1-2. Ngatta makasta nu mangipasingan ittam tu matalo nga aya ta kataggi-tadday?

NGATTA mangipasingan ittam nakuan tu matalo nga aya ta kataggi-tadday? Tabbagan yatun na tumunug ira nga proverbio: “Ariammu ipamavulun nga panawan naka na matalo nga aya anna kinamatalo. . . . Tapenu makemmemmi ka ta mata na Dios anna na tolay anna imammatadda nga makalippawa ka.” “I tolay nga matalo i aya na, mabenefisiowan na i baggi na.” “I mangipasingan tu kinatunung anna matalo nga aya ay makaleg tu inango.”​—Prov. 3:3, 4; 11:17, ftn.; 21:21.

² Tatun ira nga proverbio, egga i tallu nga rason nu ngatta mangipasingan ittam tu matalo nga aya. Ollu, makemmemmi ittam ta Dios. Mekadua, mabenefisiowattam i baggi tam. Angngarigan na, malladda i pakikkofuttam ta tanakuan. Mekatallu, makalawa ittam tu bendision ira ta mappange, kagitta na mannanayun nga inango. Makasta gafu talaga nu tuttulattam yaw nga kinagi ni Jehova nittam: “Mangipasingakkamu tu matalo nga aya anna allo ta kataggi-tadday.”​—Zac. 7:9.

3. Anni ira nga pakkiavu i tabbagattam?

³ Taw nga artikulo, tabbagattam i appa nga pakkiavu. Sinni ira i pangipasingannattam tu matalo nga aya? Anni i magigiammu tam ta libru nga Ruth meyannung ta pangipasingan tu matalo nga aya? Kunnasi tam mepasingan i matalo nga aya? Anni ira i pammakapianattam nu ipasingattam i matalo nga aya?

4. Kunnasi tam maparigan si Jehova? (Marcos 10:29, 30)

⁴ Nagigiammu tam ta nappasa nga artikulo nga ipasingan ni Jehova i matalo nga aya turi laman ira ta mangiddu nisa anna masserbi nisa. (Dan. 9:4) Megafu ta ‘sittam i meddu nga ána na Dios, parigattam yayya.’ (Efe. 5:1) Kayà tam gafu gapa nga  ipasingan i matalo nga aya ta wawwaragi tam.​—Bibbigan i Marcos 10:29, 30.

5-6. Anni i pakantindi na totolay ta “kinamatalo”?

⁵ Magga umanugu ka nga nu mas manawag nikaw i kayà kagian na matalo nga aya, mas mabi mu nga mepasingan yatun ta wawwaragim. Tapenu mas mantindiattam nu anni i matalo nga aya, ammuattam nu anni i neruman natun ta kinamatalo. Ammuattam labbi gafu nu anni i kinamatalo base ta pakantindi na totolay. Usattam i tadday nga angngarigan.

 ⁶ Makagi tam nga matalo i tadday nga empleyadu nu piga ragun ngana yayya nga mattattrabahu ta tattadday nga kumpania. Ngem baka ari na paga vuluvuga nga nakilala i makakkua tatun nga kumpania. Posible gapa nga egga ira i reglamento na kumpania nga ari yayya nga umanugu. Ari na gapa kakkagian nga iddukan na i kumpania. Ngem ari na nga manaw tatun megafu ta yatun laman i pagalegan na. Tulu-tuloy laman yayya nga mattrabahu tatun adde sonu marretiro yayya, fuera ngana laman nu egga i meyofer nisa tu mas makasta nga trabahu ta tanakuan nga kumpania.

7-8. (a) Anni i motibo tam ta pangipasingan tu matalo nga aya? (b) Ngatta ikonsidera tam i karuan nga istoria ta libru nga Ruth?

