1. Anni i makoffun nittam nu matageno tam nga magitetadday ittam anna kattam marubang i problema? (Salmo 118:5-7)

NATAGENO mu ngana kari nga magitetadday ka anna awan vuluvuga tu makoffun nikaw ta problema nga ara-arubangammu? Aru gapa i nakatageno tu kunnatun, nelagum ngana i matalo ira nga aripan ni Jehova. (1 Pat. 19:14) Nu kunnatun i situasiommu, daddammammu i promesa ni Jehova: “Ariat-taka vuluvuga nga panawan, ni et-taka nga pagurayan.” Yari tu sigga-komfiansa nga makagi tam: “I Yafu [nga Jehova] i manguffun niakan, awan tu ek-ku nga paganassingan.” (Heb. 13:5, 6) Nitura ni apostol Pablo danatun nga uvovug para ta Cristiano ira ta Judea turi 61 C.E. Iperaddam nittam gapa natun i nitura na salmista ta Salmo 118:5-7.​—Bibbigan.

2. Anni i gigiammuattam taw nga artikulo, anna ngatta?

² Kagitta na salmista, naekspiriensa mismu ni Pablo i panguffun nisa ni Jehova. Angngariganna, maturu tu dua ragun nigena pinadday i turana ta Hebreo, kuruga delikadu i pinabbiahe ni Pablo ta bebay. (King. 27:4, 15, 20) Nige natun nga pabbiahena, namippiga ngana yayya nga inuffunan ni Jehova. Innattam i tallu nga inusa ni Jehova tapenu uffunan yayya: si Jesus anna i anghel ira, totolay nga egga autoridadna,  anna i kapangngurugna ira. I pangammu taw nga nesimmu ta pattolay ni Pablo i mamattuyag ta pattalo tam ta promesa na Dios nga tabbaganna gapa i pakimallo tam para ta uffun.

3. Anni i posible nga nanono ni Pablo, anna ngatta?

³ Kawagan ni Pablo i uffun. Turi ta ma-56 C.E., ginuggung yayya na totolay tapenu ilawan ta templo ta Jerusalem anna kayàda yayya nga patayan. Ta tumunug nga aggaw, turi ta niyangeda si Pablo ta Sanhedrin, maggi yayya napatay na kalabanna ira. (King. 21:30-32; 22:30; 23:6-10) Tatun nga tiempo, posible nga nanono ni Pablo, ‘Maattammakku kari paga yaw nga pammaltratu?’

4. Kunnasi inuffunan ni Jehova si Pablo gukaban ni Jesus?

⁴ Kunnasi noffunan si Pablo? Ta gabi kabalin nga naaresto ni Pablo, nanaddag “i Yafu” nga si Jesus ta bikona anna kinagina sa: “Ari ka maganassing! Pinakurug mu i meyannung niakan taw ta Jerusalem, mawag tu kuam-mu gapa yaw ta Roma.” (King. 23:11) Kuruga makapagaram yatun nga kinagi ni Jesus. Kinomendanna si Pablo ta pinallayyagayyana ta Jerusalem anna nipromesana nga maski anni i mesimmu kani Pablo, makadde yayya ta Roma anna makapallayyagayya paga tari. Kabalin natun, nabanna-bannayan yayya nga kunna abbing nga ginakkopan na yamana.

5. Kunnasi inuffunan ni Jehova si Pablo gukaban na anghel? (Innan i letratu ta vungun.)

⁵ Anni paga i karuan nga problema nga neparubang kani Pablo? Maddua ragun nige natun nga nesimmu ta Jerusalem, nakatakay si Pablo ta barku mappange ta Italia turi ta egga i nadafudda nga masikan nga bagiu. Pagabbo na nakatakay ira nga matay ngana ira. Ngem ari nga naganassing si Pablo. Ngatta? Kinagina ta nakatakay ira: “Nappasingan niakan turi ta gabi i anghel na Dios nga makakkua niakan anna paddaya-rayawak-ku. Kinagi na niakan, ‘Ari ka nga maganassing, Pablo! Mawag tu umarubang ka ta Emperador. Megafu laman nikaw ay paliaran na Dios ngamin i nakipabbiahe nikaw.’” Inusa ni Jehova i tadday nga anghel tapenu ikagi uli i promesana kani Pablo nga kinagi ni Jesus ta gafu. Talaga nesimmu yatun. Nakadattal si Pablo ta Roma.​—King. 27:20-25; 28:16.

