1. Kunnasi tam nakuan imammatan i Cristiano nga pangurug?

NABALOR nga kualidad i Cristiano nga pangurug. Ari tu ngamin nga totolay ay egga kunnatudda. (2 Tes. 3:2) Ngem, nangiyawa si Jehova ta kada maddayaw sa tu “kadakal na angngurug.” (Roma 12:3; Gal. 5:22) Mappabalo nakuan danuri egga i kunnatunna.

2, 3. (a) Anni ira i posible nga bendision para ta egga pangurugna? (b) Anni ira nga pakkiavu i ikonsidera tam?

² Kinagi ni Jesus nga iyaranni na nelangitan nga Yamana i totolay Sa gukaban na Anana. (Juan 6:44, 65) Posible nga mapakoma i liwi-liwa na tadday nu mangurug yaya kani Jesus. Yatun gapa i mangivuka tu oportunidad tapenu mapeggan tu mannanayun nga relasion kani Jehova. (Roma 6:23) Anni kari kingngua tam tapenu mepangngo ittam tatun nga makapabbaw nga bendision? Megafu ta minattagarulli ittam, patay laman i kepangngattattam. (Sal. 103:10) Ngem nasingan ni Jehova i potensial tam. Vinukatanna i giffutuattam ta mapia nga dumug megafu ta ari mepangngo nga kinasippona. Yatutta namegafu tam nga  mangipasingan tu pangurug kani Jesus, anna egga iddanama tam nga mannanayun nga inango.—Bibbigan i 1 Juan 4:9, 10.

³ Ngem anni kari talaga i pangurug? Pakalippawa laman kari yaw ta bendision ira na Dios para nittam? I mas importante, kunnasi tam mepasingan nga egga pangurug tam?

4. Iyesplika nu ngatta ari laman nga mental nga pakalippawa i pangurug.

⁴ Ari laman tu basta mental nga pakalippawa ta gakkag na Dios i nelagum ta pangurug. Makapangngua nga fuersa yaw nga mamagguyu ta tadday tapenu kuan i mekunnay ta uray na Dios. I pammakatalo ta pamaliag na Dios i mamaguyu ta Cristiano tapenu ilayyagayyana i mapia nga dumug ta tanakuan. Niyesplika ni apostol Pablo: “Nu ilammuyag na bibig mu tu si Jesus i Yafu, anna kurugam-mu ta futum tu pinaginnolay yaya na Dios, mapaliag ka! Ta mapakatunung i tolay ta arubang na Dios gafu ta napafutu nga angngurug na; ay ta pangilammuyag na ta angngurug na, mapaliag gapa yaya.”—Roma 10:9, 10; 2 Cor. 4:13.

5. Ngatta importante i pangurug, anna kunnasi tam mapaladda yatun? Iyilustra.

⁵ Nakadepende ta kapeggan tu pangurug anna pamattalupaddian nga maladda yatun i oportunidad tam nga mattolay tu mannanayun ta Paraiso. Kagitta na maseta i pangurug. Mawag i danum tapenu mattalupaddian nga matotolay yatun. Mallanang onu mallelay i maseta nu kurang i danumna onu ari regular nga mabayatan. Sonu kua, matay ngana yatun nu nammaga ngana. Kunnatun gapa i pangurug tam. Mallanang yatun tapus matay nu mapagurayan. (Luc. 22:32; Heb. 3:12) Ngem nu tangngawattam, matotolay i pangurug tam anna “dumaka-dakal,” anna ‘massikan ittam ta angngurug.’—2 Tes. 1:3; Tito 2:2.

