensia. Angngariganna, ari makagi na astronomer ira nu kunnasi limittuag i uniberso onu ngatta egga ittam ta planeta nga Earth nga aru i naddianna nga inango. Ari gapa meyesplika na totolay nu ngatta kakayàda i mattolay tu mannanayun. (Ecl. 3:11) Ngatta aru ira i importante nga pakkiavu nga awan paga tu tabbagna? Aru nga totolay anna sientista ira i makkakkagi nga awan tu Dios anna ipoppodduda i teoria na ebolusion. Ngem ta mismu nga libru ni Jehova, tabbaganna ira i pakkiavu nga pakavurungan na totolay maski sitaw i diadda.
5. Kunnasi ittam nakadepende ta dorob ira na natural nga nikaparatu?
5 Nakadepende ittam ta dorob na natural nga nikaparatu nga kingngua ni Jehova. Maddepende i elektrisian, tuberu, inhiniero, anna doktor ira taw nga dorob tapenu kuan i trabahuda. Angngariganna, mabbase i mangopera ira nga doktor ta natural nga nikepuestu na parte ira na baggi. Yari tu ari ngana nga alegan na doktor nu sitaw i futu na pasiente. Tuttulattam i dorob ira na nikaparatu. Mappeligro i inango tam nu kontrattam i law of gravity!
INORGANISA NA DIOS
6. Ngatta ekspektattam nga organisado i maddayaw ira kani Jehova?
6 Talaga makapabbaw i nika-organisa na uniberso. Yatutta ekspektattam nga kayà ni Jehova nga organisado i maddayaw ira sa. Ta kakuruganna, niyawa na Dios i Biblia tapenu megiya ittam. Marresulta tu daddam anna ziga i pattolay nga awan tu uffun na organisasion anna estandarte na Dios.
7. Ngatta makagi nga organisado nga libru i Biblia?
7 Ari laman nga nakkirivu nga koleksion na Judio anna Cristiano nga literatura i Biblia. Organisado yatun nga libru—obra nga naggafu ta Dios. Egga i koneksion na kada libru na Biblia. Masingan i tema na Biblia namegafu ta Genesis adde ta Nepakannammu—i paddefensa ta soberania ni Jehova anna ketuppal na gakkagna ta davvun gukaban na Pappatulanna nga pammagurayan ni Cristo, i nepromesa nga “gaka.”—Bibbigan i Genesis 3:15; Mateo 6:10; Nepakannammu 11:15.
8. Ngatta makagi tam nga talaga organisado i Israelita ira?
8 Ehemplo na kina-organisado i Israelita ira gari. Angngariganna, ta Mosaiko nga Dob, egga ira i “babbay nga inorganisa tapenu masserbi ta attallungan na tolda na paggarammammungan.” (Ex. 38:8) Organisado i pagali na kampu na Israelita anna na tabernakulo. Turi kua, inorganisa ni David i Levita ira anna i papari ta grupo ira segun ta trabahuda. (1 Cron. 23:1-6; 24:1-3) Nu tuppaladda si Jehova, igiya anna iddanna ira tu imammo anna pattaradday.—Deut. 11:26, 27; 28:1-14.
9. Ngatta organisado i ollu-siglo nga kongregasion Cristiano?
9 Organisado i ollu-siglo nga kongregasion Cristiano, anna nakadepende yatun ta direksion maggafu ta manangngal nga baggi. Apostoles laman i ollu ira nga miembrona yatun nga grupo. (King. 6:1-6) Turi kua, egga ira neyammung tatun nga tanakuan nga lallaki. (King. 15:6) Nigiya ni Jehova i karuan nga miembro na manangngal nga baggi kunne na gapa i tanakuan paga nga nakipattrabahu nira tapenu manabarang anna manuddu ta kongregasion ira. (1 Tim. 3:1-13; Tito 1:5-9) Kunnasi nga nabenefisiowan i kongregasion ira ta panuttul ta direksion na manangngal nga baggi?
10. Anni i resultana nu tuttulan na kongregasion gari i bili-bilin na nakka-anugutan na manangngal nga baggi? (Innan i letratu ta gafu na artikulo.)
10 Bibbigan i Kingngua 16:4, 5. Nipakannammu na lallaki nga sinunno na manangngal nga baggi ta kongregasion ira nga bisitadda i “bili-bilin nga nagana-anugutan na apostol ira tuange ta mannakam ta Jerusalem.” Durante nga tuttulan yatun ira na kongregasion, “nassikan i angngurug na iglesia ira anna nammungan i bilang da ta kagaggaw.” Egga kari i leksion nga meyaplika na organisasion na Dios ta maddaggun taw nga rekord na Biblia?
TUTTUTTULAMMU KARI I DIREKSION?
