1. Megafu ta liwa, anni i matageno na aru ta matalo nga aripan na Dios?

“PAKALLALLO ngà mabba ta kunnaw nga paddia-paddiak-ku!” (Roma 7:24) Matageno gapa na aru ta matalo nga aripan na Dios yatun nga kinagi ni apostol Pablo. Mazziga ittam ngamin megafu ta narensia nga liwa, anna nu mangngua ittam tu ari makemmemmi kani Jehova, mammiserable ittam. Matageno gapa na karuan nga Cristiano nga nakangngua tu tadday nga serioso nga liwa nga ari ira vuluvuga nga mapakoma na Dios.

2. (a) Kunnasi nipasingan na Salmo 34:22 nga ari nakuan nga madammakkan ta pakkakonsensia i aripan ira na Dios? (b) Anni i ikonsidera tam taw nga artikulo? (Innan i kahon nga “ Leksion onu Simboliko?”)

² Ngem, siniguradu na Katurakan nga danuri makiyegu kani Jehova ay ari nakuan ngana nga madammakkan na pakkakonsensia. (Bibbigan i Salmo 34:22.) Anni i nelagum ta pakiyegu kani Jehova? Anni ira nga dakkua i mawag nga kuattam tapenu malawà i allo anna pamakoma ni Jehova? Malà tam i tabbag tatun ira nga pakkiavu gukaban na pangikonsidera ta unnug na siudad ira nga pakiyegutan ta Israel gari. Naggafu yatun nga unnug ta Dob nga pakkasinabban, nga natalianan turi Pentecostes 33 C.E. Daddamman nga naggafu kani Jehova i Dob. Yatutta, magigiammu tam ta unnug  na siudad ira nga pakiyegutan i pagimamma ni Jehova ta liwa, nakaliwa, anna pabbabawi. Innattam labbi nu anni i gakkag anna keyusan natun ira nga siudad.

3. Kunnasi asikasuan na Israelita ira i kaso na sadya nga pamatay?

³ Serioso i pagimamma ni Jehova meyannung ta ngamin nga klase na pamatay ta Israel gari. I nanadya nga namatay ay patayan na karannian nga parientes nga lalaki na biktima, nga magalan tu “mangibalo ta daga.” (Num. 35:19) Megafu tatun, mapagan na namatay tu mismu nga inangona i inango na inosente nga napatena. Megafu ta insigida nga pangastigu, ari nga nadapingan i Nepromesa nga Davvun, ta nidob ni Jehova: “Ariannu dapingan i davvun nga paddianannu, megafu ta parittan na [pangivuvvu tu] daga [na totolay] i davvun.”​—Num. 35:33, 34.

4. Kunnasi maasikasu i kaso na aksidente nga pamatay ta Israel?

⁴ Kunnasi gapa nga asikasuan na Israelita ira i aksidente nga pamatay? Maski nu aksidente laman i nakuana, i aksidente nga nakapatay ay manattabbag lagapa ta daga na inosente nga napatena. (Gen. 9:5) Ngem megafu ta allo, mepamavulun nga tammangnganna i mangibalo ta daga anna umay yaya ta siudad nga pakiyegutan. Maproteksionan yaya tatun. Ari nakuan manaw ta siudad nga pakiyegutan i aksidente nga nakapatay adde ta patay na atannang nga pari.​—Num. 35:15, 28.

5. Kunnasi makoffun i unnug na siudad ira nga pakiyegutan tapenu mas malippawa tam si Jehova?

⁵ Ari tu tolay i nangitunno tatun ira nga siudad bilang siudad nga pakiyegutan. Si Jehova mismu i nangidog kani Josue: “Kagiammu ta Israelita ira, ‘Piliannu para ta bagginu i siudad ira nga pakiyegutan.’” Natunno yatun ira nga siudad bilang “sagrado nga paddianan.” (Jos. 20:1, 2, 7, 8) Megafu ta si Jehova mismu i nangitunno tatun ira nga siudad para ta espesial nga keyusan, baka meyavu tam: Kunnasi makoffun nittam yaw nga unnug tapenu mas manawag nga malippawa i allo ni Jehova? Anni i ituddu nittam natun nu kunnasi ittam nga makiyegu sa ta maddaggun?