6. Anni i dua nga kebalinan na pangurug segun ta Hebreo 11:1?

⁶ Mabibbig i kebalinan na pangurug ta Hebreo 11:1. (Bibbigan.) Nakafokus i pangurug ta dua nga gannug nga ariattam masingan: (1) “Gannug ira nga iddanamat-tam”—nelagum taw i nepromesa ira nga mesimmu ta mappange, kagitta na pangultimo na ngamin nga kinamarakay anna paddattal na napabagu nga mundo. (2) “Gannug ira nga ariat-tam nga masingan.” Tatun nga konteksto, i orihinal nga Griego nga termino nga netransleyt tu “ari nga pabbabbang,” kebalinanna nga “makakumbinsi nga ebidensia” na gannug ira nga ari masingan, kagitta na kegga ni Jehova nga Dios, Jesu-Cristo, i anghel ira, anna i aktibidad ira na nelangitan nga Pappatulan. (Heb. 11:3) Kunnasi tam mapakurug i iddanama tam anna mangurug ittam ta gannug ira nga ari masingan nga kinagi na Biblia? Gukaban na kakkagian anna kukukuattam—nga nu awan yatun, ari kumpleto i pangurug tam.

7. Kunnasi makoffun i ehemplo ni Noe tapenu malippawa tam i kebalinan na mapeggan tu pangurug? (Innan i letratu ta gafu na artikulo.)

⁷ Mabibbig i pangurug ni Noe ta Hebreo 11:7, nga “kinurug [na] i pamappalan sa na Dios meyannung ta mappange nga ganna-gannug nga ari paga nga nasingan. Gininna na i Dios ay namadday tu daka-dakal nga sinambaw nga nakapaliag sa tuange ta kitangabbalayan na.” Nipasingan ni Noe i pangurugna gukaban na pamadday tu daka-dakal nga arka. Siguradu nga nakkiavu i karrubana nu ngatta. Nagimammo kari yaya onu kinagina nira nga ariadda yaya paki-alaman? Ari vuluvuga! Napaguyu yaya na pangurugna nga magutu nga mangilayyagayya anna iddan tu pamappalan i kakontemporariona ira ta mappange nga pangukum na Dios. Kinagi uli ni Noe ta totolay i mismu nga kinagi ni  Jehova sa: “Nadesidì nga pangultimuan ngamin i inango, megafu ta napannu tu kinavayolente i davvun megafu nira . . . Mangiyangenà tu delubio na danum ta davvun tapenu madaral ta utun na davvun ngamin nga pattag nga egga inangona. Mawawan ngamin i egga ta utun na davvun.” Kinagina uli nira i bilin na Dios nga kuadda tapenu mapaliag: “Tullukkamu ta arka.” Megafu tatun, nakepasingan mangana si Noe tu pangurug megafu ta “nangilayyagayya [yaya] ta matunung nga attolay.”—Gen. 6:13, 17, 18; 2 Ped. 2:5.

8. Anni i nitura ni Santiago meyannung ta kebalinan na fustu nga Cristiano nga pangurug?

⁸ Netura i libru nga Santiago kabalin nga nitura ni apostol Pablo i meyannung ta pangurug. Gitta ni Pablo, niyesplika ni Santiago nga i napasikkal nga Cristiano nga pangurug ay ari laman tu basta pakkagi nga mangurug ka; nelavu tatun i pagguyu. Niturana: “Innak-ku bi nu mepasingam-mu i angngurug nga ari nga navulunan ta pangngua. Ay ipasingak-ku i angngurug ku nga masingan ta pangnguà.” (Sant. 2:18) Nipasinganna paga i padduman na basta mangurug ta pangipasingan tu pangurug. Mangurug i demonio ta kegga na Dios, ngem awan nira i fustu nga pangurug. Kokkontradda lallagu i ketuppal na gakkag ira na Dios. (Sant. 2:19, 20) Kinagina paga i tadday gari  nga egga i pangurugna: “Kunnasi na nikebilang ni Abraham nga ginafuat-tam tu matunung ta arubang na Dios? Napakatunung yaya gafu ta kingngua na turi ta nitavvung na ta altar si Isaac nga ana na. Masingam-mu gafu tu navvulun i angngurug anna annangngua na; gafu ta annangngua na nabbalin tu awan tu pakkurangan na angngurug na.” Tapus tapenu palawanan i punto nga mepasingan nakuan i pangurug gukaban na pagguyu, niyammunna: “Kagitta na baggi nga natay nu awan tu espiritu na, kunnatun gapa tu natay i angngurug nu awan tu annangngua.”—Sant. 2:21-23, 26.

9, 10. Kunnasi ittam uffunan ni apostol Juan tapenu malippawa i importansia na pangipasingan ta pangurug tam?

