1. Segun ta Mateo 28:18-20, anni i nibilin ni Jesus?

KABALIN na paginnolay ni Jesus, nappasingan yayya ta disipulosna ira ta Galilea. Egga gare i importante nga ikagina nira. Anni yari? Mabibbig yatun ta Mateo 28:18-20.​—Bibbigan.

2. Anni ira nga pakkiavu i ikonsidera tam?

² Magaplika gapa i bilin ni Jesus nga magangngua tu disipulos ta aripan ira na Dios ta kaggawattam. Ikonsidera i tallu nga pakkiavu meyannung ta trabahu nga niyawa ni Jesus ta nittam. Ollu, anni paga i mawag tam nga kuan fuera ta pangituddu ta kiddaw ira na Dios ta bagu ira nga disipulos? Mekadua, kunnasi nga makaduffun i ngamin nga miembro na kongregasion ta papprogreso na Bible study? Mekatallu, kunnasi tam moffunan i inactive ira nga wawwaragi tam nga makiparte uli ta trabahu nga pagangngua tu disipulos?

3. Anni i kinagi ni Jesus nga mawag tu kuattam?

³ Manawag nga kinagi ni Jesus nga ituddu tam ta totolay i nibilinna ira. Ngem daddammattam nga ari laman nga kinagi ni Jesus nga ‘tudduannu ira ta ngamin nga bili-bilikku nikamu.’ Kinagina lallagu nga ‘tudduannu ira tu parulattadda ngamin i bili-bilikku nikamu.’ Tapenu matuttul yatun nga bilin, ituddu tam ta Bible study tam nu anni i kuadda anna ipasingattam gapa nu kunnasida nga kuan yatun. (King. 8:31) Ngatta kunnatun i kuattam?

4. Anni nga angngarigan i mangipasingan nu kunnasi tam ituddu ta Bible study tam nga parulattan i nibilin ni Jesus?

 ⁴ Kunnasi tam matudduan i tanakuan tapenu parulattadda i bili-bilin ni Cristo? Pannonopan yaw nga angngarigan. Anni i kuan na tadday nga manuddu tapenu mammuan na estudiantena i mawag ira nga tuttulanna ta pammaneho? Ikagina tu ollu nu anni ira nga gannug i mepamavulun ta pammaneho anna nu anni ira i megamma. Ngem fuera paga tatun, mawag tu vulunanna yayya ta pammaneho tapus tudduanna yayya nu kunnasina aktual nga meyaplika i nagigiammuna. Anni i magigiammu tam tatun?

5. (a) Segun ta Juan 14:15 anna 1 Juan 2:3, anni paga i mawag nga ituddu tam ta Bible study tam? (b) Mangiyawa tu angngarigan nu kunnasi tam makua yatun.

⁵ Nu mab-Bible study ittam, ari tu makalanno nga ituddu tam ta Bible study tam i ikikkiddaw na Dios nittam. Mawag gapa nga tudduattam yayya nga iyaplikana ta inaggaw nga pattolena i magiggigiammuna. (Bibbigan i Juan 14:15; 1 Juan 2:3.) Gukaban na kukukuattam, mepasingattam ta Bible study tam nu kunnasida nga meyaplika i prinsipio ira na Biblia ta eskuela, ta pattrabahuan, onu nu maddibersion ira. Awayya tam nga iyistoria nira nu kunnasi nga nakoffun i pangiyaplika tam ta prinsipio ira na Biblia tapenu maprotektan ittam ta perwisio onu tapenu makangngua ittam tu makasta nga desision. Ipaginna tam ta Bible study tam ira nga ipaka-pakimallo tam ira kani Jehova nga igiya ira na masanto nga espirituna.—Juan 16:13.

6. Anni paga i kuattam tapenu matudduattam i Bible study tam nga parulattan i bili-bilin ni Jesus?

⁶ Anni paga i kuattam tapenu matudduattam i Bible study tam nga parulattan i bili-bilin ni Jesus? Mawag tu uffunattam ira tapenu mapaguyu ira nga mangngua tu disipulos. Egga ira i Bible study nga maganassing nga mallayyagayya. Yayya nga pasensiattam nga mas ipalippawa nira i ituttuddu ira na Biblia tapenu mas massikan i pangurugda, madde i futuda, anna mapaguyu ira nga mallayyagayya. Anni gafu i kuattam tapenu mapaguyu i Bible study ira nga ilayyagayya i mapia nga dumug?

