1. Anni i awayya na nga meyavu tam ta baggi tam?

MAVURUKKA kari nu manono mu i aranni ngana ira nga mesimmu, kagitta na kadaral na falsu nga relihion, pangatake na Gog na Magog, anna i gerra na Armagedon? Niyavu mu ngana kari yaw ta baggim, ‘Sonu mesimmu danatun, makapattalupaddian ngà kari nga matalo maski nu kappaganassing danatun?’ Dakal nga uffun i kinagi ni Jesus ta disipulos na ta tema nga teksto tam. Kinagi na: “Ari kamu nga mavvuru-vurung. Mangurug kamu.” (Juan 14:1) Nu masikan i pangurug tam, kalmadu ittam laman maski nu anni i mesimmu ta mappange.

2. Kunnasi tam nga pasikannan i pangurug tam, anna anni i gigiammuattam taw nga artikulo?

² Nu pannonopattam i reaksiottam sangawe kada mapurueban i pangurug tam, mammuattam nu anni ira i kuattam tapenu massikan i pangurug tam anna maattammattam i kapurueba ira ta mappange. Kada gare maattammattam i tadday nga kapurueba, mas massikan i pangurug tam. Taw nga artikulo, ammuattam i appa nga situasion nga neparubang ta disipulos ni Jesus nga nangipasingan tu kawagadda paga nga pasikannan i pangurug da. Tapus gigiammuattam nu anni ira i kuattam nu meparubang ittam ta kuddanatun nga problema anna nu kunnasi ittam nga iprepara natun ta mappange.

3. Base ta Mateo 6:30, 33, anni i manawag nga kinagi ni Jesus meyannung ta pangurug?

³ Gagangay laman nga kayà na ulu na familia nga iyawa i makan, passinnun, anna i paddianan na atawa na anna na ána na. Ngem ari tu mabi yatun ta mattolay ittam ta mariga nga tiempo. Egga lagu paga i karuan nga wawwaragi nga nawawadda i trabahu da. Maski nu malappo ira nga magaleg tu bagu nga trabahu, ariadda lagapa nga makaleg. Pinanakitan gapa na karuan i trabahu ira nga ari tu mepangngo ta Cristiano ira. Tatun ira  nga situasion, kawagattam i masikan nga pangurug nga iyawa ni Jehova i pakawagan na familia tam. Yatun i manawag nga kinagi ni Jesus ta disipulos na ta Sermon ta Vukig. (Bibbigan i Mateo 6:30, 33.) Nu buu i pattalo tam nga ari ittam pagurayan ni Jehova, makapaffokus ittam ta passerbi ta nisa. Kada masingattam gapa nu kunnasi nga iyayawa ni Jehova i pakawagattam, mas maddukko ittam nisa anna massikan i pangurug tam.

4-5. Anni i nakoffun ta tadday nga familia turi ta navvuru-vurung ira ta material nga pakawagadda?

⁴ Innan nu kunnasi nga naekspiriensa na tadday nga familia ta Venezuela i panguffun ni Jehova turi ta mavvuru-vurung ira ta material nga pakawagadda. Dati bi nga egga i makalanno nga kuartu na familia nga Castro megafu ta egga i davvun nga kusetchadda. Ngem finuersa na armadu nga lallaki nga apan i pakkukua da anna pinapanaw da ira ta davvudda. Kunnaw i kagian na yama nga si Miguel: “Sangawe, maddepende kami ngana laman ta baddi nga davvun nga nipakusetcha nikami na tanakuan. Kada umma, makimallo ngà labbi kani Jehova nga iyawa na nakuan i pakawagammi tatun nga aggaw.” Maziga i familia nga Castro, ngem nattalo ira nga meyawa na minaggiddu nga Yama tam i pakawagadda ira ta kadaggaw. Regular ira nga makistudy anna mallayyagayya. Megafu ta pinagollu da i Pappatulan ta pattoleda, iyayawa ni Jehova i pakawagadda.