6. Anni i promesa ni Jesus, anna ngatta makapasikan yatun?

⁶ Kunnasi ittam moffunan? Kagitta ni Pablo, uffunan ittam gapa ni Jesus. Angngariganna, nipromesa ni Jesus ta taga-tuttulna ira:  “Kanayun ngà makitappaddian nikamu adde ta panuppalan na mundo.” (Mat. 28:20) Mapasikan ittam na kinagi ni Jesus. Ngatta? Megafu ta egga ira i tiempo nga makkafi i nono tam. Angngariganna, maraddam ittam tu piga nga aggaw onu piga nga ragun nu matayan ittam tu iddeddukattam. Marigatan gapa i karuan megafu ta pabbako onu pallakay. Egga gapa i tiempo nga madepres i karuan. Maski kunnatun, makapagattam ittam megafu ta “kanayun” nga kavulu tam si Jesus maski ta pinakamariga nga situasion nga arubangattam.​—Mat. 11:28-30.

7. Segun ta Nepakannammu 14:6, kunnasi ittam uuffunan ni Jehova sangawe?

⁷ Ipasiguradu nittam na Biblia nga uffunan ittam ni Jehova gukaban na anghelna ira. (Heb. 1:7, 14) Angngariganna, suportan anna igiya ittam na anghel ira nu ilayyagayya tam i ‘mapia nga dumug na Pammaguray na Dios’ ta totolay ira nga “madduma-ruma i rasa, tribu, paguvovug, anna nasion.”​—Mat. 24:13, 14; bibbigan i Nepakannammu 14:6.

8. Kunnasi inuffunan ni Jehova si Pablo gukaban na dakal na suddalu?

⁸ Kunnasi noffunan si Pablo? Turi ta 56 C.E., nipromesa ni Jesus kani Pablo nga makadde yayya ta Roma. Ngem niplano na karuan nga Judio ta Jerusalem nga tarangalladda si Pablo tapus patayadda yayya. Turi ta nammuan na dakal na suddalu na Roma nga si Claudio Lisias yatun nga plano, inuffunanna si Pablo. Insigida nga zinog ni Claudio i aru nga suddalu tapenu protektadda si Pablo mappange ta Cesarea. Ma-105 kilometro i karayyu natun ta Jerusalem. Turi ta egga ta Cesarea si Pablo, nimandu ni Gubernador Felix nga mefuku yayya ta palasio ni Herodes. Gafu tatun, ari ngana mapatay na Judio ira si Pablo.​—King. 23:12-35.

9. Kunnasi inuffunan ni Gubernador Festo si Pablo?

⁹ Nappasa i dua ragun, agga-fuku lagapa si Pablo ta Cesarea. Sinalianan ngana ni Festo si Gubernador Felix. Nikiddaw na Judio ira kani Festo nga mabista i kaso ni Pablo ta Jerusalem ngem manaki ni Festo. Ammuna gare nga ‘para-paranan na Judio ira nga papatayan si Pablo ta dalan.’​—King. 24:27–25:5.

10. Anni i kingngua ni Gubernador Festo turi ta nikiddaw ni Pablo nga i Emperador i maddisidi ta kasona?

¹⁰ Nabista i kaso ni Pablo ta Cesarea. Megafu ta ‘ikaya ni Festo nga pagustuan i Judio ira,’ niyavuna kani Pablo: “Ikaya mu i umay ta Jerusalem tapenu disidiak-ku i kasom tari?” Ammu ni Pablo nga baka patayadda yayya ta Jerusalem ngem ammuna gapa i kuanna. Umay yayya ta Roma tapus mallayyagayya tari. Yatutta kinagina: “Ikiddò tu i Emperador i maddisidi ta kasò.” Nakibbida labbi si Festo ta gumattabarang ira nisa tapus kinagina kani Pablo: “Gafu ta nikiddom tu i Emperador i maddisidi ta kasom, umay ka gafu ta Emperador.” Megafu tatun nga desision ni Festo, nakadde si Pablo ta Roma. Arayyu ngana yayya turi ira ta Judio nga mangigato nisa.​—King. 25:6-12.

