Gafu ta mas aru ngana i mallayyagayya, mas aru gapa i kawagan na wawwaragi nga literatura. Magimprenta i wawwaragi ta Brooklyn Bethel tu magazina ira, ngem danari hardbound nga libru ay ipeyimprenta da ta kumpania ira ta lawan. Tapus piga vulan bi nga ari nga makeyimprenta yatun ira nga kumpania tu makalanno nga libru nga meyusa ta ministerio. Yayya nga nikiddaw ni Brother Rutherford kani Robert Martin, i brother nga mangirollu ta factory, nu posible kari nga makeyimprenta ira tu sarili da ira nga libru.

“Kegganas yatun nga ideya,” istorian ni Brother Martin, “megafu ta kayà kagian natun nga mawag tu mavvuka kami tu bagu nga factory nu sitaw kumpleto i meyusa ira para ta typesetting, electroplating, printing, anna binding.” Narrenta i wawwaragi tu tadday nga building ta 18 Concord Street ta Brooklyn tapus ginatadda yari ira i mawag tu equipment.

Ari tu ngamin ay magayayya tatun nga papprogreso. Binisita na presidente nari na kumpania nga dati bi nga nagimprenta ta libru tam ira i bagu nga factory. Kunnaw i kinagi na: “First class ira i equipment nu ta pagimprenta tu libru, ngem awan mabba ta nikamu i makannammu nu kunnasi nga usan danatun. Annam nga vulan lang siguru, madaral ngana ngamin i equipment nu.”

“Gitta na kurug gapa yatun,” kagian ni Brother Martin, “ngem ari na gare ninono nga i Yafu i manguffun; kanayun nga uuffunan nakami.” Fustu si Brother Martin. Ari nabbayag, ma-2,000 ngana nga libru kada aggaw i meyimprenta tatun nga bagu nga factory.

Fuera paga ta pagimprenta na totolay ni Jehova ta karuan nga libru da, niyusa da gapa i bagu nga metodo na pangilayyagayya tu mapia nga dumug—i pab-broadcast ta radio. Turi ta Pebrero 26, 1922, Liggu na fugag, i ollollu nga pinabbida ni  Brother Rutherford ta radio. Nipalappa na i tema nga “Minillion nga Matolay Sangawe i Ari Ngana Vuluvuga Matay” ta istasion na radio nga KOG ta Los Angeles, California, U.S.A.

Mga 25,000 i nakaginna ta programa. Nattura i karuan ta nira tapenu mappabalo ta palappa ni Brother Rutherford. Tadday tatun ay naggafu kani Willard Ashford nga taga-Santa Ana, California. Nappabalo yayya kani Brother Rutherford megafu ta “kegganas anna makapa-interes” i palappa na. Niyammung na paga: “Ta familia mi, tallu i mataki yayya nga ari kami makapanaw ta balemi. Imposible nakuan nga maginna na maski sinni ta nikami i palappa mu maski paga nu ta tumunug nga kanto laman yatun. Mapia ngana laman ta egga ta radio yatun.”

Aru paga nga palappa i ne-broadcast ta tumunug ira nga ligguan. Turi ta mabalin ngana i dagun 1922, tinantia na The Watch Tower nga “maturu tu 300,000 nga totolay i nakalawa ta mensahe gukaban na wireless [onu radio].”

Napagaram i Estudiante ira na Biblia tatun ira nga tura anna komento da. Yari tu dinesisioda nga mamataddag tu istasion na radio ta tadday nga sular ta Staten Island nga aranni laman ta Brooklyn Bethel. Ta tumunug ira nga dagun, yatun nga istasion nga magalan tu WBBR i inusa na Estudiante ira na Biblia tapenu iwara i mensahe na Pappatulan ta aru nga totolay ta aru nga lugu-lugar.

Niyanunsio na Hunio 15, 1922 nga isyu na The Watch Tower nga egga saw i makua tu general convention ta Cedar Point, Ohio, mamegafu ta Setiembre 5 adde ta 13, 1922. Excited i Estudiante ira na Biblia turi ta zimittal ira ta Cedar Point.

Ta pangivuka nga palappa ni Brother Rutherford, kunnaw i kinagi na ta audience: “Daka-dakal i pattalo ku nga i Yafu ay . . . bendisionan na yaw nga kombension anna siguraduan na nga mas aru paga nga lugar i malayyagayyan taw ta davvun.” Namippiga nga nipagaram na ispiker ira tatun nga kombension nga mawag tu mallayyagayya i ngamin.

Tapus ta Biernes, Setiembre 8, mga 8,000 i nagatende ta auditorium. Aba-abangan na ngamin i palappa ni Brother Rutherford. Ekspektadda nga  iyesplika na i kebalinan na “ADV” nga neyimprenta ta imbitasiodda ira. Turi ta magitubang ngana ira, magga napansin na karuan i dakal nga rolyo na canvas ta utun na stage. Nabbiahe maggafu ta Tulsa, Oklahoma, U.S.A. si Arthur Claus tapenu umay tatun nga kombension. Makakkasta i nappuestuan na yatutta maginna na tu mapia i palappa. Mariga nga pasikannan i volume na boses megafu ta awan tu microphone onu loudspeaker ta venue.