⁵ Tatun ira nga mariga nga tiempo, nakafokus si Miguel anna i atawa na nga si Yurai ta panangngal ni Jehova ta nira. Inusa ni Jehova i kapangngurug da ira tapenu iyawa i karuan nga pakawagadda onu uffunan si Miguel nga makaleg tu trabahu. Inusa gapa ni Jehova i branch office tapenu iddan ira tu relief goods. Ari ira vuluvuga pinagurayan ni Jehova. Megafu tatun, makagi da nga nassikan i pangurug na familia da. Kabalin nga istorian na kaka nga ana da nga si Yoselin i pinanguffun ni Jehova ta nira, istorian na paga: “Makakkasta i annagenappammi megafu ta uuffunan nakami ni Jehova. Para nio, kofukku si Jehova, anna magga kanayun nà nga uffunan.” Kinagi na paga: “Megafu ta naattammammi i kapurueba ira ta pangurug na familia mi, preparadu kami para ta mas mariga ira nga kapurueba ta mappange.”

6. Nu makkurang i inaggaw nga pakawagan nu, kunnasi nu nga mapasikan i pangurug nu?

⁶ Makkukurang kamu kari gapa ta inaggaw nga pakawagan nu? Nu wan, awayya nu nga usan yaw nga mariga nga tiempo tapenu pasikannan i pangurug nu. Makimallo kamu kani Jehova tapus bibbigan nu i kinagi ni Jesus ta Mateo 6:25-34 anna pannonopan nu tu mapia yatun. Nonopan gapa i ekspiriensa na wawwaragi tam nga namakurug nga iyawa ni Jehova i pakawagan danuri na okupadu ta passerbi nisa. (1 Cor. 15:58) Nu kuan nu yatun, dumakal i pattalo nu nga nu inuffunan ira ni Jehova, magga uffunan nakamu gapa. Ammu ni Jehova i pakawagan nu anna nu kunnasi nga iyawa yatun. Kada maekspiriensa nu i panguffun ni Jehova,  mas massikan i pangurug nu anna maattamman nu i mas mariga ira nga kapurueba ta mappange.​—Hab. 3:17, 18.

7. Segun ta Mateo 8:23-26, anni i efekto na ‘masikan nga bayabbag’ na bagiu ta pangurug na disipulos?

⁷ Mittan, nattakay ta barangay si Jesus kavulu i disipulos na. Gavva nga nabbayabbag tu masikan ta bebay megafu ta bagiu. Inusa ni Jesus yatun nga nesimmu tapenu ipalippawa ta disipulos na nga kawagadda nga pasikannan i pangurug da. (Bibbigan i Mateo 8:23-26.) Ta kaddarakal na palung, maggi lummag ngana i barangay. Ngem agga-katrug si Jesus. Ta anassing na disipulos ira, nilukag da si Jesus tapenu mappakurag nisa. Masippo na ira nga kinagianan: “‘Ngatta ta maganassing kamu?’ kun-ni Jesus. ‘Anni i kafi na angngurug nu!’” Nattaman danatun nga disipulos nga egga i pakapangngua ni Jehova nga protektan si Jesus anna i kakavvulu na. Anni gafu i magigiammu tam tatun? Mawag tu masikan i pangurug tam tapenu marubattam i maski anni nga literal nga ‘masikan nga bayabbag’ na bagiu onu i kitarriga ira nga problema nga gitta na bagiu.

8-9. Anni i kitarriga nga inattamman ni Anel, anna anni i namasikan ta pangurug na?

⁸ Nassikan i pangurug ni Anel, tadday nga single sister ta Puerto Rico, turi ta naattamman na i literal nga ‘masikan nga bayabbag’ na bagiu. Zinaral na Hurricane Maria i balena ta 2017. Nawawan na paga i trabahu na gafu tatun. Kunnaw i kagian ni Anel: “Tatun ira nga kitarriga nga tiempo, fermi i vuru-vurukku. Ngem nagigiammù i mattalo kani Jehova gukaban na pakimallo anna kingnguà lagapa i mawag ku ira nga kuan maski nu mavuru-vurung ngà.”

