“Mabendisionan Noka i Tadday nga Minangngiyawa”

I-PLAY

TAGGA paga, importante ngana nga parte na kurug nga paddayarayaw i pangitavvung. Mangisakrifisio i Israelita ira tu aya-ayam, anna kilala gapa i Cristiano ira ta ‘sakrifisio na paddaya-rayawda.’ Ngem, egga ira i tanakuan nga sakrifisio nga talaga makapagayaya ta Dios. (Heb. 13:15, 16) Mangirattal tu bendision anna pagayaya yaw ira nga sakrifisio, kagitta na ipasingan na tumunug ira nga ehemplo.

Kakayà na matalo nga aripan gari nga si Hana, nga mapeggan tu ana nga lalaki ngem lupo onu baug yaya. Ta pakimallo, nitabbana nga nu makka-ana yaya: “Iyawa ku yaya kani Jehova ta ngamin nga aggaw na pattolena.” (1 Sam. 1:10, 11) Turi kua, navussi si Hana, anna nagana tu lalaki nga mangngagan tu Samuel. Turi nefutà ngana si Samuel, niyangay yaya ni Hana ta tabernakulo, gittana nitabbana. Binendisionan ni Jehova si Hana megafu ta minassakrifisio nga espirituna. Nabendisionan paga yaya tu lima nga ána, anna nabbalin si Samuel tu profeta anna nattura tu libru na Biblia.—1 Sam. 2:21.

Kagitta da Hana anni Samuel, egga i pribilehio na Cristiano ira ta maddaggun nga usan i pattoleda ta dedikadu nga passerbi ta Namaratu nira. Nipromesa paga ni Jesus nga i maski anni nga passakrifisio tam tapenu madayaw si Jehova ay bala-balattanna tu aru.—Mar. 10:28-30.

Ta ollu-siglo, madumu-rumug i Cristiano nga mangngagan tu Dorcas megafu ta “mangngua tu mapia anna minaggallallo” yaya—sakrifisio ira nga kingnguana tapenu uffunan i tanakuan. Ngem narraddam i interu kongregasion megafu ta “nattaki si Tabita [onu Dorcas] anna natay.” Turi ta naginna na disipulos ira nga egga si Pedro ta lugarda, nakimemallo ira sa nga umay yaya nira. Fugurammu ngana laman i ayayada turi ta zimittal si Pedro anna pinaginnolena si Dorcas—i ollu nga rekord na pamaginnolay na apostol! (King. 9:36-41) Ari nattamman na Dios i sakrifisio ira ni Dorcas. (Heb. 6:10) Nerekord ta Uvovug na Dios i kualidadna nga minangngiyawa tapenu pamarigattam.

Nangipasingan gapa si apostol Pablo tu makasta nga ehemplo na minangngiyawa ta tiempo anna atension. Turi ta nattura si Pablo ta Cristiano ira ta Corinto, kinagina: “Ay pagayaya ku nga gastowan ngamin i egga niakan, anna maski paga iyawa ku i inango ku megafu laman nikamu.” (2 Cor. 12:15) Nagigiammu ni Pablo gukaban na ekspiriensana nga i passakrifisio para ta tanakuan ay ari laman nga mangirattal tu personal nga pagayaya, nu ari, mangirattal gapa yatun tu bendision anna fabor ni Jehova.—King. 20:24, 35.

Manawag nga mapagayaya tam si Jehova nu usattam i tiempo anna sikattam nga suportan i interes na Pappatulan anna uffunan i kapangngurug tam. Ngem egga paga kari i tanakuan nga makua tam tapenu suportan i trabahu nga pangilayyagayya ta Pappatulan? Wan! Fuera paga ta passakrifisio tam ta tiempo anna sikattam, medayaw tam paga i Dios gukaban na boluntario nga donasiottam. Makoffun yaw ta trabahu nga interu-mundo nga pallayyagayya, nelagum ngana i passuporta ta misionero ira anna tanakuan paga nga ngamin-tiempo nga aripan. Kunne na gapa, makoffun i boluntario ira nga donasion ta papprepara anna pangitransleyt tu literatura anna video ira, panguffun ta nafektan ira na kalamidad, anna pamataddag tu Kingdom Hall. Makasiguradu tam nga “mabendisionan noka i tadday nga minangngiyawa.” I tadday paga, nu usattam i pakkukua tam ira kani Jehova, medayaw tam yaya.—Prov. 3:9; 22:9.