7. Anni i kuattam tapenu mapaguyu i Bible study ira nga ilayyagayya i mapia nga dumug?

⁷ Iyavu tam ta Bible study tam: “Anni ira i makasta nga nesimmu nikaw turi ta nagigiammum i ituttuddu na Biblia? Mawag kari gapa nga mammuan yatun na tanakuan? Anni i kuammu tapenu moffunammu ira?” (Prov. 3:27; Mat. 9:37, 38) Ipasingammu nisa i tract ira ta Teaching Toolbox tam tapus iyavu mu nisa nu anni tatun ira nga tract i baka kayà nga bibbigan na parientes, kokkofun, onu katrabahuna. Iddammu yayya tu aru nga kopia natun ira nga tract. Mappraktis kamu tapenu metuddum nisa nu kunnasi nga efektibo nga mepalima danatun nga tract. Sonu unbaptized publisher ngana yayya, vulunattam yayya ta pallayyagayya.​—Ecl. 4:9, 10; Luc. 6:40.

8. Ngatta mawag tu dakal i pangaya na Bible study tam ta Dios anna ta kasittolena? (Innan gapa i kahon nga “ Nu Kunnasi nga Moffunan i Bible Studym nga Mas Ayatanna i Dios.”)

⁸ Nidob nittam ni Jesus nga tudduattam i tanakuan nga ‘parulattadda i ngamin nga bili-bilinna’ nittam. Nelagum tatun i dua nga pinaka-importante nga bilin​—ayatammu i Dios anna ayatammu i kasittolem. (Mat. 22:37-39) Mawag tu ayatattam i Dios anna i kasittoletam ta yatun i mamaguyu nittam nga mallayyagayya. Awayyana nga maganassing i karuan nga Bible study nga mallayyagayya  ngem pagarammattam ira nga sisinu nga malabanadda i paganassing ta uffun ni Jehova. (Sal. 18:1-3; Prov. 29:25) Mabibbig ta kahon naw nga artikulo nu anni ira i makua tam tapenu moffunan i Bible study tam ira nga mas dumakal i pangayada ta Dios. Anni gapa i kuan na kongregasion tapenu moffunadda i Bible study ira nga mas nga makepasingan tu aya?

9. Anni i kuan na maggigiammu nga mammaneho tapenu ammuna sangaw i kuanna nu yayya ngana laman i mammaneho?

⁹ Toliattam i angngarigan na maggigiammu nga mammaneho. Durante nga yayya i mammaneho tapus kabikona ta kotse i manuddu nisa, anni i kuanna tapenu makagigiammu yayya? Mawag tu ginnanna i mekagi nisa anna obserbanna i tanakuan ira nga mammaneho. Angngariganna, ipasingan na manuddu nisa nga egga i masippo ira nga drayber nga pagurayadda nga magovertake i tanakuan nga takay. Ipasinganna gapa nisa danuri ikafida i headlight-da tapenu ari nga matulang i karuan nga drayber. Makoffun i kuddanatun nisa tapenu ammuna sangaw i kuanna nu yayya ngana laman i mammaneho.

10. Kunnasi paga nga mapprogreso i Bible study?

¹⁰ Nu mamegafu ngana gapa nga masserbi kani Jehova i Bible study, ari laman tu ta nangistudy nisa i pakagigiammuanna, nu ari, ta makasta ira nga ehemplo na tanakuan nga aripan ni Jehova. Anni paga gafu i makoffun nira tapenu mapprogreso? Mawag tu magatende ira ta study. Ngatta? Nu makistudy ira, mas umaru i pakannammuda, mapaladda i pangurugda, anna mas dumakal i pangayada ta Dios. (King. 15:30-32) Ta study gapa nga awayya yayya nga iyammammu na mangistudy nisa ta wawwaragi nga kaparehuna tu ekspiriensa ta pattolay. Masinganna ta kongregasion nu kunnasi nga ipasa-pasingan na wawwaragi i aya ta tanakuan. Innan i tumunug ira nga angngarigan.