6, 7. (a) Anni i papel na manakam ira ta pangukum ta aksidente nga nakapatay? (Innan i letratu ta gafu na artikulo.) (b) Ngatta kinasirib para ta pugante nga mappoffun ta manakam ira?

⁶ Nu aksidente nga nakapatay i tadday nga pugante, mawag labbi nga “iyarubanna i kasona ta pagginna na manakam ira” ta trangka na siudad nga pakiyegutan nga nattammangnganna. Mawag nga alawatadda yaya. (Jos. 20:4) Mappasa i piga tiempo, meyangay yaya uli ta manakam ira na siudad nga nesimmuan na pamatay, tapus ginnadda i kasona. (Bibbigan i Numeros 35:24, 25.) Kabalin laman nga medeklara nga aksidente i pamatay nga makatoli i pugante ta siudad nga pakiyegutan.

⁷ Ngatta melagum i manakam ira? Ira i mamattalupaddian ta kinarenu na kongregasion ta Israel anna moffunan danuri aksidente nga nakapatay nga mabbenefisio ta allo ni Jehova. Nitura na tadday nga iskolar na Biblia nga nu ari nga nappoffun i pugante ta manakam ira, “yaya lagapa i maperwisiu.” Kunna paga: “Nepay i dagana ta mismu nga uluna, megafu ta arianna nga inapprobetsa i seguridad nga niyawa na Dios para sa.” Egga i uffun para ta aksidente nga nakapatay, ngem kawagan nga alegan anna alawatanna yatun. Nu arianna nga makiyegu ta tadday ta siudad ira nga niyunnug ni Jehova, egga lallaguray na karannian nga parientes na napatena nga patayan yaya.

8, 9. Ngatta mappoffun nakuan ta elder ira i Cristiano nga nakaliwa tu madammo?

⁸ Ta maddaggun, mawag nga mappoffun ta elder ira i tadday nga Cristiano nga nakaliwa  tu madammo tapenu metoli i makasta nga relasionna kani Jehova. Ngatta importante yatun? Ollu, naggafu kani Jehova i unnug para ta elder ira nga asikasuan i madammo ira nga liwa, gittana mabibbig ta Uvovugna. (Sant. 5:14-16) Mekadua, protektan naw nga unnug i mabbabawi nga nattagaruli tapenu makapattalupaddian ta panangngal na Dios anna malillitan i pakatotoli nga liwa. (Gal. 6:1; Heb. 12:11) Mekatallu, napili anna nasanay i elder ira nga pasikannan i nono danuri mabbabawi nga nakaliwa, anna banna-bannayan ira ta taki anna pakkakonsensia. Tinukoy ni Jehova yaw ira nga lallakay nga “pakiyegutan ta bagiu.” (Isa. 32:1, 2, ftn.) Ariannu kari umanugu nga pangipasingan tu allo na Dios yaw nga unnug?

⁹ Aru ta aripan ira na Dios i napalubbangan megafu ta inaleg anna inalawada i uffun na elder ira. Angngariganna, nakaliwa tu serioso i brother nga mangngagan tu Daniel, ngem piga vulan nga magalangan yaya nga mappoffun ta elder ira. “Nappasa i apaddu nga tiempo,” kunna, “Abbo ku tu awan ngana tu maski anni nga meyuffun na elder ira niakan. Ngem, mavuru-vurung ngà lagapa ta resulta na kikkingnguà. Matageno ku nga mawag tu pegafuanakku tu pakkiddaw tu pamakoma i kada pakimallo ku kani Jehova megafu ta kingnguà ira.” Nappoffun gabbalaman si Daniel ta elder ira. Nu nonopanna i nappasa, kunna: “Talaga maganassing ngà nga umaranni nira. Ngem kabalinna, gittana egga i tadday nga nangalsa ta madammo nga kattu ta abagà. Makaranni ngà ngana kani Jehova nga awan tu makefugag niakan.” Ta maddaggun, marenu ngana i konsensia ni Daniel, anna kanni laman ay natunno yaya bilang ministerial nga aripan.

