1, 2. (a) Kunnasi neruma i matagibalor nga iddanama na kurug ira nga Cristiano ta iddanama na totolay na mundo? (b) Anni ira nga pakkiavu i ikonsidera tam?

ANNI ngana mabba kappabbaw nga iddanama tam bilang kurug nga Cristiano! Sittam ngamin, nazelugan onu tanakuan nga karneru, iddanamattam nga masingan i ketuppal na orihinal nga gakkag na Dios anna i pamakasanto ta ngagan ni Jehova. (Juan 10:16; Mat. 6:9, 10) Kuruga tagibaloran na maski sinni yatun ira nga pagiddanama. I-innaggattam i nepromesa nga bala-balo nga mannanayun nga inango ta “bagu nga langi” na Dios onu ta “bagu nga davvun.” (2 Ped. 3:13) Ta maddaggun, iddanamattam i tulu-tuloy nga espiritual nga papprogreso na totolay na Dios.

² Magiddanama gapa i totolay na mundo, ngem duda ira nu matuppal noka yatun. Angngariganna, minillion nga fugador i magiddanama nga mangaffu ta lotto, ngem ari ira siguradu tatun. Ngem “i angngurug ay i pammakatalo ta gannug ira nga iddanamat-tam.” (Heb. 11:1) Baka nonopammu, kunnasim masiguradu yatun nga iddanama? Anni ira i benefisio na kapeggan tu maladda nga pangurug ta iddanamammu?

3. Ngatta kurugattam nga matuppal ngamin i nipromesa na Dios?

³ Ari neyana nga egga i pangurug na minattagaruli nga totolay;  ari gapa nga natural nira yatun. Resulta na attrabahu na masanto nga espiritu ta minattuppal nga futu i Cristiano nga pangurug. (Gal. 5:22) Ari nekagi ta Biblia nga egga onu kawagan ni Jehova i pangurug. Megafu ta makapangngua anna masirib yaya, awan tu makefugag sa ta pattuppal ta gakkagna. Siguradu i nelangitan nga Yama tam ta ketuppal na nipromesana ira nga bendision, yatutta para sa, gittana nesimmu ngana yatun. Yari tu kinagina: “Netuppal ngana!” (Bibbigan i Nepakannammu 21:3-6.) Ammu tam nga tuppalan kanayun ni Jehova i promesana ira megafu ta “matalo nga Dios” yaya. Yatutta kurugattam ngamin i kakkagianna meyannung ta mappange.—Deut. 7:9.

4. Anni i iddanama na natay nga matalo nga lallaki anna babbay gari?

⁴ Nerekord ta kapitulo 11 na libru nga Hebreo i 16 nga matalo nga lallaki anna babbay. Kinagi ni Pablo nga “nala da i mapia nga ke-uvovug da gafu ta angngurug da,” kunne na gapa i aru paga. (Heb. 11:39) ‘Mammakatalo’ ngamin ira nga palattuagan na Dios i nipromesana nga “gaka” nga manaral ta rebelyon ni Satanas anna mattuppal ta orihinal nga gakkagna. (Gen. 3:15) Egga ira i natay nga matalo nige nga vinukatan na nepromesa nga “gaka,” nga si Jesus Cristo, i nelangitan nga inango. (Gal. 3:16) Mapia ngana laman megafu ta ari maffaliu nga promesa ira ni Jehova, mapaginnolay ira ta paraiso nga davvun.—Sal. 37:11; Isa. 26:19; Os. 13:14.

5, 6. Ta anni naffokus da Abraham anna familiana? Kunnasida pinaladda i pangurugda? (Innan i letratu ta gafu na artikulo.)