⁷ Anni kari i nadduman na kinamatalo anna na matalo nga aya? I motibo na tolay. Nammuattam ta  parapo 6 nga matalo i empleyadu megafu ta obligadu yayya nga kuan yatun. Ngem ta Biblia, anni kari i motibo na totolay na Dios ta pangipasingan tu matalo nga aya? Ari tu megafu ta obligadu ira nga kuan yatun, nu ari, megafu ta kayà da nga kuan yatun. Nonopan i ehemplo ni David. Maski nu nigato yayya nga patayan na yama ni Jonatan, nikayà na lagapa nga mangipasingan tu matalo nga aya ta meddu nga kofun na nga si Jonatan. Maski nu piga ragun ngana nga natay si Jonatan, ari lagapa nga nagimmang si David nga nangipasingan tu matalo nga aya kani Mefiboset nga ana ni Jonatan.​—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Aru i magigiammu tam meyannung ta matalo nga aya nu ikonsidera tam i karuan nga istoria ta libru na Biblia nga Ruth. Anni kari i magigiammu tam ta karakter ira tatun nga libru? Kunnasi tam nga meyaplika danatun ta kongregasiottam? *

9. Ngatta nanono ni Noemi nga kokkontran yayya ni Jehova?

⁹ Mabibbig tam ta libru nga Ruth i istoria meyannung kani Noemi, ta manugang na nga si Ruth, anna kani Boaz. Iddukan ni Boaz i Dios anna parientes yayya na atawa ni Noemi. Megafu ta nabbisin ta Israel, nagali ta Moab si Noemi, i atawa na, anna i dua nga ana da nga lalaki. Ta kegga da tari, natay i atawa ni Noemi. Nangatawa i dua nga ana na, ngem kaddaraddam ta natay gapa ira. (Ruth 1:3-5; 2:1) Grabe i pinakkafi na nono ni Noemi megafu tatun nga natturunug nga trahedia. Ta sobra nga paddaddam na, nanono na nga kokkontran yayya ni Jehova. Kinagi na: “Kontra ngana niakan i lima ni Jehova.” “Nipamavulun na Makapangngua-sa-Ngamin nga mazziga i pattolè.” Kinagi na paga: “Si Jehova i nangontra nio anna i Makapangngua-sa-Ngamin i rason na pazziga-riga ku.”​—Ruth 1:13, 20, 21.

10. Kunnasi nga inuffunan ni Jehova si Noemi?

¹⁰ Ari tu makasta i kinagi ira ni Noemi, ngem anni lagapa i kingngua ni Jehova? Arian na yayya nga pinagurayan. Nakipattageno yayya ta nisa. Malippawa ni Jehova nga “awayya na nga mammaguyung i masirib megafu ta  katattazzi.” (Ecl. 7:7) Ngem mawag ni Noemi i uffun tapenu masingan na nga ari yayya nga pinagurayan ni Jehova. Anni gafu i kingngua na Dios? (1 Sam. 2:8) Inusa na si Ruth tapenu mangipasingan tu matalo nga aya kani Noemi. Kakayà gapa nga kuan yatun ni Ruth, yayya nga pinasikan na i nono ni Noemi anna niperaddam na nisa nga iddeddu lagapa yayya ni Jehova. Anni gafu i magigiammu tam kani Ruth?

11. Ngatta ikagumattam nga uffunan danuri maraddam onu nakkafi i nono da?

¹¹ Nu egga i matalo nga aya tam, ikagumattam nga uffunan danuri maraddam onu nakkafi i nono da. Ari vuluvuga nga pinanawan ni Ruth si Noemi. Kunnatun gapa i kukukuan na masippo ira nga wawwaragi sangawe. Ari da vuluvuga nga pagurayan danuri kapangngurug da nga maraddam onu nakkafi i nono da. Iddeddukadda gare i wawwaragi da anna kakayà da nga kuan i maski anni tapenu makoffun ta nira. (Prov. 12:25, ftn.; 24:10) Kunnatun i ipagaram ni apostol Pablo nga kuattam: “Pasikannan nu i nono na makafi i nono da. Uffunan nu i makafi anna pasa-pasensian nu ira ngamin.”​—1 Tes. 5:14.