⁹ Kabalin na maturu tallu dekada, pinadday ni apostol Juan i Evanghelio anna i tallu nga turana. Gittana karuan nga nattura ta Biblia, nalippawa ni Juan i kebalinan na pangurug. Namikkaru nga niyusana i Griego nga termino nga nu mittan netransleyt nga “ipasingan i pangurug.”

¹⁰ Angngariganna, niyesplika ni Juan: “I sinni laman nga mangurug ta Ana na Dios ay egga sa i inango nga adde ta ngangangay. Ngem i sinni laman ng ari mangurug ta Ana na Dios ay awan sa yaw nga inango ngem mannanayun sa i batù na Dios.” (Juan 3:36) Nelagum ta Cristiano nga pangurug i panuttul ta bili-bilin ni Jesus. Maruddu nga kagian gapa ni Juan i kinagi ni Jesus nga tulu-tuloy nga proseso i pangipasingan tu pangurug.—Juan 3:16; 6:29, 40; 11:25, 26; 14:1, 12.

11. Kunnasi tam mepasingan i appresasiottam ta pakannammu ta kinakurug?

¹¹ Magayaya ittam nakuan megafu ta niyusa ni Jehova i masanto nga espirituna tapenu ipakannammu nittam i kinakurug anna mepasingattam i pangurug ta mapia nga dumug! (Bibbigan i Lucas 10:21.) Kanayun ittam nakuan mappabalo ta pangiyaranni nittam ni Jehova sa gukaban na Anana, “i nangigafu anna nangompleto ta angngurug tam.” (Heb. 12:2) Tapenu mepasingattam i pangappresia ta ari mepangngo nga kinasippo, kanayuttam nakuan paladdan i pangurug tam gukaban na pakimallo anna paggigiammu ta Biblia.—Efe. 6:18; 1 Ped. 2:2.

12. Kunnasi tam mepasingan i pangurug tam?

¹² Kanayuttam nakuan ipasingan i pangurug tam ta promesa ira ni Jehova. Masingan nakuan na tanakuan nga kukukuattam yatun. Angngariganna, kanayuttam nakuan ilayyagayya i meyannung ta Pappatulan na Dios anna makipattrabahu ta pagangngua tu disipulos. Itulu-tuloy gapa nga “kuat-tam i mapia ta ngamin nga ikattolay tam, tallugaring ta wawwagi tam ira ta angngurug.” (Gal. 6:10) Pappursigiattam nga ‘arian i dana nga kata-katolay, tuange ta negagangay nga pangnga-pangngua,’ nga magimmugug kontra ta anni laman nga mamakkafi nittam ta espiritual.—Col. 3:5, 8-10.

13. Ngatta kuruga importante i “pangurug ta Dios”? Sitaw yatun neyarig anna ngatta?

¹³ “Nu awan tu angngurug,” kunna Biblia, “arian na nga awayya nga mapagayaya i Dios. Ta i sinni laman nga umaranni ta Dios ay mawag tu kurugan na tu egga i Dios ay tu bala-balattan na Dios danuri i magaleg sa.” (Heb. 11:6) Segun ta Uvovug na Dios, “i pangurug ta Dios” ay parte na “ollu ira nga tuddu” (“fundasion,” NW) nga kawagan na ngamin tapenu mabbalin anna mattalupaddian nga kurug nga Cristiano. (Heb. 6:1) Megafu tatun, mawag nakuan tu i Cristiano ira ay ‘ilanno ta angngurug [da]’ i tanakuan paga nga importante ira nga kualidad tapenu ‘ari [ira] umarayyu ta aya na Dios.’—Bibbigan i 2 Pedro 1:5-7; Jud. 20, 21.

14, 15. Nu mekumpara ta aya, kunnasi ka-importante i pangurug?

 ¹⁴ Nipasingan na Cristiano ira nga nattura ta Biblia i importansia na pangurug gukaban na ginatu nga pakkagida tatun. Awan ngana tu Cristiano nga kualidad nga kunnatun kakaru nga nekagi. Kayàna kari kagian nga pangurug i pinaka-importante nga kualidad na Cristiano?

