1. Anni i ipagaram ni Jehova nga kuattam?

KAKAYÀ ni Jehova i matalo nga aya. (Os. 6:6) Pagaramman na ittam nga ipasingan yatun. Gukaban ni profeta Mikias, kagian na Dios nittam nga “iddukan i matalo nga aya.” (Mik. 6:8, ftn.) Ngem nige tam nga makua yatun, mawag tu makannammuattam labbi nu anni i kebalinan na matalo nga aya.

2. Anni i matalo nga aya?

² Anni i “matalo nga aya”? Mami-230 nga neyusa yatun ira nga uvovug ta New World Translation of the Holy Scriptures. Segun ta “Glossary of Bible Terms” tatun nga translation, i matalo nga aya ay “aya nga napaguyu na determinasion, integridad, kinamatalo, anna meggo nga relasion. Maruddu nga tumukoy yatun nga uvovug ta pangaya na Dios ta totolay, ngem awayya na gapa nga tumukoy yatun ta pangaya na totolay ta kataggi-tadday.” Si Jehova i pinakamakasta nga ehemplo ta pangipasingan tu matalo nga aya. Taw nga artikulo, gigiammuattam nu kunnasi nga ipasingan ni Jehova i matalo nga aya na ta totolay. Ta tumunug nga artikulo, pabbiridattam nu kunnasi tam maparigan si Jehova gukaban na pangipasingan tu matalo nga aya ta kataggi-tadday.

3. Anni i kinagi ni Jehova kani Moises meyannung ta baggi na?

³ Turi ta kapapanaw pagalaman na Israelita ira ta Ehipto, kinagi ni Jehova kani Moises i ngagan na anna i kualidad na ira. Kinagi na: “Si Jehova, si Jehova, tadday nga Dios nga minangngikallo anna minangngikabbi, ari insigida nga mapporay anna abundansia ta matalo nga aya anna kinakurug, mangipasingan tu matalo nga aya ta rinivu, mamakoma ta kamali anna tagaruli anna liwa.” (Ex. 34:6, 7) Tatun nga makapatukkal-futu  nga kinagi ni Jehova meyannung ta kualidad na ira, nipasingan na kani Moises i nerumu-ruma nga aspeto na matalo nga aya na. Anni yatun?

4-5. (a) Anni i kinagi ni Jehova meyannung ta baggi na? (b) Anni ira nga pakkiavu i tabbagattam?

⁴ Ari laman nga kinagi ni Jehova nga egga i matalo nga aya na, nu ari, kinagi na paga nga ‘abundansia yayya ta matalo nga aya.’ Namippiga nga neyusa danatun nga uvovug ta Biblia. (Num. 14:18; Neh. 9:17; Sal. 86:15, NW; 103:8, NW; Joel 2:13; Jon. 4:2) Si Jehova laman i tukuyan natun ira nga teksto. Ari vuluvuga nga tumukoy yatun ta totolay. Ari kari nga kappabbaw nga kanayun nga ipasigo ni Jehova yatun nga kualidad na? Importante gafu ta nisa i matalo nga aya. * Yari tu kinagi ni Patul David: “Ta langi, O AFU, i pagaddetan na aya mu nga awan tu pangulian na . . . I pangaya mu, O Dios, ay kuruga mangina, ta i totolay ay akkiyegutad-da i lirum na paya mu ira.” (Sal. 36:5, 7) Appresiattam kari gapa i matalo nga aya na Dios gitta ni David?

⁵ Tapenu mas malippawa tam i kebalinan na matalo nga aya, ikonsidera tam i dua nga pakkiavu: Sinni i pangipasingannan ni Jehova tu matalo nga aya? Kunnasi ittam mammakapia ta matalo nga aya ni Jehova?

6. Sinni i pangipasingannan ni Jehova tu matalo nga aya?

⁶ Sinni i pangipasingannan ni Jehova tu matalo nga aya? Segun ta Biblia, aru nga gannug i awayya tam nga ayatan, gitta na “agrikultura,” “binarayang anna denu,” “disiplina,” “pakannammu,” “ka-uto,” anna karuan paga. (2 Cro. 26:10; Prov. 12:1; 21:17; 29:3) Ngem ari vuluvuga mepasingan i matalo nga aya ta gannug onu ideya ira. Mepasingan laman yatun ta totolay. Ngem ari laman tu basta mangipasingan si Jehova tu matalo nga aya ta maski sinni. Ipasingan na laman yatun tari ira ta egga i madukko nga relasiodda ta nisa. Matalo i Dios tam ta kokkofun na. Makakkasta i gakkag na anna mannanayun i pangaya na ta nira.

