“Nasingak-ku i tadday nga trono nga egga sa i agga-itubang! I muka na ay dumalla-dallangarang nga kagitta na nawag na kumiri-kiri ira nga mangina nga batu na haspe anna karnelia. Egga ta pallevu na trono i vullangun nga kagitta na kulor na esmeralda.”​—Nepakannammu 4:2, 3.

“Egga i nawag ta pallevuna nga negitta ta vullangun ta kunam ta aggaw na urang. Kunnatun i masingan nga nawag ta pallevuna. Kagitta yatun na gloria ni Jehova.”​—Ezekiel 1:27, 28.

Ganna-gannug nga mabi tam manono i neyusa taw ira nga sirmata nga neyawa kada apostol Juan anna profeta Ezekiel—kumili-kili nga mangina nga bata-batu, vullangun, anna gloria na trono. Irepresentana yatun ira i gloria na Katannangan nga Dios, nga si Jehova. Ipasingadda nga kappabbaw i kasta, kapianan, anna imammo na presensia ni Jehova.

Mekunnay yaw ira nga ilustrasion meyannung ta Dios ta uvovug ira nga nitura na salmista: “I Yafu ay makawayya; dakal nga dayaw i mepangngo sa; mepangngo tu mekakua yaya anne ta ngamin nga dios ira. I dios ira na karuan nga nasion ay sinan-dios laman, ngem i langi ira ay pinaro na Yafu tam. Nalevutan yaya tu dayaw anna kekakua; napannu i Templo na ta pakapangngua anna kasta.”​—Salmo 96:4-6.

Maski si Jehova i Katannangan, imbitanna ittam nga umaranni sa gukaban na pakimallo anna ipasiguraduna nga ginnanna ittam. (Salmo 65:2) Kuruga ideddukan anna ikavurung ittam na Dios, yari tu talaga makagi ni apostol Juan: “I Dios ay aya.”​—1 Juan 4:8.

“Ngem si Esteban, nga napannuan ta Espiritu Santo, ay siminangag ta langi, ay nasingan na i gloria na Dios anna si Jesus nga agga-taddag ta ziwanan na Dios. ‘Innan nu!’ kun-na nga kinagi. ‘Aggavuka i langi anna masingak-ku i Ana na Tolay nga agga-taddag ta ziwanan na Dios!’”​—Kingngua 7:55, 56.

Nige nga nasingan ni Esteban yaw nga sirmata, pinateda si Jesus ta pangipepegafu na lider ira na Judio nga paddagunanna nga kergowan. Napakurug na sirmata nga matolay ngana si Jesus anna napaginnolay anna nadayaw. Meyannung tatun, nitura ni apostol Pablo: ‘Pinaginnolay [ni Jehova] si Cristo anna namagitubang sa ta ziwanan na ta langi. Tari nga pammagurayan ni Cristo, atannangan na ngamin i mammaguray, makawayya, makapangngua, anna yafu ira. Ay mas nga marayaw i ngagan na anne ta ngamin nga pakawayya ari laman toye ta maddaggun ngem ta mappange paga.’​—Efeso 1:20, 21.

Fuera paga ta pakkagi ta atannang nga posisionna, ipasingan na Katurakan nga kagitta ni Jehova,  kuruga ikavurung ni Jesus i totolay. Turi ta pamministerio ni Jesus ta davvun, inuruna i mataki, pinammapiana i baldadu, anna pinaginnolena i natay. Gukaban na passakrifisio ta inangona, nipasinganna i monag nga ayana ta Dios anna ta totolay. (Efeso 2:4, 5) Sonu magitubang ngana yaya ta ziwanan na Dios, ipasingan noka ni Jesus i autoridadna anna mangiyawa tu aru ira nga bendision ta minattuppal nga totolay maski sitaw.

“[Sakan si profeta Daniel] Gigirawakku magadde ta neplasta ira i trono anna nagitubang i Ollu ta Aggaggaw [si Jehova]. . . . Egga i tanga rivu nga rinivu nga masserbi sa, anna mafulu rivu nga taggi-mafulu rivu i agga-taddag ta arubanna.”​—Daniel 7:9, 10.

Taw nga sirmata meyannung ta langi, ari laman tu tadday nga anghel i nasingan ni Daniel, nu ari, napakaru nga anghel. Kuruga kappabbaw yatun nga sirmata! Nagloria nga espiritu nga persona i anghel ira, intelihente anna makapangngua. Egga ira i ranggo nga serafin anna kerubin. Maturu tu mami-250 nga nakagi i anghel ta Biblia.

Ari nga dati nga tolay ta davvun i anghel ira. Pinaratu ira na Dios nige paga nga naparatu i totolay. Naobserbada i nikapadday na davvun anna nikukkulleda i pagayayada.—Job 38:4-7.