¹⁵ Tapenu ikumpara i pangurug ta aya, nitura ni Pablo: “Maski nu egga niakan i dakal nga angngurug nga makeyali ta vukig ira, ngem nu awan niakan i aya, awan tu kwentà.” (1 Cor. 13:2) Nipasingan ni Jesus nga kuruga importante i kualidad nga aya ta Dios ta pattabbagna taw nga pakkiavu: “Anni i kuruga importante ta ngamin nga Dorob?” (Mat. 22:35-40) Moffunan ittam na aya tapenu mapeggan tu importante paga ira nga kualidad, nelagum i pangurug. I “aya,” kunna Biblia, ay “i pammakatalo” ta ngamin nga gannug. Megafu ta aya, mangurug tam ta ganna-gannug nga kinagi na Dios ta Uvovugna.—1 Cor. 13:4, 7.

16, 17. Kunnasi nga parehu nga neddan tu importansia ta Biblia i pangurug anna i aya, ngem anni i mas importante? Ngatta?

¹⁶ Megafu ta nabalor i pangurug anna i aya, namippiga nga tinukoy yatun na nattura ira ta Biblia. Maruddu nga makkavulu i pakkagida tatun ira. Pinagaram ni Pablo i kapangngurugna nga “iyusa tam i angngurug anna aya tu kunna panakkag ta gakaw tam.” (1 Tes. 5:8) Kunni Pedro: “Ariannu paga nga nasingan si Jesus ngem ayatan nu yaya. Adde sangoye ay arian nu nga nasingan yaya, ngem kurugan nu.” (1 Ped. 1:8) Kinagi ni Santiago ta nazelugan ira nga wawwaragina: “I pobre ira toye ta utun na davvun i pinili na Dios nga mabbalin tu masikan ta angngurug anna malagum ta Pammagurayan nga nitabba na ta mangaya ira sa.” (Sant. 2:5) Nitura ni Juan: “Yaw i bilin na: tu mangurug ittam kani Jesu-Cristo nga Ana na, makka-aya-aya ittam kunna nebilin ni Cristo nittam.”—1 Juan 3:23.

¹⁷ Maski nu importante i pangurug, mappasa i aspetona ira yaw nga kualidad sonu masingattam i ketuppalan na promesa ira na Dios anna maekspiriensa i realidad na Cristiano nga iddanama. Ngem ari vuluvuga magimmang i pakawagan nga dumakal i aya tam ta Dios anna ta kasittoletam. Yatutta nitura ni Pablo: “Ay danoye i tallu nga mannanayun; i angngurug, aggiddanama anna aya; ngem i kadakallan ta kebalinan taw nga tallu, ay i aya.”—1 Cor. 13:13.

18, 19. Anni nga kadakallan nga pangipasingan tu pangurug i mesissimmu ta maddaggun, anna sinni i maketuppal tatun?

¹⁸ Maddaggun ngana nga mangipasingan tu pangurug ta nepataddag nga Pappatulan na Dios i totolay ni Jehova. Narresulta yatun ta approgreso na interu mundo nga espiritual nga paraiso nga egga maturu tu walu million tu residentena. Maruddu nga masingan nira i aspeto ira na vunga na masanto nga espiritu na Dios. (Gal. 5:22, 23) Kadakallan yatun nga pangipasingan tu napasikkal nga Cristiano nga pangurug anna aya!

¹⁹ Ari tu posible yatun nu totolay laman i mangngua, nu ari, Dios laman i maketuppal tatun. Yaw nga kappabbaw nga trabahu ay mangiyawa tu “dayaw kani Jehova, mannanayun nga senial nga ari vuluvuga mappasa.” (Isa. 55:13) Ta kakuruganna, “regalu na Dios” yatun nga ‘mapaliag tam gafu ta angngurug.’ (Efe. 2:8) Dumaka-dakal anna mapprogreso i espiritual nga paraiso tam adde ta mapannu i interu davvun tu perfekto, matunung, anna magayaya nga totolay, nga makedayaw ta ngagan ni Jehova adde noka. Kanayuttam nakuan nga ipasingan i pangurug tam ta promesa ira ni Jehova!