11. Anni ira i ehemplo nga maobserba na Bible study ta kongregasion, anna anni i awayyana nga efekto natun nisa?

¹¹ Oobserban na single mother nga Bible study i tadday nga sister nga kaparehuna tu situasion. Nakagigiammu yayya ta passakrifisio natun nga sister nga umu-umay lagapa ta Kingdom Hall kavulu i baraddi nga ánana. Marigatan gapa i tadday nga Bible study nga iyemmang i passigariliu. Tapus nakilalana i tadday nga brother nga dati gapa nga nakkaproblema tatun nga bisiu. Kinagi natun nga brother ta Bible study nga megafu ta ayatanna si Jehova, nawayyana nga tuttulan i bili-bilinna. (2 Cor. 7:1; Fil. 4:13, NW) Niyistoriana gapa nu anni ira i kingnguana tapenu meyemmanna i passigariliu. Tapus kunna nisa, “Kayam gapa yatun.” Megafu tatun, napagaram yayya anna nakkomfiansa nga makuana gapa yatun. Napansin gapa na kabataan nga Bible study nga magayayya i tadday nga kabataan nga Saksi. Megafu tatun, kayàna nga mammuan nu ngatta kanayun nga magayayya i sister.

12. Anni i makua na kada tadday ta kongregasion tapenu makoffun ta Bible study ira?

¹² Nu aru i makilala na Bible study nga matalo nga wagi, mammuanna nira nu kunnasi nga matuttul i bilin ni Cristo nga ayatan i Dios anna i kasittolay. (Juan 13:35; 1 Tim. 4:12) Gittana nakagi ta nappasa nga parapo, makagigiammu i Bible study ta wawwaragi nga kaparehuda tu situasion. Danatun i mangipasingan nisa nga mawayyana gapa i manguli tapenu mabbalin yayya tu disipulo ni Cristo. (Deut. 30:11) Aru gafu i makua na kada tadday ta kongregasion tapenu moffunan i Bible study ira nga mapprogreso. (Mat. 5:16) Anni gapa i kukukuammu tapenu  mapagarammu i Bible study ira nga umu-umay ta study?

13-14. Kunnasi nga trinatu ni Jesus i apostolesna nga nakkafi i nonoda?

¹³ Kayà tam nga uffunan danuri inactive nga wawwaragi tam tapenu matuppalda uli i bilin ni Jesus nga mangngua tu disipulos. Tapenu makua tam yatun, aru i magigiammu tam ta pinattratu ni Jesus ta apostolesna nga nakkafi i nonoda.

¹⁴ Turi ta aranni ngana nga matay si Jesus, “nakkakarela ngamin i disipulo ira anna pinagurayad-da yaya.” (Mar. 14:50; Juan 16:32) Kunnasi nga trinatu ni Jesus i apostolesna ira nga nakkafi i nonoda tatun nga tiempo? Turi ta naginnolay yayya, kinagina ta karuan nga disipulosna: “Ari kamu nga maganassing. En-nu nga kagian ta wawwagì [nga naginnolay ngà].” (Mat. 28:10a) Ari nga nawanan tu iddanama si Jesus ta apostolesna. Maski nu pinanawadda yayya, inagalanna lagapa ira tu “wawwagì.” Pinarigan ni Jesus si Jehova nga minangngikallo anna minammakoma.​—2 Pat. 13:23.

15. Anni i matageno tam turi ira ta nagimmang ngana nga mallayyagayya?

¹⁵ Ikavurungattam gapa i wawwaragi tam nga nagimmang ngana nga mallayyagayya. Wawwagi tam lagapa ira anna iddeddukattam ira! Meraddammattam lagapa i sakrifisio ira nga kingngua danatun nga wawwaragi ta nappasa ta passerbida kani Jehova. Egga ira i karuan nga inactive nga piga dagun nga nasserbi kani Jehova ta nappasa. (Heb. 6:10) Talaga kakanappattam ngana ira! (Luc. 15:4-7) Kayà tam nga parigan si Jesus, yatutta anni gafu ira i kuattam tapenu mepasingattam nga ikavurungattam ira?

