Awan Nakuan tu Maski Anni nga Mangifugag Nikaw ta Premyo
“Awan nakuan tu maski sinni nga mangifugag nikamu ta premyo.”—COL. 2:18, NW.
KANSION: 32, 134
1, 2. (a) Anni i premyo nga karagatan na aripan ira na Dios? (b) Anni i makoffun nittam tapenu makapaffokus ta premyo? (Innan i letratu ta gafu na artikulo.)
KAGITTA ni apostol Pablo, egga gapa i matagibalor nga iddanama na nazelugan ira nga Cristiano ta maddaggun nga mala ‘i premyo, nga yaw i bagu nga attolay nga pagagalan na Dios.’ (Fil. 3:14) Karagatadda nga makipammaguray kani Jesu-Cristo ta nelangitan nga Pappatulan anna makipattrabahu nisa nga mamabbalin tu perfekto ta totolay. (Nep. 20:6) Talaga makakkasta nga addetan yatun turi ta nembita na Dios! Neruma gapa i iddanama na tanakuan ira nga karneru. Iddanamadda nga mala i premyo nga mannanayun nga inango ta davvun—anna talaga makapagayaya yatun nga iddanama!—2 Ped. 3:13.
2 Tapenu moffunan ni Pablo danuri kasi-nazeluganna nga mattalupaddian nga matalo anna mala i premyo, kinagina: “Nononopan nu i egga ira tari [ta langi].” (Col. 3:2) Agga-nonoda nakuan i nabalor nga iddanamada nga nepara-paran ta langi. (Col. 1:4, 5) Talaga makoffun ta aripan ni Jehova i pannonoda ta bendision ira nga iyawana ta nira tapenu makapaffokus ira ta premyo, maski ta langi onu ta davvun i iddanamada.—1 Cor. 9:24.
3. Anni ira nga peligro i inabiso ni Pablo ta kapangngurugna ira?
3 Inabisowan ni Pablo danuri kapangngurugna meyannung ta peligro ira nga mangifugag nira ta premyo. Angngariganna, nattura yaya ta kongregasion ta Colosas meyannung ta falso ira nga Cristiano nga makkaraga nga pagayayatan i Dios gukaban na panuttul ta Dob ni Moises imbes nga mangurug kani Cristo. (Col. 2:16-18) Kinagi paga ni Pablo i peligro ira nga mesimmu adde ta maddaggun nga mangifugag nittam ta premyo. Angngariganna, niyesplikana nu kunnasi ibita i imoral ira nga pakkaraga, anna solusionan i problema ta wawwaragi anna ta familia. Makoffun lagapa i tabaranna taw ira nga gannug adde ta maddaggun. Yatutta, gigiammuattam i karuan ta meddu nga tabarang ni Pablo nga mabibbig ta turana ta taga-Colosas.
PATAYANNU I IMORAL IRA NGA PAKKARAGA
4. Ngatta mawawattam i premyo megafu ta imoral ira nga pakkaraga?
4 Kabalin nga niperaddam ni Pablo ta wawwaragina i meyannung ta kappabbaw nga iddanamada, niturana: “Mawag gafu tu pallikuran nu ngamin i neravvunan ira nga pakkaraga: kagitta na paggannug, marakay nga appana-panono, nepattaggan nga pakkaraga na baggi, pakkaraga nga mangngua ta marakay, anna pakkelug.” (Col. 3:5) Makapangngua i imoral nga pakkaraga anna daralan natun i relasiottam kani Jehova anna i iddanama tam. Kinagi na tadday nga brother nga nakaliwa tu imoralidad tapus nanoli gabbalaman ta kongregasion, “Ginuggunnà na sobra sikanna nga fuersa nga ariakku nalabanan adde ta naffu ngà.”
