Nu Kunnasi Ka Makibagay ta Bagu nga Kongregasiommu
“MAGGUDU-GUDU ngà nga magali taw,” kunni Allen. * “Ariakku ammu nu egga mabbalin tu kofukku onu akseptaddà.” Makibagay paga laman si Allen ta bagu nga kongregasion nga 1,400 kilometro i karayyuna ta baleda.
Nu nagali ka ta tanakuan nga kongregasion, awayyana nga maggudu-gudu ka gapa. Anni i makoffun nikaw tapenu makibagay? Anni i kuammu nu marigatakka makibagay anne ta inekspektam? Kunne na gapa, nu ariammu magali, anni i makuam tapenu moffunan i bagu ali ira tapenu alistu nga makibagay?
NU KUNNASI KA MAKIBAGAY ANNA MAPPROGRESO
Nonopan yaw nga ilustrasion: Nu meyali i fun na kayu, ma-stress gapa yatun. Durante nga mabattul i fun na kayu, aru ta gamuna i malsa tapenu mas alistu nga meyali. Nu memula ngana uli, mawag nga mattugu onu mattalovu insigida i bagu nga gagamu na kayu. Kunnatun gapa, awayyana nga naka-ekspiriensa ka tu stress turi ta nagali ka ta tanakuan nga kongregasion. Ta dati nga kongregasiommu, “negamu” ka ngana ta madukko nga pakkorofun anna egga regular nga rutinam ta passerbi kani Jehova. Mawag mu gapa nga mamattalovu tu bagu ira nga gamu ta bagu nga pallevu. Anni i makoffun nikaw nga makua yatun? Iyaplika i prinsipio ira na Biblia. Ikonsidera tam i karuan.
I tolay nga regular nga mabbibbig tu Uvovug na Dios ay “kagitta na i kayu nga nemula ta pipi na weg ira; mavvunga ta tiempo nga kepangngattan na anna ari vuluvuga nga makkatang i don na ira. Ngamin i kuan na ay mattuppal ta mapia.”—Sal. 1:1-3.
Kagitta na kayu nga mawag tu regular nga makala tu suplay na danum tapenu matolay, mawag gapa na tadday nga Cristiano nga regular nga kuman tu Uvovug na Dios tapenu kanayun nga masikan ta espiritual. Yatutta, inaggaw nga bibbigan i Biblia anna regular nga magatende ta study ira. Itulu-tuloy i makasta nga rutina nga paddayarayaw na familia anna personal nga paggigiammu. Ngamin nga kingnguam dati tapenu kanayun nga masikan i relasiommu kani Jehova, mawag tu itulu-tuloy mu nga kuan danatun.
“I sinni laman nga marrefresko ta tanakuan ay marefreskowan gapa.”—Prov. 11:25.
Mapasikakka anna mas alistu ka nga makibagay nu kanayukka mallawan. “I talaga nakoffun nikami na atawà ay i pa-auxiliary pioneer-mi insigida ta bagu nga kongregasiommi,” kunni Kevin, nga tadday nga elder. “Nakilalami insigida i wawwaragi, papayunir, anna nammuammi i teritoria.” Kinagi ni Roger nga nagali ta tadday nga lugar nga maturu tu 1,600 kilometro i karayyuna ta paddiananna: “I pallawan kanayun ta ministerio adde ta posible i pinakamakasta nga makua tapenu mabagayammu i bagu nga kongregasiommu. Ipakannammu gapa ta elder ira nga sigga-parakka nga manguffun ta maski anni nga pakawagan, awayyana ta pappakarenu ta Kingdom Hall, pabboluntario ta parte ta study nga ari metaddaggan, onu pangitakay ta wagi ta study ira. Nu masingan na wawwaragi i tadday nga bagu nga minassakrifisio, alistu daka makadukko.”
“Vukatan nu ta mapia i giffutuan nu!”—2 Cor. 6:13.
Palawannu i pangayanu ta wawwaragi. Turi ta nagali da Melissa anna familiana ta bagu nga kongregasion, kinaragatadda nga magaleg tu bagu ira
nga kofun. “Makikkistoria kami nige anna kabalin na study ira,” kunna. “Nakoffun yatun tapenu egga tiempomi nga makistoria anne ta basta pakkagi tu paddios laman.” Nakoffun gapa yatun ta nira nga alistu nga makabisadu i bagu ira nga ngagan. Fuera paga tatun, nappalawa ira gukaban na pamadulo, nga namatuyag ta bagu ira nga pavvurulun. “Nalami i kontak number-da anna nalada gapa i kontak number-mi,” kunna, “tapenu magalan kami anna melagum ta aktibidad ira na kongregasion anna ta tanakuan paga.”Nu maganassikka nga makiyuvovug ta bagu nga totolay, igafum ta baraddi nga gannug. Angngariganna, mangngizzi—maski ari ka komportable nga kuan ta gafu. Umaranni nikaw i tanakuan nu sigga-galo ka. Kakuruganna, “i masaya nga muka ay mamagayaya ta futu.” (Prov. 15:30, ftn.) “Talaga minappasirannà,” kunni Rachel, nga nagali ta lugar nga arayyu ta naddakallanna. Nu mittan, pilitakku paga i baggì tapenu makiyuvovug ta wawwaragi ta bagu nga kongregasiokku. Magaleg ngà tu agga-itubang ta Kingdom Hall nga ari vuluvuga nga makiyuvovug. Megafu ta baka minappasirang gapa yatun nga tolay nga kagittà.” Ngatta ariammu karagatan nga makiyuvovug ta tadday nga bagu nige anna kabalin na kada study?