16. Kunnasi tam mepasingan nga ikavurungattam danuri wawwagi tam nga inactive?

¹⁶ Imbitan ira. Pinagaram ni Jesus danuri apostolesna nga nakkafi i nonoda gukaban na pangimbitana nira ta tadday nga paggarammammung. (Mat. 28:10b; 1 Cor. 15:6) Imbitattam gafu danuri inactive ira nga makistudy uli. Baka mawag tu mamippiga tam ira nga imbitan nigeda nga magatende. Siguradu nga nagayayya si Jesus tagga ta inalawa na disipulosna i imbitasionna.​—Ikumpara i Mateo 28:16 anna Lucas 15:6.

17. Anni i kuattam nu egga i inactive nga minay nakistudy?

¹⁷ Alawatattam ira. Inalawa ni Jesus i disipulosna turi ta minay ira nga nakipaggarammammung nisa. Yayya i minaranni nira tapenu kiyuvovugan ira. (Mat. 28:18) Anni i kuattam nu egga i inactive nga minay ta Kingdom Hall? Sittam nakuan i ollu nga umaranni anna meddu nga alawatattam yayya. Baka nononopattam nu anni i ikagi tam nisa. Puede tam nga kagian nisa nga magayayya ittam nga makasingan nisa uli, ngem ariattam nakuan yayya nga pasiranan.

18. Kunnasi tam nga mapagaram i inactive ira?

¹⁸ Pagarammattam ira. Posible nga natageno na disipulos ni Jesus nga ariadda metuppal i nibilinna nga mallayyagayya ira ta interu mundo. Ngem pinagaram ni Jesus i disipulosna. Kunna nira: “Kanayun ngà makitappaddian nikamu.” (Mat. 28:20) Nakoffun kari yatun? Wan. Ari nabbayag, okupadu ngana ira nga ‘mattuddu anna mallayyagayya ta mapia nga dumug.’ (King. 5:42) Magawag gapa tu pamagaram danuri inactive. Baka nononopadda nga ariadda ngana makapallayyagayya uli. Ngem awayya tam nga ikagi nira nga ariadda magitetadday ta pallayyagayya. Sonu mallawan ngana ira uli, vulunattam ira. Siguradu nga appresiadda i panguffuttam  nira tapenu makapallayyagayya ira uli. Nu ipatageno tam ta inactive ira nga wawwagi tam lagapa ira, posible nga manoli ira, anna magayayya i interu nga kongregasion gafu tatun.

19. Anni i kakayà tam nga kuan, anna ngatta?

¹⁹ Adde sonu anni nga mangngua ittam tu disipulos? Adde sonu manuppal yaw nga mundo. (Mat. 28:20; innan i Glosari, “Katapusan ng sistemang ito.”) Mawayya tam kari nga mallayyagayya anna mangngua tu disipulos adde tatun nga tiempo? Determinadu ittam nga kuan yatun! Kakayà tam nga usan i tiempo, sikan, anna kuartu tam tapenu alegan danuri “mepangngo nga mangalawa tu mannanayun nga inango.” (King. 13:48, NW) Paparigattam si Jesus nu kuattam yatun. Kinagina: “I pakkatolè ay i pamarulo ku ta uray na Dios nga naddog niakan anna i pangituppal ta ipakua na.” (Juan 4:34; 17:4) Yatun gapa i kakayà tam nga kuan. Kayà tam nga balinan yatun nga trabahu nga netalo nittam. (Juan 20:21) Kayà tam gapa nga tulu-tuloy nga mallayyagayya i tanakuan, kagitta tam, nelagum i inactive ira.​—Mat. 24:13.

20. Segun ta Filipos 4:13, ngatta mawayya tam nga ituppal i trabahu nga nibilin nittam ni Jesus?

²⁰ Kurug tu mariga nga ituppal i bilin ni Jesus. Ngem ari ittam magitetadday ta pangituppal tatun megafu ta nipromesa ni Jesus nga uffunanna ittam. Ituppal tam i bilin nga mangngua tu disipulos bilang ‘katrabahu na Dios’ anna “doroban ni Cristo.” (1 Cor. 3:9, NW; 2 Cor. 2:17) Nu kunnuri gafu, mawayya tam nga balinan i trabahu. Pribilehio tam nga ituppal yatun anna uffunan i tanakuan nga kunnatun gapa i kuadda!​—Bibbigan i Filipos 4:13, NW.