5. Kunnasi tam maprotektan i baggi tam kontra ta peligroso ira nga situasion?
5 Mas ngana nga kawagan nga magalerto ittam nu meparubattam ta situasion ira nga matenta ittam nga ikompromiso i moral ira nga estandarte ni Jehova. Angngariganna, kinasirib para ta mannobio nga ta gafu paga laman na relasiodda, mangipay ira tu limitasion meyannung ta pakkemmi, paggummo, onu pakkavulu nga ira laman dua. (Prov. 22:3) Luttuag i delikadu ira nga situasion ta moral nu mattrabahu ta tanakuan nga lugar i Cristiano onu makipattrabahu ta arianna kasekso. (Prov. 2:10-12, 16) Nu kunnatun i situasiommu, iyammammum i baggim nga Saksi ni Jehova, mepangngo nakuan i agguyu-guyum, anna daddamman nga marake i resulta na paki-alembong. Mas paga nga mariga i situasiottam nu problemadu onu magitetadday ittam. Egga i tiempo nga magawag ittam tu tolay nga mangipatageno nga iddeddukanna ittam. Baka kuruga desperadu ngana ittam para ta emosional nga suporta nga akseptattam i atension na maski sinni. Nu mesimmu nikaw yatun, mappoffun kani Jehova anna ta wawwaragi tapenu ariammu mawawan i premyo.—Bibbigan i Salmo 34:18; Proverbio 13:20.
6. Anni nakuan i daddammattam nu mappili ittam tu dibersion?
6 Tapenu mapatetam i imoral ira nga pakkaraga, mawag tam nga ibita i imoral nga dibersion. Maruddu nga iperaddam na dibersion ira ta maddaggun i ganna-gannug nga nesimmu gari ta Sodoma anna Gomora. (Jud. 7) Palawanan danuri mangngua tu dibersion ira nga normal laman i seksual nga imoralidad anna awan tu peligro natun. Ariattam nakuan makkampante nga akseptan i maski anni nga klase na dibersion. Mawag nga piliattam tu mapia i klase na dibersion nga ari makefugag nittam ta paffokus tam ta premyo nga inango.—Prov. 4:23.
“BARUASIANNU I BAGGINU” TU AYA ANNA KINASIPPO
7. Anni ira i posible nga problema nga meparubang ta Cristiano nga kongregasion?
7 Umanugu tam ngamin nga bendision i mabbalin tu parte na Cristiano nga kongregasion. Makoffun i paggigiammu ta Uvovug na Dios ta study tam ira anna i masippo anna meddu nga suporta tam ta kataggi-tadday tapenu kanayuttam nga nakafokus ta premyo. Ngem egga ira tiempo nga mabbalin tu tensionadu i wawwaragi ta kongregasion megafu ta ari pakkarantindian. Nu ariattam masolba danatun, posible nga marresulta yatun ta taki na nono.—Bibbigan i 1 Pedro 3:8, 9.
8, 9. (a) Anni ira nga kualidad i makoffun nittam tapenu mala i premyo? (b) Anni i makoffun nittam tapenu mapattalupaddian i imammo nu nakaliwa nittam i kapangngurug tam?
8 Kunnasi tam malabanan i taki na nono nga fugaddan ittam nga mala i premyo? Kinagi ni Pablo ta taga-Colosas: “Megafu ta sikamu i pinili na Dios, masanto anna meddu, baruasiannu i bagginu tu meddu nga pangikabbi, kinasippo, kinapakalinno, kinalumamo, anna pappasensia. Makkapasa-pasensia anna makkapaka-pakoma kamu nu egga i taki na nono nu ta kataggi-tadday. Nu kunnasi nga agga-paran nga pakoman nakamu ni Jehova, kunnari gapa nakuan i kuannu. Ngem fuera paga taw ira nga gannug, baruasiannu i bagginu tu aya, megafu ta perfekto yatun nga mamattaradday.”—Col. 3:12-14, NW.
9 Makoffun i aya anna kinasippo tapenu sigga-paran ittam nga pakoman i kataggi-tadday. Angngariganna, nu natakitan ittam ta kinagi onu kingngua na kapangngurug tam, nonopattam gapa turi ta nakakagi onu nakakua tam tu ari makasta. Ariattam kari appresian i aya anna kinasippo na wawwaragi tam nga namalampas ta kamali tam ira? (Bibbigan i Eclesiastes 7:21, 22.) Mas ngana nga mappabalo ittam nga pinattaradday na kinasippo ni Cristo i kurug ira nga maddayarayaw. (Col. 3:15) Parehu nga Dios i ayatattam, parehu i mensahe nga ilayyagayya tam, anna parehu ira nga problema i meparubang nittam. Nu masippo anna meddu nga pakomattam i kataggi-tadday, makoffuttam ta pattaradday na kongregasion anna makapaffokus ittam ta premyo nga inango.