⁹ Kinagi paga ni Anel nga nakoffun gapa i pattuppal tapenu maattamman na i problema na ira. Istorian na: “Kalmadu ngà kanayun megafu ta sinuttul ku i organisasion ni Jehova. Ammù tu uuffunan nà ni Jehova gukaban na wawwaragi. Pinasikadda i nono ku, anna niyawa da i pakawagakku ira.” Kinagi na paga: “Mas paga anne ta kiniddò kani Jehova i niyawana ira nio, yayya nga talaga nassikan i pangurug ku.”

10. Anni i kuammu nu egga i problemam nga kunna ‘masikan nga bayabbag’ na bagiu?

¹⁰ Maddaggun kari i ‘masikan nga bayabbag’ na bagiu ta pattolem? Awayya na tu marigi-rigatakka megafu ta efekto na kalamidad, onu awayya na gapa nga egga i grabe nga taki mu nga namakkafi ta nono mu, anna ari mu ngana ammu i kuammu. Normal laman nga mavurukka nu mittan. Ngem ariammu pawanan i pattalo mu kani Jehova megafu tatun nga pavvuru-vurung. Umaranni ka nisa gukaban na napafutuan nga pakimallo. Pasikannammu i pangurug mu gukaban na pannono ta tiempo ira nga inuffunan naka ni Jehova. (Sal. 77:11, 12) Nu inuffunan naka ni Jehova ta nappasa, magga uffunan naka gapa sangawe anna ta mappange.

11. Ngatta determinadu ittam nakuan nga mattuppal turi ira ta mangirollu nittam?

¹¹ Anni paga i makoffun nikaw tapenu attamman  i kitarriga ira nga problema? Kagitta na kinagi ni Anel, importante i pattuppal. Sanayammu i baggim nga mattalo turi ira ta pattalakkan ni Jehova anna ni Jesus. Nu mittan, gitta na ari tu masirib i karuan ta instruksion danuri na natunno nga mangirollu nittam. Ngem daddammammu nga bendisionan ni Jehova danuri mattuppal. Napakurug tam ngana gapa ta Uvovug ni Jehova anna ta ekspiriensa na matalo nga wawwaragi nga makepaliag i pattuppal. (Ex. 14:1-4; 2 Cro. 20:17) Pannonopammu danatun nga ehemplo tapenu determinadu ka nga tuttulan i direksion na organisasion ni Jehova sangawe anna ta mappange. (Heb. 13:17) Makoffun gapa yatun tapenu ari mu noka nga ikassing i dakal nga ziga nga aranni ngana nga duttal.​—Prov. 3:25.

12. Base ta Lucas 18:1-8, kunnasi nga makoffun i pangurug tapenu maattamman i kawan tu hustisia?

¹² Ammu ni Jesus nga mapurueban i pangurug na disipulos na megafu ta kawan tu hustisia. Inuffunan na ira nga arubangan yatun gukaban na tadday nga ilustrasion nga mabibbig tam ta libru na Lucas. Inistoria ni Jesus tatun i tadday nga balu nga babay nga manotoli nga mappoffun ta hues nga awan tu agganassing na ta Dios. Mangurug yatun nga babay nga nu ari yayya nga magimmang nga makimemallo ta hues, ginnan na gabbalaman yayya anna mala na i hustisia. Nesimmu talaga yatun. Anni i magigiammu tam tatun? Matunung si Jehova, ari tu kagitta nari na hues. Yayya nga kinagi ni Jesus: “I Dios, ay arian na pano nga iyawa i katunungan mismu na totolay na nga aggaw-gabi nga makimemallo sa?” (Bibbigan i Lucas 18:1-8.) Tapus niyammung paga ni Jesus: “Nu manoli i Ana na Tolay, egga pano i maleran na nga angngurug na totolay [kagitta na angngurug nari na balu] ta utun na davvun?” Nu makaekspiriensa ittam tu kawan na hustisia, pakurugattam nakuan nga masikan i pangurug tam kagitta nari na balu. Minappasensia ittam nakuan anna ari ittam nga magimmang nga mappoffun kani Jehova. Nu masikan i pangurug tam, komfiansa ittam nga ari mabbayag, uffunan gabbalaman ittam ni Jehova. Ari tam nakuan gapa nga tagibadditan i makua na pakimallo tam ira. Nu mittan gare, sobra ta inekspekta tam i tabbag ta pakimallo tam ira.