Nu Kunnasi Nga Maddona I Karuan Ta Tangapamundowan Nga Trabahu

Kagitta na turi ta kaggawan ni Pablo, aru ta maddaggun i “mangisina,” onu mangibadyet tu kuartu, tapus idannada yatun ta kahon para ta kontribusion ta “Worldwide Work.” (1 Cor. 16:2) Kada vulan, ipatulug na kongregasion ira yatun nga kontribusion ta ofisina na Saksi ira ni Jehova nga makassakup ta lugarda. Awayya gapa nga direkta ka nga maddona ta legal nga korporasion na Saksi ira ni Jehova ta nasion nga paddianammu. Tapenu mammuan i primeru nga legal nga korporasion nga usan na Saksi ira ni Jehova ta nasionnu, kontakammu i panga nga ofisina. Malegan i adres ta www.pr418.com. Depende ta nasion nga paddianammu, yaw ira i klase na donasion nga awayyam direkta nga iyawa:

DIREKTA IRA NGA DONASION

Donasion ira gukaban na electronic bank transfer, debit card, onu credit card. Posible gapa yaw ta karuan nga panga gukaban na jw.org onu tanakuan paga nga website nga natunno.
Donasion nga kuartu, alahas, onu tanakuan paga nga pakkukua. Mangilagum tu tura nga mangipakannammu nga i kuartu onu anni paga nga pakkukua ay donasion nga awan tu kondisionna.

UNNUG TA DONASION NGA EGGA KONDISIONNA

Kuartu nga nedona nga egga i kondisionna nga metoli nu kawagan na naddona.
Mangilagum tu tura nga makkagi nga egga i kondision na donasion.

CHARITABLE PLANNING

Fuera paga ta kuartu anna ta pakkukua ira, egga paga i tanakuan nga makua tapenu makoffun ta tangapamundowan nga trabahu para ta Pappatulan. Nelista yatun ira ta gukag. Maski anni paga i metodo onu metodo ira nga kayà mu usan, kontakammu labbi i panga nga ofisina nga makassakup ta teritorianu tapenu masingan nu anni i mepangngo ta lugarnu. Megafu ta nadduruma i legal ira nga kiddaw anna dob ta vugi, importante nga makkonsulta labbi ta kualipikadu nga abugadu anna eksperto ta vugi nige mu maddona.

Insurance anna Pension: Donasion nga awayyam ikwenta tu benefisariu ta life insurance policy onu tadday nga retirement plan/pension i tadday nga legal nga korporasion nga usan na Saksi ira ni Jehova.

Deposito ta Bangku: Deposito ira ta bangku nga meyawa ta tadday nga korporasion nga usan na Saksi ira ni Jehova nu matay i tadday. Tuttulan i unnug na bangku ta lugarnu.

Stock anna Bond: Stock onu bond ira nga nedona ta tadday nga korporasion nga usan na Saksi ira ni Jehova gukaban na direkta nga donasion onu katurakkan nga meyali yaw nu natay ngana i naddona.

Davvun anna Balay: Melaku ira nga davvun anna balay nga nedona ta tadday nga korporasion nga usan na Saksi ira ni Jehova, awayyana tu gukaban na direkta nga pangidona. Nu maddian paga tatun i nangidona, awayya nga mamadday tu katurakkan nga puede yaya maddian tatun adde ta matolay paga yaya.

Testamento anna Trust: Awayyana nga mepamana i pakkukua onu kuartu ta tadday nga korporasion nga usan na Saksi ira ni Jehova gukaban na legal nga testamento onu pangingagan ta korporasion bilang benefisariu na tadday nga trust agreement. Taw nga unnug, awayya nga mapakarianan i mapagan nga vugi.

Gittana kayà kagian na termino nga “charitable planning,” kawagan nga mapplano i maddona taw nga klase na donasion ira. Tapenu moffunan danuri maya nga maddona ta tangapamundowan nga trabahu na Saksi ira ni Jehova gukaban naw nga klase na paddona, egga i brosiur nga Charitable Planning to Benefit Kingdom Service Worldwide nga neprepara ta English anna Spanish. Napadday yatun nga brosiur tapenu mangiyawa tu informasion ira nu kunnasi maddona ta maddaggun onu ta mappange, gittana pamana nu natay ngana i naddona. Awayyana nga egga ira i informasion ta brosiur nga ari meyaplika ta situasiommu megafu ta dob ira ta vugi onu tanakuan paga nga dob ta nasion nga paddianammu. Gukaban na pangusa taw ira nga metodo, aru i nakoffun ta passuporta ta interu-mundo nga trabahu tam nga pallayyagayya anna panguffun ta kalamidad anna dakal i mapakarianan ta mapagan nga vugi. Nu egga ta nasion nga paddianammu, awayyam makkiddaw tu kunnaw nga brosiur ta sekretario ta kongregasionnu.

Para ta aru paga nga informasion, i-click i link nga “Mangiyawa tu Donasion Para ta Interu Mundo nga Trabahu” ta gukag na jw.org/ibg, onu kontakan i panga nga ofisina.

Baka Kaya Mu Gapa i

Tutorial ta Elektroniko nga Paddona

Gigiammuan i opsion anna tool ira nga meyusam ta paddona.

PASSIFUSIFUTAN—MAGIGIAMMU NGA EDISION