10, 11. (a) Ngatta delikadu i passil? (b) Kunnasi tam malabanan i passil ta pangifugagna nittam nga mala i premyo?
10 Iperaddam nittam na ehemplo ira na pamappalan ta Biblia nga fugaddan ittam na passil nga mala i premyo. Angngariganna, pinassil ni Cain i wagina nga si Abel anna pinatena. Pinassil da Kora, Datan, anna Abiram si Moises tapus kinontrada yaya. Pinassil gapa ni Patul Saul i makasta nga nattuppalan ni David anna pinlanona nga patayan yaya. Yatutta, kagian na Uvovug na Dios: “Nu egga i passil anna pakkaraga ta gannug nga masserbi ta baggi, egga ngana gapa tari i gulu anna ngamin nga gannug na marakay.”—Sant. 3:16.
11 Nu mapeggattam tu aya anna kinasippo ta giffutuattam, ariattam insigida nga mappassil. Kagian na Biblia: “I aya ay pappasensia anna pagallo. Ari tu pamassa-passil.” (1 Cor. 13:4) Tapenu ari megamu i passil ta futu tam, karagatattam nga innan i gannug ira segun ta pagimamma na Dios, imammatattam i wawwaragi bilang miembro na parehu nga Cristiano nga baggi. Makoffun yaw nittam tapenu makisimpatia, nga mekunnay ta nainspiran nga tabarang: “Nu madayaw i tadday, magayaya ira ngamin.” (1 Cor. 12:16-18, 26) Yatutta, imbes nga mappassil, magayaya ittam nu makalawa tu bendision i tanakuan. Ikonsidera i ehemplo na ana ni Patul Saul nga si Jonatan. Arianna namassil turi ta natunno si David nga patul imbes nga yaya. Pinagaramna lallagu si David. (1 Sam. 23:16-18) Awayya tam kari mabbalin tu masippo anna meddu kagitta ni Jonatan?
MANGAFFU TU PREMYO BILANG FAMILIA
12. Anni nga tabarang na Katurakan i makoffun nittam tapenu mala i premyo bilang familia?
12 Nu meyaplika i prinsipio ira na Biblia, marresulta yatun tu imammo anna pagayaya na familia anna makoffun tapenu mala i premyo. Anni i nebase ta Katurakan nga nitabarang ni Pablo ta taga-Colosas? Kinagina: “Sikamu nga babbay, makimoray kamu ta gi-attawan nu, ta yatun i annungan nu nga kunna tumuttul ta Yafu. Sikamu nga lallaki, iddukan nu i gi-attawan nu, anna arian nu ira nga tazza-tazzian. Sikamu nga ána, annungan nu i makimoray ta mappagana nu ta ngamin nga gannug, ta yatun i makapagayaya ta Yafu. Sikamu nga mappagana, arian nu nga poporayan ta ari nga mepangngo i ána nu, ta marakay nu makkafi i nono da.” (Col. 3:18-21) Siguradu nga umanugu ka nga makabenefisio ta atawa nga lalaki, atawa nga babay, anna ána i pangiyaplika ta tabarang ni Pablo.
13. Kunnasi moffunan na Cristiano nga sister i ari kapangngurug nga atawana?
13 Kunnasi nu atawa ka nga babay anna matageno mu nga ari tu mepangngo i pattratu nikaw na atawam nga ari kapangngurug? Awayyana nga mapporeka anna makipporfia sa, ngem mapakasta kari natun i situasion? Maski nu mafuersam yaya nga kuan nu anni i kayà mu, alawatanna kari i kinakurug? Ari. Ngem nu irespetom i pakka-ulu na atawam, makoffun yatun ta imammo na familia, medayom si Jehova, anna mapagarammu 1 Pedro 3:1, 2.
paga i atawam nga maginteres ta kurug nga paddayaw; makoffun gafu nikamu yatun nga dua nga mala i premyo.—Bibbigan i14. Anni nakuan i kuan na Cristiano nga atawa nga lalaki nu ari yaya irespeto na ari kapangngurug nga atawana?