12. Anni i kakastan nga meyuffummu ta kapangngurug mu nga nakkafi i nono na?

¹² Nu nakkafi i nono na kapangngurug mu, i kakastan nga meyuffummu ay magginna ka tu mapia ta nisa anna ikagim ta nisa nga iddeddukammu yayya. Masingan ni Jehova i panguffummu ta meddu nga karneru na. (Sal. 41:1) Kagian na Proverbio 19:17: “I mangipasingan tu fabor ta pobre ay mappappagatu kani Jehova, anna bala-balakkan na yayya megafu ta kukukuan na.”

13. Anni i madduma nga desision ni Ruth anna ni Orpa? Ngatta ipasingan na desision ni Ruth nga matalo i aya na? (Innan i letratu ta vungun.)

¹³ Mas malippawa tam paga i matalo nga aya nu pannonopattam i nesimmu kani Noemi turi ta natay i atawa na anna i dua nga ana na. Ta pakadumug ni Noemi nga “binendisionan uli ni Jehova i totolena anna niddan na ira tu makan,” nadesision na nga manoli ta diadda. (Ruth 1:6) Ta ollu na bi, parefu nga nevulu nisa i dua nga manugang na. Ngem ta pallakag da palabbe, namittallu nga kinagi ni Noemi ta nira nga manoli ngana ira ta Moab. Anni i nesimmu? Kunnaw i mabibbig: “Inummakkan ni Orpa si Noemi nga katugangan na tapus nanaw. Ngem ari yayya nga pinanawan ni Ruth.” (Ruth 1:7-14) Sinuttul ni Orpa i kinagi nisa ni Noemi, yayya nga milibbe ngana yayya ta Moab. Ngem ari tu kunnatun i kingngua ni Ruth maski nu puede nakuan gapa yayya nga lubbe. Dinesision na nga uffunan i katugangan na megafu ta matalo nga aya. (Ruth 1:16, 17) Pinili gafu ni Ruth nga ari panawan si Noemi, ari tu megafu ta obligadu yayya nga kuan yatun, nu ari, megafu ta yatun i kayà na nga kuan. Ipasingan natun nga desision na nga matalo i aya na. Anni i magigiammu tam tatun?

14. (a) Anni i kakayà nga kuan na aru nga wawwaragi? (b) Segun ta Hebreo 13:16, anni ira nga sakrifisio i makapagayayya ta Dios?

 ¹⁴ Nu egga i matalo nga aya tam, massakrifisio ittam tapenu moffunan i tanakuan. Kagitta na ta nappasa, aru gapa nga wawwaragi sangawe i kayà da nga mangipasingan tu matalo nga aya ta kapangngurug da ira, maski turi ira ta ariadda paga nga nammammu. Nu egga i kalamidad, insigida nga ammuadda nu kunnasi ira nga makoffun. Nu egga gapa i kakongregasiodda nga mamroblema ta finansial, ikagumadda nga manguffun ta praktikal. Paparigadda i taga-Macedonia ira ta ollu siglo nga nangisakrifisio ta tiempo anna pakkukua da ira. Mangiyayawa ira tu ‘maturu paga ta awayya da nga iyawa’ tapenu laman moffunan danuri magawag. (2 Cor. 8:3) Kuruga magayayya si Jehova nu masingan na i kunnatun nga matalo nga aya!—Bibbigan i Hebreo 13:16.

15-16. Kunnasi nga nipasingan ni Ruth nga talaga kayà na i manguffun?

¹⁵ Aru i magigiammu tam ta istoria na Biblia meyannung ta panguffun ni Ruth kani Noemi. Ammuattam i karuan tatun.