11. Anni nakuan i kuan na natunno nga lallaki ta direksion nga malàda ta organisasion na Dios?
11 Anni nakuan i kuan na miembro na Branch Committee onu Country Committee, manangngal ta sirkito, anna elder ira ta kongregasion nu makalawa ira tu direksion ta organisasion na Dios? Ituddu na libru ni Jehova ta ngamin nga mabbalin ittam tu minattuppal anna minakkimoray. (Deut. 30:16; Heb. 13:7, 17) Awan tu lugar na minangngivuya onu rebelyoso nga espiritu ta organisasion na Dios, ta makadaral i kunnatun nga ugali ta meddu, memammo, anna nattaradday nga kongregasion. Siempre, awan tu matalo nga Cristiano i mayà nga mabbalin tu awan tu respeto anna ari mapattalakkan nga gitta ni Diotrefes. (Bibbigan i 3 Juan 9, 10.) Iyavu tam ta baggi tam: ‘Makoffun ngà kari ta espiritualidad na totolay ta pallevu ku? Akseptan anna suportakku kari i pangigiya na mangiyorollu ira nga brother?’
12. Anni i bagu nga unnug meyannung ta pappili tu elder anna ministerial ira nga aripan?
12 Innattam i bagu laman nga desision na Manangngal nga Baggi. Nekagi i bagu nga unnug meyannung ta pappili tu elder anna ministerial ira nga aripan ta “Mga Tanong Mula sa Mambabasa” na Nobiembre 15, 2014 nga isyu na Ang Bantayan. Segun ta artikulo, niddan na ollu-siglo nga manangngal nga baggi tu autoridad i manangngal ira ta sirkito tapenu manunno. Yatutta turi Setiembre 1, 2014, i manangngal ira ta sirkito ngana i magapruba ta nerekomenda ira nga mabbalin tu elder anna ministerial ira nga aripan. Ammuan tu mapia na manangngal ta sirkito danuri lallaki nga nerekomenda anna vulunan ira ta pallayyagayya nu posible. Obserbanna i familia na brother nga nekonsidera. (1 Tim. 3:4, 5) Memmugug nga repasuan na elder ira anna na manangngal ta sirkito i kualipikasion ira segun ta Biblia para ta ministerial nga aripan anna elder ira.—1 Tim. 3:1-10, 12, 13; 1 Ped. 5:1-3.
13. Kunnasi masuportan i direksion nga nalawa tam ta elder ira?
13 Mawag nga tuttulattam i nebase-Biblia nga direksion nga iyawa na elder ira. I orihinal 1 Tim. 6:3) Daddamman i tabarang ni Pablo meyannung ta magulu ira ta kongregasion. Egga ira i ‘tanakuan nga awan tu kuad-da nu ari mammiti-miti onu mangi-alam ta kuan na ikattolay da.’ Siguradu nga sinabarangngan ngana ira na elder ngem ariadda gininna i tabarang. Kunnasi arubangan na kongregasion i kunnatun nga tolay? Kinagi ni Pablo: “Takkilalan nu yatun nga tolay anna arayyuan nu yaya.” Kawagan nga iyemmadda i pakikofun tatun nga tolay ngem ari nga tratuan tu kalaban. (2 Tes. 3:11-15) Awayya na elder ira nga manabarang gukaban na palappa meyannung ta kukukuan na tadday nga mangipasiran ta kongregasion, gitta na paki-date ta ari Saksi. (1 Cor. 7:39) Nu egga i kunnatun nga palappa ta kongregasion, anni i kuammu? Nu ammum i situasion nga mekagi ta palappa, arayyuammu kari yatun nga indibidual? Awayyana nga mapaguyu yatun nga tolay nga iyemmanna i marake nga kukukuanna megafu ta meddu nga pangikavurung anna determinasiommu. [1]
nga termino ta Griego nga netransleyt nga “kurug,” kebalinanna gapa nga “marenu ta moral” onu “pammakapianan.” Igiyana yaw nga marenu ta moral ira nga instruksion nga malegan ta Libru na Dios i matalo nga papastor ta organisasion na Dios. (MATTALUPADDIAN NGA MARENU, MEMAMMO, ANNA NATTARADDAY
14. Kunnasi ittam makoffun ta kinarenu na kongregasion?
14 Makoffun tam ta kinarenu na kongregasion ta espiritual nu tuttulattam i direksion nga malà tam ta Uvovug na Dios. Innattam i situasion ta Corinto gari. Kingngua ni Pablo i ngamin nga mawayyana tapenu mallayyagayya tatun nga siudad, anna inidduna i kaparehuna nga “masanto nga totolay.” (1 Cor. 1:1, 2) Siguradu nga narigatan yaya turi ta mawag nga arubanganna i problema na kongregasion ta seksual nga imoralidad! Kinagina ta elder ira nga “iyawa nu yatun nga tolay kani Satanas”—nga kayàna kagian, madisfellowship yaya. Tapenu mattalupaddian i kinarenu na kongregasion, mawag nga alsan na elder ira i “lebadura.” (1 Cor. 5:1, 5-7, 12) Nu suportattam i desision na elder ira nga idisfellowship i tadday nga ari mabbabawi, makoffun ittam tapenu kanayun nga marenu i kongregasion anna awayyana nga mapaguyu yaya tapenu mabbabawi anna makkiddaw tu pakoma kani Jehova.