13. Anni i neyuffun na pakimallo ta familia nga naka-ekspiriensa tu kawan na hustisia?

¹³ Kunnaw gapa i naekspiriensa na familia da Sister Vero nga taga-Democratic Republic of the Congo. Turi ta inatake na suddalu ira i diadda, nattammang si Sister Vero kavulu i ari tu Saksi nga atawa na anna i 15-anios nga ana da nga babay. Nakadde ira ta checkpoint na militar nu sitaw pinagimmadda ira anna inananassidda nga patayadda ira. Turi ta tumangi ngana si Vero, nakimallo tu kitassikan i ana da anna namippiga nga inusa na i ngagan nga Jehova tapenu makkalma i yena na. Kabalin na nga nakimallo, niyavu sa na komander na suddalu, “Nene, sinni i nanuddu niko nga  maddasal?” Nitabbag na: “Si Mamà, Sir. Sinudduan nà nga parigakku i dasal ta Mateo 6:9-13.” Tapus kinagi na komander: “Sige na ‘vu ‘Ne, lubbe kamu ‘na na magana mu. Paray nakuan tu protektan nakamu ni Jehova nga Dios nu!”

14. Ta anni nga situasion nga mawag tu ipasingattam i pangurug tam, anna anni ira i makoffun ta nittam?

¹⁴ Tatun ira nga ekspiriensa, magigiammu tam nga ari tam nakuan tagibadditan i makua na pakimallo. Ngem kunnasi nu ari insigida nga natabbag i pakimallo mu ira onu ari tu extraordinariu i nikatabbag natun? Parigammu i balu ta istoria ni Jesus. Ari ka magimmang nga makimallo. Makkomfiansa ka nga ari naka pagurayan na Dios. Mangurug ka nga tabbagan na lagapa saw i pakimallo mu ira. Ibala-balayummu gafu nga ikiddaw i masanto nga espiritu ni Jehova. (Fil. 4:13) Daddamman nga aranni ngana nga iyawa nikaw ni Jehova i daka-dakal nga bendision. Sonu mesimmu yatun, makattamammu ngana i ngamin nga ziga nga inattammammu. Nu matalo nga attammammu i problemam ira sangawe ta uffun ni Jehova, massikan i pangurug mu, anna maattammammu i problema ira ta mappange.​—1 Ped. 1:6, 7.

15. Base ta Mateo 17:19, 20, anni nga problema i inarubang na disipulos ni Jesus?

¹⁵ Nituddu ni Jesus ta disipulos na nga mawag da i pangurug ta situasion ira nga gitta na imposible nga malampasan. (Bibbigan i Mateo 17:19, 20.) Mittan, ari da nga mapalawan i tadday nga demonio maski nu nakua da ngana mabba yatun dati. Anni gafu i problema? Nipakanawag ni Jesus nira nga makafi gare i pangurug da, yayya nga kinagi na tu pasikannadda i pangurug da tapenu maski nu kagitta na vukig i kaddarakal na problema da, mawayya da nga arubangan yatun! Meparubang ittam gapa sangawe ta darakal nga problema nga gitta na kitarriga nga lampasan.

