1-2. (a) Ngatta mattalo nakuan kani Jehova i bagu kasal ira? (Salmo 37:3, 4) (b) Anni i gigiammuattam taw nga artikulo?

ARANNI kamu kari ngana nga makkasal onu bagu kasal kamu laman? Magga maimajin nu ngana i magayayya nga pattolay kavulu i iddeddu nu. Ngem siempre, magga makkaproblema kamu ta pagatawa nu. Egga gapa ira i importante nga desision nga mawag tu kuan nu. Dakal i efekto na ta pagayayya nu nga magatawa i pangarubang nu ta problema ira anna i desision nu ira. Nu mattalo kamu kani Jehova, makangngua kamu tu masirib ira nga desision, malladda i pagatawa nu, anna mas magayayya kamu. Ngem nu ari nu nga iyaplika i tabarang na Dios, magga marigatakkamu ta pagatawa nu sonu makkaproblema kamu anna mafektan natun i pagayayya nu.​—Bibbigan i Salmo 37:3, 4.

² Maski nu para ta bagu kasal yaw nga artikulo, mapaguruvovugan taw i problema ira nga gagangay ta sigga-atawan. Egga ira i magigiammu tam ta ehemplo na matalo ira nga lallaki anna babbay ta Biblia nga awayya tam nga iyaplika ta pattoletam anna ta pagatawa. Makagigiammu ittam gapa ta ekspiriensa ira na sigga-atawan ta tiempo tam.

3-4. Anni ira i posible nga problema na bagu kasal?

³ Baka itabarang na karuan ta bagu kasal nga parigadda i gagangay nga kukukuan na totolay ta maddaggun. Angngarigan na, baka fuersan na mappagana anna na paparientes nga insigida  ngana nakuan nga makka-ana i bagu kasal. Baka kagian gapa na kokkofun anna kafamilia na bagu kasal nga mawag tu mamataddag ira tu balay anna gumatang tu makasta ira nga gamit tapenu komfortable i pattolay da.

⁴ Nu ari nga mannono tu mapia i magatawa, baka maddesision ira base laman ta kakkagian na tanakuan yari tu daka-dakal saw i gatu da. Tapus, trabahu la’ nga trabahu ngana saw i kuadda tapenu mapagan ngamin danatun nga gatu. Awan ngana gapa saw tu tiempo da para ta personal nga paggigiammu tu Biblia, family worship, anna ministerio. Baka egga paga saw i tiempo nga ari ngana ira nga makistudy megafu ta magovertime ira tapenu mas dakal i sueldu da onu tapenu ari ira nga malsa ta trabahu da. Nu kunnatun i mesimmu ta magatawa, sayang i makasta ira nga chansa tapenu mas makapasserbi nakuan ira kani Jehova.

5. Anni i magigiammu nu kani Klaus anna Marisa?

⁵ Nu maffokus ittam ta pagunnug tu material nga ganna-gannug, ari ittam nga magayayya. Aru ngana i namakurug tatun kagitta da Klaus anna Marisa. * Turi ta bagu kasal ira, parehu ira nga nattrabahu tu full time tapenu aru i kuartu anna pakkukua da. Ngem i kurug, ari ira nga magayayya tatun. Inamin ni Klaus: “Magatammi nu anni i kayà mi, ari laman tu yari i mawag mi. Ngem awan tu goal mi ta espiritual. Aru i pakavurungammi anna mai-stress kami.” Awayya na nga napakurug nu ngana gapa nga ari kamu nga nagayayya turi ta naffokus kamu ta pagunnug tu material. Nu kunnatun i situasion nu, puede kamu paga nga manguli. Makoffun i makasta ira nga ehemplo na tanakuan tapenu makua nu nu anni ira i mawag nu nga ulian. Ammuattam labbi nu anni i magigiammu na atawa nga lalaki kani Patul Jehosafat.

6. Kunnasi nga niyaplika ni Patul Jehosafat i Proverbio 3:5, 6 turi ta nakkaproblema yayya?

⁶ Sikamu nga atawa nga lalaki, marigatakkamu kari nu mittan ta responsibilidad nu ira? Aru i magigiammu nu kani Patul Jehosafat. Mawag tu tangngallan ni Patul Jehosafat i interu nga nasion! Kunnasi na nga nakua yatun nga daka-dakal nga responsibilidad? Nikaguman na nga protektan danuri sakup na. Pinaderan na i siudad ira na Juda anna nabbuu yayya tu masiki-sikan nga armada nga maturu tu 1,160,000 i suddalu na. (2 Cro. 17:12-19) Mittan, nakkaproblema si Jehosafat. Inana-anassing na dakal nga armada na Amonita, Moabita, anna na lallaki nga naggafu ta vinukig nga rehion na Seir si Jehosafat kunne na gapa i familia na anna i totolena. (2 Cro. 20:1, 2) Anni i kingngua ni Jehosafat? Nappoffun yayya kani Jehova tapenu mas massikan i nono na. Niyaplika na i mabibbig ta Proverbio 3:5, 6. (Bibbigan.) Nu innattam gapa i mapakalinno nga pakimallo na  ta 2 Cronicas 20:5-12, masingattam i daka-dakal nga pattalo na ta minaggiddu nga Yama na ta langi. Kunnasi nga sinabbag ni Jehova i pakimallo ni Patul Jehosafat?