11. Anni i pinannonopan ni Pablo nga kinagi ni Isaias?

¹¹ Ta paginnag ni Pablo ta pabbiahena mappange ta Italia, awayyana nga nanonona i kinagi ni profeta Isaias turi ira ta mangokkontra kani Jehova: “Mapplano kamu, ngem akkanna metuppal yatun! Ikaginu i kayànu, ngem akkanna mesimmu, ta i Dios ay egga nikami!” (Isa. 8:10) Ammu ni Pablo nga uffunan yayya na Dios. Yatun i namasikan ta nonona tapenu marubanna paga i kapurueba ira ta mappange.

12. Kunnasi trinatu ni Julio si Pablo, anna anni i nalippawa ni Pablo megafu tatun?

 ¹² Nabbiahe si Pablo mappange ta Italia turi 58 C.E. Megafu ta tadday yayya nga presu, kargo yayya na ofisial na suddalu na Roma nga si Julio. Egga i autoridadna nga parigatan si Pablo onu mabbalin tu masippo nisa. Kunnasina tamma usan i autoridadna? Ta ollu nga pagimmadda ta tumunug nga aggaw, ‘nipamavulun ni Julio tu mabbisita si Pablo ta kokkofunna.’ Pinrotektan paga lagu ni Julio si Pablo. Nigammana i plano na suddalu ira nga patayan i ngamin nga presu ta barko. Ngatta? “Ikaya na nga paliaran si Pablo.” Nalippawa ni Pablo nga usu-usan ni Jehova yatun nga masippo nga ofisial tapenu uffunan anna protektan yayya.​—King. 27:1-3, 42-44.

13. Kunnasi paguyuan ni Jehova danuri egga autoridadda?

¹³ Kunnasi ittam moffunan? Usu-usan ni Jehova i makapangngua nga masanto nga espiritu tapenu paguyuan danuri egga autoridadda nga ituppal i gakkagna. Nitura ni Patul Solomon: “I futu na patul ay gittana umaga-agi nga danum ta lima ni Jehova. Ifuntana yatun nu sitaw i kayàna.” (Prov. 21:1) Kunnasi mesimmu yatun? Angngariganna, makkokkog i totolay tu paddalanan na danum tapenu mefuntada i danum ta direksion nga kayàda. Usu-usan gapa ni Jehova i espirituna tapenu idirekta i appana-panono na mammaguray ira nga ituppal i gakkagna. Gafu tatun, mapaguyu ira nga magangngua tu desision nga pammakapianan na totolay na Dios.​—Ikumpara i Ezra 7:21, 25, 26.

14. Segun ta Kingngua 12:5, sinni ira i ipakimallo tam?

¹⁴ Anni i kuattam? Awayya tam nga ipakimallo i desision ira nga kuan na “patul ira tuange ta ngamin nga mammaguray” nga makafekto nittam nga Cristiano. (1 Tim. 2:1, 2; Neh. 1:11) Awayya tam gapa ipakimallo i nefuku ira nga wawwaragi tam, gittana kingngua na ollu-siglo ira nga Cristiano. (Bibbigan i Kingngua 12:5; Heb. 13:3) Ipakimallo tam gapa maski danuri magguardia ta nefuku nga wawwaragi tam. Kiddawattam kani Jehova nga paguyuanna ira tapenu mangipasingan ira tu “allo” ta kapangngurug tam ira gittana kingngua ni Julio.

15-16. Kunnasi inuffunan ni Jehova si Pablo gukaban da Aristarco anna Lucas?

¹⁵ Kunnasi noffunan si Pablo? Ta pabbiahena mappange ta Roma, mamippiga yayya  nga inuffunan ni Jehova gukaban na kapangngurugna ira. Innattam i karuan tatun.