10. Tapenu makalawa tu allo, anni i mawag nga insigida nga kuan na aksidente nga nakapatay?

¹⁰ Kawagan nga magguyu i tadday nga aksidente nga nakapatay tapenu makalawa tu allo. Mawagna nga mattammang ta karannian nga siudad nga pakiyegutan. (Bibbigan i Josue 20:4.) Ari tu puede nga awan tu paki-alam na pugante; nakadepende i inangona ta insigida nga pakaddena tatun nga siudad anna pattalupaddian tatun! Sakrifisio yaw ta  partena. Mawawanna i trabahuna, i balena, anna i lallagurena nga mabbiahe​—adde ta patay na atannang nga pari. * (Num. 35:25) Ngem sulit yatun ira nga sakrifisio. Nu panawanna i siudad, ipasinganna nga awan tu pangikavurunna ta inango na napatena, anna mappeligro i mismu nga inangona.

11. Kunnasi mepasingan na nabbabawi nga Cristiano nga arianna abusuan i allo na Dios?

¹¹ Tapenu mabenefisiowan ta allo na Dios, mawag gapa nga magguyu danuri mabbabawi nga nakaliwa ta maddaggun. Mawag gapa tu interamente nga panawattam i minalliwa ira nga annangngua, nga tammangngattam ari laman danuri madammo nga liwa, nu ari, maski danuri baraddi nga liwa nga mattuppal ta serioso ira nga pakaliwatan. Nainspiran nga nitura ni apostol Pablo i kingngua danuri nabbabawi nga Cristiano ta Corinto. Kunna: “I vunga natun nga paddaraddam nga niyusa na Dios; nattalikarag kamu, anna mas ngana i pakkaraga nu nga mamakurug tu awan tu naliwatan na! Ikalussaw nu ngana i baggi nu, minay nikamu i assing, karagatan nu i panolì, anna karagatan nu paga ngana tu makastigo i nakaliwa!” (2 Cor. 7:10, 11) Nu mappursigi ittam nga panawan i minattagaruli nga dalattam, mepasingattam nga ari ittam nga makkampante, nga abusuan i allo ni Jehova.

12. Anni ira i mawag nga isakrifisio na tadday nga Cristiano tapenu tulu-tuloy nga malawàna i allo na Dios?

¹² Anni i mawag nga isakrifisio na tadday nga Cristiano tapenu tulu-tuloyna nga malawà i allo na Dios? Sigga-paran nakuan yaya nga isakrifisio onu battangan danuri meddu sa nu tagatadda yaya ta liwa. (Mat. 18:8, 9) Nu influwensiannaka na kokkofummu nga mangngua tu gannug ira nga ari makemmemmi kani Jehova, iyemmammu kari i pakikavvulu nira? Nu marigatakka nga kontrolan i paginummu tu binarayang, sigga-parakka kari nga ibita i situasion ira nga manenta nikaw ta sobra nga paginum? Nu laba-labanammu i imoral ira nga pakkaraga, lisiammu kari i maski anni nga pelikula, website, onu maski anni nga mamalattuag tu madaping ira nga appanono? Daddamman, sulit i anni laman nga sakrifisio tam tapenu mapattalupaddiattam i integridad kani Jehova. Awan ngana tu mas mataki paga anne ta panawan ittam ni Jehova. Kunne na gapa, awan ngana tu mas makapagayaya anne ta ‘mannanayun nga matalo nga ayana.’​—Isa. 54:7, 8.

13. Iyesplika nu ngatta memammo anna makapagayaya i pattolay na pugante ta unag na siudad nga pakiyegutan.

¹³ Nu nakatallung ngana ta siudad nga pakiyegutan i pugante, ari ngana yaya mappeligro. Meyannung tatun ira nga siudad, kinagi ni Jehova: “Masserbi danatun nga pakiyegutammu.” (Jos. 20:2, 3) Ari nikiddaw ni Jehova ta nakapatay nga ukuman mangana ta parehu nga kaso, anna ari gapa nga mepermiso nga tullung ta siudad i mangibalo ta daga tapenu patayanna i pugante. Arianna vuluvuga maganassing nga mabalakkan yaya. Ta keggana ta siudad, memammo anna protektadu yaya ni Jehova. Ari tu affukutan yaw nga siudad. Awayyana mattrabahu, uffunan i tanakuan, anna memammo nga masserbi kani Jehova taw nga siudad. Wan, posible i makapagayaya anna malanna-lanno nga pattolay!