7. Kunnasi nga sinabbag ni Jehova i pakimallo ni Jehosafat?

⁷ Sinabbag ni Jehova i pakimallo ni Jehosafat gukaban na Levita nga si Jahaziel. Kinagi ni Jehova: “Umay kamu ta puestu nu, mattalupaddiakkamu nga agga-taddag, anna innan nu i pangipaliag ni Jehova nikamu.” (2 Cro. 20:13-17) Nu nonopattam, ari tu yatun i gagangay nga estratehia ta pakiggerra! Ngem si Jehova i nangidog tatun, ari tu tolay. Megafu ta daka-dakal i pattalo ni Jehosafat ta Dios na, kingngua na nu anni i nepakua ta nisa. Turi ta nakiggerra yayya anna i totolena, nipuestu na ta arubang na armada na danuri gumakkansion nga awan vuluvuga tu armas da, imbes tu danuri nakuan pinakamalalaki nga suddalu na ira. Megafu tatun, sinuppal ni Jehova i promesa na kani Jehosafat. Inaffu na i kalaban.​—2 Cro. 20:18-23.

8. Anni i magigiammu na ulu ira na familia kani Jehosafat?

⁸ Aru i magigiammu nu nga ulu na familia kani Jehosafat. Responsibilidad nu nga tangngallan i familia nu yari tu ikaguman nu nga protektan anna suportan ira. Nu egga i luttuag nga problema, baka manono nu nga masolba nu lagapa yatun. Ngem ari kamu nakuan nga mattalo ta sarili nu nga diskarte. Mas makasta nu ipakimallo nu yatun kani Jehova. Tapus makimallo kamu gapa kavulu i atawa nu. Mappegiya kamu kani Jehova gukaban na paggigiammu nu tu Biblia anna publikasion ira tapus iyaplika nu i tabarang ira nga mabibbig nu. Awayya na nga ari nga suportan na tanakuan i desision nu ira nga nebase ta Biblia. Baka kagiadda paga lagu nikamu nga kokkomforme laman i desision nu. Baka kumbinsian dakamu paga lagu nga proteksion para ta familia nu i kuartu anna i ganna-gannug nga magatang natun. Ngem nonopan nu nakuan i ehemplo ni Jehosafat. Nattalo yayya kani Jehova anna nipasingan na yatun ta desision na ira. Ari vuluvuga pinagurayan ni Jehova yatun nga matalo nga lalaki. Magga ari nakamu gapa nga pagurayan. (Sal. 37:28; Heb. 13:5) Anni gafu gapa i makua na magatawa tapenu magayayya i pattoleda?

9. Kunnasim nga ideskriba si profeta Isaias anna i atawa na?

⁹ Pinaka-importante kani profeta Isaias anna ta atawa na i passerbi da kani Jehova. Profeta si Isaias anna awayya na nga kunnatun gapa i annungan na atawa na megafu ta nagalan yayya nga “profetisa.” (Isa. 8:1-4) Nakafokus yaw nga magatawa ta passerbi da kani Jehova. Makakkasta ira nga ehemplo ta sigga-atawan ira sangawe!

10. Anni i efekto na ta magatawa nu gigiammuadda i profesiya ira ta Biblia?

¹⁰ Maparigan gapa na magatawa ira ta maddaggun si Isaias anna i atawa na nu kuadda i ngamin nga mawayya da ta passerbi da kani Jehova. Mapaladda da i pattalo da kani Jehova nu makkavulu nga gigiammuadda i profesiya ira ta Biblia anna nu masingadda nga kanayun nga matuppal yatun. * (Tito 1:2) Puede gapa nga pannonopadda i parte da ta ketuppal na profesiya ira ta Biblia. Angngarigan  na, awayya da i makiparte ta ketuppal na profesiya ni Jesus meyannung ta kelayyagayya na mapia nga dumug ta interu mundo nige nga duttal i panuppalan. (Mat. 24:14) Nu mas nga dumakal i pattalo na magatawa nga metuppal noka i profesiya ira ta Biblia, mas gapa nga determinadu ira nga kuan i ngamin nga mawayya da para kani Jehova.