¹⁶ Vinulu da Aristarco anna Lucas si Pablo mappange ta Roma * maski nu ari ira nga nepromesan ni Jesus nga makadde ira tari nga sigga-matolay. Kingnguada yatun megafu ta matalo ira nga kokkofun ni Pablo. Pinappeligroda i inangoda maski nu tari pagalaman ta pinabbiaheda nga nakannammuan nga ari ira nga matay. Turi ta nattakay ngana da Aristarco anni Lucas ta barko ta Cesarea, siguradu nga nappappabalo si Pablo kani Jehova megafu ta dua nga magutu nga wawwagi nga namulu nisa.​—King. 27:1, 2, 20-25.

17. Kunnasi inuffunan ni Jehova si Pablo gukaban na wawwaragi?

¹⁷ Ta pabbiahe ni Pablo, namippiga yayya inuffunan na wawwaragi. Ta pagimmadda ta Sidon, ‘nipamavulun ni Julio tu mabbisita yayya ta kakkofunna tari tapenu awayyada yayya nga uffunan ta mawagna.’ Turi ta nakadde da Pablo anna kavuluna ta siudad na Puteoli, ‘egga i nasimmuadda tari nga wawwagi ta angngurug nga nagimbita nira tu makitappaddian ira labbi nira tu tanga-ligguan.’ Durante ta paddiadda tatun, niyawa na wawwaragi i pakawagadda ira tapus siguradu gapa nga niyistoria ni Pablo i makapagaram ira nga ekspiriensada. (Ikumpara i Kingngua 15:2, 3.) Kabalin na makapagaram nga pabbisitada, nabbiahe uli si Pablo anna i kakavvuluna.​—King. 27:3; 28:13, 14.

18. Ngatta nappabalo si Pablo ta Dios anna nassikan i nonona?

¹⁸ Ta pallakag ni Pablo mappange ta Roma, awayyana nga nanonona i niturana para ta kongregasion tatun nga siudad tallu ragun ngana i nappasa: “Aru ngana nga dagun nga ikaya ku tu et-ta kamu nga innan.” (Roma 15:23) Ngem arianna ekspektan tu duttal yayya tatun bilang tadday nga presu. Yatutta napagaram yayya nga masingan i wawwaragi ta Roma nga magigginnag nga dumafung nisa. “Ta pakasingan ni Pablo nira, nabbala-balo  yaya ta Dios, ay nassikan i nono na.” (King. 28:15) Ngatta nappabalo yayya? Megafu ta nasinganna i panguffun ni Jehova gukaban na wawwaragi.

19. Segun ta 1 Pedro 4:10, kunnasi ittam usu-usan ni Jehova tapenu uffunan danuri nakkafi i nonoda?

¹⁹ Anni i kuattam? Egga kari i kakongregasiommu nga nakkafi i nonona megafu ta nattaki yayya, natayan, onu tanakuan paga nga problema? Nu egga, ikiddaw tam kani Jehova tu uffunanna ittam nga mangipasingan tu aya ta wagi tam ta kakkagian anna kukukuattam. Awayyana tu yatun i mamasikan ta nonona. (Bibbigan i 1 Pedro 4:10.) * Nu kuattam yatun, metoli i komfiansana ta promesa ni Jehova nisa nga: “Ariat-taka vuluvuga nga panawan, ni et-taka nga pagurayan.” Siguradu nga magayayya ittam tatun!

20. Ngatta sigga-komfiansa tam nga mekagi: “I Yafu [nga Jehova] i manguffun niakan”?

²⁰ Gittana nesimmu kani Pablo anna ta kakavvuluna, meparubattam gapa ta kakkaru nga problema. Ngem masikan i nono tam megafu ta uffunan ittam ni Jehova. Kukukuanna yatun gukaban ni Jesus anna na anghel ira kunne na gapa i totolay nga egga autoridadda. Gittana naekspiriensa na aru nittam, paguyuan ni Jehova i aripanna ira gukaban na masanto nga espiritu tapenu uffunan i wawwaragi. Kagitta ni Pablo, sigga-komfiansa tam nga mekagi: “I Yafu [nga Jehova] i manguffun niakan, awan tu ek-ku nga paganassingan. Anni i makua na tolay niakan?”​—Heb. 13:6.