14. Anni i pakkomfiansan na nabbabawi nga Cristiano?

¹⁴ Makonsensia lagapa i karuan nga totolay na Dios nga nakaliwa tu serioso maski nu nabbabawi ngana ira. Matageno paga na karuan nga ari vuluvuga nga kattamman ni Jehova i kingnguada. Nu kunnatun i matageno mu, makasiguradu ka nga permanente  i pamakoma ni Jehova nikaw! Ariammu ngana kawagan nga makonsensia. Natageno yaw ni Daniel nga nakagi ta gafu. Kabalin yaya nga tinunung na elder ira anna inuffunan tapenu mapeggan tu marenu nga konsensia, kunna: “Mas makenango ngà ngana uli. Kabalin nga naayus yatun nga gannug, ariakku ngana makonsensia. Nu nari ngana i liwa, awang ngana. Kagitta na kinagi ni Jehova, alsanna i mamakadammo nikaw anna iyarayyuna yatun. Ariammu ngana vuluvuga masingan danatun.” Nu egga ta unag na siudad nga pakiyegutan i pugante, arianna ngana kawagan nga kuruga mavurung ta mangibalo ta daga. Kunnatun gapa, nu pinakoma ngana ni Jehova i liwa tam, ariattam ngana maganassing nga palattuaganna uli yatun onu usan tapenu ukuman ittam.​—Bibbigan i Salmo 103:8-12.

15, 16. Kunnasi mapaladda i pakkomfiansam ta allo na Dios megafu ta papel ni Jesus bilang Taga-tavvu anna Atannang nga Pari?

¹⁵ Ta kakuruganna, mas aru paga i rasottam anne ta Israelita ira nga makkomfiansa ta allo ni Jehova. Kabalin nga kinagi ni Pablo nu kunnasi kamiserable yaya megafu ta arianna perfekto nga natuppal si Jehova, nakagina: “Mabbala-balo ngà ta Dios, ta paliaran nà gafu kani Jesu-Cristo nga Yafu tam!” (Roma 7:25) Wan, maski laba-labananna i liwa anna i nappasa nga kingnguana​—nga nabbabawyanna ngana—​kumbinsidu si Pablo ta pamakoma na Dios gukaban ni Jesus. Bilang i Taga-tavvu tam, pakarenuan ni Jesus i konsensia tam anna iddanna ittam tu memammo nga panageno. (Heb. 9:13, 14) Bilang Atannang nga Pari tam, “awayya na nga paliaran sangoye, anna adde noka, danuri i umaranni ta Dios gafu sa, ta matolay yaya adde noka nga mangipepakimallo nira ta Dios.” (Heb. 7:24, 25) Nu i papel na atannang nga pari ay tapenu ipasiguradu ta Israelita ira nga mapakoma i liwi-liwada, yammanno paga i serbisio na Atannang nga Pari nga si Jesus, nga ipasiguraduna nittam nga “alawatat-tam i allo anna bendision nga manguffun nittam ta tiempo na pagawag tam.”​—Heb. 4:15, 16.

¹⁶ Tapenu iyegu gafu ittam ni Jehova, ipasingattam i pangurug tam ta sakrifisio ni Jesus. Ariattam nonopan nga meyaplika laman ta ngamin nga totolay i tavvu. Mangurug tam lallagu nga personal nga mabenefisiowattam taw nga tavvu. (Gal. 2:20, 21) Mangurug nga i tavvu i basehan na pamakoma ta liwi-liwa mu. Magiddanama ka ta mannanayun nga inango megafu ta tavvu. Regalu ni Jehova nikaw i sakrifisio ni Jesus.

17. Ngatta kayà mu nga makiyegu kani Jehova?

¹⁷ Refleksion na allo ni Jehova i siudad ira nga pakiyegutan. Megafu taw nga unnug, ari laman nepatalatto na Dios i kinasagrado na inango, nu ari, nepasinganna gapa nu kunnasi ittam uffunan na elder ira, nu anni i nelagum ta pabbabawi, anna nu ngatta interamente nga makapakkomfiansa ittam ta pamakoma ni Jehova. Makiyegu ka kari kani Jehova? Awan ngana tu tanakuan nga lugar nga mas mangirayyu nittam ta peligro! (Sal. 91:1, 2) Ta tumunug nga artikulo, gigiammuattam nu kunnasi makoffun nittam i siudad ira nga pakiyegutan tapenu parigan i kapianan nga ehemplo na hustisia anna allo ni Jehova.