Kunne na gapa, ta gafu baka magayaya ka nga makilala i bagu ira. Ngem ta pappasa na tiempo, awayyana tu ari ngana tu “bagu” i ganna-gannug. Tatun nga punto, baka mawag nga mas mappursigi ka nga itulu-tuloy nga mangngua tu bagu nga pakkorofun.
Nu meyali i fun na kayu, ma-stress gapa yatun, ngem sonu meyali ira, mattalovu gabbalaman i bagu nga gagamuda
SESENU NGA MAKIBAGAY
Egga i karuan ira nga fun na kayu nga mas mabayag nga megamu tu mapia ta bagu nga pallevu. Ari gapa tu para-parehu i kalistu na pakibagay na kada tadday ta bagu nga kongregasion. Nu nabayag ka ngana nga nakali ngem marigatakka paga nga makibagay, makoffun i pangiyaplika ta tumunug ira nga prinsipio na Biblia:
“Ari ittam nga molang nga mangngua ta mapia; ta nu ari nga makkafi i nono tam, gatabat-tam i balo tam noka nu duttal i tiempo na.”—Gal. 6:9.
Iddan tu mas aru nga tiempo i baggim nga makibagay anne ta inekspektam. Angngariganna, aru ta misionero ira nga nasanay ta Gilead i maddian labbi tu piga ragun ta asaymentda nigeda manoli ta naggafuadda nga nasion tapenu mabbisita. Makoffun yatun tapenu egga tiansada nga maddukko ta lokal nga wawwaragi anna makibagay ta tanakuan nga kultura.
Nalippawa ni Alejandro nga namippiga ngana nga nagali, nga ari nga mapalistu i proseso na pakibagay. Kunna: “Ta ultimo nga pagalimi, kinagi na atawà, ‘Egga ta dati nga kongregasiotta dua i ngamin nga kokkofukku!’” Niperaddam ni Alejandro sa nga kunnatun mangana i kinagina dua-ragun ngana i nappasa turi ta nagali ira. Ngem tatun nga dua-ragun, nangipasingan tu interes i atawana ta tanakuan yatutta nabbalin tu madukko nga kofunna i dati ira nga estrangheru.
“Ariammu kagian, ‘Ngatta mas makasta i dati ira nga aggaw anne ta maddaggun?’ megafu ta niyavu mu yaw ari nga megafu ta kinasirib.”—Ecl. 7:10.
Ariammu pakkumparan i bagu nga kongregasiommu ta naggafuammu. Angngariganna, baka mas minappasirang onu mas minaggistoria i wawwaragi ta bagu nga kongregasiommu anne ta dati nga nakasanayammu nga kongregasion. Maffokus 1 Ped. 2:17.
ta positibo ira nga ugalida, kagitta na kayà mu gapa nga paffokusadda nikaw. Egga ira i bagu ali nga natagenoda nga kawagadda iyavu ta baggida, ‘Talaga kari nga ayatakku i ngamin nga “wawwagi” ta pangurug?’—“Makkiddaw kamu ay keddak-kamu.”—Luc. 11:9.
Kanayun mappoffun gukaban na pakimallo. “Ariammu attamman yatun nga magitetadday,” kunna elder nga si David. “Aru i gannug nga makua tam megafu ta uffun laman ni Jehova. Ipakimallo tam yatun!” Umanugu si Rachel nga nakagi ta gafu. “Nu matagenomi na atawà nga gittana ari kami parte na kongregasion,” kunna, “espesipiko nga ipakimallomi kani Jehova, ‘Fabor bi laman nga ipalippawa mu nikami nu ngatta marigatan i karuan nga umaranni nikami.’ Tapus puruebammi nga mas makikavulu ta wawwaragi.”
Mappagana, nu marigatan i ánanu nga makibagay, makimallo kavulu ira meyannung taw nga gannug. Uffunan ira nga makaleg tu bagu nga kofun gukaban na pangiyunnug tu makapatuyag ira nga pavvurulu.
UFFUNAN I BAGU ALI IRA NGA MAKIBAGAY
Kunnasim moffunan danuri bagu ali ta kongregasiommu? Mappursigi nga mabbalin tu kurug nga kofun maski ta gafu paga laman. Tapenu makuam yatun, nonopammu nu anni ira nga gannug i appresiammu nu sikaw i bagu ali, tapus kuammu danatun. (Mat. 7:12) Awayyada kari nga melagum ta paddayarayaw na familianu onu ta vinulan nga programa na JW Broadcasting? Awayyam kari ira makapartner ta ministerio? Nu imbitammu ira kuman, maski simple laman, meraddammadda noka i pinamisitam nira. Anni paga i praktikal nga meyuffummu ta bagu ali ira?
“Ta paddattalmi ta bagu nga kongregasiommi,” kunni Carlos, “niddan kami na sister tu lista na lugar nga mappo ira i magatang. Dakal nga uffun yatun.” Maappresia danuri naggafu ta lugar nga tanakuan i klimana nga mammuan i mepangngo nga sinnun ta tiempo na patu, lammin, onu uran ta lugarnu. Awayyam gapa ira uffunan nga mas mabbalin tu efektibo ta ministerioda gukaban na pangiyistoria nira ta historia na komunidad onu ta relihiodda.
SULIT I PAPPURSIGI NGA MAKIBAGAY
Si Allen nga nakagi ta gafu ay maturu ngana nga tanga-ragun ta bagu nga kongregasionna. Neraddammanna: “Pilitakku i baggì ta gafu tapenu makilala i wawwaragi. Ngem ta maddaggun, familià ngana ira, anna magayaya ngà.” Nalippawa ni Allen nga ari napakarianan i kokkofunna. Nammungan lallagu i kofunna ira, nga siguradu nga mabbalin tu kofunna adde ta mannanayun.
^ par. 2 Natalianan i karuan nga ngagan.