7. Kunnasi nga nipasingan ni Jehova i pangaya na ta ngamin nga totolay?

⁷ Nepasingan ngana ni Jehova i pangaya na ta ngamin nga totolay. Kinagi ni Jesus kani Nicodemo: “Kuruga iddukan na Dios i mundo. Yatun tu zinog na i tattadday nga Ana na, tapenu ngamin i mangurug sa ay ari nga matay nu ari matolay ira adde ta ngangangay.”​—Juan 3:1, 16; Mat. 5:44, 45.

8-9. (a) Ngatta mangipasingan si Jehova tu matalo nga aya ta masserbi ira nisa? (b) Anni i ammuattam ta tumunug nga subtitulo?

 ⁸ Gitta na nakagi ta ollu, ipasingan laman ni Jehova i matalo nga aya na ta aripan na ira nga egga i madukko nga relasiodda ta nisa. Mapakurug yatun ta kinagi ni Patul David anna ni profeta Daniel. Angngarigan na, kinagi ni David: “I pangaya mu ta totolay nga makannammu nikaw ay ikana-kanayum-mu.” “I pangaya na YAFU ta mammakakua ira sa ay mannanayun adde noka.” Kinagi gapa ni Daniel: ‘O Jehova nga kurug nga Dios nga mangipasingan tu matalo nga aya tari ira ta mangaya nisa anna mattuttul ta bili-bilin na.’ (Sal. 36:10; 103:17; Dan. 9:4) Segun tatun ira nga teksto, ipasingan ni Jehova i matalo nga aya na tari laman ta aripan na ira megafu ta ammammu da yayya, ikakua da yayya, ayatadda yayya, anna tuttuladda i bili-bilin na. Talaga gafu ipasingan laman ni Jehova i matalo nga aya na tari ira ta mepangngo i paddayoda nisa.

⁹ Nige tam namegafu ta passerbi kani Jehova, nammakapia ngana ittam ta aya nga nipasingan na ta ngamin nga totolay. (Sal. 104:14) Ngem turi ta namegafu ittam nga naddayaw ta nisa, nammakapia ngana gapa ittam ta matalo nga aya na. Kakurugan na, ipasiguradu ni Jehova ta masserbi ira ta nisa: “Ari nga mawawan i matalo nga aya ku nikaw.” (Isa. 54:10) Kunnaw gapa i napakurug ni David ta mismu nga pattolena: “Espesial i pattratu ni Jehova ta matalo ira nisa.” (Sal. 4:3, NW ) Anni nakuan gafu i efekto na ta nittam na matalo nga aya ni Jehova? Kinagi na salmista: “Gigiammuan nu danaw paray, sikamu nga ma-uto; i mannanayun nga pangaya na YAFU ay en-nu paray agga-nono.” (Sal. 107:43) Naggafu yatun nga makasta nga tabarang kani Jehova. Ammuattam ngana gafu i tallu nga aspeto na matalo nga aya na anna nu kunnasi ittam mammakapia tatun.

10. Kunnasi ittam mammakapia nu ammu tam nga mannanayun adde noka i matalo nga aya na Dios? (Salmo 31:7)

¹⁰ Mannanayun adde noka i matalo nga aya na Dios. Mami-26 nga nakagi ta Salmo 136 yatun nga importante nga aspeto na matalo nga  aya. Kunnaw i mabibbig tam ta gafu natun nga versikulo: “Mabbala-balo kamu ta YAFU, ta mapia yaya; i aya na ay mannanayun adde noka.” (Sal. 136:1) Ta versikulo 2 adde ta 26, mabibbig tam i versikulo ira nga “i aya na ay mannanayun adde noka.” Ta pabbibbig tam tatun nga salmo, siguradu nga mappabbaw ittam ta napakaru nga kukukuan ni Jehova tapenu mepasingan na i matalo nga aya na, anna ari yayya vuluvuga nga magimmang ta pangipasingan na tatun. Ipasingan na paga natun nga pakatotoli nga uvovug nga ari nga manguli i pangaya na Dios ta totolena. Makapagayayya nga makannammuan nga ari nga mabi nga mawawan i pangaya ni Jehova ta massesserbi ira ta nisa. Arian na ira vuluvuga nga panawan mas ngana nu egga i problema da. Nu kunnasi ittam mammakapia: Magayayya ittam, makapagattam ittam, anna metulu-tuloy tam i passerbi kani Jehova megafu ta ammu tam nga ari na ittam vuluvuga nga panawan.​—Bibbigan i Salmo 31:7.