11. Anni i nakua ni Priscila anna ni Akila, anna ngatta?

¹¹ Makagigiammu i bagu kasal ira nga magatawa ta Judio nga magatawa nga da Priscila anna Akila nga naddian ta siudad na Roma. Nammuadda i meyannung kani Jesus anna nabbalin ira tu Cristiano. Siguradu nga kontentu anna magayayya yaw nga magatawa ta pattoleda. Ngem gavva nga nanguli i paddia-paddiadda turi ta pinapanaw ni Emperador Claudio i ngamin nga Judio ta Roma. Megafu tatun, mawag tu panawan naw nga magatawa i lugar nga nakasanayadda, magaleg ira tu bagu nga paddianan, anna mannegosio mana ira tu pamadday tu tolda ta bagu nga lugar. Nakefugag kari nira yatun ta pamagollu da ta Pappatulan? Magga ammu nu i tabbag tatun. Ta pagali da ta Corinto, inuffunan ni Akila anna ni Priscila i kongregasion tari anna nakipattrabahu gapa ira kani apostol Pablo tapenu pasikannan i wawwaragi. Ari nabbayag, nagali ira ta tanakuan nga lugar nu sitaw mas dakal i pakawagan para ta mallayyagayya. (King. 18:18-21; Roma 16:3-5) Talaga busy yaw nga magatawa ngem magayayya ira!

12. Ngatta mawag tu mannono i magatawa tu goal da ira ta espiritual?

¹² Maparigan na magatawa ira sangawe si Priscila anna si Akila nu pagolluadda i Pappatulan. I pinakamakasta nga tiempo nga pabbidan i goal ira ay nu mannobio pagalaman i dua nga tolay. Nu pabbidan na mannobio i desision ira nga kuadda tapus mannono ira tu goal da ta passerbi kani Jehova anna ikagumadda nga addetan yatun ira, mas masingadda i panguffun ni Jehova ta nira. (Ecl. 4:9, 12) Kunnatun i kingngua da Russell anna Elizabeth. Kagian ni Russell, “Mannobio kami pagalaman, talaga pabbidammi ngana i goal mi ira ta espiritual.” Kagian gapa ni Elizabeth:  “Kingngua mi yatun tapenu sonu mawag mi i maddesision, masiguradu mi nga makoffun i desision nga kuammi tapenu madde mi i goal mi ira.” Megafu ta ipamavulun na situasion da Russell anna Elizabeth, nagali ira ta Micronesia nu sitaw mas dakal i pakawagan para ta publisher ira.

13. Segun ta Salmo 28:7, anni i pammakapianan na nu matalo ittam kani Jehova?

¹³ Kagitta ni Russell anna ni Elizabeth, aru gapa nga magatawa i nappasimple tapenu mas aru i tiempo da ta pallayyagayya anna panuddu. Aru i pammakapianan na magatawa nu mannono ira tu goal da ta passerbi kani Jehova anna nu makka-uffun ira tapenu madde da danatun. Matageno da i pangikavurung ta nira ni Jehova, dumakal i pattalo da ta nisa, anna mabbalin ira tu kurug nga magayayya.​—Bibbigan i Salmo 28:7.

14. Anni i mangipasingan nga nattalo si apostol Pedro anna i atawa na ta promesa ta Mateo 6:25, 31-34?

¹⁴ Makagigiammu i magatawa ira kani apostol Pedro anna ta atawa na. Nappasa ngana i ma-annam nga vulan adde ta tanga-ragun turi ta ollu nga nammammu ni apostol Pedro si Jesus. Tapus imbitan yayya ni Jesus nga mevulu ta nisa anna panawan ngana i negosio na nga pagimmanango. Importante yatun nga desision yatutta mawag labbi nga nonopan ni Pedro i situasiodda na atawa na. (Luc. 5:1-11) Dinesision ni Pedro nga mevulu kani Jesus. Masirib i kingngua na! Makagi tam gapa nga sinuportan na atawa ni Pedro yatun nga desision na. Segun gapa ta Biblia, egga ira i tiempo nga nevulu i atawa ni Pedro ta nisa ta pabbiahe na kabalin na nipaginnolay ni Jesus. (1 Cor. 9:5) Megafu ta makasta nga ehemplo na atawa ni Pedro bilang tadday nga Cristiano nga atawa nga babay, egga i lallaguray ni Pedro nga manabarang para ta Cristiano ira nga atawa nga lalaki anna babay. (1 Ped. 3:1-7) Nattalo si Pedro anna i atawa na ta promesa ni Jehova nga iyawa na i pakawagadda nu pagolluadda i Pappatulan.​—Bibbigan i Mateo 6:25, 31-34.