⁵ Netura ta Hebreo 11:13 i meyannung ta Cristiano ira gari: “Ngamin danaw nga totolay ay natay nga sigga-angngurug. Ariad-da nga nalawa i nitabba ira na Dios, ngem neripa da ta arayyu anna nikaya da nga alawatan danaw nga netabba.” Tadday tatun si Abraham. Manawag kari ta nonona i makapagayaya nga iddanama nga inango ta pammaguray na nepromesa nga “gaka”? Klaro i tabbag ni Jesus tatun nga pakkiavu ta pakkagina ta kumokkontra sa: “Nagayaya si Abraham nga yama nu ta iniddanaman na tu masingan na i aggaw na dattal ku. Nasingan na lagu, ay nagayaya yaya.” (Juan 8:56) Kunnatun gapa da Sara, Isaac, Jacob, anna aru paga nga naffokus ta iddanamada ta mappange nga Pappatulan, “nga pinanono anna pinataddag na Dios.”—Heb. 11:8-11.

⁶ Kunnasi nga pinaladda da Abraham anna na familiana i pangurugda? Siguradu nga natudduan ira meyannung ta Dios gukaban na pagginna ta matalo ira nga manakam, anghel onu sirmata, anna pabbibbig ta netura ira gari. Ariadda nakattamman i nagigiammuda, nu ari, tinagibalorda i promesa anna kikkiddawan ira na Dios anna monag nga ninonoda yatun. Siguradu ira ta iddanamada, yatutta sigga-paran ira nga mammakatalo ta Dios maski nu mazziga-riga ira.

7. Anni ira nga probision i niyawa ni Jehova nittam tapenu mapaladda i pangurug tam, anna anni nakuan i kuattam tatun ira?

⁷ Tapenu mattalupaddian nga maladda i pangurug tam, niyawa nittam ni Jehova i kumpleto nga Uvovugna, i Biblia. Regular nakuan nga bibbigattam yatun, nu posible kagaggaw, tapenu “mapalag” tam anna “mattuppal ta mapia.” (Sal. 1:1-3; bibbigan i Kingngua 17:11.) Kagitta na Cristiano ira gari, kawagan nga monag nga pannonopan i promesa ira na Dios anna tuppalan i ikikkiddona ira. Binendisionan ittam paga ni Jehova tu abundansia nga espiritual nga makan gukaban na “mekatalo anna nannono nga doroban.” (Mat. 24:45) Yari tu nu tagibalorattam  i nagigiammu tam ta espiritual ira nga probision nga niyawa ni Jehova, meyarig ittam ta ehemplo ira gari na pangurug nga ‘nammakatalo’ ta iddanama na Pappatulan.

8. Kunnasi mapaladda na pakimallo i pangurug tam?

⁸ Importante gapa i papel na pakimallo ta palladda na pangurug na Cristiano ira gari. Napasikan i pangurugda durante nga naekspiriensada i tabbag ni Jehova ta pakimalloda. (Neh. 1:4, 11; Sal. 34:4, 15, 17; Dan. 9:19-21) Mevuvvu tam gapa i pakavurungattam kani Jehova, megafu ta ammu tam nga ginnanna ittam anna pasikannan nga sigga-pagayaya nga magattam. Malladda i pangurug tam durante nga tabbaganna i pakimallo tam. (Bibbigan i 1 Juan 5:14, 15.) Megafu ta aspeto na masanto nga espiritu i pangurug, kawagattam nga kanayun nga “makkiddaw” tu espiritu na Dios, gittana nipagaram ni Jesus.—Luc. 11:9, 13.

9. Fuera paga ta baggi tam, sinni paga nakuan ira i ipakimallo tam?

⁹ Ari nakuan limitadu ta personal nga pakawagan i pakimallo tam. ‘Ariattam makua ngamin nga uvovugan’ i napakaru nga “makapabbaw ira” nga kingngua ni Jehova yatutta mappabalo anna dayawattam yaya kada aggaw! (Sal. 40:5) Daddamman gapa nakuan ta pakimallo tam ‘danuri i presu ira tu kunna kasi-presu tam ira.’ Ipakimallo tam i interu mundo nga pawwaragi netallugaring “i darakal” tam. Magayaya i futu tam nu masingattam nu kunnasi tabbagan ni Jehova i nattaradday nga pakimallo tam!—Heb. 13:3, 7.