11. Segun ta Salmo 86:5, ngatta mamakoma si Jehova?

¹¹ Mamakoma i Dios megafu ta matalo nga aya na. Nu masingan ni Jehova i pabbabawi na nakaliwa anna iyemmang na ngana i marake ira nga kukukuan na, pakoman na yatun megafu ta matalo nga aya na. Kinagi ni salmista David meyannung kani Jehova: “Arian na ittam nga kastigowan ta kunna kepangngattat-tam; arian na ibalo nittam i katagarulian anna liwa-liwa tam.” (Sal. 103:8-11) Ammu ni David nu kunnasi kadammo ta panageno nu tuku-tukian naka na konsensiam. Ngem ammu na gapa nga “minammakoma” si Jehova. Ngatta? Tabbagan yatun na Salmo 86:5. (Bibbigan.) Masingan tatun nga pakimallo ni David nga minammakoma si Jehova megafu ta ari nga manguli i matalo nga aya na ta ngamin nga makimallo ta nisa.

12-13. Anni i makoffun nittam nu makokkonsensia ittam megafu ta nappasa ira nga nakaliwatattam?

¹² Nu makaliwa ittam, normal laman nga makatageno ittam tu daddam. Mapaguyu gare ittam natun tapenu mabbabawi anna itunung i nakaliwatattam ira. Ngem sobra mabbi gapa i pakkakonsensia na karuan nga aripan na Dios megafu ta nappasa ira nga nakaliwatadda. Abbo da gare nga ari ira vuluvuga nga pakoman ni Jehova maski nu kurug mabba i  pabbabawi da. Malabanammu i kunnatun ira nga panageno nu malippawa mu nga kakayà ni Jehova nga ipasingan ta nikaw i matalo nga aya.

¹³ Nu kunnasi ittam mammakapia: Maski imperfekto ittam, makapasserbi ittam tu sigga-pagayayya kani Jehova megafu ta marenu i konsensia tam. Posible yatun megafu ta “i daga ni Jesus nga Ana na i mamakarenu nittam ta ngamin nga katagarulian.” (1 Juan 1:7) Nu makkafi i nono mu megafu ta pakkafiammu ira, daddammammu nga sigga-paran naka nga pakoman ni Jehova, basta kurug i pabbabawim. Sifutan i koneksion na matalo nga aya anna pamakoma ta kinagi ni David. Nitura na: “Nu kunnasi i katannang na langi ta davvun, kunnatun ta mammakakua ira sa i aya na nga mannanayun. Nu kunnasi i karayyu na zigattu ta taggappan, kunnatun i kadakal na pamakoma na nittam.” (Sal. 103:11, 12) Talaga “dakal i pamakoma” ni Jehova.​—Isa. 55:7.

14. Segun kani David, kunnasi ittam protektan na matalo nga aya na Dios?

¹⁴ Protektan ittam ta espiritual na matalo nga aya na Dios. Kunnaw i nipakimallo ni David kani Jehova: “Sikaw laman i awayyà pattaguan; ta ziga ay sikaw i mamaliag niakan. Iyassikak-ku nga ikansion i pamaliag mu, megafu ta niyawa mu niakan i pangiyegu mu. . . . I mammakatalo ta YAFU ay meyegu ira megafu ta ari manguli nga pangaya na.” (Sal. 32:7, 10) Ta tiempo na Biblia, maprotektan i totolay megafu ta pader ira nga nakapalevu ta interu siudad. Megitta gapa tatun ira nga pader i matalo nga aya ni Jehova megafu ta protektan ittam natun ta maski anni nga makadaral ta relasiottam ta nisa. Megafu paga tatun nga matalo nga aya, iyaranni ittam ni Jehova ta nisa.​—Jer. 31:3.