Tapenu awan vuluvuga tu maka-istorbo ta programa, niyanunsio na tserman nga awan ngana tu mapamavulunan nga tullung ta auditorium nu mappalappa ngana si Brother Rutherford. Ta 9:30 na umma, pinegafuanan ni Brother Rutherford i palappa na gukaban na pangipakoli ta kinagi ira ni Jesus ta Mateo 4:17: “Aranni ngana i pappatulan na langi.” (King James Version) Kunnaw i pinangipakanawag na nu kunnasi noka mammuan na totolay yatun nga Pappatulan: “Si Jesus mismu i nangideklara nga ta tiempo na kegga na, magapit yayya tu totolena, nu kanni nga ammungan na danuri kurug anna matalo ira nga totolay.”

Kunnaw gapa i meraddamman ni Brother Claus nga agga-itubang ta main auditorium: “Maggigginna kami tu mapia anna awan tu kayà mi nga mapalampas.” Ngem gavva nga marake i panageno na, yari tu nallawan yayya ta auditorium. Manaki na nakuan i mallawan megafu ta ammu na nga baka ari da ngana saw yayya patallungan uli.

Nappasa i piga minuto, nappipia gabbalaman i panageno na. Istorian na nga turi ta manoli ngana yayya ta auditorium, nakaginna yayya tu masikan nga pappoppo. Fermi nga na-excite yayya tatun! Gafu ta aya na nga metuloy nga maginna i makakkasta nga palappa, nanono na nga okay laman ta nisa nga makkalaya ta ato. Tatun nga tiempo, si Brother Claus nga 23 anios pagalaman, ay nakaleg tu pakkalayatan na. Agga-vuka laman yari ira i bentana na auditorium. Turi ta minaranni yayya ta bentana ira, nakagi na nga kakkasta i pagginna na.

 Ngem ari laman tu si Arthur i nagangngua ta kunnatun. Egga gapa balo ta ato i karuan ta kokkofun na. Tadday tatun si Frank Johnson. Niyavu na kani Arthur, “Egga i pocket knife mu tatun?”

“Wan, egga,” kunni Arthur.

“Sikaw i tabbag ta pakimallo mi,” kunni Frank. “Masingammu yaw nga dakal nga rolyo na canvas? Banner yaw nga negalu taw ira nga pato. Ginnammu tu mapia si Judge. a Sonu kagian na nga ‘advertise, advertise,’ gappakkammu yaw nga appa nga galu.”

Agga-tammi ni Arthur i knife anna iinnaggadda na kofun na i signal sonu gappakkan na ngana i galu. Turi kua, nadde ngana ni Brother Rutherford i pinaka-importante nga parte na palappa na. Talaga excited si Brother Rutherford anna magaganassan yayya yari tu maggi nakkulle yayya ta pakkagi na: “Mabbalikkamu tu matalo anna kurug nga saksi ira para ta Yafu. Itulu-tuloy nu i pakillaban adde sonu madaral ngana i Babilonia. Ilayyagayya nu ta maski sitaw i mensahe. Mawag nga mammuan na mundo nga si Jehova i Dios anna si Jesu-Cristo i Patul na patul ira anna i Yafu na yafu ira. Yaw ngana i pinaka-importante nga aggaw ta ngamin. Mammaguray ngana i Patul! Responsibilidad nu nga ipakannammu yatun ta ngamin. Yatutta, ilayyagayya, ilayyagayya, ilayyagayya (advertise, advertise, advertise) i Patul anna i Pappatulan na!”

Inistoria ni Arthur nga kavulu i tanakuan nga wawwaragi, ginappo da i galu yari tu makakkasta i pinavvullag na banner. Mabibbig ta banner: “Advertise the King and Kingdom” (“Ilayyagayya i Patul Anna i Pappatulan”). I “ADV” ay abbreviation na “advertise.”

Nakoffun i kombension ta Cedar Point tapenu makapaffokus i wawwaragi ta importante nga trabahu na pangilayyagayya ta Pappatulan anna magayayya nga nakiparte danuri sigga-paran nga manguffun. Nitura na tadday nga colporteur (magalan ngana sangawe nga pioneer) maggafu ta Oklahoma, U.S.A., “Aru ta layyagayyammi i mattrabahu ta pamminan tu coal anna talaga poppobre ira.” Niyistoria na nga kada maginna na totolay i mensahe na Golden Age nga magazina, “maruddu nga tumangi ira.” Kinagi na, “Talaga bendision nga mabanna-bannayan ira.”

Natageno na Estudiante ira na Biblia i importansia na kinagi ni Jesus ta Lucas 10:2: “Aru i magatag ngem baddi i maggatag ira.” Ta kabalin na dagun, mas determinadu ira nga ilayyagayya i mensahe na Pappatulan ta mas aru paga nga lugar.