10. Sinni ira i aripan na Dios nga ari nga nakikompromiso, anna anni i namasikan nira tapenu makuada yatun?

¹⁰ Nitura ni apostol Pablo ta Hebreo kapitulo 11 i inattamman ira nga kapurueba na aru nga ari nengaganan nga aripan ira na Dios. Angngariganna, kinagina i matalo nga babbay nga natayan tu ána ngem napaginnolay gabbalaman. Kinagina gapa danuri “nanakitad-da i mapalubbangan; mas lallagu nikaya da i naziga-riga adde ta patay tapenu maginnolay ira ta mas mapia nga pattolay.” (Heb. 11:35) Maski ariattam masiguradu nu sinni i kinagi ni Pablo, egga ira i nabarag adde ta patay megafu ta pattuppal anna pagangngua ta uray na Dios kagitta da Nabot anna Zacarias. (1 Pat. 21:3, 15; 2 Cron. 24:20, 21) Manawag nga egga nakuan i oportunidad da Daniel anna kakavvuluna nga “mapalubbangan” nu nikompromisoda i integridadda. Ngem, megafu ta pattaloda ta pakapangngua na Dios, ‘nafufu i simu na leon ira’ anna ‘naddo i zumozzozzog ira nga afi.’—Heb. 11:33, 34; Dan. 3:16-18, 20, 28; 6:13, 16, 21-23.

11. Anni ira nga kapurueba i inattamman na profeta ira megafu ta pangurugda?

¹¹ Megafu ta pangurug, “noyoyaw . . . anna nefuku” da profeta Mikaias anna Jeremias. Karuan gapa nga gitta ni Elias ay “nallaka-lakag ira ta tana-tana anna kavukiran, anna nadjidian ira ta kueba anna darakal nga avvu ta davvun.” Nagattam ngamin ira megafu ta ‘pammakataloda ta gannug ira nga iddanamadda.’—Heb. 11:1, 36-38; 1 Pat. 18:13; 22:24-27; Jer. 20:1, 2; 28:10, 11; 32:2.

12. Sinni i nangipasingan tu kapianan nga ehemplo na pagattam ta kapurueba, anna anni i nakoffun sa?

¹² Kabalin na pakkagi ni Pablo ta nadduruma nga matalo nga lallaki anna babbay, nipasinganna i kapianan nga ehemplo ta ngamin—si Jesu-Cristo. “Megafu ta pagayaya nga maginnennag sa” kunna Hebreo 12:2, “inattamman na anna arian na nga ninonono i kappasiran nga kapapatay . . . Ay sangoye, agga-itubang ngana yaya ta ziwanan  na trono na Dios.” ‘Nonopattam’ i ehemplo na pangurug ni Jesus ta arubang na pinakamariga ira nga kapurueba. (Bibbigan i Hebreo 12:3.) Kagitta ni Jesus, i ollu Cristiano ira nga martir, gitta na disipulo nga si Antipas, ay nammanaki nga ikompromiso i integridadda. (Nep. 2:13) Egga i bala-baloda nga mapaginnolay ta langi—nga mas paga makasta anne ta ‘paginnolay ta mas mapia nga pattolay’ na matalo nga babbay anna lallaki gari. (Heb. 11:35) Kabalin na nikepataddag na Pappatulan turi 1914, napaginnolay ngamin i natay nga matalo nga nazelugan bilang espiritu ta langi tapenu mammaguray ta totolay kavulu ni Jesus.—Nep. 20:4.

13, 14. Anni ira nga kapurueba i naekspiriensa ni Rudolf Graichen, anna anni i nakoffun sa tapenu makapagattam?

¹³ Minillion ta moderno ira nga Saksi i tumuttuttul ta ehemplo ni Jesus gukaban na paffokus ta iddanamada anna ari pangipamavulun nga pakkafian na kapurueba ira i pangurugda. Innattam i ehemplo ni Rudolf Graichen, nga neyana ta Germany turi 1925. Neraddammanna i letratu ira na eksena na Biblia nga nakabesing ta libag na baleda. “Ipasingan na tadday nga letratu i simaron nga kitu anna i karneru, abbing nga kazzing  anna leopardo, uvvun nga baka anna leon—nga memammo ngamin, nga iyorollu na abbing. . . . Ariakku vuluvuga makattamman yatun.” (Isa. 11:6-9) Maski ta daga-ragun nga pameppersigi, ollu ta Nazi Gestapo tapus ta Communist Stasi na East Germany, napattalupaddian ni Rudolf i maladda nga pangurugna ta paraiso nga davvun.