¹⁶ Ari ka magimmang nga manguffun. Ta ollu na bi nga kinagi ni Ruth nga vulunan na i katugangan na nga si Noemi ta pallabbe ta Juda, nammanaki si Noemi, ngem ari nga nagimmang si Ruth. Anni i nesimmu? “Ta pakasingan ni Noemi nga ifuersa ni Ruth nga mevulu nisa, ari na ngana yayya nga finugaddan.”​—Ruth 1:15-18.

17. Anni i mawag tapenu ari ittam insigida nga magimmang nga manguffun?

¹⁷ I magigiammu tam: Mawag i pasensia tapenu moffunan danuri wagi nga problemadu. Ari tam nakuan nga magimmang nga manguffun ta nira. Angngarigan na, baka ta ollu, manaki na tadday nga sister i mappoffun. * Ngem nu egga i matalo nga aya tam, kuattam i ngamin nga mawayya tam tapenu uffunan yayya. (Gal. 6:2) Iddanamattam gapa nga paray nakuan tu alawatan na gabbalaman i panguffuttam nisa anna i pamanna-bannay tam.

18. Ngatta awayya na tu massinti nakuan si Ruth?

¹⁸ Ari ka massinti. Turi ta nakalabbe ngana ta Betlehem si Noemi anna si Ruth, kunnaw i kinagi ni Noemi ta dati ira nga kakarruba na: “Napappannu ngà turi ta nanaw ngà, ngem pinanoli nà ni Jehova nga limi-lima.” (Ruth 1:21) Nonopan nu anni i matageno ni Ruth tatun ira nga kinagi ni Noemi. Aru ngana i nisakrifisio na tapenu laman moffunan si Noemi. Nakipattangi yayya nisa, binanna-bannayan na yayya, anna piga aggaw nga vinulu na yayya nga lumakag palabbe. Ngem kunnaw lagapa i kinagi ni Noemi: “Pinanoli nà ni Jehova nga limi-lima.” Nipasingan natun ira nga kinagi na nga ari na vuluvuga inappresia i suporta ni Ruth nisa nga egga laman ta biko na tatun nga tiempo. Siguradu nga mataka-taki yatun kani Ruth! Ngem ari na vuluvuga pinanawan si Noemi.

19. Anni i makoffun nittam tapenu ariattam pagurayan i problemadu nga wagi?

¹⁹ I magigiammu tam: Nu problemadu i tadday nga sister, baka makekagi yayya tu makapataki nittam maski nu kingngua tam ngana i ngamin nga mawayya tam tapenu uffunan yayya. Ngem ari ittam nga massinti. Ari tam pagurayan yatun nga sister nga maraddam onu nakkafi i nono na. Mappoffun ittam kani Jehova tapenu mabanna-bannayattam yayya.​—Prov. 17:17.

20. Anni i namasikan ta nono ni Ruth tapenu tulu-tuloy nga moffunan na si Noemi?

²⁰ Mamagaram ta tiempo nga kawagan yatun  na tanakuan. Nakepasingan ngana tu matalo nga aya si Ruth kani Noemi, ngem sangawe, yayya ngana gapa i magawag tu pamagaram. Yayya nga inusa ni Jehova si Boaz tapenu pagaramman yayya. Kinagi ni Boaz kani Ruth: “Bala-balakkan naka nakuan ni Jehova megafu ta kingnguam, anna egga nakuan i perfekto nga paga para nikaw naggafu kani Jehova nga Dios na Israel, nga nattaguammu i paya na ira tapenu makiyegu.” Magga napagaram si Ruth tatun ira nga masippo nga kinakkagi na. Yayya nga kunnaw i nitabbag na kani Boaz: “Binanna-bannayammà anna pinasikammu i nono na aripammu.” (Ruth 2:12, 13) Megafu ta pinagaram ni Boaz si Ruth ta tiempo nga kawagan na yatun, nassikan i nono na tapenu tulu-tuloy nga moffunan na si Noemi.