14 Kunnasi nu atawa ka nga lalaki anna matageno mu nga ariannaka irespeto na ari kapangngurug nga atawam? Mapilit mu kari yaya nga irespeto naka nu kullekammu anna ipatageno mu nga sikaw i kanayun nga makurug? Ari vuluvuga! Ekspektan na Dios nga meddu ka nakuan nga ulu, kagitta ni Jesus. (Efe. 5:23) Kanayun nga mapasensia anna meddu si Jesus bilang ulu na kongregasion. (Luc. 9:46-48) Gukaban na pamarig ta ehemplo ni Jesus, moffunan na atawa nga lalaki i atawana ta kurug nga paddayaw.
15. Kunnasi mepasingan na Cristiano nga atawa nga lalaki nga iddukanna i atawana?
15 Nekagi ta atawa ira nga lalaki: “Iddukan nu i gi-attawan nu, anna arian nu ira nga tazza-tazzian.” (Col. 3:19) Mekakua na lalaki i atawana nga babay gukaban na pagginna ta opinionna ira anna pangipasiguradu sa nga tagibaloranna i kakkagianna. (1 Ped. 3:7) Maski arianna makua ngamin i ikiddaw na atawana, maruddu nga balanse i desisionna nu makkonsulta ta atawana. (Prov. 15:22) Kuan na minaggiddu nga atawa nga lalaki i mapia para ta atawana tapenu mala i respetona, nga ari nga mepipilit. Maruddu nga mapeggan tu magayaya nga familia nga masserbi kani Jehova anna malada i premyo na inango nu ayatan na atawa nga lalaki i atawana anna i ánana.
Kunnasi tam malabanan i problema ira ta familia nga mangifugag nittam nga mala i premyo? (Innan i parapo 13-15)
SIKAMU NGA KABATAAN—AWAN NAKUAN TU MANGIFUGAG NIKAMU TA PREMYO!
16, 17. Bilang kabataan, kunnasim malillitan i sobra nga pakkadismaya ta magana mu ira?
16 Kunnasi nu tinedyer kamu anna matagenonu nga ari kamu malippawa na magananu nga Cristiano anna istrikto ira? Awayyana tu megafu ta madismaya kamu, paddudannu ngana nu makasta talaga i masserbi kani Jehova. Ngem nu ipamavulunnu nga magimmakkamu masserbi megafu ta pakkadismaya, mammuannu gabbalaman nga awan tu tanakuan nga talaga mangikavurung nikamu nu ari i minagganassing ta Dios nga magananu anna i kongregasionnu.
17 Nu ari kamu vuluvuga nga kinorekta na magananu, ariannu kari madduda nu talaga ikavurungadda kamu? (Heb. 12:8) Ngem awayyana i mamaddismaya nikamu ay nu kunnasi i panisiplina na magananu. Imbes nga ikalussom i istilo na paddisiplinada, ammuan lallagu i rason nu ngatta kukukuadda yatun. Makkalma ka laman tapenu ari tu sobra i reaksiommu ta pinangivuyada nikaw. Kagian na Biblia: “I tolay nga egga pakannammuna gaggaddanna i uvovugna ira, anna i minangngalippawa nga tolay ay mattalupaddian nga kalmadu.” (Prov. 17:27) Mammanakam ka lallagu ta espiritual anna kalmadu nga akseptan i tabarang anna mabbenefisio tatun maski paga nu kunnasi nga neyawa yatun. (Prov. 1:8) Bendision i kapeggan tu magana nga mangiddu kani Jehova. Siguradu nga uffunadda kamu nga mala i premyo na inango.
18. Ngatta determinadu ka nga maffokus ta premyo?
18 Kappagayaya nga nonopan i premyo nga iddanamattam—maski nu imortal nga inango yatun ta langi onu mannanayun nga inango ta paraiso nga davvun. Siguradu yatun nga iddanama, nga nebase ta promesa mismu na Namaratu. Meyannung ta Paraiso nga davvun, kunna Dios: “Megafu ta i davvun ay siguradu nga mapannu tu pakannammu kani Jehova.” (Isa. 11:9) Ngamin gafu nga mattolay noka ta utun na davvun ay natudduan ni Jehova. Talaga sulit nga pappursigian yatun nga premyo. Yatutta maffokus ka ta nipromesa ni Jehova, anna ariammu ipamavulun i maski anni nga makefugag nikaw ta premyo!