15. Anni i magigiammum kada Tiago anna Esther?

¹⁵ Nu piga dagun kamu ngana nga magatawa, anni i kuan nu tapenu mas nga karagatan nu nga palawan i ministerio nu? Aru i mala nu ta ekspiriensa na tanakuan nga magatawa. Puede nu nga bibbigan i serye nga “Sigga-paran nga Nisakrifisioda i Baggida.” Nakoffun i kunnatun ira nga artikulo ta magatawa nga taga-Brazil nga da Tiago anna Esther tapenu mas karagatadda nga masserbi nu sitaw mas dakal i pakawagan. Istorian ni Tiago: “Nu mabibbig mi nu kunnasi nga inuffunan ni Jehova i wawwaragi tam, kayà mi gapa nga tuttulan si Jehova anna maekspiriensa gapa i panguffun na.” Ari nabbayag, nagali yaw nga magatawa ta Paraguay anna namegafu turi ta 2014, massesserbi ngana ira ta teritoria na Portuguese. Kunnaw gapa i kagian ni Esther: “Tadday ta teksto nga parehu nga kakayà mi na atawà ay i Efeso 3:20. Ta passerbi mi kani Jehova, mamippiga mi ngana nga napakurug nga fustu yatun nga teksto.” Tatun nga tura ni Pablo ta taga-Efeso, nipromesa na nga iyawa ni Jehova i mas aru paga anne ta kiddawattam nisa. Kuru-kurug yatun nga promesa!

16. Sinni i puede nga pakiyoffunan na bagu kasal ira nga magatawa nu mannono ira tu goal da?

¹⁶ Makagigiammu gapa i bagu kasal ira nga magatawa ta ekspiriensa danuri na nattalo kani Jehova. Egga ira i karuan nga magatawa nga nabayag ngana nga massesserbi ta ngamin tiempo. Ngatta ari kamu nga mappoffun  ta nira tapenu makanono kamu ta goal nu ta espiritual? Nu kuan nu yatun, mepasingan nu nga mattalo kamu kani Jehova. (Prov. 22:17, 19) Moffunan gapa na elder ira i bagu kasal ira nga magatawa tapenu makanono ira tu goal da ta espiritual anna madde da yatun.

17. Anni i nesimmu kani Klaus anna Marisa, anna anni i magigiammu tam ta nesimmu ta nira?

¹⁷ Awayya na nga egga ngana ira i goal tam nga naplano tam. Ngem nu mittan, tanakuan i pangusan nittam ni Jehova. Kunnatun i nesimmu ta magatawa nga da Klaus anna Marisa nga nakagi ta nappasa ira nga parapo. Tallu ragun ngana ira nga magatawa turi ta pinanawadda i paddianadda anna nabboluntariu ira ta construction na Finland branch. Ngem nakannammuadda nga adde laman ta annam nga vulan ira nga puede nga maddian tari. Siempre ta ollu na, nadismaya ira. Ngem ari nabbayag, nembitan ira nga maggigiammu tu Arabic nga lengguahe. Tapus sangawe, magayayya ngana ira nga massesserbi ta teritoria nga Arabic ta tanakuan nga nasion. Nu manono ni Marisa yatun ira nga nesimmu, kunnaw i makagi na: “Nu puruebammu i bagu nga gannug, siempre ta ollu na, magga maganassikka anna mawag tu buu i pattalo mu kani Jehova. Ngem kanayukkami nga inuffunan ni Jehova anna ariammi nga inekspekta yatun. Megafu tatun ira nga nesimmu, mas nga ziminakal i pattalo ku kani Jehova.” Makagigiammu kamu tatun nga ekspiriensa. Magga kanayukkamu nga bendisionan ni Jehova nu buu i pattalo nu ta nisa.

18. Anni i kuan na sigga-atawan ira tapenu kanayun ira nga mattalo kani Jehova?

¹⁸ Regalu ni Jehova i pagatawa. (Mat. 19:5, 6) Kayà na nga magayayya i magatawa tatun nga regalu. (Prov. 5:18) Sikamu nga bagu kasal nga magatawa, anni i kukukuan nu ta pattolenu? Ikakkaguman nu kari nga ipasingan kani Jehova nga mappappabalo kamu ta regalu ira nga niyawa na ta nikamu? Makimallo kamu kani Jehova. Alegan nu i prinsipio ira ta Uvovug na nga awayya nu nga iyaplika ta situasion nu tapus tuttulan nu i tabarang na. Makasiguradu kamu nga magayayya i pagatawa nu nu nakafokus kamu ta passerbi kani Jehova!