21. Base ta Isaias 32:1, 2, anni i mawag nga kuan na minangngikavurung ira nga elder?

²¹ I magigiammu tam: Magawag gapa tu pamasikan ta nono maski danuri mangipasa-pasingan tu matalo nga aya ta tanakuan. Kinomendan ni Boaz si Ruth megafu ta nasingan na nga masippo i pattratu na kani Noemi. Kunnatun gapa i elder ira sangawe. Komendadda danuri wawwaragi nga masingadda tu masippo anna mangungnguffun ta tanakuan. Nu napafutuan i pakkomenda da anna neyawa yatun ta tiempo nga kawagan yatun, massikan danatun nga wawwaragi tapenu tulu-tuloy gapa ira nga makoffun ta tanakuan.​—Bibbigan i Isaias 32:1, 2.

22-23. Kunnasi nga nanguli i appana-panono ni Noemi, anna ngatta? (Salmo 136:23, 26)

²² Nappasa i piga nga tiempo, vuka-palag nga nangiyawa si Boaz tu makan para kani Ruth anna Noemi. (Ruth 2:14-18) Anni i efekto kani Noemi na kinavuka-palag ni Boaz? Kinagi na: “Bala-balakkan nakuan yayya ni Jehova, nga kanayun nga mangipasingan tu  matalo nga aya na ta matolay anna ta natay.” (Ruth 2:20a) Dakal i nangulian na appana-panono ni Noemi! Dati bi, mataki i nono na nga nakkagi tu kunnaw: “Si Jehova i nangontra nio.” Ngem kunnaw ngana i kinagi na: ‘Kanayun nga mangipasingan tu matalo nga aya si Jehova.’ Anni tamma i nakoffun tapenu manguli i panageno ni Noemi?

²³ Mamegafu ngana nga masingan ni Noemi nga uuffunan yayya ni Jehova. Inusa ni Jehova si Ruth tapenu iyawa nisa i kawagan na nga uffun ta pallabbe na ta Juda. (Ruth 1:16) Nalippawa gapa ni Noemi nga inusa ni Jehova si Boaz tapenu uffunan yayya anna si Ruth megafu ta tadday si Boaz ta “mattubus” nira. * (Ruth 2:19, 20b) Awayya na tu kunnaw i nanono na: ‘Mantindiakku ngana sangawe. Talaga arian nà vuluvuga nibabbattang ni Jehova. Kanayukku yayya nga kavulu ta nappasa-pasakku ira!’ (Bibbigan i Salmo 136:23, 26.) Siguradu nga nappappabalo si Noemi kani Ruth anna kani Boaz megafu ta ari ira nga nagimmang nga nanguffun nisa. Maimajittam ira nga tallu nga magayayya megafu ta nagayayya uli si Noemi anna netoli i sikan na ta passerbi kani Jehova.

24. Ngatta ari ittam nga magimmang nga mangipasingan tu matalo nga aya ta wawwaragi tam?

²⁴ Anni i nagigiammu tam ta libru nga Ruth meyannung ta matalo nga aya? Nu egga i matalo nga aya tam, ari ittam insigida nga magimmang nga manguffun ta wawwaragi nga narraddam onu nakkafi i nono da. Massakrifisio ittam gapa para nira. Mawag gapa nga napafutuan nga komendan na elder ira danuri mangipasa-pasingan tu matalo nga aya ta tanakuan ta tiempo nga kawagadda i pamagaram. Nu masingattam nga nagayayya uli i zinuffunattam anna netoli i sikadda ta passerbi, magayayya ittam gapa. (King. 20:35) Ngem anni nakuan i pinakamotibo tam tapenu ari magimmang nga mangipasingan tu matalo nga aya? Kayà tam gare nga parigan anna pagayayyatan si Jehova, nga “abundansia ta matalo nga aya.”​—Ex. 34:6; Sal. 33:22.