16. Kunnasi nga nakoffun i pangurug ni Geydi tapenu maattamman na i trahedia anna i grabe nga paddaddam na?

¹⁶ Innattam i naekspiriensa ni Sister Geydi nga taga-Guatemala. Ta pallabbe da maggafu ta study, pinatay na kriminal ira i atawa na nga si Edi. Kunnasi nga nakoffun i pangurug ni Geydi tapenu maattamman na i grabe nga paddaddam na? Kinagi na: “Nakoffun nio i pakimallo tapenu mepakattù kani Jehova i pakadammakkakku. Nalappawan ngà. Ammù nga tattangngallan nà ni Jehova gukaban na familià anna na wawwaragi ta kongregasion. Kanayun ngà gapa nga busy ta passerbì kani Jehova tapenu ari ngà kuruga maddaddam, malampasakku i kada aggaw, anna ariakku pakavurungan i tumunug nga aggaw. Turi ta naekspiriensà yaw, nanono ku nga maski anni paga nga problema i duttal ta mappange, mawayyà yatun nga attamman ta uffun ni Jehova, ni Jesus, anna na organisasion.”

17. Anni i kuattam nu egga i dakal nga problema tam nga gitta na kitarriga nga lampasan?

¹⁷ Maddaddam ka kari megafu ta natayakka?  Bibbigammu i istoria ira ta Biblia nuri ira na napaginnolay tapenu mapasikan i pangurug mu tatun nga iddanama. Maddaddam ka kari ta nadisfellowship i kafamiliam? Gigiammuammu i Biblia tapenu makumbinsi ka nga kanayun nga kapianan i panisiplina ni Jehova. Maski nu anni paga i problema nga arubangammu, chansam yatun tapenu pasikannan i pangurug mu. Ivuvvu mu i ngamin nga mayan na futum kani Jehova. Ariammu nga isina i baggim ta wawwaragi. Kanayukka lagapa nakuan nga madukko ta nira. (Prov. 18:1) Mangngua ka tu ganna-gannug nga makoffun nikaw tapenu makapagattam ka maski paga nu makatangi ka nu manono mu i nesimmu nikaw. (Sal. 126:5, 6) Kanayukka lagapa nakuan nga makistudy, mallayyagayya, anna mabbibbig tu Biblia. Agga-nono mu nakuan i makakkasta ira nga bendision ni Jehova para nikaw ta mappange. Kada maekspiriensam i panguffun ni Jehova, mas paga nga massikan i pangurug mu ta nisa.

18. Anni i kuammu nu masingammu nga makafi paga balo i pangurug mu?

¹⁸ Nu egga i problemam ta nappasa onu ta maddaggun nga nangipasingan tu makafi balo i pangurug mu, ariammu pakkafian i nono mu. Chansam yatun tapenu pasikannan i pangurug mu. Ikiddom i kagitta na nikiddaw na apostoles ni Jesus, nga kudda: “Pasikannam-mu i angngurug mi.” (Luc. 17:5) Nonopammu gapa i ekspiriensa ira taw nga artikulo. Kagitta da Miguel anna Yurai, daddammammu i ngamin nga tiempo nga zinuffunan naka ni Jehova. Kagitta gapa ni Anel anna na ana ni Vero, napafutuan nga makimallo ka kani Jehova netallugaring nu dakal i problemam. Kagitta ni Geydi, rekunnisiammu nga uffunan naka ni Jehova gukaban na kafamiliam onu na wawwaragi. Nu ipamavulummu nga uffunan naka ni Jehova nga malampasan i problemam ira sangawe, massikan i pangurug mu nga uffunan naka gapa nga attamman i problema ira nga arubangammu ta mappange.

19. Ta anni nga makkomfiansa si Jesus, anna ta anni ka nga makasiguradu?

¹⁹ Inuffunan ni Jesus i disipulos na nga masingan i situasion ira nga kawagadda nga pasikannan i pangurug da. Ngem ari na vuluvuga pinaddudan nga mawayya da nga arubangan i problema ira ta mappange ta uffun ni Jehova. (Juan 14:1; 16:33) Komfiansa yayya nga egga noka i dakal nga ammung na totolay nga mepaliag sonu dakal nga ziga megafu ta masikan i pangurug da. (Nep. 7:9, 14) Tadday ka kari noka ta nira? Ta uffun ni Jehova, makasiguradu ka tu posible yatun. Ngem mawag tu kuammu sangawe i ngamin nga mawayyam tapenu mapeggakka tu pangurug anna pasikannan yatun!—Heb. 10:39.