Tadday nga gannug tapenu matalo nga makapasserbi i anghel ira ta Dios ay gukaban na kelagudda ta pinaka-importante nga trabahu ta mundo ta maddaggun—i keproklama na mapia nga dumug na Pappatulan na Dios. (Mateo 24:14) Masingan ta sirmata kani apostol Juan i partisipasiodda tatun nga trabahu: “Kabalin naw, nasingak-ku i tadday mangana nga anghel nga kumaga-kagag ta tangnga ta utun. Egga sa i mannanayun nga evanghelio nga ilammuyag na ta ngamin nga totolay ta utun na davvun: totolay na madduma-ruma i rasa, tribu, paguvovug, anna nasion.” (Nepakannammu 14:6) Maski ari ngana makibidda i anghel ira ta totolay ta kaggawattam gittana kingnguada ira ta nappasa, igiyadda danuri mangilammuyag tu mapia nga dumug ta marenu i giffutuadda.

“Nabbatta i gerra ta langi. Si Miguel [Jesu-Cristo] tuange ta anghel ira ay nakillaban ta dragon tuange gapa ta anghel na ira. Ngem naffu i dragon tuange ta anghel na ira, anna ari  ngana nga nepamavulun tu maddian ira ta langi. I dakal nga dragon, yuri i iraw gari nga mangagan tu Demonio, onu Satanas nga minannabag ta tanga-ravvunan, ay napatavvar tuange ta ngamin nga anghel na, anna netabbo ira ta utun na davvun.”—Nepakannammu 12:7-9.

Egga i tiempo nga magulu ta langi. Ta gafa-gafu paga laman na totolay, egga tadday nga anghel nga kakayàna i madayaw yari tu narrebelde yaya kontra kani Jehova, nabbalin yaya tu Satanas, nga kayàna kagian “Minakkontra.” Narrebelde gapa i karuan ta anghel yatutta nagalan ira tu demonio. Megafu ta kinamarakeda, kokkontradda si Jehova anna iyorolluda i aru ta totolay kontra ta meddu nga direksion ni Jehova.

Sobra i kinadake anna kinavayolente da Satanas anna demoniona ira. Kalaban ira na totolay anna i rason ta aru nga ziga-riga ta mundo. Angngariganna, pinatay ni Satanas i aya-ayam anna aripan na matalo nga lalaki nga si Job. Tapus, pinatena i mafulu nga ána ni Job gukaban na “masikan nga paddag” tapenu dabbakan i balay nga naddianadda. Kabalinna yatun, pinattaki ni Satanas si Job tu “sumussussu nga vutali mamegafu ta dapagna adde ta tuppag na uluna.”—Job 1:7-19; 2:7.

Ngem aranni ngana nga mawawan si Satanas. Namegafu turi ta nikepattuna ta utun na davvun, ammuna nga “pigo ngana laman i nabattang sa nga tiempo.” (Nepakannammu 12:12) Siguradu i kadaral ni Satanas anna makakkasta nga balita yatun!

‘Sinavvu [ni Jesus] para ta Dios i totolay ta madduma-ruma nga tribu, paguvovug, nasion, anna rasa. Pinabbalim-mu ira tu papari ta tadday nga pammagurayan; i Dios tam i ed-da nga passerbian, ay mammaguray ira ta tanga-ravvunan.’​—Nepakannammu 5:9, 10.

Nu kunnasi nga napaginnolay si Jesus ta davvun tapenu mattolay ta langi, kunnatun gapa i karuan. Kinagi ni Jesus ta matalo ira nga aripanna: “Umay ngà mangiparan tu paddianan nu. Ay, . . . toliat-takamu nga apan tapenu nu sitaw i diak-ku, tari gapa i dian-nu.”​—Juan 14:2, 3.

Egga i gakkag na pappange danuri umay ta langi. Kavuluda si Jesus ta gobierno na Pappatulan nga mammaguray ta totolay ta interu davvun anna mangirattal nira tu aru nga bendision. Yaw i Pappatulan nga kinagi ni Jesus ta disipulosna nga ipakimalloda ta modelo nga pakimallo: “Ama mi nga egga ta langi, marayaw paray i ngagam-mu; maparattal paray i Pammagurem. Makua i urem toye ta davvun kunne ta langi.”​—Mateo 6:9, 10.

“[Sakan si apostol Juan] ay naginnà i masikan nga ngaral nga naggafu ta trono nga nakkagi, ‘Sangoye ay makitappaddian ngana i Dios ta sina-sinolay! . . . Funatan na ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki. Ta napawan ngana ngamin i dana nga ganna-gannug.’”​—Nepakannammu 21:3, 4.

Itudduna yaw nga sirmata i tiempo sonu pangultimuan na Pappatulan na Dios​—ta pammaguray ni Jesus kavulu danuri napaginnolay ta davvun—i pammaguray ni Satanas anna pabbalinan tu paraiso i davvun. Mawawan ngana ngamin i gannug nga mangiyawa tu taki anna daddam ta totolay. Maski i patay ay mappasa.

Kunnasi gafu i binillion nga natay nga ari napaginnolay ta langi? Ta mappange nga tiempo, egga i iddanamada nga mapaginnolay anna matolay tu mannanayun ta Paraiso nga davvun.​—Lucas 23:43.