¹⁴ Egga paga ira i mariga nga problema nga inarubang ni Rudolf. Natay i yenana megafu ta typhus ta kampo nga affukutan ta Ravensbrück, anna nasinganna i pakkafi na pangurug na yamana nga narresulta ta paffirmana ta dokumento nga makkagi nga ari ngana yaya nga Saksi ni Jehova. Kabalinna nga nallawan ta presu, egga i pribilehiona nga masserbi tu manangngal ta sirkito anna nembita ta Gilead School. Nadog yaya bilang misionero ta Chile tapenu masserbi mangana nga manangngal ta sirkito. Ngem ari nabalin tatun i problemana ira. Tanga ragun kabalinna atawan i kasi-misionerona nga si Patsy, natay i anada nga babay. Tapus natay ta edad laman nga 43 i meddu nga atawana. Inattamman ngamin yaw nga kapurueba ni Rudolf maski mallaka-lakay anna mattaka-taki yaya. Regular payunir anna elder ngana yaya turi ta nallawan i istoria na pattolena ta Agosto 1, 1997 nga isyu na Ang Bantayan, pahina 20-25. ^[1]

15. Sinni ira i ehemplo na magayaya nga nagattam maski ta pameppersigi?

¹⁵ Magayaya lagapa i Saksi ira ni Jehova ta iddanamada maski ta arubang na grabe anna tulu-tuloy nga pameppersigi. Angngariganna, aru ta wawwaragi tam ta Eritrea, Singapore, anna ta South Korea i nefuku, maruddu ta megafu ta tuttuttuladda i kinagi ni Jesus nga ari pangusa tu espada. (Mat. 26:52) Kavulu ta ginatu nga nefuku da Isaac, Negede, anna Paulos, nga maturu 20 dagun ngana nga nefuku ta Eritrea! Nattalupaddian nga matalo yaw nga wawwaragi maski ta grabe nga pammaltratu kagitta na kalsa na lallagureda nga mangatawa anna suportan i bako anna lakay nga maganada. Gittana masingan ta website nga jw.org, agga-galo lagapa ira, nga mamakurug nga napattalupaddian nga maladda i pangurugda. Maski i guardia ta presu irespetoda ira.

16. Kunnasi ka maprotektan na maladda nga pangurug?

¹⁶ Aru ta Saksi ira i ari nga neparubang ta grabe nga pameppersigi. Tanakuan gapa i kapurueba ta pangurugda. Aru i mapproblema ta finansial onu nazziga-riga megafu ta gerra sibil onu ta kalamidad ira. Sinuttul gapa na karuan i ehemplo da Abraham, Isaac, Jacob, anna Moises nga pinanawadda i kinariku anna kinaprominente ta mundo. Nilabanadda i materialistiko anna makasarili nga pattolay. Anni i nakoffun nira? I ayada kani Jehova anna i maladda nga pangurugda ta promesa nga alsanna ngamin i kawan tu hustisia anna bala-balakkanna i matalo ira nga aripanna tu mannanayun nga inango ta matunung nga napabagu nga mundo.—Bibbigan i Salmo 37:5, 7, 9, 29.

17. Anni i determinasiommu, anna anni i gigiammuan ta tumunug nga artikulo?

¹⁷ Taw nga artikulo, nasingattam nu kunnasi mapaladda i pangurug tam na regular nga pakimallo anna monag nga pannono ta promesa ira na Dios. Makoffun yatun tapenu makapagattam ta kapurueba ira na pangurug tam durante nga ‘mammakatalo’ ittam ta Cristiano nga iddanama tam. Ngem aru paga i nelagum ta pangurug segun ta Biblia, kagitta na masingan ta tumunug nga artikulo.