15. Kunnasi tam mapattalupaddian i imammo ta kongregasion?
15 Egga paga i tadday nga problema ta Corinto. Idemanda na karuan nga Cristiano ira i kasi-Cristianoda. Niyavu ni Pablo nira: “Ari kari mas mapia nu attamman nu laman ngana i katazza-tazzi anna kadara-darogas nu?” (1 Cor. 6:1-8) Egga gapa i kunnatun nga situasion ta maddaggun. Nu mittan mawawan i imammo na wawwaragi megafu ta nalugi nga negosio anna akusasion nga naddarogas. Nidemanda na karuan i wagida, ngem uffunan ittam na mismu nga Libru na Dios nga malippawa nga mas mapia tu malugi anne tu mepasiranan i ngagan na Dios onu madaral i imammo na kongregasion. [2] Iyaplika tam nakuan i tabarang ni Jesus tapenu masolba i serioso ira nga problema anna paddarama. (Bibbigan i Mateo 5:23, 24; 18:15-17.) Nu kuattam yatun, masuportattam i pattaradday na familia na maddayarayaw kani Jehova.
16. Ngatta ekspektattam nga nattaradday i totolay na Dios?
16 Ipasingan na mismu nga Libru ni Jehova nu ngatta ekspektattam nga nattaradday i totolena. Nikansion na salmista: “Kuruga makapabbaw, kuruga makasta nu i totolay na Dios ay mattaradday ira!” (Sal. 133:1) Organisado anna nattaradday i Israelita ira nu tuttuladda si Jehova. Niprofesiya na Dios i pabbalinan na totolena ta mappange: “Pattaraddayakku ira, gittana karneru ta kural.” (Mik. 2:12) Kinagina paga gukaban ni profeta Zefanias: “Nu kunnatun uliakku i lengguahe na totolay tu marenu nga lengguahe [na kinakurug ta Katurakan], tapenu ngamin ira ay magagal ta ngagan ni Jehova, anna makiyabaga ira ta passerbi [onu, “mattaradday nga maddayaw,” ftn.] sa.” (Zef. 3:9) Mappabalo ittam ta egga i pribilehio tam nga nattaradday nga dayawan si Jehova!
Mangiyawa tu espiritual nga uffun i elder ira ta tadday nga nakaliwa (Innan i parapo 17)
17. Tapenu mattalupaddian i pattaradday anna kinarenu na kongregasion, anni nakuan i kuan na elder ira ta nakaliwa ira?
17 Tapenu kanayun nga mattaradday anna marenu i kongregasion, mawag nga insigida anna meddu nga asikasuan na elder ira i hudisial ira nga gannug. Ammu ni Pablo nga ari laman tu emosion i nelavu ta aya ta Dios, anna arianna pagurayan i marake ira nga annangngua. (Prov. 15:3) Yari tu ari nafugaddan si Pablo nga itura i Ollu nga Corinto—mafuersa ngem meddu nga tura. Kabalin na piga vulan netura i Mekadua nga Corinto, nga nangipasingan nga napprogreso ira megafu ta niyaplika na elder ira i direksion ni apostol Pablo. Nu makaliwa i Cristiano nigena paga mammuan, ivuya nakuan yaya na kualipikado ira nga lallaki gukaban na mapia nga uvovug.—Gal. 6:1.
18. (a) Kunnasi nakoffun ta ollu-siglo ira nga kongregasion i tabarang na Uvovug na Dios? (b) Anni i paguvovugattam ta tumunug nga artikulo?
18 Manawag nga nakoffun i nainspiran nga tabarang na mismu nga Libru na Dios ta ollu-siglo ira nga Cristiano ta Corinto anna ta maski sitaw tapenu mattalupaddian nga marenu, memammo, anna nattaradday i kongregasiodda. (1 Cor. 1:10; Efe. 4:11-13; 1 Ped. 3:8) Megafu tatun, mas aru i nakua na wawwaragi ta ministerioda tatun nga tiempo. Ta kakuruganna, makagi ni Pablo nga “nelayya-gayya ta ngamin nga totolay ta utun na davvun” i mapia nga dumug. (Col. 1:23) Ta maddaggun, melammuyag ta interu davvun i pakannammu ta makapabbaw ira nga gakkag na Dios, megafu ta appursigi na organisado nga pallayyagayya. Pakurugan paga na tumunug nga artikulo nga dakal i pangikakuada ta Biblia anna determinadu ira nga dayawan i Soberano nga Yafu nga si Jehova.—Sal. 71:15, 16.
^ [1] (parapo 13) Innan i Organisado Upang Gawin ang Kalooban ni Jehova, p. 134-136.
^ [2] (parapo 15) Para ta informasion meyannung ta situasion ira nu maddesision nga idemanda na tadday nga Cristiano i kapangngurugna, innan i “Mattalupaddian ta Ayâ na Dios,” p. 223, ftn.