15. Anni ira i mangipasingan nga protektan ittam ni Jehova megafu ta matalo nga aya na?

¹⁵ Dineskriba paga ni David nu kunnasi nga protektan na Dios i totolena. Nitura na: “Umay ka, AFU, ay i inango ku paliaram-mu kari; palubbangam-mà gafu ta aya mu nga ari manguli.” Kinagi paga ni David meyannung kani Jehova: “I pammakatalakkak-ku ay i manayun nga aya mu laman; magayaya ngà ta pamaliag mu niakan.” (Sal. 6:4; 13:5) Ipasigo ni David tatun ira nga kinagi na nga ipaliag ni Jehova i totolena megafu ta matalo nga aya na. Maski sitaw gafu i paddianattam, basta masserbi ittam kani Jehova, makapattalo ittam nga protektan na ittam tapenu mapattalupaddiattam i relasiottam ta nisa. Nipasiguradu gapa yatun na nattura ta Salmo 91. Kunnaw i kinagi na kani Jehova: “Sikaw i mangiyegu anna mamaliag niakan. Sikaw i Dios ku nga ek-ku pammakatalakkan.” (Sal. 91:1-3, 9, 14) Kinagi gapa ni Moises nga makitappaddian nittam i Dios. (Sal. 90:1) Turi ta lakay ngana yayya, nitura na yaw ira nga makapabannay nga uvovug: “I Dios ay akkiyegutan tagga paga ta ollu nga tiempo, iyakka naka na mannanayun nga lima na.” (Deut. 33:27) Anni i ituddu nittam na uvovug ira nga “iyakka naka na mannanayun nga lima na” meyannung kani Jehova?

16. Anni i dua nga kukukuan ni Jehova tapenu uffunan ittam? (Salmo 136:23)

¹⁶ Memammo ittam megafu ta si Jehova i Akkiyegutattam. Ngem egga lagapa ira i tiempo nga awayya na tu mapedda ittam megafu ta problema, anna marigatan ittam nga tumaddag. Nu kunnatun i mesimmu, anni i kuan ni Jehova para nittam? (Bibbigan i Salmo 136:23.) Tammikan na labbi ittam, sisinu na ittam nga palakkatan, anna uffunan na ittam nga tumaddag uli. (Sal. 28:9; 94:18) Nu kunnasi ittam mammakapia: Ammu tam nga  kanayun ittam nga uffunan na Dios. Kunnasi na nga kuan yatun? Ollu, maski sitaw i paddianattam, magga protektan ittam ni Jehova. Mekadua, kuruga ikavurungan ittam na minaggiddu nga Yama tam ta langi.

17. Megafu ta matalo nga aya na Dios, ta anni ittam nga makapattalo? (Salmo 33:18-22)

¹⁷ Gitta na nagigiammu tam ngana, makasiguradu ittam nga uffunan ittam ni Jehova nga mattalupaddian nga matalo ta nisa nu egga i problema tam. (2 Cor. 4:7-9) Kinagi ni profeta Jeremias: “Megafu ta matalo nga aya ni Jehova yayya nga ari ittam paga nga napawan, megafu ta awan tu pagaddetan na allo na.” (Sila. 3:22) Kagitta na salmista, makapattalo gafu ittam nga kanayun nga ipasingan ni Jehova nittam i matalo nga aya na megafu ta “tangngallan na YAFU i mammakakua ira sa, nga mammakatalo ta ari manguli nga pangaya na.”​—Bibbigan i Salmo 33:18-22.

18-19. (a) Anni nakuan i daddammattam? (b) Anni i gigiammuattam ta tumunug nga artikulo?

¹⁸ Anni nakuan i daddammattam? Nige tam paga nga nasserbi kani Jehova, nammakapia ngana ittam ta aya nga nipasingan na ta ngamin nga totolay. Ngem turi ta naddayaw ittam ngana nisa, nammakapia paga ittam ta matalo nga aya na. Megafu tatun nga aya, kanayun ittam nga protektan ni Jehova. Ari na ittam vuluvuga nga pagurayan anna tuppalan na noka i promesa na ira ta nittam. Kakayà na nga mannanayun i pakikkofuttam ta nisa! (Sal. 46:1, 2, 7) Maski nu anni i problema tam, iyawa ni Jehova i sikan nga kawagattam tapenu makapattalupaddian nga matalo ta nisa.

¹⁹ Nagigiammu tam ngana nu kunnasi nga ipasa-pasingan ni Jehova i matalo nga aya na ta massesserbi ira ta nisa. Ekspektan na gapa nga kunnatun i ipasingattam ta kataggi-tadday. Kunnasi? Yatun i gigiammuattam ta tumunug nga artikulo.